བོད་མིར་དགའ་ཞེན་ཆེ་བའི་རྒྱ་རིགས་བུད་མེད་ཅིག་འཛིན་བཟུང་བྱས་ཏེ་གོ་ཐོས་མེད་པར་གྱུར།

བོད་ཀྱི་ཆོས་དང་རིག་གཞུང་སྐད་ཡིག་སོགས་ལ་དོ་དབྱིངས་ཆེ་བའི་རྒྱ་རིགས་བུད་མེད་བོད་མིང་ལ་དབང་མཚོ་དང་རྒྱ་མིང་ལ་ཀྲང་ཡ་ཌི་ལགས་རྒྱ་ནག་གཞུང་གིས་འཛིན་བཟུང་བཙན་འཁྲིད་བྱས་ཏེ་ཟླ་བ་གཉིས་ཙམ་འགྲོ་བཞིན་ཡོད་ཀྱང་གོ་ཐོས་གང་ཡང་མེད་པར་གྱུར་འདུག

འདི་ལོའི་ཕྱི་ཟླ ༧ པའི་ནང་ཧྥ་རན་སིར་སློབ་སྦྱོང་བྱེད་བཞིན་པའི་རྒྱ་རིགས་བུད་མེད་ཀྲང་ཡ་ཌིའམ་བོད་མིང་ལ་དབང་མཚོ་ལགས་ཕ་མ་གཉིས་དང་ནང་མིར་ཐུག་འཕྲད་དུ་ཕྱིན་རྗེས།  ཟླ་དེའི་ཕྱི་ཚེས་ ༣༡ ཉིན་བོད་ཡུན་ནན་ཞིང་ཆེན་གྱི་ནང་ནས་རྒྱ་ནག་གཞུང་གིས་ཁོང་མོ་གློ་བུར་དུ་འཛིན་བཟུང་བཙན་འཁྲིད་བྱས་ཡོད་པ་དང་། ཟླ་གཅིག་དང་ཉིན་གྲངས་ ༢༣ ལྷག་འགྲོ་བཞིན་ཡོད་ཀྱང་ཁོང་མོའི་ཁ་པར་སོགས་ཚང་མ་རྒྱ་གཞུང་ཉེན་རྟོག་པས་བཙན་འཕྲོད་བྱས་ཡོད་སྟབས། ཁོང་མོའི་ནང་མི་ཚོས་ཀྱང་གནས་སྟངས་གང་ཡང་ཤེས་རྟོགས་མི་ཐུབ་པར་གྱུར་ཡོད་འདུག

དེ་རིང་ཕྱི་ཚེས་ ༢༣ ཉིན་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་དེ་འབྲེལ་གསར་འགོད་བསྒྲགས་གཏམ་ཞིག་སྤེལ་བའི་ནང་དུ། རྒྱ་ནག་གི་དབང་འཛིན་པས་རང་ལོ་ ༢༢ ཡིན་པའི་སློབ་ཕྲུག་ལས་འགུལ་བ་ཀྲང་ཡ་ཌི་ཡིས་མི་རིགས་དྲང་བདེན་མ་བྱུང་བ་དང་། འཛམ་གླིང་ཡོངས་ཀྱི་གཞོན་སྐྱེས་མང་པོ་ལྟར་ཞི་བདེའི་ངང་ཐོབ་ཐང་ལོངས་སུ་སྤྱོད་འདོད་ཡོད་པའི་སྐད་ཆ་བཤད་པ་དེ་ཁྲིམས་འགལ་གྱི་བྱ་སྤྱོད་ཅིག་གཏན་ནས་མིན་པས། ཁོང་མོ་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་གནང་འདུག

ཁོང་མོའི་དགའ་རོགས་སྐལ་བཟང་ཡར་འཕེལ་ལགས་ཀྱིས་འདི་ག་གསར་ཁང་ལ། ཐོག་མར་ངེད་གཉིས་ཐུག་དུས་ཁོང་མོས་བོད་ཡིག་གི་ཀ་སྨད་སུམ་ཅུ་ཤེས་ཀྱི་འདུག་ཀྱང་། ཚིག་གྲུབ་སོགས་བཟོ་ཤེས་ཀྱི་མེད་པས་བོད་ཀྱི་སྐད་ཡིག་ལ་དུང་ཞེན་དང་བག་ཆགས་ཟབ་མོ་ཡོད་ན། ངས་བོད་ཡིག་བསླབ་དགོས་ཟེར་ནས་ཐོག་མར་བློ་གསལ་འཇུག་ངོགས་ཀྱི་རྩ་ཚིག་སོགས་བློར་འཛིན་དུ་བཅུག་ནས་སུམ་རྟགས་དག་གསུམ་སློབ་མགོ་བཙུགས་པ་ཡིན། མོས་དྲ་ལམ་ནས་ཀྱང་བོད་ཡིག་སློབ་ཚན་གཉིས་བླངས་ནས་འབད་བརྩོན་བྱས་ཏེ་བོད་ཡིག་ཡག་པོ་ཆགས་ཡོད་རེད། ཅེས་བརྗོད་བྱུང་། 

