རང་ལོ་ ༡༥ མན་གྱི་ན་ཆུང་བྱིས་པ་ཚོ་ཆུང་དུས་ནས་རྐང་སྤོལ་ལ་དོ་དབྱིངས་ཡོང་ཆེད་བོད་མིའི་སློབ་གྲྭ་ཁག་དྲུག་ནས་ཕོ་མོ་གཉིས་ཀྱི་རུ་ཁག་བཅུ་གཉིས་དང་སློབ་སྟོན་པ་བཅས་ཁྱོན་མི་གྲངས་ ༢༠༠ ཙམ་གྱིས་སྟོང་བཙན་རྐང་སྤོལ་རྩེད་འགྲན་ནང་མཉམ ཞུགས་བྱས་འདུག
ཕྱི་ཚེས་ ༢༡ ནས་ ༢༨ བར་ཉིན་གྲངས་དགུའི་རིང་དྷ་རམ་ས་ལར་སྟོང་བཙན་རྐང་སྤོལ་རྩེད་འགྲན་འཚོག་གི་འདུག
ཁ་སང་ཕྱི་ཚེས་ ༢༡ ནས་ ༢༨ བར་ཉིན་གྲངས་་དགུའི་རིང་བཞུགས་སྒར་ཁུལ་དུ་བོད་རྒྱལ་ཡོངས་རྩེད་རིགས་ཚོགས་པའི་གོ་སྒྲིག་འོག ཧི་མ་ཅལ་མངའ་སྡེའི་ཁུལ་དུ་ཡོད་པའི་རང་ལོ་ ༡༥ མན་གྱི་སློབ་གྲྭ་ཁག་གི་བུ་དང་བུ་མོའི་་སྟོང་བཙན་རྐང་སྤོལ་འགྲན་ཚོགས་ཞེས་པ་ཞིག་འཚོག་བཞིན་འདུག ཁ་སང་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས་ཕེབས་ཡོད་འདུག་ལ། སྟོང་བཙན་རྐང་སྤོལ་འགྲན་ཚོགས་ཐེངས་དང་པོའི་ཐོག་སློབ་གྲྭ་ཁག་དྲུག་གི་ཕོ་མོའི་རྐང་སྤོལ་རུ་ཁག་ ༡༢ མཉམ་ཞུགས་བྱས་འདུག
དེའི་ཐད་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བྱང་ཆུབ་རྒྱལ་མཚན་ལགས་ཀྱིས་འདི་གའི་གསར་འགོད་པར་ཁ་པར་བརྒྱུད། ད་ལན་སྟོང་བཙན་རྐང་སྤོལ་རྩེད་འགྲན་དེ་འཚོག་དགོས་པའི་དམིགས་ཡུལ་ནི། སློབ་མ་རྣམས་ལ་རྐང་སྤོལ་རྨང་གཞི་ཡར་རྒྱས་གཏོང་ཐབས་དང་། ལོ་ན་ཆུང་བའི་སློབ་མ་རྣམས་ལ་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་བཞིན་རྩེད་འགྲན་གྱི་སྡིངས་ཆ་བསྐྲུན་ཆེད་ཡིན་ཞིང་། རྒྱལ་ཡུམ་ཆེན་མོ་རྗེས་དྲན་གྱི་རྩེད་འགྲན་ལྟ་བུར་མཚོན་ན། བཙན་བྱོལ་བོད་མིའི་རྐང་སྤོལ་རྩེད་འགྲན་གྱི་སྡིངས་ཆ་ཆེ་ཤོས་ཤིག་ཡིན་ཡང་། ལོ་ན་ཆུང་བའི་སློབ་མ་རྣམས་ལ་འདི་ལྟ་བུའི་སྡིངས་ཆ་ཞིག་མེད་པས། རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་བཞིན་རྩེད་འགྲན་གྱི་ཁྲིམས་སྒྲིག་རང་བཞིན་ལྡན་པའི་སྡིངས་ཆ་ཞིག་ལོ་ན་ཆུང་བ་རྣམས་ལ་བསྐྲུན་ཐུབ་ན་ཕུགས་རྒྱང་རིང་པོ་ལ་ཕན་ཐོགས་ཡོད་པའི་ཁར། ལོ་ན་ཆུང་བ་རྣམས་ལ་གོ་སྐབས་ཡག་པོ་ཞིག་བསྐྲུན་ཐུབ་པའི་དམིགས་ཡུལ་བཟུང་ཡོད། ཅེས་བརྗོད་བྱུང་།
