རྒྱ་གར་གཞུང་གིས་རྒྱལ་ནང་གི་དཔལ་འབྱོར་འཕེལ་རྒྱས་རྒྱུན་སྐྱོང་ཆེད་ཐོན་རྫས་དང་ཞབས་ཞུའི་ཁྲལ་ལ་དེ་སྔོན་རིམ་པ་མི་འདྲ་བ་བཞི་ཡོད་པ་དེ་གསུམ་དུ་བཟོས་ནས་རྒྱས་སྤྲོས་ཀྱི་རིགས་དང་ལྷག་པར་དུ་མིའི་འཕྲོད་བསྟེན་དང་ཁོར་ཡུག་ལ་གནོད་སྐྱོན་ཆེ་བའི་རིགས་ཀྱི་ཐོན་རྫས་ལ་ཁྲལ་(GST)བརྒྱ་ཆ་ ༤༠ ལ་སྤར་འདུག
ཐོན་རྫས་དང་ཞབས་ཞུའི་ཁྲལ་བརྒྱ་ཆ་ ༤༠། པར་བོད་ཀྱི་དུས་བབ་གསར་ཁང་གིས་བསྒྲིགས།
སྤྱིར་རྒྱ་གར་གཞུང་གིས་ཕྱི་ལོ་ ༢༠༡༧ ལོར་གཏན་འབེབས་དང་ལག་བསྟར་བྱས་པའི་ཐོན་རྫས་དང་ཞབས་ཞུའི་ཁྲལ་(GST)སྤྲོད་ཕྱོགས་ལ་བརྒྱ་ཆ་ ༥ དང་། ༡༢། ༡༨། ༢༨ བཅས་རིམ་པ་བཞི་རུ་དབྱེ་ཡོད་ཀྱང་། ཟླ་འདིའི་ཕྱི་ཚེས་ ༣ ཉིན་རྒྱ་གར་དབུས་དཔལ་འབྱོར་ལས་ཁུངས་ཀྱིས་རྒྱ་གར་གྱི་ཐོན་རྫས་དང་ཞབས་ཞུའི་ཁྲལ་ལ་འགྱུར་བ་ཆེན་པོ་བཏང་སྟེ། ཁྲལ་འབབ་བརྒྱ་ཆ་ ༥ ཅན་དང་། བརྒྱ་ཆ་ ༡༨ ཅན། བརྒྱ་ཆ་ ༤༠ ཅན་བཅས་ཚན་པ་གསུམ་དུ་བསྡུས་ཡོད་ཅིང་། ཟླ་འདིའི་ཕྱི་ཚེས་ ༢༢ ཉིན་ནས་དངོས་སུ་རྒྱ་གར་རྒྱལ་ཡོངས་སུ་ལག་བསྟར་བྱ་རྒྱུ་ཡིན་འདུག དེ་ནི་མི་ལོ་བརྒྱད་འགོར་གྱི་ཁྲལ་བསྡུའི་འགྱུར་བ་དེས་རྒྱལ་ནང་གི་ཐོན་སྐྱེད་སྤྱིའི་རིན་ཐང་(GDP)འཕར་སྣོན་ཡོང་བར་ཕན་ཐོགས་ཆེན་པོ་ཡོང་བའི་རེ་བ་གནང་གི་ཡོད་འདུག
དེའི་ཐད་རྒྱ་གར་གྱི་སྲིད་བློན་སྐུ་ཞབས་མུ་དྷི་མཆོག་གིས། ད་ལན་རྒྱ་གར་ནང་ལག་བསྟར་བྱས་པའི་རྒྱ་གར་གྱི་ཐོན་རྫས་དང་ཞབས་ཞུ་ཡི་ཁྲལ་འབུལ་ཕྱོགས་ཐད་འགྱུར་བ་བཏང་བ་དེས། ཞིང་པ་དང་། རྒྱ་གར་གྱི་འབྱོར་འབྲིང་མི་མང་། བུད་མེད་དང་། གཞོན་སྐྱེས་རྣམས་ལ་ཁེ་ཕན་དང་། ཚོང་ལས་ཆུང་ཚགས་རིགས་གཉེར་བར་སྟབས་བདེ་བཟོས་ཡོད། ཅེས་གསུངས་འདུག
ཐོན་རྫས་དང་ཞབས་ཞུའི་ཁྲལ་བརྒྱ་ཆ་ ༡༨། པར་བོད་ཀྱི་དུས་བབ་གསར་ཁང་གིས་བསྒྲིགས།
