དབུ་མའི་ལམ་གྱི་ཉིན་མོ་སྲུང་གཙིའི་མཛད་སྒོར་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས། དགོན་པའི་སློབ་གསོ་དང་། ཁྱིམ་ཚང་སློབ་གསོ། སློབ་གྲྭའི་སློབ་གསོ་གསུམ་གྱི་ཐོག་ཤུགས་སྣོན་བརྒྱབ་སྟེ་བོད་པའི་རིག་གཞུང་དང་སྐད་ཡིག་ལ་དགའ་ཞེན་བསྐྲུན་རྒྱུ་གལ་ཆེན་ཡིན་སྐོར་གསུངས་སོང་།
ལོ་ལྟར་ཕྱི་ཟླ་ ༩ ཚེས་ ༡༨ ཉིན་དབུ་མའི་ལམ་གྱི་ཉིན་མོར་སྲུང་གཙི་ཞུ་ཡི་ཡོད་པ་ལྟར། དེ་རིང་ཕྱི་ཚེས་ ༡༨ ཉིན་གྱི་ཞོགས་པའི་ཆུ་ཚོད་ ༩ པའི་སྟེང་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ (Centre for Middle Way Initiative) གི་གོ་སྒྲིག་འོག དྷ་ས་ས་གནས་མགོ་འཛིན་གྱི་ཚོགས་ཁང་དུ་དབུ་མའི་ལམ་གྱི་ཉིན་མོ་སྲུང་གཙིའི་མཛད་སྒོ་འཚོགས་སོང་། སྐབས་དེར་སྐུ་མགྲོན་གཙོ་བོ་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་དང་། དམིགས་བསལ་སྐུ་མགྲོན་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། གཞུང་འབྲེལ་མ་ཡིན་པའི་ཚོགས་པ་ཁག་གི་འགན་འཛིན་རྣམ་པ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཞོན་དབུས་པའི་ཚོགས་མི་ཁག སློབ་ཕྲུག་ཁག་ཅིག་དང་ཕ་མ་སོགས་ཚང་འཛོམས་གནང་སོང་།
ད་ལན་གྱི་མཛད་སྒོའི་སྟེང་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གིས་ཕྱི་ལོ་ ༢༠༢༥ ལོའི་རྒྱ་གར་རྒྱལ་ཡངོས་འཛིན་རིམ་བཅུ་པའི་སློབ་མ་གྲངས་ ༡༢ དང་འཛིན་རིམ་བཅུ་གཉིས་པའི་སློབ་མ་གྲངས་ ༥ བཅས་བོད་ཡིག་ཡིག་རྒྱུགས་ཁྲོད་བརྒྱ་ཆ་ ༩༨ ཡན་ལོན་པའི་རྩེ་ཕུད་སློབ་མ་ཁྱོན་ ༡༧ ལ་ཧིན་སྒོར་འབུམ་གཅིག་གི་བྱ་དགའ་དང་ཕྱག་འཁྱེར་གནང་སོང་།
མཛད་སྒོའི་སྟེང་ཐོག་མར་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཞོན་བསྟན་འཛིན་བཤེས་གཉེན་ལགས་ཀྱིས། དབུ་མའི་ལམ་གྱི་ཉིན་མོ་འདི་བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༡༩༩༧ ཟླ་ ༩ ཚེས་ ༡༨ ཉིན་གཞུང་འབྲེལ་སྲིད་བྱུས་སུ་གཏན་འབེབས་གནང་བའི་ཉིན་མོ་ཞིག་ཡིན་པར་སོང་། ལོ་ལྟར་དེ་རིང་གི་ཉིན་མོ་འདི་གལ་ཆེན་དོན་ཆེན་དུ་བརྩིས་ནས་སྲུང་གཙི་ཞུས་དང་ཞུ་མུས་ཡིན། དབུ་མའི་ལམ་གྱི་སྲིད་ཇུས་གལ་ཆེན་པོ་རེད། འོན་ཀྱང་། དེ་དང་མཉམ་དུ་རྩ་ཆེ་བའི་བོད་ཀྱི་ཆོས་དང་རིག་གཞུང་ཉར་ཚགས་བྱ་དགོས་པ་དང་། ད་ལྟའི་བོད་ནང་གི་ཛ་དྲག་གནས་སྟངས་དེ་དག་གང་མགྱོགས་སེལ་བའི་ཐབས་ལམ་གལ་ཆེན་པོ་ཆགས་ཀྱི་ཡོད་པར་བརྟེན། ཚོགས་པའི་ངོས་ནས་ལོ་ལྟར་དེའི་ཐོག་འབད་བརྩོན་ཞུ་བཞིན་ཡོད་ལ། ང་ཚོས་ཕྱོགས་མཐའ་ཁག་ཏུ་ཡོད་པའི་བོད་མི་དང་རྒྱ་མི། དེ་བཞིན་ཕྱིའི་རྒྱལ་ཁབ་ཀྱི་མི་རིགས་འདྲ་མིན་ལ་ད་ལྟའི་བོད་ཀྱི་གནས་སྟངས་དང་། ད་ལྟའང་རྒྱ་ནག་གིས་བོད་ནང་གི་བོད་མི་རྣམས་ལ་འགྲོ་བ་མིའི་ཐོབ་ཐང་མེད་པའི་ཐོག བོད་ཀྱི་སྐད་ཡིག་དང་རིག་གཞུང་། ངོ་བོ་སོགས་རྩ་མེད་གཏོང་ཐབས་བྱས་དང་བྱེད་མུས་ཡིན་པ་སོགས་བོད་ནང་གི་ཛ་དྲག་གནས་སྟངས་སྐོར་ལ་འགྲེལ་བརྗོད་བྱས་ནས་བོད་དོན་གོ་རྟོགས་ངེས་པར་དུ་སྤེལ་དགོས་གལ་ཆེ། ལོ་རྒྱུས་ཀྱི་ཐོག་ནས་བོད་རང་བཙན་གཙང་མ་ཡིན་པའི་ངོས་འཛིན་ཞུས་པའི་ཐོག་ནས་ད་ལྟའི་གནས་སྟངས་ལ་དཔག་པའི་ང་ཚོའི་དབུ་མའི་ལམ་དེ་འོས་ཤིང་འཚམ་པའི་སྲིད་ཇུས་རེད། ད་ལྟ་བར་དུ་འགྲེལ་བརྗོད་ཞུས་པ་དེའང་བོད་མིའི་སྒྲིག་འཛུགས་ཀྱི་ཡིག་ཆ་གང་ཡོད་པ་གཞིར་བཟུང་གིས་འགྲེལ་བརྗོད་བྱེད་ཀྱི་ཡོད་ལ། དབུ་མའི་ལམ་གྱི་ཉིན་མོ་འདི་གལ་ཆེན་པོ་ཡིན་པའི་ངོས་འཛིན་ཞུས་པའི་ཐོག་ནས་མི་རེ་ངོ་རེའི་ཐོག་ནས་བོད་ཀྱི་གནས་སྟངས་དེ་རྒྱལ་སྤྱིའི་སྤྱི་ཚོགས་སྟེང་འགྲེམས་སྤེལ་བྱ་རྒྱུ་དང་། བོད་ཀྱི་སྐད་ཡིག་དང་རིག་གཞུང་སོགས་སྲུང་སྐྱོབ་བྱེད་པ་བརྒྱུད་༸གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་ཞིག་ཆགས་ཀྱི་ཡོད་རེད་བསམ་གྱི་འདུག སླར་ཡང་ཚང་མ་ལ་དབུ་མའི་ལམ་གྱི་ཉིན་མོ་བཟང་ཞུ་རྒྱུ་ཡིན། ཞེས་སོགས་འགྲེལ་བརྗོད་གནང་སོང་།
རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་དྲུང་ཆེ་ཀུན་དགའ་ནོར་བུ་ལགས་ཀྱིས་དབུ་མའི་ལམ་གྱི་ཉིན་མོའི་བསྒྲགས་གཏམ་ཞིག་སྒྲོག་སྦྱངས་གནང་སོང་བ་དང་། དེའི་ནང་དུ། དབུ་མའི་ལམ་གྱི་ཉིན་མོ་འདི་བོད་མི་མང་སྤྱི་འཐུས་ལྷན་ཚོགས་ནས་ ༡༩༩༧ ཟླ་ ༩ ཚེས་ ༡༨ ཉིན་གཞུང་འབྲེལ་སྲིད་བྱུས་སུ་གཏན་འབེབས་གནང་བའི་ཉིན་མོ་ཞིག་ཡིན་པར་སོང་། དེ་རིང་གི་ཉིན་མོ་འདི་གལ་ཆེ་དོན་ཆེན་དུ་བརྩིས་ནས་སྲུང་བརྩི་ཞུ་དགོས་པའི་ཉིན་མོ་ཞིག་ཆགས་ཡོད། དེར་བརྟེན་དེ་རིང་འཛམ་གླིང་ས་ཕྱོགས་གང་སར་དབུ་མའི་ལམ་གྱི་ཉིན་མོ་སྲུང་བརྩི་ཞུ་མཁན་ཡོངས་ལ་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ངོས་ནས་བཅོས་མིན་གྱི་འཚམས་འདྲི་ཞུ་རྒྱུ་ཡིན། དབུ་མའི་ལམ་ནི་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐུབ་པ་དང༌། བོད་རྒྱ་མི་རིགས་གཉིས་འདྲ་མཉམ་དང་གཅིག་ཕན་གཅིག་གྲོགས་ཀྱིས་བརྟན་ལྷིང་མཉམ་གནས་ཡོང་ཆེད་འདོན་གནང་མཛད་པའི་ཐབས་ལམ་ཞིག་དང༌། བཙན་བྱོལ་བོད་གཞུང་མང་ནས་མང་གཙོའི་ལམ་སྲོལ་གྱི་ཐོག་ནས་གོ་བསྡུར་རིམ་པར་བྱས་ཏེ་གཏན་ལ་ཕབ་པའི་སྲིད་བྱུས་ཤིག་ཡིན། དེ་ནི་བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་དབང་སྒྱུར་བའི་བོད་ཀྱི་ད་ལྟའི་གནས་བབ་ཁས་ལེན་མི་བྱེད་པ་དང་། ཡང་བོད་ཀྱི་ལོ་རྒྱུས་དངོས་དོན་རང་བཙན་ཡིན་པ་དེ་ཡང་རྩོད་གླེང་མི་བྱེད་པར་དེ་གཉིས་ཀྱི་དབུས་ཏེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་ཆོལ་གསུམ་བོད་རིགས་ཡོངས་རྫོགས་ལ་མིང་དོན་མཚུངས་པའི་རང་སྲིད་རང་སྐྱོང་ཞིག་ཐོབ་ཐབས་བྱ་རྒྱུའི་སྲིད་བྱུས་དང་ཐབས་ལམ་ལ་དབུ་མའི་ལམ་ཞེས་བརྗོད། དེ་བཞིན་༧སྐུའི་ཕྱག་དེབ་གསར་པ་ ༼བོད་དང་བོད་མིའི་མགྲིན་ཚབ་༽ ནང་དུའང་བསྐྱར་དུ་གང་ཉིད་ཀྱིས་དབུ་མའི་ལམ་གྱི་སྲིད་བྱུས་སྐོར་འགྲེལ་བརྗོད་གནང་ཡོད་པ་ལྟར། འདི་ལྟ་བུའི་སྲིད་བྱུས་ཤིག་གི་གལ་ཆེན་རང་བཞིན་ངོས་འཛིན་བྱ་རྒྱུ་གལ་ཆེན་ཡིན་པ་སྨྲ་མི་དགོས། ཞེས་གསལ་འདུག
ཡང་བསྒྲགས་གཏམ་ནང་། བོད་དོན་དཀའ་རྙོག་སེལ་ཐབས་སུ་དབུ་མའི་ལམ་འདི་དངོས་ཡོད་གནས་ཚུལ་དང་མཐུན་ཞིང༌། ད་ལྟའི་དུས་རབས་འདིར་གཅིག་ལ་གཅིག་བརྟེན་མ་བྱས་པར་ཁེར་རྐྱང་སྡོད་ཐབས་མེད་པའི་གནས་སྟངས་དང་། སྐད་ཡིག་གཅིག་དང་གོམས་སྲོལ་གཅིག མདོར་ན་བོད་རིགས་ཡོངས་རྫོགས་རང་སྐྱོང་གཅིག་གི་འོག་ཏུ་ཚུད་ནས་མི་རིགས་ཀྱི་ལས་དོན་འཛིན་སྐྱོང་སྤེལ་གསུམ་ཚགས་ཚུད་དང་རྒྱུན་འཁྱོངས་ཡོང་རྒྱུར་ཕན་པ། དཔལ་འབྱོར་དང༌། དངོས་པོའི་ཡར་རྒྱས། དེང་རབས་ཀྱི་དཔལ་ཡོན་ཡར་རྒྱས་ཡོང་རྒྱུར་ཕྱི་དངོས་པོའི་ཕན་ཡོན་ཡོད་པ་དང་། བོད་དོན་བདེན་མཐའ་གསལ་ཐབས་ཀྱི་གཞི་རྒྱ་ཆེ་བའི་ལས་དོན་ཁག་ལ་རྒྱལ་སྤྱིའི་ནང་རྒྱབ་སྐྱོར་ཐོབ་དང་ཐོབ་བཞིན་པ་རྒྱུན་གནས་ཡོང་བར་ཕན་པ་ཡོད་པ། ལྷག་པར་བོད་ནང་ལེགས་བྱང་དང་། ཁོར་ཡུག མི་རིགས་ཀྱི་ངོ་བོ་དང་བཅས་པ་རྩ་གཏོར་འགྲོ་གཞིའི་ཛ་དྲག་གི་དཀའ་ངལ་ལས་སྐྱོབ་ཐུབ་པའི་ཕན་པ་ཡོད་པ་སོགས་མདོ་དོན་དབུ་མའི་ལམ་གྱི་སྲིད་བྱུས་ལ་མོས་མཐུན་རྒྱབ་སྐྱོར་གནང་མཁན་ཚོས་རྒྱུ་མཚན་གྱི་ལམ་ནས་སྲིད་བྱུས་འདི་ལ་རྒྱབ་སྐྱོར་དང༌། མོས་མཐུན། གོ་རྟོགས་རྙེད་པ་བཅས་གནང་ནས་དུས་རྒྱུན་ནས་མི་རིགས་གཞན་དང༌། རང་རེའི་མི་མང་རྣམས་ལ་གོ་རྟོགས་སྤེལ་ཐབས་གནང་ནས་གང་མགྱོགས་གཞིས་བྱེས་མཉམ་འཛོམས་ཀྱི་སྐྱིད་པའི་ཉི་མ་ཤར་བར་བརྩོན་པ་