ཐའེ་ཝན་ས་གནས་ཁག་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་ཀྱིས་༸གོང་ས་མཆོག་གི་བྱམས་བརྩེའི་སྙིང་སྟོབས་རྒྱུན་འཁྱོངས་བྱས་ཏེ་བོད་དོན་ལ་རྒྱབ་སྐྱོར་དང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཡིན་འདུག
ཁ་སང་བོད་ཀྱི་མང་གཙོའི་དུས་དྲན་ཐེངས་ ༦༥ པ་དང་བསྟུན། ཐའེ་ཝན་གྱི་རྒྱལ་ས་ཐའེ་པེ་རུ། ཐའེ་ཝན་ས་གནས་ཁག་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་ཞེས་པ་ཞིག་གསར་དུ་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོའི་ཐོག་ཐའེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Wu Pei-Yi ལགས་དང་། ཐའེ་ཝན་སྐུ་ཚབ་དོན་གཅོད་འབའ་པ་སྐལ་བཟང་རྒྱལ་ལགས། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་དྲུང་ཆེ་བཀྲ་ཤིས་ཚེ་རིང་ལགས། ཐའེ་ཝན་ས་གནས་གྲོས་ཚོགས་འཐུས་མི་ ༡༤ ། འགྲོ་བ་མིའི་ཐོབ་ཐང་དང་འབྲེལ་བའི་གཞུང་ཁོངས་མིན་པའི་ཚོགས་པ་ཁག ས་གནས་བོད་དོན་རྒྱབ་སྐྱོར་ཚོགས་པ་བཅས་མཉམ་ཞུགས་གནང་ཡོད་འདུག དེ་བཞིན་སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དྲ་ལམ་བརྒྱུད་ནས་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་འགྲེལ་བརྗོད་དང་འབྲེལ། བོད་མི་ཡོངས་ཀྱིས་༧གོང་ས་མཆོག་གི་འཁྲུངས་སྐར་དང་བསྟུན་ནས་བྱམས་བརྩེའི་ལོ་སྲུང་གཙི་བྱེད་བཞིན་ཡོད་པས། ཐའེ་ཝན་ས་གནས་ཁག་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་ཀྱིས་༧གོང་ས་མཆོག་གི་བཀའ་དགོངས་བཞིན་བོད་དོན་ཐོག་མུ་མཐུད་དུ་རྒྱབ་སྐྱོར་གནང་སྐྱོང་ཡོང་སྐོར་གསུངས་འདུག
དེའི་སྐོར་ལ་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་དྲུང་ཆེ་བཀྲ་ཤིས་ཚེ་རིང་ལགས་ཀྱིས་འདི་གའི་གསར་འགོད་པར། བོད་དང་ཐའེ་ཝན་འགྲོ་བ་མིའི་ཐོབ་ཐང་ཁང་གིས་ཐའེ་ཝན་གྱི་ས་གནས་ཁག་ཏུ་ཕྱིན་ཏེ་ས་གནས་གྲོས་ཚོགས་འཐུས་མི་དང་མཉམ་དུ་ས་གནས་སུ་བོད་དོན་ལས་འགུལ་སྤེལ་ཕྱོགས་དང་། བོད་ནང་གི་ཛ་དྲག་གི་གནས་སྟངས། བཙན་བྱོལ་ནང་གི་བོད་དོན་འཐབ་རྩོད་ཀྱི་གནས་བབ་སོགས་ཐོག་བོད་དོན་ཞུ་གཏུགས་བྱས་པ་རེད། ང་ཚོས་ཐའེ་ཝན་ས་གནས་ཁག་གི་གྲོས་ཚོགས་དང་། མི་མང་། གཞོན་སྐྱེས་རྣམས་ལ་བོད་དོན་གོ་རྟོགས་ཆེད་དུ་དམིགས་ཏེ་ལས་གཞི་སྤེལ་བ་རེད། ད་ལྟའི་ཆར་ས་གནས་གྲོས་ཚོགས་འཐུས་མིའི་ཁྲོད་དུ་གཞོན་སྐྱེས་མང་པོ་ཞིག་གི་ཚོར་བ་རྣོ་བའི་ཐོག་ནས་བོད་དོན་ལ་རྒྱབ་སྐྱོར་བྱེད་ཀྱི་འདུག ཐེངས་འདིར་ཐའེ་ཝན་གྱི་གྲོང་ཁྱེར་ ༡༥ ཡི་ས་གནས་གྲོས་ཚོགས་འཐུས་མི་ ༤༠ ཙམ་གྱིས་མོས་མཐུན་ཐོག་དེབ་བསྐྱལ་བྱས་ཏེ་ཚོགས་པ་འདི་གསར་འཛུགས་གནང་ཐུབ་ཡོད། ཅེས་འགྲེལ་བརྗོད་གནང་བྱུང་།
