༸གོང་ས་མཆོག་གིས་ཚོགས་འདུའི་ཐོག་ཚང་མས་ལོ་རྒྱུས་ཀྱི་དོན་དངོས་གླེང་སྟེ་རྫུན་གཏམ་འཁྱོག་བཤད་རིགས་ཡོ་བསྲང་དང༌། བོད་དང་ཧི་མ་ལ་ཡའི་རི་རྒྱུད་ཆོས་རིག་གཅིག་གྱུར་གྱི་ལ་ཞེན་ཟབ་མོས་༸རྒྱལ་བསྟན་མི་རིགས་དང་བཅས་ནམ་ཡང་ཉམས་པ་མེད་པའི་ཞབས་འདེགས་ལ་བརྩོན་གལ་ཆེ་ཞེས་གསུངས།
དེ་རིང་ཕྱི་ཚེས་ ༣ ནས་ ༧ བར་ཉིན་གྲངས་ལྔའི་རིང་གངས་ཅན་སྐྱིད་གཤོངས་ཀྱི་སྲིད་སྐྱོང་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་དང་། ཏཱ་ལའི་བླ་མ་མཐོ་རིམ་སློབ་གཉེར་ཁང་། ས་རཱ་བོད་ཀྱི་མཐོ་རིམ་སློབ་གཉེར་ཁང་། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་བཅས་མཉམ་འབྲེལ་གྱི་གོ་སྒྲིག་འོག ༧རྒྱལ་བའི་གོ་སྟོན་སྲུང་གཙི་དང་འབྲེལ་ནས་བོད་དང་ཧི་མ་ལ་ཡའི་འབྲེལ་ལམ་སྐོར་གྱི་ཚོགས་ཆེན་དབུ་འཛུགས་གནང་སོང་།
ཚོགས་ཆེན་གྱི་དབུ་འབྱེད་མཛད་སྒོའི་སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་གཙོས། ཧི་མ་ལ་ཡའི་མཁས་དབང་། བོད་ཀྱི་ལོ་རྒྱུས་སྨྲ་བའི་མཁས་པ། ཉམས་ཞིབ་པ། ཚོགས་བཅར་བ་ ༨༠ དང་། མཐོ་སློབ་ཁག་ནས་སློབ་མ་ ༣༠ ཙམ་ཟུར་ཉན་དུ་ཆེད་བཅར་ཞུས་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ཞིག་བསྩལ་བའི་ནང་། ད་ལམ་བོད་ཀྱི་སྲིད་བྱུས་ཉམས་ཞིབ་ཁང་གིས་གཙོས་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་། སྨོན་ལམ་བརྡ་འཕྲིན་ཞིབ་འཇུག་ཁང་བཅས་ཐུན་མོང་ནས་དེང་སྐབས་བོད་ཀྱི་ཆོས་རིག་གཉན་འཕྲང་གི་དུས་སྐབས་ཏེ་ཕ་རོལ་ཕྱོགས་ནས་བོད་ཀྱི་ཆོས་དང་། སྐད་ཡིག་རིག་གཞུང་ལོ་རྒྱུས་སོགས་བོད་མི་རིགས་ཀྱི་ངོ་བོ་མཚོན་པའི་རྣམ་པ་མཐའ་དག་ཞི་དྲག་ཐབས་ལམ་སྣ་ཚོགས་ཀྱིས་རྨེག་མེད་བཟོས་དང་བཟོ་བཞིན་ཡོད་པའི་གནས་སྟངས་ལ་གཞིགས་ཏེ་འདི་གར་བོད་དང་ཧི་མ་ལ་ཡའི་འབྲེལ་ལམ་ཞེས་པའི་ཚོགས་ཆེན་གལ་ཆེ་ཞིག་གྲ་སྒྲིག་སྐོང་འཚོགས་བྱེད་བཞིན་ཡོད་པ་དེར་བོད་དང་རྒྱ་བལ་འབྲུག་གསུམ་ནས་བཙན་པོའི་གདུང་རྒྱུད་ཁྲི་ཆེན་དང་རྒྱལ་པོ། ཇོ་བོ་དང་ནོ་ནོ་སོགས་དང༌། བོད་དང་ཧི་མ་ལ་ཡའི་ས་ཁུལ་ནས་ཡིན་པའི་ལོ་རྒྱུས་མཁས་པ་བརྒྱ་ཕྲག་ཚོགས་ཞུགས་ཀྱིས་ཉིན་ལྔའི་རིང་བགྲོ་གླེང་གཏམ་བཤད་བྱ་རྒྱུ་ཤིན་ཏུ་ལེགས་པས་ཚང་མར་འཚམས་འདྲི་བཀྲ་ཤིས་བདེ་ལེགས་ཡོད། ཚོགས་འདུའི་ཐོག་ཚང་མས་ལོ་རྒྱུས་ཀྱི་དོན་དངོས་གླེང་སྟེ་རྫུན་གཏམ་འཁྱོག་བཤད་རིགས་ཡོ་བསྲང་དང༌། བོད་དང་ཧི་མ་ལ་ཡའི་རི་རྒྱུད་ཆོས་རིག་གཅིག་གྱུར་གྱི་ལ་ཞེན་ཟབ་མོས་༸རྒྱལ་བསྟན་མི་རིགས་དང་བཅས་ནམ་ཡང་ཉམས་པ་མེད་པའི་ཞབས་འདེགས་ལ་བརྩོན་གལ་ཆེ་བ་ཡིད་འཇགས་འཚལ། ཞེས་གསུངས་འདུག
བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཚོགས་འདུའི་ངོ་སྤྲོད་གསུང་བཤད་གནང་གྲུབ་མཚམས་སུ། སྲིད་སྐྱོང་སྤེན་པ་ཚེ་རིང་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གིས་གསུང་འཕྲིན་ཕེབས་པ་ནང་བཞིན་རྒྱ་ནག་གིས་བོད་ཀྱི་ལོ་རྒྱུས་ལ་འཁྱོག་བཤད་བྱེད་མུས་ཡིན་པ་དང་། དངོས་ཡོད་མ་ཡིན་པ་མང་པོ་ཞིག་འཛམ་བུ་གླིང་ནང་བསྒྲགས་ཀྱི་ཡོད། ལྷག་པར་དུ་བོད་དང་རྒྱ་ནག་གི་འབྲེལ་བ། བོད་དང་སོག་པོའི་འབྲེལ་བ། བོད་དང་ལི་ཡུལ་གྱི་འབྲེལ་བ། བོད་དང་རྒྱ་གར་གྱི་འབྲེལ་བ། བོད་དང་བལ་ཡུལ་གྱི་འབྲེལ་བ། བོད་དང་འབྲུག་གི་འབྲེལ་བ་སོགས་དེ་འདྲའི་གནས་སྟངས་མང་པོ་ཞིག་ལོ་རྒྱུས་ནང་ཡོད་པ་དེ་དག་གོ་རྒྱུ་མེད་པ་ཆགས་རྒྱུའི་ཉེན་ཁ་ཞིག་ཡོང་གི་ཡོད་པར་བརྟེན། དེ་རིང་གོ་སྟོན་དང་སྟབས་བསྟུན་ནས་སྲིད་བྱུས་ཉམས་ཞིབ་ཁང་དང་། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་། ཏཱ་ལའི་བླ་མ་མཐོ་རིམ་སློབ་གཉེར་ཁང་། ས་རཱ་བོད་ཀྱི་མཐོ་རིམ་སློབ་གཉེར་ཁང་བཅས་ཐུན་མོང་གི་ཐོག་ནས་ཚོགས་འདུ་འདི་གོ་སྒྲིག་ཞུས་ཡོད་པ་རེད། གནམ་གཤིས་རྐྱེན་གྱིས་ལ་ཧོར་སྤི་ཏི་ནས་ཚོགས་བཅར་བ་ཁག་ཅིག་ཕེབས་ཐུབ་མེད་པ་དང་། ཨ་རུ་ན་ཅལ་དང་། འབྲུག འབྲས་ལྗོངས། བལ་ཡུལ། ལ་དྭགས་སོགས་ཧི་མ་ལ་ཡའི་རི་རྒྱུད་ཡོངས་སུ་རྫོགས་པ་ནས་སྐུ་ཚབ་མང་པོ་ཞིག་དང་། ལ་ཧོར་སྤི་ཏི་ཁུལ་ནས་ལོ་རྒྱུས་ཐོག་ལ་དོ་སྣང་བྱེད་མཁན་སློབ་ཕྲུག་ ༣༠། བྱུང་རབས་ཀྱི་མཁས་པ་ཁག་ཅིག ལོ་རྒྱུས་ཀྱི་སློབ་དཔོན་སོགས་ཚོགས་འདུར་མཉམ་ཞུགས་གནང་ཡོད་འདུག་ལ། ཚོགས་ཆེན་འདིའི་ཐོག་ནས་བོད་དང་ཁྱིམ་མཚེས་རྒྱལ་ཁབ་རྒྱ་ནག་དང་སོག་པོ་ཙམ་མིན་པར་ལྷོ་ཕྱོགས་སུ་ཡོད་པའི་རྒྱ་གར་དང་འབྲེལ་བ་གང་ཡོད་པ་དེ་དག་གི་སྐོར་ལ་གོ་རྟོགས་གསལ་པོ་ཡོང་ཐུབ་རྒྱུའི་རེ་བ་རྒྱག་གི་ཡོད། ཅེས་གསུངས་བྱུང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་མཁས་དབང་མང་་པོ་ཕེབས་ཡོད་པའི་ཐོག