ས་རཱ་བོད་རིག་པའི་བགྲོ་གླེང་ཐེངས་བཅོ་བརྒྱད་པ་མཇུག་བསྒྲིལ་སོང་།

དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་ནས་གསར་འགོད་པས་ཕྱོགས་ལྷུང་མེད་པའི་ཐོག་ནས་དྲང་བདེན་དང་དངོས་ཡོད་གནས་ཚུལ་འགོད་དགོས་པ་དང་། ལོ་རྒྱུས་དང་འབྲེལ་ནས་རྒྱབ་ལྗོངས་ཀྱི་གནས་ཚུལ་ཉམས་ཞིབ་གནང་ཐུབ་ན་ཕན་ཐོགས་ཆེ་དགོས་སྐོར་གསུངས་སོང་།

དེ་རིང་ཕྱི་ཚེས་ ༨ ཉིན་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། གསར་འགྱུར་མེ་ལོང་གི་བརྗོད་གཞིའི་ཐོག་ས་རཱ་བོད་རིག་པའི་བགྲོ་གླེང་ཐེངས་བཅོ་བརྒྱད་པ་མཇུག་བསྒྲིལ་སོང་། མཇུག་བསྡོམས་མཛད་སྒོའི་ཐོག་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གཙོས་པའི་བོད་ཀྱི་དཔེ་མཛོད་ཁང་གི་ཉམས་ཞིབ་དང་པར་སྐྲུན་ཚན་པའི་འགན་འཛིན་ན་ག་སངས་རྒྱས་བསྟན་དར་ལགས་རྣམ་གཉིས་ཕེབས་འདུག

མཛད་སྒོའི་ཐོག་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གིས། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་དུ་ཞབས་སོར་འཁོད་ནས་ཐོག་མར་མ་སུ་རི་རུ་བཞུགས་སྒར་དང་པོ་ཡོད་པའི་སྐབས། ལོ་དེའི་ལོ་མཇུག་ཏུ་༧གོང་ས་མཆོག་གི་དགོངས་པ་དང་པོ་དེ་ཤེས་ཡོན་གྱི་ཐོག་ལ་བོད་ཕྲུག་ཚོར་ཤེས་ཡོན་སྤྲོད་རྒྱུ་དང་། ཤེས་ཡོན་མ་སྤྲོད་གོང་དུ་སློབ་དེབ་གྲ་སྒྲིག་བྱ་རྒྱུ། དེ་བཞིན་དགེ་རྒན་འོས་སྦྱོང་བྱ་རྒྱུ་སོགས་དགོངས་པ་བཞེས། དགེ་རྒན་འོས་སྦྱོང་སྐབས་སུ། སློབ་དེབ་དེ་འཛིན་གྲྭ་སོ་སོར་འཚམ་པའི་ཉམས་མྱོང་ཡོང་ཆེད་ཁག་ཅིག་ (Lucknow) རུ་དམའ་རིམ་དགེ་རྒན་གྱི་ཟབ་སྦྱོང་དུ་བཏང་འདུག དེ་ནས་སློབ་དེབ་ཚོགས་ཆུང་བཙུགས་པ་དང་། དེང་དུས་དང་མཐུན་པའི་སློབ་དེབ་ཕྱོགས་སྒྲིག་གནང་དགོས་པར་བརྟེན། འཛིན་གྲྭ་སོ་སོ་དང་ཕྲུ་གུའི་བསམ་བློའི་གནས་ཚད་ལ་བལྟས་ནས་བང་སྒྲིག་དགོས་པས། དེ་ལ་སློབ་སྟོན་པ་བྷ་བྷུ་མཐར་ཕྱིན་དང་། དེ་སྔའི་གཞུང་ཞབས་ཟུར་པ་ལྷ་ལུང་པ་བློ་བཟང་ཕུན་ཚོགས་རྣམ་པ་གཉིས་གདན་འདྲེན་ཞུས་ཏེ། སློབ་དེབ་ཕྱོགས་སྒྲིག་བྱེད་པའི་སྐབས། འཛིན་གྲྭ་སོ་སོར་དཔག་པའི་སློབ་དེབ་གང་འདྲ་བྱེད་དགོས་མིན་གྱི་ལམ་སྟོན་ཞུས་པ་རེད། ཅེས་དང་།

