རྒྱ་ནག་རྒྱལ་ཡོངས་སྐབས་གཉིས་པའི་དོམ་སེར་གློག་བརྙན་གཟེངས་རྟགས་ནང་བོད་ཀྱི་གློག་བརྙན་གསའ་ལ་གློག་བརྙན་རྩེ་གྲས་དང་། འཁྲབ་ཁྲིད་པ་རྩེ་གྲས། འཁྲབ་རོགས་རྩེ་གྲས། རོལ་དབྱངས་རྩེ་གྲས་བཅས་ཀྱི་བྱ་དགའི་མིང་འདོན་གནང་འདུག
ཟླ་འདིའི་ཕྱི་ཚེས་ ༡༢ ནས་ཉིན་གྲངས་གཉིས་རིང་རྒྱ་ནག་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་དུ། རྒྱ་ནག་གི་སྐབས་གཉིས་པའི་དོམ་སེར་གློག་བརྙན་གཟེངས་རྟགས་མཛད་སྒོ་འཚོགས་གཏན་ཁེལ་ཡོད་ཅིང་། ཐེངས་འདིའི་དུས་སྟོན་ཐོག་རྒྱལ་ཁབ་དང་ས་གནས་ ༡༢༦ ཡི་གློག་བརྙན་བརྩམས་ཆོས་མི་འདྲ་བ་ ༥༣༤༣ མཉམ་ཞུགས་བྱས་ཡོད་པའི་ནང་ནས་གློག་བརྙན་བརྩམས་ཆོས་ ༡༢༥ བདམས་ཡོད་པ་དང་། དེའི་ནང་གློག་བརྙན་དང་། བརྙན་འཕྲིན་ཟློས་གར། དངོས་བཤུས་གློག་བརྙན། འགུལ་རིས་བཅས་ཀྱི་བརྩམས་ཆོས་རྩེ་ཕུད་གྲངས་ ༢༧ ལ་བྱ་དགའ་སྤྲོད་རྒྱུ་ཡིན་པ་ལྟར། བོད་ཀྱི་གློག་བརྙན་གསའ་ལ་གློག་བརྙན་རྩེ་གྲས་དང་། འདས་པོ་པདྨ་ཚེ་བརྟན་ལགས་ལ་འཁྲབ་ཁྲིད་པ་རྩེ་གྲས། ཚེ་བརྟན་བཀྲ་ཤིས་ལགས་ལ་འཁྲབ་རོགས་རྩེ་གྲས། གདུགས་དཀར་ཚེ་རིང་ལགས་ལ་རོལ་དབྱངས་རྩེ་གྲས་བཅས་མིང་འདོན་གནང་ཡོད་འདུག
བོད་ཀྱི་གློག་བརྙན་གསའ་ནི་གློག་བརྙན་འཁྲབ་ཁྲིད་པ་དམ་པ་པདྨ་ཚེ་བརྟན་ལགས་ཀྱི་བོད་སྐད་གློག་བརྙན་བརྒྱད་པ་དེ་ཡིན་ཞིང་། བརྩམས་ཆོས་དེ་ཕྱི་ལོ་ ༢༠༢༠ ལོའི་རིམས་ནད་ཀྱི་སྐབས་སུ་འབྲི་མགོ་བཙུགས་ཤིང་། ཕྱི་ལོ་ ༢༠༢༡ ལོའི་ཟླ་ ༡༠ པ་ནས་བཟུང་ཕབ་སྐྲུན་བྱེད་མགོ་བཙུགས་ཡོད་འདུག གློག་བརྙན་འདིའི་ནང་མི་དང་སྲོག་ཆགས་གཉིས་ཇི་ལྟར་མཉམ་དུ་འཚོ་སྡོད་བྱེད་པའི་སྐོར་གྱི་གཏམ་རྒྱུད་བཤད་ཡོད་པ་དང་། གློག་བརྙན་ཕབ་སྐྲུན་བྱ་ཡུལ་ནི་རི་དྭགས་གསའ་རྒྱུན་དུ་འཚོ་སྡོད་བྱ་སའི་ཡུལ་དངོས་ཏེ། མགོ་ལོག་རྨ་སྟོད་ཀྱི་སྟོང་རི་མཚོ་རྒན་ཉེ་འདབས་ནས་ཕབ་སྐྲུན་བྱས་པ་ཞིག་ཡིན་འདུག གློག་བརྙན་འདིའི་ནང་དུ་བོད་ཀྱི་གློག་བརྙན་འཁྲབ་སྟོན་པ་སྦྱིན་པ་དང་ཚེ་བརྟན་བཀྲ་ཤིས། ཞོང་ཙི་ཆིས་བཅས་ཀྱིས་གཙོ་འཁྲབ་གནང་ཡོད་འདུག་
