༸སྐུའི་གོ་སྟོན་དང་བསྟུན་བདེ་སྲུང་ལས་ཁུངས་ཀྱིས་ཆུ་བཞི་སྒང་དྲུག་བསྟན་སྲུང་དང་བླངས་དམག་མི་ཟུར་བ་དང་། གློ་སྒྲིག་འཛུགས་སོགས་ཆོལ་གསུམ་དཔའ་བོ་དཔའ་མོ་མཉམ་འཛོམས་ཀྱི་ཚོགས་འདུ་ཞིག་སྐོང་ཚོགས་གནང་རྒྱུ་ཡིན་འདུག
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་བདུན་པའི་སྐབས། བོད་མིའི་སྒྲིག་བདེ་སྲུང་ལས་ཁུངས་ཀྱི་ཕྱི་ལོ་ ༢༠༢༤ ཟླ་ ༤ ཚེས ༡ ནས་ཕྱི་ལོ་ ༢༠༢༥ ཟླ་ ༣ ཚེས་ ༣༡ བར་གྱི་ལོ་འཁོར་ལས་སྡོམ་སྙིང་བསྡུས་ཀྱི་ཐད་བགྲོ་གླེང་དང་དྲི་བ་དྲི་ལན་སྐབས། བོད་ནང་གཉེན་འཕྲད་དུ་སྐྱོད་མཁན་རྣམས་ལ་ལམ་སྟོན་དང་། དེ་བཞིན་འདི་ལོར་༸སྐུའི་གོ་སྟོན་སྲུང་གཙིའི་ཆ་ཤས་སུ་བོད་ཀྱི་དཔའ་བོ་དཔའ་མོའི་ལྷན་འཛོམས་ཤིག་ཀྱང་འཚོག་འཆར་ཡོད་པའི་མུར། ཚོགས་འདུའི་སྐུ་མགྲོན་གཙོ་བོར་ཨ་འབྲུག་མགོན་པོ་བཀྲ་ཤིས་ཀྱི་བུ་དང་། ལྷ་སྲས་རྒྱ་ལོ་དོན་འགྲུབ་ཀྱི་བུ་གཉིས་མགྲོན་འབོད་གནང་རྒྱུ་ཡིན་འདུག
བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེང་སང་ཕྱི་རྒྱལ་གྱི་བོད་པ་ཁག་ཅིག་བོད་ནང་གཉེན་འཕྲད་དུ་འགྲོ་མཁན་ཆགས་ཡོད། ཁ་ཤས་ལོ་མང་པོའི་རིང་ནང་མི་དང་ཁ་བྲལ་བའི་གནས་སྟངས་ཐོག་འགྲོ་བའི་གོ་སྐབས་བྱུང་ཡོད་ལ། དེའི་ཁྲོད་ཀྱི་ཁ་ཤས་ཤིག་གིས་གོ་སྐབས་དེ་བེད་སྤྱོད་ལོག་པར་གཏོང་བཞིན་པ་ཤིག་ཆགས་ཡོད། དེའི་ཐོག་འབྲེལ་ཡོད་དོན་གཅོད་ལས་ཁུངས་དང་ཕྱི་དྲིལ་ལས་ཁུངས་ཀྱིས་དོ་སྣང་བྱེད་བཞིན་ཡོད། སྔོན་མའི་གྲོས་ཚོགས་སྐབས་སུ་སྙན་སེང་ཞུས་པ་བཞིན་ཕྱི་དྲིལ་བཀའ་བློན་དང་བདེ་སྲུང་བཀའ་བློན་སོགས་འབྲེལ་ཡོད་ལས་བྱེད་རྣམས་མཉམ་འཛོམས་ཐོག