མི་དོར་བའི་སྒོ་ནས་ནུས་པ་འདོན་སྤེལ་གནང་དགོས། དེ་བཞིན་སྐབས་བདུན་པའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ངོས་ནས་ད་ལོ་༧སྐུའི་དགུང་གྲངས་དགུ་བཅུར་ཕེབས་པའི་བྱམས་བརྩེ་ལོ་སྲུང་བརྩིའི་ཆེད། རྒྱ་གར་དང་བལ་ཡུལ་གཙོའི་ཡུ་རོབ་ཁུལ་དང་ཨ་རི། ཐའེ་ཝན། ཁེ་ན་ཌ་བཅས་སུ་གཞུང་འབྲེལ་ཕྱོགས་སྐྱོད་ཀྱིས་ས་གནས་དང་། ལྷག་པར་དུ་གང་སར་བཞུགས་པའི་རྒྱ་རིགས་དང་ཕྱི་རྒྱལ་མི་རིགས་གཞན་རྣམས་ལ་དབུ་མའི་ལམ་གྱི་སྲིད་བྱུས་གོ་རྟོགས་སྤེལ་རྒྱུ་དང་། ༧སྐུའི་ཕྱག་དེབ་གསར་པ་༼བོད་དང་བོད་མིའི་མགྲིན་ཚབ་༽ས་ཕྱོགས་གང་སར་འགྲེམས་སྤེལ་ཞུ་རྒྱུ་ཡིན་ལགས། འཛམ་གླིང་གི་ཡུལ་གྲུ་གང་སར་གནས་པའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ས་གནས་རྒྱུན་ལས་ཁག་གི་ངོས་ནས་ཀྱང་མི་མང་གི་རེ་འདུན་བཞིན་འོས་འདེམས་བྱུང་བ་ལྟར་རྣམ་ཀུན་ཞུ་སྒོའི་ཐད་ལྷག་བརྩོན་རྒྱུན་བསྲིངས་དགོས་པའི་འབོད་སྐུལ་དང་བསྒྲགས་དབུ་མའི་ལམ་གྱི་ཉིན་མོར་བོད་རིགས་སྤུན་ཟླ་ཡོངས་ལ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ། ཞེས་སོགས་གསལ་འདུག
དམིགས་བསལ་སྐུ་མགྲོན་ས་རཱ་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཀྱིས། བོད་ཀྱི་སྐད་ཡིག་དང་རིག་གཞུང་རྒྱུན་འཛིན་བྱ་རྒྱུ་གལ་ཆེན་པོ་རེད་ཟེར་བའི་སྐད་ཆ་རྙིང་པ་རེད། ཡིན་ནའང་སྐད་ཡིག་སྲུང་སྐྱོབ་དང་། རིག་གཞུང་མི་ཉམས་རྒྱུན་འཛིན་གྱི་ཆེད་དུ་མི་སྒེར་དང་། ཚོགས་པ་ཁག དེ་བཞིན་གཞུང་གི་ངོས་ནས་ག་རེ་གནང་དགོས་ཀྱི་ཡོད་པ་དེ་དག་གནད་འགག་ཆེན་པོ་ཞིག་ཆགས་ཀྱི་ཡོད་རེད་བསམ་གྱི་འདུག