འདི་ལོའི་ཕྱི་ཟླ་ ༥ ཚེས་ ༢༣ ནས་ཕྱི་ཟླ་ ༦ ཚེས་ ༥ བར་ཐའེ་པེ་རྩོམ་རིག་དུས་སྟོན་ཐོག་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་དམ་པ་པདྨ་ཚེ་བརྟན་ལགས་ཀྱི་གློག་བརྙན་བརྩམས་ཆོས་ཁག་ཅིག་བསྟན་ཡོད་པ་དང་། ཕྱི་ལོ་ ༢༠༢༤ ཟླ་ ༣ ཚེས་ ༡༠ ཉིན་ཨེ་ཤ་ཡའི་གློག་བརྙན་གཟེངས་རྟགས་ཆེན་མོའི་ཐོག་བོད་ཀྱི་གློག་བརྙན་གསའ་ལ་གློག་བརྙན་འཁྲབ་གཞུང་རྩེ་གྲས་དང་བརྙན་ལེན་རྩེ་གྲས་ཀྱི་བྱ་དགའ་ཐོབ་ཡོད་ཅིང་། ཕྱི་ལོ་ ༢༠༢༤ ཟླ་ ༢ པའི་ནང་ཧྥ་རན་སི་ཝེ་སོལ་ཨེ་ཤེ་ཡའི་རྒྱལ་སྤྱིའི་གློག་བརྙན་དུས་སྟོན་ (Vesoul International Film Festival of Asian Cinema) ཐེངས་ ༣༠ པའི་སྟེང་གློག་བརྙན་རྩེ་གྲས་ཀྱི་བྱ་དགའ་ཐོབ། ཕྱི་ལོ་ ༢༠༢༣ ཟླ་ ༡༢ ནང་རྒྱ་ནག་ཧའེ་ནན་གླིང་ཕྲན་རྒྱལ་སྤྱིའི་གློག་བརྙན་དུས་སྟོན་ཐེངས་ལྔ་པའི་སྟེང་གློག་བརྙན་འཁྲབ་ཁྲིད་པ་རྩེ་གྲས་ཀྱི་གསེར་གྱི་བྱ་དགའ་ཐོབ། ལོ་དེའི་ཕྱི་ཟླ་ ༡༡ ཚེས་ ༡ ཉིན་ཊོག་ཡོའི་གློག་བརྙན་དུས་སྟོན་ཐེངས་ ༣༦ པའི་ (The 36th Tokyo International Film Festival) སྟེང་གློག་བརྙན་རྩེ་གྲས་ཀྱི་བྱ་དགའ་ཐོབ། དེ་བཞིན་ཕྱི་ལོ་ ༢༠༢༣ ལོའི་ཟླ་ ༧ ཚེས་ ༢༥ ཉིན་ཨེ་ཊ་ལི་རྒྱལ་ཁབ་ཀྱི་ལི་ཌོ་(Lido) གླིང་ཕྲན་དུ། རྒྱལ་སྤྱིའི་གློག་བརྙན་བཟོ་སྐྲུན་མཐུན་ཚོགས་ (International Federation of Film Producers Association) ཀྱིས་གོ་སྒྲིག་བྱས་པའི་སྐབས་ ༨༠ པའི་ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་ (80th Venice International Film Festival) སྟེང་གཟིགས་འབུལ་ཞུས་ཡོད་འདུག
བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་དམ་པ་་པདྨ་ཚེ་བརྟན་ལགས་ནི་ཕྱི་ལོ་ ༡༩༦༩ ལོར་མདོ་སྨད་ཁྲི་ཀ་ནས་སྐྱེས་ཤིང་། གློག་བརྙན་འཁྲབ་ཁྲིད་པ་དང་། རྩོམ་པ་པོ། ལོ་ཙཱ་བ་བཅས་ཡིན་ལ། ཕྱི་ལོ་ ༢༠༠༢ ལོར་པེ་ཅིན་གློག་བརྙན་སློབ་གླིང་དུ་གློག་བརྙན་སྐོར་ལ་ཆེད་སྦྱོང་གནང་རྗེས། འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་བཅས་ཀྱི་ལས་ཀ་གཅིག་ལྕོགས་སུ་གནང་། ཁོང་གིས་ལྷིང་འཇགས་ཀྱི་མ་ཎི་རྡོ་འབུམ་དང་། འཚོལ། ཁྱི་རྒན། གཡང་མདའ། ཐར་ལོ་སོགས་གློག་བརྙན་རིགས་ ༡༤ ལྷག་འཁྲབ་འཁྲིད་གནང་སྟེ་བོད་ཕྱི་ནང་གཉིས་ནས་དགའ་བསུ་ཆེན་པོ་ཐོབ་ཡོད་པ་མ་ཟད། རྒྱལ་སྤྱིའི་གློག་བརྙན་དུས་སྟོན་ཆེ་ཁག་ནས་གཟེངས་རྟགས་ཁག་ཅིག་ཀྱང་ཐོབ་སྟེ། བོད་པ་རང་གིས་བཟོས་པའི་གློག་བརྙན་གྱིས་རྒྱལ་སྤྱིའི་སྐད་གྲགས་ཅན་གྱི་གློག་བརྙན་ཁྲོམ་རའི་ནང་གོམ་པ་དང་པོ་སྤོས་ཡོད་པ་རེད། དེ་བཞིན་ཁོང་གི་གློག་བརྙན་ཐར་ལོ་དང་ཁྱི་རྒན། ལག་དམར། དབུགས་ལྒང་བཅས་ལ་རྒྱལ་སྤྱིའི་ཝཱ་ནེ་སི་ (Venice) དང་། ཨ་རིའི་བྷིར་ཀི་ལིན་ (Brooklyn)། ཐའེ་ཝན་དང་རྒྱ་ནག་གི་གློག་བརྙན་དུས་སྟོན་སོགས་ཀྱི་ཐོག་གཟེངས་རྟགས་བྱ་དགའ་ཐོབ་སྟེ། རྒྱལ་སྤྱིའི་སྟེང་པདྨ་ཚེ་བརྟན་ལགས་ནི་བོད་ཀྱི་གློག་བརྙན་འཁྲབ་འཁྲིད་པའི་ཚབ་མཚོན་མི་སྣ་ལྟ་བུར་གྱུར་ཡོད་ལ། ཁོང་གི་གློག་བརྙན་གྲགས་ཅན་ཐར་ལོ་ལ་རྒྱ་ནག་དང་རྒྱལ་སྤྱིའི་གཟེངས་རྟགས་མི་འདྲ་བ་ ༡༢ ཐོབ་ཡོད་འདུག ཡིད་སྐྱོ་བ་ཞིག་ལ་ཕྱི་ལོ་ ༢༠༢༣ ཟླ་ ༥ ཚེས་ ༨ ཉིན་གྱི་དགོང་མོར་བོད་ཀྱི་རྒྱལ་ས་ལྷ་སར་གློ་བུར་དུ་སྐུ་གྲོངས་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