བོད་ནང་གཉེན་འཕྲད་འགྲོ་ཕྱོགས་ཀྱི་ལམ་སྟོན་རགས་ཟིན་ཞིག་བཀའ་ཤག་ལ་ཕུལ་ཡོད་པ་དང་། བཀའ་ཤག་གིས་བཀའ་འཁྲོལ་ཐོབ་སྟེ་ས་གནས་མགོ་འཛིན་ལས་ཁུངས་དང་ས་གནས་དོན་གཅོད་ལས་ཁུངས་ཁག་ཏུ་ཕུལ་ཟིན། ལམ་སྟོོན་དེས་ནུས་པ་གང་འདྲ་ཐོན་ཡོད་མེད་བཤད་ཚོད་ཁག་པོ་རེད། བཀོད་ཁྱབ་བཏང་རྗེས་བཀའ་ཤག་གིས་ལམ་སྟོན་དེ་ལག་བསྟར་འགྲོ་ཡི་ཡོད་མེད་ཐོག་བགྲོ་གླེང་བྱུང་། དེ་བཞིན་ས་གནས་ཁག་ཏུ་ཐེངས་མང་པོར་དེའི་སྐོར་ལ་མུ་མཐུད་དུ་ཞུ་དགོས་པ་བཤད་ཡོད། ད་ལན་རྒྱ་གར་དང་ཕྱི་རྒྱལ་གྱི་སྤྱི་འཐུས་རྣམ་པ་འདིར་འཛོམས་ཡོད་པར་བསྟུན། བཀའ་ཤག་གི་བཀོད་ཁྱབ་དེ་ཚོགས་དྲུང་ལས་ཁུངས་སུ་ཕུལ་ཡོད་ཀྱང་། སང་ཉིན་འདྲ་བཤུས་གྲངས་ ༤༥ བཟོས་ཏེ་སྤྱི་འཐུས་སོ་སོར་ཕུལ་རྒྱུ་ཡིན། སྤྱི་འཐུས་རྣམ་པས་འབྲེལ་བ་ཡོད་སའི་ས་གནས་དང་སྤྱི་ཚོགས་ཁྲོད་དུ་ཐུགས་འགན་བཞེས་རོགས་ཞུ་རྒྱུ་ཡིན། ཞེས་གསུངས་སོང་།
ཡང་ཁོང་མོས། དེ་བཞིན་བརྒྱུད་ལམ་འདི་བརྒྱུད་ནས་བོད་ནང་དུ་གཉེན་འཕྲད་དུ་མ་ཕེབས་ཞུ་ཐུབ་ཀྱི་མ་རེད། ཡིན་ནའང་རྒྱ་ནག་གུང་ཁྲན་ཏང་གི་བེད་སྤྱོད་ཀྱི་ལག་ཆར་མ་འགྱུར་བ་ཞིག་བྱེད་དགོས་པ་དེ་ཧ་ཅང་གལ་ཆེན་པོ་རེད། རྒྱ་གར་གཙོས་བོད་ནང་གཉེན་འཕྲད་དུ་འགྲོ་མཁན་རྣམས་ཀྱིས་ངེས་པར་དུ་བདེ་སྲུང་ལས་ཁུངས་སུ་འབྲེལ་བ་བྱེད་ནས་འགྲོ་ན་ཡག་པོ་རེད་མ་གཏོགས། དེ་མིན་གྱི་མི་སྒེར་ལ་དཀའ་ངལ་འཕྲད་མི་སྲིད་པ་མ་རེད། དེ་འདྲའི་རིགས་ཀྱི་གནས་ཚུལ་བྱུང་ཚེ་བདེ་སྲུང་ལས་ཁུངས་ཀྱིས་ཀྱང་གང་ཡང་བྱེད་ཐུབ་ཀྱི་མ་རེད། ད་ལྟའི་ཆར་དེ་འདྲའི་རིགས་ཀྱི་གནས་སྟངས་ཡོང་བསྡད་ཡོད། དེའི་ཐོག་ས་གནས་མགོ་འཛིན་ལས་ཁུངས་དང་དོན་གཅོད་ཁང་བཅས་ཀྱིས་ངེས་པར་དུ་མཁྱེན་པ་བྱེད་རོགས། གཉེན་འཕྲད་ཀྱི་གནས་ཚུལ་སྐོར་བདེ་སྲུང་ལས་ཁུངས་ལ་ཕུལ་དགོས་པ་གང་ཡང་མེད། བདེ་སྲུང་ལས་ཁུངས་ཀྱིས་གནས་ཚུལ་གྱི་བརྒྱུད་ལམ་བཙལ་བ་གང་ཡང་མ་རེད། བོད་དུ་གཉེན་འཕྲད་དུ་འགྲོ་བའི་གནས་ཚུལ་བདེ་སྲུང་ལས་ཁུངས་སུ་བཤད་ཚེ། རྗེས་སུ་དཀའ་ངལ་བྱུང་ཚེ་བདེ་སྲུང་ལས་ཁུངས་ཀྱིས་གསལ་བཤད་བྱེད་པའི་ལམ་ཁ་ཆགས་ཀྱི་ཡོད་ལ། རྒྱལ་ཁབ་ཁག་གི་གཞུང་གི་གཟིགས་ཕྱོགས་ཐོག་ཁྱད་པར་གཏན་གཏན་ཡོང་གི་རེད། ཅེས་གསུངས་སོང་།
དེ་བཞིན་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། རྒྱ་ནག་གུང་ཁྲན་ཏང་བཙུགས་ནས་ལོ་དྲུག་ཅུ་འཁོར་བའི་མཛད་སྒོའི་ཐོག་ཕྱི་རྒྱལ་གྱི་བོད་པ་ཁག་ཅིག་བོད་ཀྱི་སྐུ་ཚབ་བྱས་ཏེ་ཕྱིན་ཡིན་ཟེར་བའི་གནས་ཚུལ་སོགས་ཀྱི་ཐོག བདེ་སྲུང་ལས་ཁུངས་ནས་དོ་སྣང་བྱེད་བཞིན་ཡོད་ཅིང་། བཀའ་ཤག་ལའང་དུས་ཐོག་ཏུ་ཞུས་ཏེ་ལམ་སྟོན་ཞུས་ཡོད། ཁོང་ཚོ་བོད་པའི་སྐུ་ཚབ་ཆགས་ཀྱི་ཡོད་མེད་རྒྱ་ནག་གཞུང་གིས་གསལ་ཤོས་ཤེས་ཀྱི་ཡོད་པ་རེད། དེང་སང་ཁག་ཅིག་གིས་མཛའ་འབྲེལ་ཚོགས་པ་ཟེར་བ་དེ་འདྲ་བཙུགས་ཡོད། ༸གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་ཀྱི་ཐུགས་རྗེ་བཀའ་དྲིན་ཁོ་ནར་བརྟེན་ནས། བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱིས་མཇུག་སྐྱོང་བྱས་ཏེ་དམངས་གཙོའི་སྐུ་ཚབ་འདིར་བཞུགས་བསྡད་ཡོད། དེ་ལས་གཞན་པའི་སྐུ་ཚབ་ཞིག་ལ་ངོས་ལེན་རྩ་བ་ཉིད་ནས་བྱེད་ཐབས་མེད། སྐུ་ཚབ་ཡིན་ཟེར་བ་དེ་ཧམ་བཤད་དང་སོ་སོའི་ཁེ་ཕན་ཞིག་བྱེད་ཀྱི་ཡོད་པར་ངོས་འཛིན་བྱེད་ཀྱི་ཡོད། ཅེས་དང་། ༸གོ་སྟོན་དང་འབྲེལ་ནས་བདེ་སྲུང་ལས་ཁུངས་ཀྱིས་༸གོང་ས་མཆོག་གི་དགོངས་གཞི་དང་བོད་སྤྱིའིི་རྩ་དོན་དང་འབྲེལ་བའི་ལས་གཞི་སྤེལ་རྒྱུ་བགྲོ་གླེང་བྱུང་སྟེ། བོད་བསྟན་སྲིད་དང་མི་རིགས་ཀྱི་ཆེད་དུ་བློས་བཏང་བྱེད་མཁན