དེང་སང་ང་ཚོས་འདི་གལ་ཆེན་པོ་ཡིན་པ་དང་། འདི་གཅེས་སྐྱོང་དང་རྒྱུན་འཛིན་བྱ་དགོས་པའི་སྐོར་ལ་བཀའ་མོལ་གསུངས་བསྡད་པ་མ་གཏོགས་དོན་ངོ་མར་ཏོག་ཙམ་འཐུས་ཤོར་འགྲོ་ཡི་ཡོད་པའི་རྣམ་པ་ཧ་ཅང་གི་གསལ་པོ་རེད། དཔེར་ན་དེ་རིང་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གིས་འཛིན་རིམ་བཅུ་པ་དང་བཅུ་གཉིས་ཀྱི་རྒྱ་གར་རྒྱལ་ཡོངས་ཀྱི་ཡིག་རྒྱུགས་ནང་སློབ་ཚན་མང་པོ་ཡོད་པའི་ཁྲོད། ཆེད་མངགས་བོད་ཡིག་ཟུར་འདོན་བྱས་ནས་བྱ་དགའ་གསོལ་རས་དང་ཆེ་མཐོང་གནང་བ་འདེ་ནི་དོན་དངོས་སུ་ཆེ་མཐོང་དང་ངོས་འཛིན་བྱེད་སྟངས་ཤིག་རེད་བསམ་གྱི་འདུག དེ་ལས་གལ་ཆེ་བ་སོ་སོའི་མི་ཚེའི་ནང་ནམ་ཞག་རྒྱུན་དུ་ནས་བོད་ཀྱི་སྐད་ཡིག་དྭངས་མ་རྒྱག་རྒྱུ་གལ་ཆེན་ཡིན་པ་དང་། དེང་སང་འཁྲུག་ཆ་དོད་པའི་དུས་སྐབས་འདིར་སྤྱི་ཚོགས་དྲ་ལམ་ནང་སྐད་ཆ་ཤོད་མཁན་རྣམས་ཀྱིས་སྐད་ཆ་ཤོད་པའི་སྐབས་ཚིག་བེད་སྤྱོད་གཏོང་སྟངས་ཐོག་ཡིད་གཟབ་གནང་དགོས་པ་དང་། མི་རེ་ངོ་རེས་བོད་སྐད་དྭངས་མ་བསྐྱོན་པ་ལས་སྐད་ཡིག་འདྲེས་མ་རྒྱག་མི་དགོས་པའི་ཐད་འབད་བརྩོན་ཤུགས་ཆེན་བྱ་དགོས་པ་དང་ཐ་སྙད་བེད་སྤྱོད་གཏོང་སྟངས་ཐད་དོ་སྣང་བྱེད་དགོས་པའི་གནས་སྟངས་ཤིག་ལ་སླེབས་འདུག ཚང་མས་ཤེས་ཀྱི་ཡོད་ཀྱང་སྐབས་རེར་སྣང་མེད་ཤོར་བ་སོགས་རྒྱུ་རྐྱེན་འདྲ་མིན་ལ་བརྟེན་ནས་རིམ་བཞིན་གོམས་འདྲིས་ཐེབས་རྒྱུའི་ཉེན་ཁ་ཡོད་པས་བོད་སྐད་དྭངས་མ་བསྐྱོན་རྒྱུའི་ཐད་ཤུགས་སྣོན་རྒྱག་རྒྱུ་གལ་ཆེན་པོ་རེད། ཅེས་གསུངས་སོང་།
སློབ་སྤྱི་པ་སངས་ལགས་ཀྱིས། ད་ལྟའི་ཆར་ང་ཚོའི་སྤྱི་ཚོགས་ལ་དཀའ་ངལ་མང་པོ་ཡོད་པ་རེད། དཀའ་ངལ་མང་པོའི་ནང་ནས་དཀའ་ངལ་གཅིག་དེ་སློབ་གྲྭ་ཁག་དང་དགོན་སྡེ་ཁག་ལ་འཛུལ་ཞུགས་བྱེད་མཁན་གྱི་གྲངས་འབོར་དེ་མར་ཟགས་ཡོད་པ་རེད། དེ་སྤྱི་ཚོགས་ཀྱི་འགྱུར་བ་ལ་བརྟེན་ནས་བྱུང་བ་ཞིག་ཡིན་པར་སོང་། སྤྱི་ཚོགས་ཀྱི་འཕོ་འགྱུར་འདི་རང་བཞིན་གྱིས་འགྲོ་ཡི་ཡོད་པས། གཞུང་གིས་འགྱུར་བ་དེ་བཀག་ཐུབ་རྒྱུ་དེ་ཧ་ལམ་ཡོང་གི་མ་རེད་