ཐའེ་ཝན་ས་གནས་ཁག་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་ཀྱི་གསལ་བསྒྲགས་ཤིག་སྤེལ་ཡོད་པ་ནང་། ཐའེ་ཝན་གྱི་ས་གནས་ཁག་གི་གྲོས་ཚོགས་འཐུས་མི་རྣམས་ཀྱིས་འགྲོ་བ་མིའི་ཐོབ་ཐང་དང་། དམངས་གཙོ། རང་དབང་བཅས་ལ་བློ་སེམས་བརྟན་པོའི་ཐོག་ནས་ཐའེ་ཝན་ས་གནས་ཁག་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་ཞེས་པ་དབུ་འབྱེད་ཁྱབ་བསྒྲགས་བྱས་པ་ཡིན།
ང་ཚོས་བོོད་ནང་གདུག་རྩུབ་དང་མནར་གཅོད་མྱོང་བཞིན་པའི་བོད་མི་རྣམས་ལ་གདུང་སེམས་མཉམ་བསྐྱེད་བྱེད་ཀྱི་ཡོད་ཅིང་། རང་དབང་དང་། དམངས་གཙོ། འགྲོ་བ་མིའི་ཐོབ་ཐང་གི་འཐབ་རྩོད་ལ་རྒྱབ་སྐྱོར་བརྟན་པོ་བྱེད་ཀྱི་ཡོད། ང་ཚོས་འགྲོ་བ་མིའི་ཆེ་མཐོང་དང་རང་ཐག་རང་གཅོད་ཀྱི་ཐོབ་ཐང་ལ་བརྩི་བཀུར་བྱས་པའི་ཐོག་ནས་དོན་དངོས་ཀྱི་ཞི་བདེ་དང་དྲང་བདེན་ཞིག་ཐོབ་པར་ཡིད་ཆེས་བྱེད་ཀྱི་ཡོད།
ཐའེ་ཝན་མི་མང་གིས་༸གོང་ས་རྒྱལ་བ་རིན་པོ་ཆེ་མཆོག་ནས་མུ་མཐུད་མ་འོངས་བའི་འཛམ་གླིང་ཞི་བདེ་དང་བྱམས་བརྩེའི་ལམ་སྟོན་གནང་བའི་རེ་བ་བྱེད་བཞིན་ཡོད། ཕྱི་ལོ་ ༢༠༢༥ ཟླ་༧ ཚེས་༢ ཉིན་༧གོང་ས་མཆོག་ནས་རྒྱལ་དབང་སྐུ་ཕྲེང་བཅོ་ལྔ་བའི་ཕེབས་ངེས་ཡིན་པ་དང་། ཡང་སྲིད་ཀྱི་ལས་དོན་དགའ་ལྡན་ཕོ་བྲང་ཁོ་ནར་ཡོད་པའི་གསལ་བསྒྲགས་གནང་བར་དགའ་བསུ་ཞུ་རྒྱུ་ཡིན།དེ་ནི་རྒྱ་ནག་གཞུང་གིས་ཁྲིམས་འགལ་གྱིས་ཐེ་གཏོགས་བྱེད་ཐབས་ལ་ལན་འདེབས་གསལ་ཤོས་དང་ཤུགས་ཆེ་ཤོས་དེ་ཆགས་ཡོད།
ཕྱི་ཟླ་ ༧ ཚེས་ ༥ ཉིན་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་སྐབས་བཀའ་སློབ་སྩལ་བའི་ནང་། སྐུ་གཟུགས་གསལ་ཐང་ཡིན་པ་དང་། མི་མང་ལ་མུ་མཐུད་ཞབས་འདེགས་ཞུ་རྒྱུའི་འདོད་པ་ཡོད་ཅེས་གསུངས་པ་དེས་ང་ཚོ་ཡང་ཧ་ཅང་དགའ་ཚོར་ཆེན་པོ་བྱུང་། འདི་ནི་བོད་མི་ཡོངས་ཀྱི་བཀྲ་ཤིས་སྨོན་འདུན་ཡིན་པ་མ་ཟད། འཛམ་གླིང་ཡོངས་ཀྱི་དྲང་བདེན་དང་ཞི་བདེར་འབད་བརྩོན་བྱེད་མཁན་ཚང་མའི་རེ་བ་ཞིག་ཀྱང་ཡིན། ང་ཚོས་༧གོང་ས་མཆོག་གི་རང་དབང་དང་བྱམས་བརྩེའི་ཐུགས་འགན་ལ་རྒྱབ་སྐྱོར་བྱེད་པའི་ཡིད་ཆེས་བྱེད་ཀྱི་ཡོད།
ཐའེ་ཝན་ས་གནས་ཁག་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་ཀྱིས་༸གོང་ས་མཆོག་གིས་སློབ་སྟོན་གནང་བའི་བྱམས་བརྩེའི་སྙིང་སྟོབས་རྒྱུན་འཁྱོངས་བྱས་ཏེ་རྒྱལ་སྤྱིའི་ཚོགས་སྡེ་དང་མཉམ་དུ་བོད་དོན་ལ་རྒྱབ་སྐྱོར་དང་། འགྲོ་བ་མིའི་ཐོབ་ཐང་སྲུང་སྐྱོབ། རང་དབང་དང་དམངས་གཙོའི་ལམ་བུར་མཉམ་དུ་མདུན་སྐྱོད་བྱ་རྒྱུ་ཁས་ལེན་བྱས་ཡོད། ཅེས་བཀོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