་མང་པོ་ཞིག་འདས་གྲོངས་སུ་ཕྱིན་ཡོད་པ་དང་། ད་དུང་འཚོ་བཞུགས་ཡོད་མཁན་ཁག་ཅིག་ཡོད་པ་རེད། ཁོང་རྣམ་པར་བཀའ་དྲིན་རྗེས་དྲན་དང་ལྷན་འཛོམས་ཡོང་ཆེད། ༸གོ་སྟོན་དང་བསྟུན་ནས་བོད་ཀྱི་དཔའ་བོ་དཔའ་མོའི་ལྷན་འཛོམས་ཞེས་པ་བྱ་རྒྱུ་བྱས་པ་རེད། དེའི་ཁྲོད་དུ་ཆུ་བཞི་སྒང་དྲུག་བསྟན་སྲུང་དང་བླངས་དམག་མི་ཟུར་བ་དང་། གློ་སྒྲིག་འཛུགས། མི་སྒེར་གྱི་ཐོག་ནས་མཉམ་ཞུགས་བྱེད་མཁན་གྱི་ཐོ་བསྡུས་ཡོད། སྐབས་དེའི་སྐུ་མགྲོན་དུ་ཨ་འབྲུག་མགོན་པོ་བཀྲ་ཤིས་ཀྱི་བུ་དང་། སྐུ་ངོ་རྒྱ་ལོ་དོན་འགྲུབ་ཀྱི་བུ་སོགས་གདན་འདྲེན་གྱིིས་ཆོལ་གསུམ་དཔའ་བོ་དཔའ་མོ་མཉམ་འཛོམས་ཐོག་རྒྱལ་ཞེན་དང་ཆིག་སྒྲིལ་གྱི་ནུས་པ་འཕེལ་ཐུབ་པའི་རེ་བ་བྱེད་བཞིན་ཡོད། ཅེས་གསུངས་སོང་།
ཕྱི་ལོ་ ༢༠༢༤ ཟླ་ ༩ ཚེས་ ༩ ཉིན་བོད་མིའི་སྒྲིག་འཛུགས་ཀྱིས་བཙན་བྱོལ་བོད་མི་རྣམས་བོད་ནང་བསྐྱོད་ཕྱོགས་ཐད་ལམ་སྟོན་དོན་ཚན་བདུན་གནང་ཡོད་པའི་ནང་། ༡། བོད་མིའི་སྒྲིག་འཛུགས་ཀྱི་མཛད་གཙོ་དང༌། ལས་ཁུངས་མ་ལག་གི་ལས་བྱེད་པ་ལས་ཐོག་རྣམས་དང་། ལས་འགན་འཁྱུར་བ་རྣམས་ཀྱིས་བདེ་སྲུང་ལས་ཁུངས་ལ་སྙན་གསན་མ་ཞུས་པར་བོད་ནང་བསྐྱོད་ཐལ་མེད་པ་དགོས་རྒྱུ། ༢། བོད་མི་སྒེར་པ་སུ་ཡིན་རུང་བོད་དང་རྒྱ་ནག་ཏུ་བསྐྱོད་པར་བོད་མིའི་སྒྲིག་འཛུགས་ནས་དགག་ཆ་མེད་ནའང་། རང་རང་གནས་ཡུལ་གྱི་སྐུ་ཚབ་དོན་གཅོད་དམ་ས་གནས་འགོ་འཛིན་ལ་ངོ་ཐུག་གམ། གློག་འཕྲིན་ནམ་ཁ་པར་བརྒྱུད་ཕྱོགས་བསྐྱོད་འཆར་གཞི་སྙན་གསན་ཞུ་དགོས་པ་དང་། སྐུ་ཚབ་དོན་གཅོད་དམ་ས་གནས་འགོ་འཛིན་ལ་ཞུ་སྟབས་འགྲིག་མིན་བྱུང་ཚེ། ཐད་ཀར་བདེ་སྲུང་ལས་ཁུངས་ལ་སྙན་གསན་ཞུ་འཐུས། སྙན་གསན་མེད་རིགས་ལ་བོད་མིའི་སྒྲིག་འཛུགས་ནས་ངོས་སྦྱོར་རྒྱབ་གཉེར་དང་མཐུན་འགྱུར་རོགས་རམ་སྦྱོར་སྤྲོད་མི་བྱེད།
