བོད་པའི་སྤྱི་ཚོགས་ནང་དེབ་སྐྱེལ་བྱས་པའི་ཚོགས་པ་ཁག་ ༡༦༠ ནས་ ༡༧༠ བར་ཡོད་པ་རྣམས་ཀྱིས་གང་ཐུབ་ཀྱིས་རྒྱ་གར་གྱི་ཁྲིམས་ལྟར་ཕྱི་རྒྱལ་ནས་དངུལ་ལེན་ཆོག་པ་བཟོ་གལ་ཆེ་སྐོར་གསུངས་སོང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་པའི་ཚོང་པ་རྣམས་ཀྱིས་ཡུལ་ཁྲིམས་བརྩི་སྲུང་བྱ་རྒྱུ་གལ་ཆེན་ཡིན་པ་མ་ཟད་ཚོང་ལས་སྡེ་ཁག་དང་གཞུང་ཁོངས་མིན་པའི་ཚོགས་པ་ཁག་མུ་མཐུད་དུ་རྒྱུན་གནས་ཐུབ་པ་དང་རང་སྐྱ་འཕེར་བ་དགོས་གལ་ཆེ་སྐོར་གསུངས།

དེ་རིང་ཕྱི་ཚེས་ ༨ ཉིན་དྷ་ས་ས་གནས་མགོ་འཛིན་གྱི་ཚོགས་ཁང་དུ། བོད་མིའི་ཚོང་ལས་བདེ་ཚོགས་ཀྱི་གོ་སྒྲིག་འོག་ལོ་འཁོར་ཚོགས་ཆེན་སྐབས་བཅོ་བརྒྱད་པ་འཚོགས་ཡོད་ཅིང་། སྐབས་དེར་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕེབས་འདུག་ལ། ལྡི་ལི་དང་། བྷིར་ (Bir)། དྷ་ས། བལ་ཡུལ་བཅས་ནས་ཚོགས་མི་ ༦༠ ལྷག་མཉམ་ཞུགས་གནང་འདུག

འདི་གའི་གསར་འགོད་པས་བོད་མིིའི་ཚོང་ལས་བདེ་ཚོགས་ཀྱི་ཚོགས་གཙོ་འཕྲིན་ལས་ནོར་བུ་ལགས་སུ་བོད་པའི་ཚོང་པ་ཚོར་དཀའ་ངལ་ག་རེ་འཕྲད་ཀྱི་ཡོད་མེད་དྲིས་པར་ཁོང་གིས། དེ་སྔ་ཚོང་པ་ཚོར་་དེབ་སྐྱེལ་ཡིག་ཆ་ཚད་ལྡན་མེད་པའི་རྐྱེན་གྱིས་དཀའ་ངལ་འཕྲད་ཡོད་ཀྱང་། ཕྱིས་སུ་བོད་མིའི་སྒྲིག་འཛུགས་ཀྱིས་རྒྱ་གར་གཞུང་ལ་འབྲེལ་བ་བྱས་ཏེ་བོད་པའི་ཚོང་ལས་ཀྱི་དཀའ་ངལ་སེལ་ཐབས་བྱས་པ་སོགས་ལ་བརྟེན་ནས་བོད་པར་དཀའ་ངལ་མི་འདུག དཔལ་འབྱོར་འདུ་འགོད་སླད་ལས་གཞི་ལས་འཆར་འདྲ་མིན་སྤེལ་དང་སྤེལ་མུས་ཡིན་ལ། ཉེ་ཆར་བོད་ཀྱི་ཐེབས་རྩའི་མཐུ་འགྱུར་འོག བོད་པའི་ཚོང་པ་གསར་པ་ལྔ་ལ་འབུམ་གསུམ་རེ་ཕུལ་ཡོད། མ་འོངས་པར་དཔལ་འབྱོར་འདུ་འགོད་ཇི་ལྟར་བྱེད་དགོས་མིན་ཐད་གླེང་སློང་དང་། བོད་པའི་ཚོང་པ་ཚོར་དཔལ་འབྱོར་གྱི་དཀའ་ངལ་འཕྲད་སྐབས་སྐྱེད་ཀ་ཉུང་བའི་ཐོག་བུ་ལོན་གཡར་རྒྱུ་དང་། རོགས་རམ་བྱ་འཆར་ཡོད། དྷ་སར་ལྷ་ཚོགས་པ་དང་ (Yes+) སོགས་ཀྱིས་འཚིག་ཇ་བཟོ་རྒྱུ་སོགས་སྩལ་འདྲ་མིན་སློབ་ཀྱི་ཡོད་ཀྱང་། ཚོང་ལས་ཀྱི་གོ་རྟོགས་མེད་པ་རེད། དེར་བརྟེན་ཚོང་ལས་མགོ་འཛུགས་པར་ལམ་སྟོན་དང་རོགས་རམ་ཡོང་ཆེད་ (Incubation Centre) གསར་འཛུགས་བྱ་འཆར་ཡོད། ཅེས་སོགས་བརྗོད་བྱུང་།