དེ་སྔོན་ཕྱི་ལོ་ ༢༠༡༧ ལོར་གཏན་འབེབ་གནང་བའི་ཐོན་རྫས་དང་ཞབས་ཞུའི་ཁྲལ་འབབ་ནང་བརྒྱ་ཆ་ ༡༢ ཅན་རྣམས་བརྒྱ་ཆ་ ༥ ལ་ཕབ་ཡོད་ཅིང་། དེའི་ནང་ཞིང་ལས་ཐོན་སྐྱེད་རིགས་དང་། རྒྱུན་སྤྱོད་བཟའ་བཏུང་རིགས་དང་། སྨན་གྱི་རིགས། སྣོད་ཆས་སོགས་ཚུད་ཀྱང་། ཚྭ་རིགས་འདྲེས་པའི་མ་རྨོས་ལོ་ཏོག་བརྔོས་མའི་རིགས་དང་། འཕྲོད་བསྟེན་ལ་གནོད་པའི་ཕྱེའི་རིགས། དེ་བཞིན་མངར་ཁུའི་རིགས་སོགས་ལ་དེ་སྔོན་ཁྲལ་བརྒྱ་ཆ་ ༡༢ ཡིན་པ་ ༡༨ ལ་འཕར་ཡོད་འདུག
དེ་བཞིན་རྒྱ་གར་རྒྱལ་ཡོངས་ཀྱི་ཤུགས་ཚད་(CC1500)ལས་དམའ་བའི་རླངས་འཁོར་ཆུང་བའི་རིགས་དང་། སྦག་སྦག་ཤུགས་ཚད་(cc350)ལས་དམའ་བ། རྐང་གསུམ་འཁོར་ལོ། སྤྱི་སྤྱོད་རླངས་འཁོར། གཞན་རྒྱུན་སྤྱོད་ཅ་དངོས་གྲང་གློག་རིགས་དང་། བརྙན་འཕྲིན། ཨར་འདམ་བྱེ་མ་སོགས་དང་། ཧིན་སྒོར་ ༧༥༠༠ མན་གྱི་མགྲོན་ཁང་སོགས་ཀྱི་ཁྲལ་བརྒྱ་ཆ་ ༢༨ ནས་ ༡༨ ལ་མར་ཆག་ཡོད་འདུག ཡིན་ནའང་། རླངས་འཁོར་ཆེ་གྲས་དང་། སྒེར་སྤྱོད་གནམ་གྲུ། དེ་བཞིན་དུ་བ་དང་། ཆང་། མྱོས་རྫས་རིགས་སོགས་གཙོ་བོར་གྱུར་བའི་འཕྲོད་བསྟེན་དང་ཁོར་ཡུག་ལ་གནོད་པ་ཆེ་བའི་རྒྱས་སྤྲོས་རིགས་ཀྱི་བཟའ་བཏུང་དང་ཅ་དངོས་རིགས་ལ་ཁྲལ་བརྒྱ་ཆ་ ༢༨ ནས་ ༤༠ ལ་འཕར་ཡོད་འདུག
ཐོན་རྫས་དང་ཞབས་ཞུའི་ཁྲལ་བརྒྱ་ཆ་༥། པར་བོད་ཀྱི་དུས་བབ་གསར་ཁང་གིས་བསྒྲིགས།
བྷི་བྷི་སི་གསར་ཁང་ལྟར་ན། ཉེ་ལམ་ཨ་རིས་རྒྱ་གར་གྱིས་ཨུ་རུ་སུ་ནས་སྣུམ་ཉོ་ཚོང་ཤུགས་ཆེན་བྱེད་ཀྱི་ཡོད་ལུགས་བརྗོད་དེ་སྒོ་ཁྲལ་བརྒྱ་ཆ་ ༢༥ ཡི་སྒང་ལ། ཉེས་ཆད་སྒོ་ཁྲལ་བརྒྱ་ཆ་ ༢༥ བཅས་སྒོ་ཁྲལ་བརྒྱ་ཆ་ ༥༠ ལ་སྤར་ཡོད་སྟབས། རྒྱ་གར་གཞུང་གིས་རྒྱ་གར་ནང་གི་དཔལ་འབྱོར་གྱི་དཀའ་ངལ་སེལ་སླད་ད་ལན་ཁྲལ་གྱི་སྒྲོམ་གཞི་བསྐྱར་བཅོས་བྱས་སྐོར་གསལ་འདུག་ལ། གནད་དོན་དབྱེ་ཞིབ་པ་ཁག་གིས། རྒྱ་གར་གཞུང་གིས་ཞིང་ལས་ཐོན་སྐྱེད་དང་ཉེར་མཁོ་རིགས་ཀྱི་ཁྲལ་ཕབ་ནས་དཔལ་འབྱོར་ཉམས་ཉེས་འགྲོ་བར་གདོང་ལེན་དང་། ཨ་རི་དང་རྒྱ་གར་གཉིས་ཀྱི་ལོ་གཅིག་གི་ཚོང་འབྲེལ་དེ་ཨ་སྒོར་ཐེར་འབུམ་ ༣༥ ནས་ ༢༦ དུ་ཟགས་སྲིད་ཚོད་དཔག་ཀྱང་བྱེད་ཀྱིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