༣། རྒྱ་ནག་གཞུང་ནས་བོད་ནང་བསྐྱོད་རྒྱུའི་ཐོངས་མཆན་སྤྲོད་སྐབས་ཆ་རྐྱེན་སྣ་ཚོགས་འཇོག་བཞིན་པ་དང་། ལྷག་པར་དེང་སྐབས་རྒྱ་གཞུང་གི་བཀོད་བྱུས་འོག་མི་ཉུང་ཤས་ལ་བོད་རིགས་སམ་བོད་འབྲེལ་གྱི་མིང་ཐོག་ནས་ཚོགས་པ་བཟོ་རུ་བཅུག་སྟེ། ཚོགས་པ་དེ་རིགས་ཀྱི་རྒྱབ་གཉེར་མེད་པར་ཐོངས་མཆན་མི་སྤྲོད་པའམ། ཚོགས་པ་འདྲ་མིན་གྱི་མིང་ཐོག་ནས་བོད་དུ་གནས་སྐོར་དང་། ལྟ་སྐོར། མཁས་པའི་འགྲུལ་བཞུད་ཟེར་བ་སོགས་གོ་སྒྲིག་བྱེད་བཞིན་པ་དེ་དག་ནི་ཕ་རོལ་པོའི་ཆབ་སྲིད་ཀྱི་དགོས་མཁོར་དམིགས་པའི་ངན་བྱུས་ཡིན་ངེས་ལ་སོང་། ཚོགས་པ་དེ་དག་ནང་མཉམ་ཞུགས་སམ། དེ་རིགས་ཀྱི་བསླུ་བྲིད་འོག་མ་ཚུད་པ་དགོས་གལ། ༤། རྒྱ་གཞུང་གི་བསླུ་བྲིད་འོག་ནས་བོད་ནང་སྐྱོད་མཁན་རྣམས་མཐའ་གཅིག་ཏུ་བོད་ཀྱི་རྩ་དོན་ལངས་ཕྱོགས་དོར་ཟིན་པར་ཁ་ཚོན་གཅོད་མི་ནུས་ནའང་། བོད་ནས་ཚུར་འཁོར་རྗེས་རྒྱ་གཞུང་གི་སྲིད་ཇུས་ལངས་ཕྱོགས་བརྒྱུད་བསྒྲགས་དང་། བོད་མིའི་ཁེ་ཕན་ལ་གནོད་པའི་ལས་ཀ་བྱེད་མཁན་བྱུང་ན། བོད་མི་རིགས་དང་། བོད་མིའི་སྒྲིག་འཛུགས་ལ་རྒྱབ་གཏོད་བྱས་པར་ངོས་འཛིན་བྱེད་དགོས་པ་ཡིན་པས། དེ་རིགས་གང་ན་སུ་ཡོད་ལ་བོད་མི་ཚང་མས་སྐབས་མཚམས་འབྲེལ་ཡོད་ལ་གནས་ཚུལ་སྙན་གསན་དང་། ཐེར་འདོན་གདོང་ལེན་དགོས་གལ།
༥། རྒྱ་གཞུང་གིས་བོད་ནང་སྐྱོད་མཁན་སྒེར་སོ་སོར་མཉམ་ལས་མཉམ་འབྲེལ་དང་། མུ་མཐུད་འབྲེལ་འཇོག་དགོས་ལུགས་སོགས་དངུལ་དངོས་ཀྱི་བསླུ་བྲིད་དང་། དབང་ཤེད་དང་། སྡིགས་བསྐུལ། ཐ་ཚིག་སྒྲོག་པ་སོགས་ཀྱི་སྒོ་ནས་ཁས་ལེན་འདྲ་མིན་བྱེད་དུ་འཇུག་རྒྱུའི་གཡོ་བྱུས་འོག་ཏུ་མ་ཚུད་པར་རང་ཚུགས་བརྟན་པོར་འཛིན