གཙོ་བོ་ཧི་མ་ལ་ཡའི་ཁུལ་དུ་ལོ་རྒྱུས་ཀྱི་ཉམས་ཞིབ་བྱེད་མཁན་གནད་ཡོད་མང་པོ་ཞིག་ཚོགས་བཅར་གནང་ཐུབ་འདུག ཚོགས་འདུ་དེ་འདྲ་ཞིག་འདུ་སྐོང་བྱེད་པ་ཐེངས་དང་པོ་རེད་བསམ་གྱི་འདུག དེར་བརྟེན་ཚོགས་འདུ་འདི་འདྲ་ཞིག་འདུ་སྐོང་གནང་རྒྱུའི་ཐོག་མའི་ཀུན་སློང་དང་། བར་དུ་འབྲེལ་བ་བྱ་རྒྱུ། དངོས་སུ་དེ་རིང་འཚོག་ཐུབ་རྒྱུའི་གོ་སྐབས་དང་སྐལ་བ་བཟང་པོ་ཞིག་བྱུང་བར་ཚང་མ་ལ་ལེགས་གསོལ་དང་བསྔགས་བརྗོད་ཞུ་ཡི་ཡིན། བོད་ལྟ་བུ་མཚོན་ན་ལོ་རྒྱུས་ཀྱི་གནས་བབ་ཀྱི་ཐོག་ནས་བཙན་པོའི་རྒྱལ་རབས་དབུ་བརྙེས་ནས་ལོ་ཉིས་སྟོང་ལྷག་འགྲོ་ཡི་ཡོད་པ་རེད། དེ་བཞིན་དུས་རབས་བདུན་པ་སྲོང་བཙན་དང་། དུས་རབས་བརྒྱད་པ་ཁྲི་སྲོང་གི་དུས་སྐབས་སུ་བོད་ཀྱི་ཆབ་སྲིད་དང་རིག་གཞུང་། ཆོས་དེ་ཚོའི་ཐོག་ལ་ཁྱབ་ཆེན་པོ་ཡོོད་པ་ལོ་རྒྱུས་ཀྱི་གནས་བབ་ཐོག་ནས་ཞིབ་འཇུག་བྱེད་ཐུབ། འོན་ཀྱང་། ད་ལྟའི་དུས་སུ་བོད་ཟེར་བ་དེ་རྒྱ་ནག་གིས་དབང་སྒྱུར་འོག་ལ་གནས་ཡོད་པ་ཞིག་དང་། ༧གོང་ས་རྒྱལ་བ་རིན་པོ་ཆེ་མཆོག་དང་གནས་ཡུལ་རྒྱ་གར་ཡོངས་ཀྱི་མཐུན་འགྱུར་ལ་བརྟེན་ནས་བཙན་བྱོལ་དུ་གནས་དགོས་པའི་གནས་སྟངས་བྱུང་བ་རེད། རྩ་བའི་ལོ་རྒྱུས་ཀྱི་གནས་བབ་ཀྱི་ཐོག་ནས་བལྟས་ན། ཆབ་སྲིད་དང་ལོ་རྒྱུས་ཀྱི་འབྲེལ་བ་ཡོད་པའི་དངོས་པོ་གང་དང་གང་ཡིན་རུང་འགྱུར་བ་འགྲོ་རྒྱུའི་གནས་སྟངས་ཆགས་ཡོད། དེ་བཞིན་བོད་ཀྱི་ཆབ་སྲིད་ཀྱི་གནས་བབ་ཀྱི་ཐོག་ནས་ཀྱང་། སྐབས་དེ་དུས་འགན་ཁུར་མཁན་དང་འབྲེལ་ཡོད་ཚང་མས་དོ་སྣང་ཅུང་ཞན་དང་། འགན་ཁུར་བཞེས་སྟངས་ཀྱི་ཐོག་ནས་ཚགས་ཚུད་པོ་མ་བྱུང་བའི་གནས་སྟངས་ཀྱི་འོག་ནས་ང་ཚོ་བཙན་བྱོལ་དུ་གྱར་དགོས་པའི་གནས་སྟངས་ཆགས་པ་དེ་གསལ་རིས་མཐོང་གསལ་ཆགས་ཡོད། ཅེས་དང་། ཐེངས་འདིའི་ཚོགས་འདུའི་སྟེང་མཁས་དབང་མང་པོས་གསུང་བཤད་གནང་ནས་ལོ་རྒྱུས་ཀྱི་གནས་བབ་མི་འདྲ་བའི་ཉམས་ཞིབ་དང་། ལོ་རྒྱུས་བཤད་སྟངས་ཀྱི་ཐོག་ནས་ནམ་རྒྱུན་མ་གོ་བ་དང་མ་རྟོགས་པ་མང་པོ་ཡོད་པར་བརྟེན། དེ་དག་དངོས་སུ་གསལ་པོ་ཆགས་ཏེ་སྔར་ལས་ཉེ་པོ་ཡོང་ཐུབ་རྒྱུ་དང་། དོ་སྣང་ཡོང་ཐུབ་རྒྱུ། དེ་བཞིན་སོ་སོའི་ངོས་ནས་སེམས་ཤུགས་འཕར་མ་སྐྱེས་ཏེ་གཅིག་ཕན་གཅིག་གྲོགས་ཡོང་ཐུབ་རྒྱུའི་ས་བོན་ཆེན་པོ་ཆགས་ཀྱི་ཡོད་སྐོར་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