ལ་ཡོང་སྲིད་ཀྱི་མ་རེད། འོན་ཀྱང་། ང་ཚོ་འཐབ་རྩོད་ཀྱི་མི་རིགས་ཤིག་ཆགས་ཀྱི་ཡོད་པ་རེད། མ་འོངས་པར་དབུ་མ་དང་རང་བཙན་འཐབ་རྩོད་ཀྱི་ཐོག་ནས་ཐབས་ལམ་གང་རུང་ཞིག་བརྒྱུད་ཐབས་ལམ་ཞིག་འཐོན་པ་ཡིན་ན་ང་ཚོ་བོད་ལ་ལོག་གི་ཡིན་ཞེས་པའི་སེམས་ཤུགས་འདི་དགོས་ཀྱི་རེད་བསམ་གྱིི་འདུག ཅེས་དང་། ད་ལྟའི་ཆར་དུས་ཚོད་ཀྱི་འགྱུར་བ་ཐེབས་ནས་ཕྲུ་གུའི་གསོ་སྐྱོང་བྱེད་སྟངས་ཐད་འཐུས་ཤོར་འགྲོ་ཡི་ཡོད་པའི་རྣམ་པ་ཞིག་འདུག དེར་བརྟེན་དགོན་པའི་སློབ་གསོ་དང་། ཁྱིམ་ཚང་སློབ་གསོ། སློབ་གྲྭའི་སློབ་གསོ་གསུམ་དེ་ཧ་ཅང་གི་གལ་ཆེན་པོ་ཆགས་ཀྱི་ཡོད་ལ། སློབ་གསོ་གསུམ་པོ་མཉམ་རུབ་དང་གཅིག་ཕན་གཅིག་རོགས་བྱས་ཏེ་སོ་སོའི་མི་རིགས་ཀྱི་ངོ་བོ་ནི་བོད་པ་ཡིན་པའི་ཚོར་བ་སྤྲོད་ཐུབ་རྒྱུ་དང་། བོད་པའི་རིག་གཞུང་དང་སྐད་ཡིག་ལ་དགའ་ཞེན་སྐྱེ་རྒྱུར་རེ་བ་ཞིག་ཡོད་པས། སློབ་གསོ་གསུམ་པོའི་ཐོག་ལ་ཤུགས་སྣོན་རྒྱག་ཐུབ་ན་ཕན་ཐོགས་ཡོང་ངེས་རེད། ཅེས་སོགས་གསུངས་སོང་།
དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས། དབུ་མའི་ལམ་ནི་ང་ཚོའི་བོད་མིའི་སྒྲིག་འཛུགས་ཀྱི་གཞུང་འབྲེལ་གྱི་སྲིད་ཇུས་ཤིག་རེད། དེ་ཡང་ངས་ནམ་ཞག་རྒྱུན་དུ་ཞུས་པ་བཞིན་མི་ཁ་ཤས་ཤིག་གིས་ཐག་བཅད་ནས་བཟོས་པ་མ་རེད། དེ་ཡང་སྤྱི་ཚོགས་ནང་ལོགས་ལ་དེ་འདྲའི་ཐོག་ལ་འགྲེལ་བཤད་རྒྱག་པར་ཐོག་མར་སོ་སོས་མགོ་འཚོས་པ་དགོས་ཀྱི་ཡོད་པ་རེད། ཉིན་ཤས་གོང་ལ་འཇར་མ་ནིའི་གསར་འགོད་པ་ཁ་ཤས་ཤིག་ངའི་སར་ལས་ཁུངས་སུ་བཅར་ནས་སྤྱི་ཡོངས་ཀྱི་དྷ་རམ་ས་ལའི་ས་གནས་ཀྱི་གནས་སྟངས་དང་། བོད་མིའི་སྒྲིག་འཛུགས་ཀྱི་སྐོར། ང་ཚོའི་འཐབ་རྩོད་སྐོར་ལ་བཅར་འདྲི་ཞུ་བར་ཕེབས་སོང་། སྐབས་དེ་དུས་དབུ་མའི་ལམ་གྱི་བརྒྱུད་རིམ་ཆ་ཚང་དབྱིན་སྐད་ཐོག་ཁོང་རྣམ་པར་འགྲེལ་བཤད་བརྒྱབ་པ་ཡིན། དེའི་སྐོར་ངས་ཞུ་དགོས་དོན་ནི་ད་ལྟའི་དུས་ཚོད་འདི་ལ་དམིགས་བསལ་གྱིས་འཛམ་གླིང་གི་འགྱུར་བ་འགྲོ་སྟངས་ལ་དཔག་པའི་གོམས་པ་སྤོ་དགོས་ཀྱི་འདུག ངས་ག་དུས་ཡིན་ཡང་འདི་ལབ་ཀྱི་ཡོད་ལ་ལབ་པ་ཙམ་མིན་པར། ངས་ས་གནས་མགོ་འཛིན་གྱི་འགན་འཁྱེར་བའི་ཐོག་ནས་རྒྱ་གར་གྱི་ཆབ་སྲིད་མི་སྣ་དང་། ཡུལ་མི་དཀྱུས་མ་སོགས་ལ་འབྲེལ་བ་མང་པོ་ཡོང་གི་འདུག ཅེས་གསུངས།
དཀོན་མཆོག་མིག་དམར་ལགས་ཀྱིས། ད་ལྟའི་དུས་ཚོད་འདིར་ཚང་མས་བསམ་བློ་གཏོང་སྟངས་དེ་ཐོག་མར་སོ་སོའི་སྐོར་ལ་བསམ་བློ་གཏོང་གི་འདུག རྒྱལ་ཁབ་ཅིག་གི་དབུ་ཁྲིད་ཡིན་ནའང་། དང་པོ་སོ་སོའི་རྒྱལ་ཁབ་ཀྱི་ཁེ་ཕན་ལ་བསམ་བློ་གཏོང་གི་འདུག དེར་བརྟེན་འདི་འདྲའི་ཆབ་སྲིད་ཀྱི་འགྱུར་ལྡོག་ཅིག་གི་ནང་ལོགས་ལ་ང་ཚོས་གོམས་པ་གང་འདྲ་སྤོ་ཡི་ཡིན་ནམ། གང་ལྟར་དབུ་མའི་ལམ་ལ་རྒྱབ་སྐྱོར་བྱེད་མཁན་གྱི་འཛམ་གླིང་རྒྱལ་ཁབ་དང་དབུ་ཁྲིད་གང་འདྲ་ཞིག་ཡིན་རུང་ཁོང་ཚོས་རྒྱུ་མཚན་ཞིག་མཐོང་ནས་ང་ཚོར་རྒྱབ་སྐྱོར་བྱེད་ཀྱི་ཡོད། རྒྱུ་མཚན་ཞིག་མེད་ན་ཁོང་ཚོས་རྒྱབ་སྐྱོར་ཏན་ཏན་བྱེད་ཀྱི་མ་རེད་བསམ་གྱི་འདུག ང་ཚོའི་ནང་དམིགས་བསལ་གྱིས་ན་གཞོན་ཚོས་དབུ་མའི་ལམ་གྱི་སྲིད་ཇུས་ཀྱི་བརྒྱུད་རིམ་ཆ་ཚང་ཤེས་ཀྱི་ཡོད་ན་སྐད་ཡིག་མི་འདྲ་བའི་ཐོག་ནས་འགྲེལ་བཤད་རྒྱག་ཐུབ་ཀྱི་རེད་ལ། རང་བཞིན་གྱིས་མི་རིགས་གཞན་ལ་གོ་རྟོགས་སྤེལ་ཐུབ་ཀྱི་རེད། ད་ལྟ་དབུ་མའི་ལམ་གྱི་རྒྱུན་ལས་རྣམས་ཀྱིས་སློབ་གྲྭ་ཁག་དང་མཐོ་སློབ་ཁག ཚོགས་སྡེ་ཁག་འདྲ་མིན་ལ་དབུ་མའི་ལམ་གྱི་སྐོར་ལ་གོ་རྟོགས་སྤེལ་རྒྱུའི་ཐོག་ལ་ཧུར་ཐག་འབད་ཐག་གནང་གི་ཡོད་པ་རེད། དེ་བཞིན་འདི་ལ་ང་ཚོའི་ངོས་ནས་རྒྱབ་སྐྱོར་བྱ་རྒྱུ་ནི་ཧ་ཅང་གི་གལ་ཆེན་པོ་ཆགས་ཀྱི་འདུག ཅེས་གསུངས་སོང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