ཚོགས་ཐོག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་འདི་ལོ་རྟག་པར་ཚོགས་དགོས་ཀྱི་ཡོད་པའི་ཆ་རྐྱེན་ཚང་དགོས་པ་དང་། ད་ལྟའི་བཀའ་ཤག་གིས་མ་འོངས་པར་ཚོང་ལས་སྡེ་ཚན་གཅིག་པོ་མིན་པར་སྤྱི་ཡོངས་ནས་བོད་མིའི་སྒྲིག་འཛུགས་ཤིག་རྒྱུན་གནས་ཡོང་བར་གནས་ཡུལ་གཞུང་གི་ཁྲིམས་དང་སྒྲིག་གཞི་དེ་དག་སྲུང་གཙི་ལེགས་པོ་ཞུ་དགོས་པ་རེད། གཞུང་འབྲེལ་གྱི་ཐོག་ནས་ཀྱང་སྐབས་རེར་འཐུས་ཤོར་འགྲོ་བའི་གནས་སྟངས་ཡོང་གི་ཡོད་ལ། གཞུང་ཁོངས་མ་ཡིན་པའི་དགོན་སྡེ་ཁག་དང་། སྒེར་གྱི་ཚོགས་པ་ཁག་གིས་རྒྱ་གར་གཞུང་གི་ཁྲིམས་དང་ཏག་ཏག་མཐུན་མི་ཐུབ་པའི་རྐྱེན་གྱིས་དེབ་སྐྱེལ་གྱི་ལག་ཁྱེར་ཤོར་བ་དང་། ལྷག་པར་དུ་ཕྱི་རྒྱལ་རོགས་དངུལ་སྤྲོད་མཁན་ཡོད་ཀྱང་རོགས་དངུལ་ལེན་སའི་དེབ་སྐྱེལ་གྱི་ཆ་རྐྱེན་ཚད་ལྡན་ཚང་མེད་ཚེ་བྱ་རྒྱུ་གང་ཡང་མི་འདུག དེར་བརྟེན་དེབ་སྐྱེལ་བྱས་པའི་སྒྲིག་འཛུགས་ཁག་དང་། དེབ་སྐྱེལ་བྱས་པའི་ཚོང་ལས་སྡེ་ཚན་ཁག་གིས་གནས་ཡུལ་གཞུང་གི་ཡུལ་ཁྲིམས་དང་མཐུན་པ་ཞིག་གནང་དགོས་པ་རེད།  ཅེས་གསུངས་སོང་།

ཡང་སྲིད་སྐྱོང་མཆོག་གིས། དེང་སང་དེེབ་སྐྱེལ་བྱས་པའི་སྒྲིག་འཛུགས་མང་པོ་ཞིག་ལ་དཀའ་ངལ་མང་པོ་འཕྲད་པ་དང་། བསྐྱར་ཞིབ་བྱེད་དགོས་པ་མང་པོ་ཡོད་པ་རེད། ད་དུང་རྒྱ་གར་གཞུང་གི་ཁྲིམས་དེ་ལ་བསྐྱར་བཅོས་དང་འགྱུར་བ་མང་པོ་ཞིག་འགྲོ་ཡི་ཡོད་པས། བོད་མིའི་སྒྲིག་འཛུགས་ཀྱི་ངོས་ནས་ད་ལོར་ཚོང་ལས་སྡེ་ཚན་ལ་(FCRA)ཡི་སྐོར་དང་། (Trust)དང་(Society) སོགས་ལ་དེབ་སྐྱེལ་བྱས་པ་རྣམས་ལ་རྒྱ་གར་གཞུང་གི་འབྲེལ་ཡོད་ལས་ཁུངས་ཀྱིས་ཟབ་སྦྱོང་སྤྲོད་འཆར་ཡོད་ལ། བོད་པའི་སྤྱི་ཚོགས་ནང་དེབ་སྐྱེལ་བྱས་པའི་ཚོགས་པ་ཁག་ ༡༦༠ ནས་ ༡༧༠ དབར་ཡོད་པའི་ནང་ནས་ཕྱེད་ཀ་ཞིག་ལ་རྒྱ་གར་གྱི་ཁྲིམས་གཞིར་བཟུང་གིས་ཕྱི་རྒྱལ་ནས་དངུལ་ལེན་ཆོག་པ་ངེས་པར་དུ་བཟོ་དགོས་ཀྱི་འདུག ང་ཚོའི་ངོས་ནས་ག་ཚོད་ཐུབ་ཐུབ་ཀྱིས་ཁྲལ་རྒྱག་དགོས་པ་དེ་དག་ཁྲིམས་དང་སྒྲིག་གཞི་གཞིར་བཟུང་གིས་འགྲོ་ཐུབ་པ་ཞིག་དགོས་གལ་ཆེ་བ་དང་། གཞུང་ཁོངས་མིན་པའི་ཚོགས་པ་ཁག་གིས་བོད་མིའི་སྒྲིག་འཛུགས་ཁོ་ནར་བརྟེན་མི་དགོས་པར་སོ་སོ་རང་སྐྱ་འཕེར་བ་བྱེད་དགོས་གལ་ཆེ་ལ། ཚོང་ལས་སྡེ་ཁག་དང་ཚོགས་པ་ཁག་མུ་མཐུད་དུ་རྒྱུན་གནས་ཐུབ་པ་བྱ་རྒྱུ་གལ་ཆེན་པོ་ཡིན་པ་མ་ཟད། མ་འོངས་པར་ཚོང་ལས་སྡེ་ཁག་གི་ངོས་ནས་བོད་པའི་སྤྱི་ཚོགས་ལ་ཞབས་ཕྱི་ཞུ་རྒྱུ་དང་རོགས་རམ་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།