་དགོས་རྒྱུ་གལ་ཆེན་ཡིན་པས། བོད་ནང་ཐོན་བསྐྱོད་མ་བྱས་གོང་དུ་འབྲེལ་ཡོད་ནས་ལམ་སྟོན་ལེན་ཐབས་བྱེད་དགོས་ཤིང་། ཕྱི་རྒྱལ་ཡུལ་གྲུ་ཁག་ཏུ་གནས་སྡོད་རང་རིགས་རྣམས་ཀྱིས་གནས་ཚུལ་དེ་རིགས་སྔོན་འགོག་སླད། རྒྱ་ནག་ཏུ་བཅའ་སྡོད་སོ་སོའི་གཞུང་ཚབ་ལ་འབྲེལ་གཏུག་གི་ཁ་པར་ཨང་གྲངས་སོགས་སྔོན་ཚུད་གྲ་སྒྲིག་ཨང་གསར་དགོས་གལ། ༦། རྒྱ་གཞུང་གི་བསླུ་བྲིད་ཀྱི་ཆ་རྐྱེན་ལ་ཁས་ལེན་བྱེད་ཐལ་ཤོར་ཚེ། གནས་ཡུལ་རྒྱལ་ཁབ་ལ་ཕྱིར་འཁོར་རྗེས་བསུན་པོ་དང་གནོན་ཤུགས་འདྲ་མིན་སྤྲད་རྒྱུའི་ལམ་ཁ་བཤངས་པ་ལྟ་བུ་ཡིན་སྟབས། དེ་འདྲའི་དཀའ་ངལ་ཇི་བྱུང་སྐབས་མཚམས་སོ་སོར་བདེ་སྲུང་ལས་ཁུངས་ལ་སྙན་གསན་ཞུས་ཏེ་རྒྱ་གཞུང་གི་རྒྱ་རྙི་ལས་ཐར་ཐབས་བྱེད་དགོས། འོལ་ཚོད་བྱས་ནས་བསྡད་པའམ་ཡང་ན་ལྐོག་འབྲེལ་བྱས་ན། འབྱུང་འགྱུར་རང་ཉིད་ལ་གནས་ཡུལ་རྒྱལ་ཁབ་ཀྱི་ཁྲིམས་ཐོག་ནས་དཀའ་ངལ་ཅི་རིགས་འཕྲད་སྲིད།
༧། དེང་སང་རྒྱ་གཞུང་གིས་བཙན་བྱོལ་བོད་མི་ཚོར་རྩ་དོན་ལས་འགུལ་དང་ཆབ་སྲིད་ལས་འགུལ་ནང་མཉམ་ཞུགས་མི་ཆོག་པ་དང༌། རྒྱ་གཞུང་ལ་མཉམ་འབྲེལ་དང་མཐུན་འགྱུར་དགོས་ལུགས་རྒྱལ་མཚམས་བརྒལ་ནས་གནོན་ཤུགས་སྤྲོད་བཞིན་པ་དེ་ནི་རྒྱལ་སྤྱིའི་ཁྲིམས་ལུགས་དང་འགལ་གྱི་ཡོད་སྟབས། དེ་ལྟའི་གནོན་ཤུགས་ཡོང་སྐབས་གསར་འགྱུར་བརྒྱུད་ལམ་ཁག་ཏུ་བློ་སྤོབས་ཆེན་པོས་དཔང་རྟགས་དང་བཅས་ཡོངས་བསྒྲགས་བྱེད་ཐུབ་ན་རབ་དང་། དེ་མིན་སོ་སོའི་གནས་ཡུལ་གཞུང་ངམ། སྐུ་ཚབ་དོན་གཅོད། ས་གནས་འགོ་འཛིན། བདེ་སྲུང་ལས་ཁུངས་བཅས་གང་རུང་ལ་གནས་ཚུལ་ཁུངས་འཕེར་འདོན་སྤྲོད་བྱེད་གལ་ཆེ་བ། ཞེས་བཀོད་འདུག
གསར་འགོད་པ། བྱམས་པ་ཚེ་རིང་། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
