ཉེ་ལམ་རྒྱ་ནག་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་དུ། སྐབས་གཉིས་པའི་རྒྱ་ནག་གི་གསེར་གྱི་དོམ་ཁྲའི་གློག་བརྙན་གཟེངས་རྟགས་སྤྲོད་པའི་མཛད་སྒོ་འཚོགས་ཡོད་ཅིང་། སྐབས་དེར་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་སུ་གློག་བརྙན་གསའ་དང་འབྲེལ་ནས་འཁྲབ་ཁྲིད་པ་རྩེ་གྲའི་གཟེངས་རྟགས་ཐོབ་འདུག
དེ་འབྲེལ་རྒྱ་ནག་གི་གསར་ལམ་ཁག་གིས་གནས་ཚུལ་སྤེལ་བ་ལྟར་ན། དོམ་ཁྲའི་གསེར་གྱི་གཟེངས་རྟགས་སྤྲོད་པའི་མཛད་སྒོའི་སྐབས་པདྨ་ཚེ་བརྟན་ལགས་སུ་འཁྲབ་ཁྲིད་པ་རྩེ་གྲའི་གཟེངས་རྟགས་སྤྲོད་སྐབས་ནི་སེམས་ཚོར་ཆེ་ཤོས་ཀྱི་དུས་སྐབས་ཤིག་ཏུ་གྱུར་ཡོད་ཅིང་། པདྨ་ཚེ་བརྟན་ལགས་ཀྱི་བུ་འཇིགས་མེད་འཕྲིན་ལས་ཀྱིས། རང་གི་ཕ་དམ་པའི་ཚབ་ཏུ་གཟེངས་རྟགས་བླངས་རྗེས་ཚོར་བ་དང་བཅས། གཟེངས་བསྟོད་འདི་ནི་ཨ་ཕའི་སྒྱུ་རྩལ་གྱི་འཚོ་བར་གུས་འདུད་བྱེད་པའི་བྱ་དགའ་ཞིག་ཡིན་པ་དང་། གློག་བརྙན་གསའ་ནི་ངའི་ཨ་ཕའི་བོད་སྐད་གློག་བརྙན་བརྒྱད་པ་ཡིན། གློག་བརྙན་འདིས་ཁོང་གི་ཚེ་གང་གི་ཉམས་མྱོང་དང་བསམ་བློ། ཕྱིར་དྲན་སོགས་གཅིག་ཏུ་བསྒྲིལ་ནས་དུས་ཚོད་དང་ས་མཚམས་ལས་བརྒལ་བའི་བརྩེ་བ་དང་སྙིང་རྗེའི་སྟོབས་ཤུགས་ཁུར་ཡོད། ཅེས་བརྗོད་འདུག
འདི་གའི་གསར་འགོད་པས་རྒྱ་གར་ནང་རྟེན་གཞི་བྱས་པའི་བོད་མི་གློག་བརྙན་བཟོ་བསྐྲུན་མཁན་ཁག་ཅིག་ལ་པདྨ་ཚེ་བརྟན་ལགས་འདས་གྲོངས་སུ་ཕྱིན་ནས་ལོ་གཉིས་ལྷག་འགྲོ་བཞིན་ཡོད་ཀྱང་། ད་དུང་ཁོང་གི་གློག་བརྙན་བརྩམས་ཆོས་ཁག་དང་འབྲེལ་ནས་ཁོང་ལ་གཟེངས་རྟགས་མི་ཉུང་བ་ཞིག་ཐོབ་དང་ཐོབ་བཞིན་ཡོད་པའི་གལ་གནད་སོགས་ཀྱི་སྐོར་ལ་སྐད་ཆ་དྲིས་སྐབས། པདྨ་ཚེ་བརྟན་ལགས་ཀྱི་གློག་བརྙན་ཁག་གིས་བོད་མིའི་འཚོ་བ་དང་རིག་གཞུང་། ཁོར་ཡུག་སོགས་གཞི་རྒྱ་ཆེ་བའི་བརྗོད་དོན་ཁག་སྟབས་བདེར་འགྲེལ་བརྗོད་བྱས་པའི་གློག་བརྙན་རྩེ་ཕུད་ཀྱི་བརྩམས་ཆོས་མཚོན་པ་དང་། དཔེར་ན་དབུགས་ལྒང་ལྟ་བུར་ཆ་མཚོན་ན། བོད་མིའི་རང་གཤིས་སུ་གྲུབ་པའི་ཁྲེལ་གཞུང་མཚོན་པ་མ་ཟད། འཕྲོད་བསྟེན་བདེ་ཐང་དང་སྤྱི་ཚོགས་ཤིག་གི་གྲུ་ཟུར་གལ་ཆེན་ཞིག་མཚོན་པར་བྱས་ཡོད་སྐོར་སོགས་བརྗོད་བྱུང་།
འདི་ལོའི་གསེར་གྱི་དོམ་ཁྲའི་གཟེངས་རྟགས་ཁྲོད། རྒྱལ་ཁབ་དང་ས་ཁུལ ༡༢༦ ནས་གློག་བརྙན་བརྩམས་ཆོས ༥༣༤༣ འཚོལ་བསྡུ་བྱས་ཡོད་པ་དང་། གཟེངས་རྟགས་ཀྱི་རྣམ་གྲངས་ཁྲོད་གློག་བརྙན་དང་བརྙན་འཕྲིན་མུ་འབྲེལ་འཁྲབ་ཚན། དངོས་བྱུང་གློག་བརྙན། འགུལ་རིས་གློག་བརྙན་བཅས་ཚན་ཁག་ཆེན་པོ་བཞིར་བྱ་དགའི་རྣམ་གྲངས་ ༢༧ ཡོད་འདུག དེའི་ནང་གློག་བརྙན་རྩེ་གྲ་དང་། འཁྲབ་ཁྲིད་པ་རྩེ་གྲ། འཁྲབ་གཞུང་རྩེ་གྲ་སོགས་ཚུད་ཡོད། དཔྱད་འདེམས་པའི་ཁྲོད་གློག་བརྙན་དང་བརྙན་འཕྲིན་རིག་གནས་ཁྱབ་ཁོངས་ཀྱི་ཉམས་མྱོང་གིས་ཕྱུག་པའི་ཆེད་མཁས་པ་ ༢༧ ཡོད་འདུག
བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་དམ་པ་པདྨ་ཚེ་བརྟན་ལགས་ནི་ཕྱི་ལོ་ ༡༩༦༩ ལོར་མདོ་སྨད་ཁྲི་ཀར་སྐྱེས་ཤིང་། གློག་བརྙན་འཁྲབ་ཁྲིད་པ་དང་། རྩོམ་པ་པོ། ལོ་ཙཱ་བ་བཅས་ཡིན་ཞིང་། ཕྱི་ལོ་ ༢༠༠༢ ལོར་པེ་ཅིན་གློག་བརྙན་སློབ་གླིང་དུ་གློག་བརྙན་སྐོར་ལ་ཆེད་སྦྱོང་གནང་རྗེས། འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་བཅས་ཀྱི་ལས་ཀ་གཅིག་ལྕོགས་སུ་གནང་། ཁོང་ལ་ལག་དམར་དང་ལྷིང་འཇགས་ཀྱི་མ་ཎི་རྡོ་འབུམ་དང་། འཚོལ། ཁྱི་རྒན། གཡང་མདའ། དབུགས་ལྒང་། ཐར་ལོ། གསའ་སོགས་གློག་བརྙན་རིགས་ ༡༤ ལྷག་ཡོད་ཅིང་། བོད་ཕྱི་ནང་གཉིས་ནས་དགའ་བསུ་ཆེན་པོ་ཐོབ་ཡོད་པ་མ་ཟད། བོད་ནང་གི་གློག་བརྙན་འཁྲབ་ཁྲིད་པའི་ཚབ་མཚོན་མི་སྣར་བརྩི་མཁན་ཡང་ཡོད་ལ། ཁོང་གིས་གློག་བརྙན་བརྩམས་ཆོས་ཁག་ལ་རྒྱ་ནག་ཙམ་དུ་མ་ཟད། གྲགས་ཆེ་བའི་རྒྱལ་སྤྱིའི་གློག་བརྙན་དུས་སྟོན་ཆེ་ཁག་ནས་ཀྱང་གཟེངས་རྟགས་ཁག་ཅིག་ཐོབ་མྱོང་། ཁོང་གི་གློག་བརྙན་ཐར་ལོ་ལ་རྒྱ་ནག་དང་རྒྱལ་སྤྱིའི་གཟེངས་རྟགས་མི་འདྲ་བ་ ༡༢ ཐོབ། ཕྱི་ལོ་ ༢༠༢༣ ཟླ་ ༥ ཚེས་ ༨ ཉིན་བོད་ཀྱི་རྒྱལ་ས་ལྷ་སར་པདྨ་ཚེ་བརྟན་གློ་བུར་དུ་འདས་གྲོངས་སུ་ཕྱིན་ཡོད།
གསར་འགོད་པ། སྐལ་བཟང་སྦྱིན་པ།