ཡང་ཁོང་གིས། ད་ལན་གྱི་རྩེད་འགྲན་དེ་དབུས་འཕྲོད་བསྟེན་ལས་ཁུངས་བརྒྱུད། དབུས་བོད་མིའི་སྒྲིག་འཛུགས་ཀྱིས་རོགས་དངུལ་གནང་བ་དང་། དེ་བཞིན་སྒེར་གྱི་སྦྱིན་བདག་ཁ་ཤས་ཤིག་ཡོད་ལ། ཁྱོན་འགྲོ་སོང་ཆེད་ཧིན་སྒོར་འབུམ་བཅུ་གཅིག་ལྷག་ཅིག་ཡོད་པ་རེད། ད་ལོར་སྟོང་བཙན་གྱི་རྩེད་འགྲན་དེ་ཐེངས་དང་པོ་ཡིན་པས། རྗེས་མ་ནས་ཡར་རྒྱས་གཏོང་དགོས་རིགས་ཡོད་ཀྱང་། ཕྱོགས་ཡོངས་ནས་གྲ་སྒྲིག་གང་ཡོང་ཡོང་ཞིག་བྱས་ཡོད་ལ། རྩེད་འགྲན་དེའི་ཤན་འབྱེད་པ་རྣམས་ཧི་མ་ཅལ་མངའ་སྡེའི་རྐང་སྤོལ་མཐུན་ཚོགས་(HPFA)ནས་ཆེད་དུ་གདན་འདྲེན་ཞུས་ཡོད། ཅེས་དང་། ཡང་ཁོང་གིས། ད་ལན་གྱི་རྩེད་འགྲན་དེ་ད་ལན་ཐེངས་པོ་དང་པོ་ཡིན་ཡང་། ཕྱིས་སུ་སྐད་གྲགས་ཆེ་ཇེར་དང་དར་ཁྱབ་ཇེ་ཆེར་འགྲོ་དུས། རྩེད་འགྲན་ཁྲོད་མཉམ་ཞུགས་བྱེད་མཁན་ཇེ་མང་དུ་འགྲོ་ཡི་རེད་སེམས་ཀྱི་འདུག་ལ། སྦྱོང་བརྡར་དང་རྩེད་འགྲན་གྱི་རྣམ་པའང་ཇེ་ཡག་ཏུ་འགྲོ་ཡི་རེད་སེམས་ཀྱི་འདུག རྩེད་འགྲན་དེ་་བོད་རྒྱལ་ཡོངས་རྩེད་རིགས་ཚོགས་པ་གཅིག་པུ་མིན་པར་སློབ་གྲྭ་ཁག་གིས་མཉམ་རུབ་ཀྱིས་ཤུགས་རྒྱག་པ་ཡིན་ན། རྩེད་ཐང་དང་རྩེད་རིགས་ཀྱི་རྣམ་པ་སོགས་ཀྱི་ཐོག་ནས་ཡར་རྒྱས་གཏོང་ཐུབ་ཀྱི་རེད། ཅེས་སོགས་བརྗོད་བྱུང་།
ཉིན་གྲངས་དགུའི་རིང་དྷ་སྟེང་བོད་ཁྱིམ་དང་དྷ་ཤོད་བོད་ཁྱིམ་གྱི་རྩེད་ཐང་དུ་རྩེད་འགྲན་བྱས་དང་བྱེད་མུས་ཡིན་པའི་སྟོང་བཙན་རྐང་སྤོལ་རྩེད་འགྲན་ཁྲོད། དྷ་སྟེང་བོད་ཁྱིམ་དང་། གོ་པལ་པུར་བོད་ཁྱིམ། སུ་ཇ་བོད་ཁྱིམ། མེས་དབོན་གཙུག་ལག་དཔེ་སྟོན་སློབ་གྲྭ། སིམ་ལ་སམ་བྷོ་ཊ། དྷོ་ལན་ཇི་སམ་བྷོ་ཊ་བཅས་ཀྱི་ཕོ་མོ་གཉིས་ཀྱི་རུ་ཁག་བཅུ་གཉིས་དང་སློབ་སྟོན་པ་བཅས་ཁྱོན་མི་གྲངས་ ༢༠༠ ཙམ་གྱིས་མཉམ ཞུགས་གནང་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