གོང་དུ་གསུངས་པ་ལྟར་བོད་ནང་དུ་གསར་འགྱུར་ཡོང་སའི་ཁུངས་གཙོ་བོ་དེ་མཐར་ཕྱིན་བྷ་བྷུ་ཡི་གསར་འགྱུར་རེད། ངས་ཞབས་ཕྱི་ཡུན་རིང་པོ་ཞུས་པའི་སྐབས། ཐེངས་གཅིག་སྐུ་མདུན་གྱིས་མཐར་ཕྱིན་བྷ་བྷུའི་རྒྱུད་པ་ཁུ་ནུ་རེད། ཕལ་ཆེར་ཆོས་ལུགས་ཡེ་ཤུ་མིན་འགྲོ་དེ་འདྲ་གསུང་གི་འདུག ཡིན་ནའང་ཁོང་བོད་པའི་ཐོག་ལ་དོ་སྣང་དང་སེམས་ཁུར་ཆེན་པོ་ཡོད་པ་ཞིག་དང་། བོད་པ་ལས་ལྷག་པ་ཡོད་རེད། དེ་བཞིན་ཁོང་གིས་གསར་འགྱུར་དེ་བོད་ལ་གཏོང་དུས་ཚོང་པ་ཕར་ཚུར་འགྲོ་མཁན་ཚོའི་བརྒྱུད་ནས་གཏོང་བ་མ་གཏོགས། དེང་སང་སྦྲག་བརྒྱུད་ནས་གཏོང་རྒྱུ་མེད་པ་རེད། དེར་བརྟེན་ཚོང་པ་ཕར་འགྲོ་ཚུར་འོང་བརྒྱུད་ནས་གསར་འགྱུར་བཏང་བ་དེ་ལས་ཕན་ཐོགས་ཆེན་པོ་ཡོང་གི་ཡོད། ཁོང་ནི་དགོངས་པར་གང་ཡོད་པ་དེ་ཐད་ཀར་གསུང་མཁན་ཞིག་རེད། དེར་བརྟེན་གཞུང་གིས་འཛིན་སྐྱོང་བྱེད་ཕྱོགས་དང་ལས་ཀ་བྱེད་སྟངས་ཀྱི་ཐོག་ལ་མ་འགྲིག་པའི་སྐོར་དགོངས་འཆར་གནང་བ་དང་། ཁ་ཤས་དཔེར་ན་བོད་ནང་རང་ས་རང་སྲུང་བྱེད་མཁན་གྱི་དམག་མི་དགོས་པ་དང་། ཕྱི་རྒྱལ་ཁག་ཏུ་ཆིངས་ཡིག་བཞག་དགོས་པའི་སྐོར་བསམ་ཚུལ་ཡོང་གི་ཡོད་ཀྱང་། ང་ཚོའི་ངོས་ནས་བསམ་བློ་གུ་དོག་པོ་དང་རྗེས་ལུས་ཐེབས་པ་ཡིན་པས། དེའི་སྒང་ལ་དོ་སྣང་ཁྱོན་ནས་སླེབས་ཀྱི་མེད་པ་སོགས་གསུངས་མྱོང་།

ཕྱི་ལོ་ ༡༩༧༠ ལོའི་ནང་མཐར་ཕྱིན་བྷ་བྷུ་ལགས་ཀྱིས་རང་དབང་ཡོད་དུས་རང་དབང་མེད། རང་དབང་མེད་དུས་རང་དབང་ཡོད་ཅེས་པ་དེ་བརྩམས་པ་རེད། དེའི་ཐད་ལས་བྱེད་ནང་ཁུལ་དུ་སྐད་ཆ་བཤད་སྐབས། བོད་ལ་རང་དབང་རང་བཙན་ཡོད་པའི་སྐབས་སུ་རང་དབང་མེད་པ་དང་། ༡༩༥༩ ལོར་བོད་རང་བཙན་ཤོར་བའི་རྗེས་སུ་རང་དབང་ཡོད་པའི་སྐོར་གོ་མྱོང་། ