རྒྱ་ནག་དྲ་ལམ་དོ་དམ་ལས་ཁུངས་ཀྱིས་ཟླ་གཉིས་རིང་སྤྱི་ཚོགས་དྲ་ལམ་ཡོངས་ལ་སྔར་ལས་དམ་དྲག་ནན་པོ་བྱེད་ཀྱི་ཡོད་སྐོར་བསྒྲགས་ཡོད་པ་མ་ཟད་གྲགས་ཅན་གྱི་དྲ་རྒྱ་དང་སྤྱི་ཚོགས་དྲ་གནས་ཁག་ཅིག་ལ་ནག་ཉེས་ཕོག་ཡོད་སྐོར་བསྒྲགས་འདུག
ཟླ་འདིའི་ཕྱི་ཚེས་ ༢༢ ཉིན་རྒྱ་ནག་དྲ་ལམ་དོ་དམ་ལས་ཁུངས་ (The Cyberspace Administration of China) ཀྱིས་ཟླ་ ༢ རིང་སྤྱི་ཚོགས་དྲ་ལམ་གྱི་ཁྲིམས་འགལ་བྱ་སྤྱོད་རིགས་ལ་ལྟ་རྟོག་དང་སྟངས་འཛིན་ནན་པོ་བྱེད་ཀྱི་ཡོད་སྐོར་བསྒྲགས་འདུག་ལ། ཁ་སང་ཕྱི་ཚེས་ ༢༣ ཉིན་པེ་ཅིན་དུ་ཡོད་པའི་བྷའེ་ཊི་ཌན་སི་ (ByteDance)སྟེ། རྒྱལ་མཚམས་ལས་བརྒལ་བའི་དྲ་འབྲེལ་ཚན་རྩལ་ཚོང་གཉེར་ཁང་དང་། ཚོང་གཉེར་ཁང་དེའི་གསར་འགྱུར་དྲ་བ་ (Jinri Toutiao) ཞེས་པའི་དེ་རིང་གི་གསར་འགྱུར་གནད་བསྡུས། དེ་བཞིན་རྒྱ་ནག་གི་དྲ་ལམ་ཚོང་གཉེར་ཁང་གྲགས་ཅན་ཨ་ལི་བྷ་བྷ་ (Alibaba) ཡི་དྲ་བཤེར་ཡོ་ཆས་ (UCWeb) བཅས་ཀྱིས་གནོད་འཚེ་ཅན་གྱི་གནས་ཚུལ་ཁྱབ་སྤེལ་བྱས་པའི་ཉེས་མིང་འོག་ཁྲིམས་དོན་ཉེས་ཆད་ཕོག་ཡོད་སྐོར་བསྒྲགས་འདུག གོང་གི་དྲ་རྒྱ་དེ་དག་སྒོ་འབྱེད་ཐུབ་ཀྱི་འདུག་ལ། ཉེས་ཆད་ག་རེ་བཅད་མིན་སོགས་ཀྱི་གནས་ཚུལ་གསལ་ཁ་མི་འདུག
རྒྱ་ནག་དང་རྒྱལ་སྤྱིའི་རང་བཞིན་གྱི་(Tik Tok) དང་། དེ་རིང་གི་གསར་འགྱུར་གནད་བསྡུས་ཞེས་པའི་གསར་ཁང་གི་བདག་པོ་བྷའེ་ཊི་ཌན་སི་ཚོང་གཉེར་ཁང་ཡིན་ཞིང་། གསར་ཁང་དེ་ལ་དུས་བཀག་ནང་ཚུད་དུ་གནོད་འཚེ་ཅན་གྱི་ནང་དོན་རིགས་ལ་བཅོས་སྒྲིག་བྱེད་དགོས་པའི་བཀའ་བཏང་ཡོད་པ་མ་ཟད། ནང་དོན་དེ་དང་འབྲེལ་ནས་འགན་འཁུར་བ་རྣམས་ལ་སྟངས་འཛིན་ནན་པོ་བྱ་རྒྱུའི་ཉེན་བརྡ་བཏང་ཡོད་འདུག དེ་བཞིན་ཨ་ལི་བྷ་བྷ་ཡི་དྲ་བཤེར་ཡོ་ཆས་ (UCWeb) ཀྱིས་ལོ་ན་མ་སོན་པའི་བྱིས་པ་ཡི་སྒེར་གྱི་གནས་ཚུལ་སྤེལ་བ་དང་། སེམས་ཁམས་ལ་གནོད་པའི་ཚིག་སྦྱོར་ངན་པ་སྤེལ་བ་སོགས་ཚོར་བ་སྐྱེན་པོ་དང་ངན་སེམས་ཅན་གྱི་བརྗོད་གཞི་སོགས་འདོན་སྤེལ་བྱས་ཡོད་པའི་ནག་ཉེས་བཙུགས་འདུག
གཞན་ཡང་རྒྱ་ནག་གཞུང་གི་དེ་འབྲེལ་གསར་འགྱུར་ནང་དུ་ཟླ་འདིའི་ནང་རྒྱ་ནག་གི་སྐད་གྲགས་ཆེ་བའི་སྤྱི་ཚོགས་དྲ་གནས་ཝའེ་པོའོ་ (Weibo) དང་། མགྱོགས་འཕྲིན་ (Kuaishou)། ཤའོ་ཧོང་ཧྲུའུ་ (Xiaohongshu) བཅས་ཀྱིས་གནས་ཚུལ་ལ་སྟངས་འཛིན་མ་བྱས་པའི་ནག་ཉེས་འོག་ཉེས་ཆད་བཅད་ཡོད་སྐོར་བརྗོད་འདུག
རྒྱ་ནག་གཞུང་གིས་དྲ་རྒྱའི་སྤྱི་ཚོགས་ཡར་རྒྱས་དང་བདེ་འཇགས་སྲུང་སྐྱོབ་དགོས་སྐོར་བརྗོད་དེ་དྲ་འབྲེལ་ཆ་འཕྲིན་ཞབས་ཞུའི་གཏན་འབེབས་ཞེས་པ་ཞིག་ཁ་གསལ་མ་ཡིན་པའི་ཐོག་ནས་གཏན་འབེབས་བྱས་ཡོད་པ་དང་། ཕྱི་ལོ་ ༢༠༡༧ ཟླ་ ༦ ནས་རྒྱ་ནག་རྒྱལ་ཁབ་དྲ་ལམ་དོ་དམ་ཁང་གིས་སྤྱི་ཚོགས་དྲ་ལམ་གྱི་བདེ་འཇགས་སྐོར་ལ་སྒྲིག་ཡིག་གཉིས་ཏེ། ཆ་འཕྲིན་གླེང་སྟེགས་ལ་སྟངས་འཛིན་བྱེད་པའི་སྒྲིག་གཞི་དང་དྲ་འབྲེལ་ཚོགས་ཆུང་ལ་སྟངས་འཛིན་བྱེད་པའི་སྒྲིག་གཞི་ཟེར་བ་གཉིས་གཏན་འབེབ་བྱས་ཏེ་ལག་བསྟར་བྱེད་མགོ་བརྩམས་ཡོད་པ་དང་། སྒྲིག་གཞི་དེ་གཉིས་ནང་ཆབ་སྲིད་ཀྱི་གནད་དོན་ཡོད་པའི་ནང་དོན་མི་སྐུར་བ་དང་། གསང་བ་དང་འབྲེལ་བའི་ནང་ཁུལ་གྱི་དཔྱད་ཡིག་མི་སྐུར་བ། དམག་དོན་གྱི་དཔྱད་ཡིག་མི་སྐུར་བ། འཆལ་གཏམ་ལ་ཡིད་ཆེས་མི་བྱེད་པ་དང་མི་བཤད་པ། རྒྱལ་ཁབ་ཀྱི་གསང་བ་དང་འབྲེལ་བའི་ཡིག་ཆ་མི་སྐུར་བ་སོགས་གསལ་ཡོད་པ་མ་ཟད། སྐད་འཕྲིན་ཚོགས་པ་དང་གླེང་སྟེགས་ཚོགས་པ། དངུལ་བརྒྱུད་སྤྲོད་ཚོགས་པ་སོགས་འཛུགས་མཁན་ཚོས་ངེས་པར་དུ་ཚོགས་པའི་ནང་གནས་ཚུལ་ཡོངས་ལ་ཁྲིམས་ཀྱི་འགན་འཁུར་དགོས་སྐོར་བཀོད་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
