ང་བོད་པ་ཡིན། ངས་བོད་ལ་འོས་འཕེན་ཞེས་པའི་འབོད་ཚིག་འོག ཕྱི་ལོ་ ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་ལས་སྔོན་འགྲོའི་འོས་བསྡུ་དེ་ཕྱི་ལོ་ ༢༠༢༦ ཟླ་ ༢ ཚེས་ ༡ ཉིན་དང་དངོས་གཞིའི་འོས་བསྡུ་དེ་ཕྱི་ལོ་ ༢༠༢༦ ཟླ་ ༤ ཚེས་ ༢༦ བཅས་ཉིན་བརྒྱ་དུས་གཅིག་ཏུ་སྲིད་སྤྱི་གཉིས་ཀྱི་འོས་བསྡུ་བྱ་རྒྱུ་ཡིན་པའི་གསལ་བསྒྲགས་བསྐྱངས་སོང་།
དེ་རིང་ཕྱི་ཚེས་ ༧ ཉིན་གྱི་སྔ་དྲོའི་ཆུ་ཚོད་ ༡༡ སྟེང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་དང་འགན་འཛིན་ལས་འཕར་ཚེ་རིང་གཡུ་སྒྲོན་ལགས་དང་སྣང་ས་ཆོས་སྒྲོན་ལགས་བཅས་དབུ་བཞུགས་ཐོག་ཕྱི་ལོ་ ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་དངོས་སུ་དབུ་འཛུགས་ཞུས་པའི་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་། སྐབས་དེར་འོས་བསྡུའི་འགན་འཛིན་བློ་བཟང་ཡེ་ཤེས་ལགས་ཀྱིས། སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༨ པའི་སྔོན་འགྲོའི་འོས་བསྡུ་དེ། ཕྱི་ལོ་ ༢༠༢༦ ཟླ་ ༢ ཚེས་ ༡ ཉིན་དང་དངོས་གཞི་འོས་བསྡུ་ཕྱི་ལོ་ ༢༠༢༦ ཟླ་ ༤ ཚེས་ ༢༦ ཉིན་གནང་གཏན་ཁེལ་བའི་ཡོངས་ཁྱབ་གསལ་བསྒྲགས་བསྐྱངས་པ་དང་བསྟུན། ཕྱི་ལོ་ ༢༠༢༥་་༢༦ ལོའི་འོས་བསྡུ་ཆེན་མོའི་སྐབས་རྒྱ་ཆེ་མང་ཚོགས་ནས་འོས་བསྡུའི་ལས་དོན་ཚགས་ཚུད་ཡོང་སླད་ཕྱ་གྲུ་མཉམ་འདེགས་ཡོང་བའི་འབོད་སྐུལ་ཤུགས་དྲག་ཞུ་བཞིན་ཡོད་པ་གསུངས་སོང་།
དེ་འབྲེལ་གསར་འགོད་བསྒྲགས་གཏམ་ཞིག་སྤེལ་བའི་ནང་། ཐོག་མར་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་དང་། ས་གནས་འོས་བསྡུ་ལས་ཁང་རྣམས་ནས་བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞིའི་དགོངས་དོན། ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང༌། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུ་ཆེན་མོ་འདི་བཞིན་དྲང་བདེན་དང་། འདྲ་མཉམ། རང་དབང་བཅས་ཀྱི་ངང་སྒྲུབ་རྒྱུའི་ཆོད་སེམས་བརྟན་པོ་ཡོད། ཅེས་གསལ་འདུག
དབུས་འོས་བསྡུ་ལས་ཁང་གི་སྲིད་སྤྱི་གཉིས་ཀྱི་ཕྱི་ལོ་ ༢༠༢༦ ལོའི་འོས་བསྡུ་ཆེན་མོའི་དུས་ཚེས་དང་ལས་རིམ་གཏན་འབེབས་གནང་བའི་ཁྲོད། ཕྱི་ལོ་ ༢༠༢༥་་་༥༦ གི་སྲིད་སྤྱི་གཉིས་ཀྱི་སྔོན་འགྲོ་དང་དངོས་གཞིའི་འོས་བསྡུ་དེ། ཕྱི་ལོ་ ༢༠༢༦ ལོའི་ཟླ་ ༢ ཚེས་ ༡ དང་ཟླ་ ༤ ཚེས་ ༢༦ བཅས་ཉིན་བརྒྱ་དུས་གཅིག་ཏུ་གནང་གཏན་ཁེལ་ཡོད་པ་ལྟར། ཕྱི་ལོ་ ༢༠༢༦ ལོའི་ཟླ་ ༢ ཚེས་ ༢༥ ཉིན་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་གནང་རྒྱུ་དང་། ཕྱི་ལོ་ ༢༠༢༦ ཟླ་ ༥ ཚེས་ ༡༣ ཉིན་དངོས་གཞིའི་གྲུབ་འབྲས་ཏེ། འདེམས་ཐོན་སྲིད་སྐྱོང་དང་སྐབས་བཅོ་བརྒྱད་པའི་བོད་མི་མང་སྤྱི་འཐུས་རྣམས་ཀྱི་མཚན་གཞུང་ཡོངས་བསྒྲགས་བྱ་རྒྱུ་གཏན་ཁེལ་འདུག
དབུས་འོས་བསྡུ་ལས་ཁང་གི་གསལ་བསྒྲགས་ལྟར་ན། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༡༧, ༡༨, ༢༠, ༢༡ བཅས་ཀྱི་ནང་གསལ་ལྟར། ས་གནས་འོས་བསྡུའི་འགན་འཛིན་ཡོངས་ནས་འོས་འཕེན་པའི་མིང་གཞུང་སྔར་ཡོད་ཁག་གཞིར་བཟུང་གིས་དག་བཤེར་དང་། ས་གནས་སོ་སོའི་འོས་བསྡུའི་དེབ་སྐྱེལ་ཟིན་ཁག་ལ་བསྐྱར་ཞིབ་བཅོས་སྒྲིག་གིས། ཕྱི་ལོ་ ༢༠༢༥ ཟླ་ ༡༠ ཚེས་ ༨ ནས་ཟླ་ ༡༡ ཚེས་ ༨ བར་འོས་འཕེན་པའི་མིང་གཞུང་དེབ་འགོད་ངེས་པར་དུ་མཇུག་སྒྲིལ་ཐུབ་པ་དགོས་པ་དང་། ཕྱི་ལོ་ ༢༠༢༥ ཟླ་ ༡༡ ཚེས་ ༢༣ བར་བོད་ཀྱི་ཡུལ་མི་རང་ལོ་ ༡༨ ཧྲིལ་པོར་ལོན་རིགས་རྣམས་མིང་གཞུང་དེབ་འགོད་ཆོག་ཅིང་། ལྷག་པར་དུ་བཙན་བྱོལ་བོད་མིའི་དང་བླངས་དཔྱ་དངུལ་འབུལ་འབབ་ཕྱི་ལོ་ ༢༠༢༦ ཟླ་ ༣ ཚེས་ ༣༡ བར་གཙང་འབུལ་ཟིན་དགོས་ལ། འོས་བསྡུའི་ཐོབ་ཐང་ལེན་པར་ས་གནས་གང་དུ་ཕེབས་ཀྱང་དཔྱ་ཁྲལ་ལག་དེབ་མཉམ་འཁྱེར་དགོས་ཀྱི་ཡོད་པའི་གལ་གནད་སོགས་གླེང་འདུག་པ་མ་ཟད། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༦༧ ནང་གསེས་ ༤ པ་ནང་གསལ་ “ སྲིད་སྐྱོང་གི་དངོས་གཞིའི་འོས་གཞི་གཉིས་ལས་མ་ཉུང་བ་གསལ་བསྒྲགས་བྱེད་དགོས།་ ” ཞེས་གསལ་བ་ལྟར། ཕྱི་ལོ་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་གི་དངོས་གཞིའི་འོས་གཞི་གསལ་བསྒྲགས་ཞུ་ཕྱོགས་ཐད། སྒྲིག་སྲོལ་བཞིན་སྲིད་སྐྱོང་གི་སྔོན་འགྲོའི་འོས་ཐོབ་ཁོངས་ནས་ཨང་རིམ་རྩེ་གཏོགས་ཀྱིས་དངོས་གཞིའི་འོས་དམིགས་སུ་འོས་གཞི་གཉིས་འདོན་རྒྱུའི་ཐག་གཅོད་བྱས་འདུག
ད་དུང་བསྒྲགས་གཏམ་ནང་མང་ཚོགས་ལ་འབོད་སྐུལ་ཁག་ཅིག་ཞུས་ཡོད་པའི་ཁྲོད། དེང་གི་ཆར་སྤྱི་ཚོགས་ཀྱི་དཀའ་ངལ་ཆེ་གྲས་ཤིག་ནི། འགན་འཁུར་གང་ཡང་མེད་པའི་ཁ་པར་དང་སྤྱི་ཚོགས་དྲ་ལམ་སོགས་བེད་སྤྱོད་ལོག་གཏོང་གིས་བདེན་པ་མིན་པའི་གནས་ཚུལ་ཁྱབ་སྤེལ་གྱིས་སྤྱི་ཚོགས་འཁྲུགས་གཞི་དང་། བོད་མིའི་ཆིག་སྒྲིལ་ལ་གནོད་ཚབས་འགྲོ་ཉེན་ལ་སོང་། རྒྱ་ཆེ་མང་ཚོགས་ནས་དགོས་མེད་དཀྲོགས་རྐྱེན་རིགས་ལ་དབུ་མ་འཁོར་བར་དོགས་ཟོན་དང་། ཡོ་བསྲང་དོད་པོས་བྱ་ར་དམ་འཛིན་ངེས་པར་གནང་གལ་ཆེ། གསར་འགྱུར་བརྒྱུད་ལམ་ཁག་ནི་མང་གཙོའི་ཀ་བ་བཞི་པར་ངོས་འཛིན་ཞུས་པ་ལྟར་དངོས་ཡོད་གནས་ཚུལ་རྣམས་གཞི་རིམ་མང་ཚོགས་ལ་དུས་ཐོག་འཁྱོལ་ཐུབ་པའི་དམིགས་བསལ་ནུས་པ་དང་ལས་འགན་ཡོད་པ་བཞིན། ཕྱི་ལོ་ ༢༠༢༥་་༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་སྐབས་མང་ཚོགས་ལ་སྨན་པའི་གནས་ཚུལ་ཁྱབ་སྤེལ་རྒྱ་ཆེ་གནང་བའི་ཡིད་ཆེས་ཞུ་རྒྱུ་ཡིན།
དེ་སྔ་ཕྱི་ལོ་ ༢༠༢༠་་་༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་སྐབས་འཛམ་གླིང་ཁྱོན་ཡོངས་ལ་ཏོག་དབྱིབས་གཉན་རིམ་ཁྱབ་གདལ་ཤུགས་ཆེ་འགྲོ་བཞིན་པའི་ཛ་དྲག་དཀའ་ངལ་འོག་འོས་བསྡུའི་ལས་རིམ་ཁག་ལེགས་གྲུབ་ཐུབ་པ་ནི། སྐབས་དེའི་དབུས་འོས་བསྡུའི་འགན་འཛིན་རྣམ་པས་གཙོས། འཛམ་གླིང་ཡུལ་གྲུ་ཁག་ ༢༦ ནང་ས་གནས་འོས་བསྡུའི་ལས་ཁང་ ༥༨ ནང་ས་གནས་འོས་བསྡུའི་འགན་འཛིན་རྣམ་པས་འགན་འཁུར་ཆེ་བཞེས་ཐོག ཚོགས་མི་དང་། ཟུར་དཔང་། ལས་བྱེད་བཅས་བསྡོམས་གྲངས་ ༢༠༡༤ དང༌། དེ་བཞིན་བོད་མིའི་སྒྲིག་འཛུགས་དང་། བོད་མི་མང་ཚོགས་ནས་ཀྱང་དཀའ་ངལ་དུ་མར་གདོང་ལེན་གྱིས་དུས་ཐོག་འོས་བསྡུའི་ལས་དོན་ཚགས་ཚུད་ངང་གྲུབ་ཐུབ་པ་དེར་འབྲེལ་ཡོད་ཚང་མར་ཡི་རང་བསྔགས་བརྗོད་ཞུ་རྒྱུ་ཡིན། ཕྱོགས་མཚུངས་ད་ལན་ཕྱི་ལོ་ ༢༠༢༥་་༢༦ ལོའི་འོས་བསྡུ་ཆེན་མོའི་སྐབས་རྒྱ་ཆེ་མང་ཚོགས་ནས་འོས་བསྡུའི་ལས་དོན་ཚགས་ཚུད་ཡོང་སླད་ཕྱ་གྲུ་མཉམ་འདེགས་ཡོང་བའི་འབོད་སྐུལ་ཤུགས་དྲག་ཞུ་བཞིན་ཡོད། ཅེས་བརྗོད་འདུག
གསར་འགོད་པ། སྐལ་བཟང་སྦྱིན་པ།