ཡང་དབང་མཚོ་ལགས་ཀྱིས་ཁྲིམས་འགལ་ནག་ཉེས་གང་ཡང་བསགས་མེད་སྐོར་ལ་ཁོང་གིས། རྒྱ་ནག་གཞུང་གིས་ཁོང་མོར་སྙོན་འཛུགས་ག་རེ་བྱས་མིན་ཐད་ད་ལྟའང་ཁ་གསལ་མེད་ནའང་། མོ་རང་བོད་ཀྱི་སྐད་ཡིག་དང་རིག་གཞུང་ལ་དོ་སྣང་དང་དགའ་ཞེན་ཆེན་པོ་ཡོད་པ་དེ་རྒྱ་ནག་གཞུང་གིས་ཆབ་སྲིད་ཀྱི་ངོ་བོར་བསྒྱུར་ནས་འཛིན་བཟུང་བྱས་པ་མིན་འགྲོ་བསམ་གྱི་འདུག ཅེས་དང་། ཁོང་མོ་ནི་བོད་དོན་རྒྱབ་སྐྱོར་གླེང་སྟེགས་ཀྱི་རྩོམ་སྒྲིག་པ་ཡིན་པ་དངོས་བདེན་ཡིན་ཡང་། གླེང་སྟེགས་དེའི་སྟེང་ནས་དངོས་གནས་ཀྱི་གནས་སྟངས་དང་རང་བྱུང་ཁམས་གཙོས་བོད་ཀྱི་སྐད་ཡིག་དང་རིག་གཞུང་སོགས་ཀྱི་ཐད་ལ་དྲང་བདེན་གྱི་རྩོམ་ཡིག་སྤེལ་རྒྱུས་མཚོན་པའི་སྲུང་སྐྱོབ་དགོས་པའི་གླེང་སློང་གནང་གི་ཡོད་པ་རེད།  དེ་ནི་རིག་གཞུང་ཞིག་ལ་དུང་བ་དང་དགའ་ཞེན་བཅངས་སྟངས་ཤིག་ཡིན་པ་ལས་ཆབ་སྲིད་ཀྱི་གནད་དོན་ཞིག་གཏན་ནས་མིན་སྐོར་སོགས་བརྗོད་བྱུང་།

ད་ལྟ་རང་ལོ་ ༢༢ ཡིན་པའི་དབང་མཚོ་ལགས་ནི་རྒྱ་ནག་ཧུ་ནན་ཞིང་ཆེན་ནས་ཡིན ཞིང་།  ཕྱི་ལོ་ ༢༠༢༢ ལོ་ནས་ཧྥ་རན་སིར་ཕྱིན་ཏེ་ཚོང་དོན་རིག་པའི་སློབ་གཉེར་བྱས་ཡོད་འདུག་ལ། སློབ་གཉེར་གྱི་ཞོར་དུ་འགྲོ་བ་མིའི་ཐོབ་ཐང་སྲུང་སྐྱོབ་ཆེད་ཕྱག་ལས་གང་མང་གནང་ཡོད་འདུག  ཁོང་མོ་ནི་བོད་བརྒྱུད་ནང་བསྟན་གྱི་རྗེས་འཇུག་པ་རྣལ་མ་ཞིག་ཡིན་པ་མ་ཟད། དུས་རྒྱུན་ཁ་འདོན་དགེ་སྦྱོར་བྱེད་པར་དགའ་ཞིང་། བོད་སྐད་བོད་ཡིག་ལ་དོན་གཉེར་ཧ་ཅང་ཆེ་བ་སོགས་བོད་དང་བོད་མིར་དགའ་ཞེན་ཆེན་པོ་ཡོད་མཁན་ཞིག་ཡིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།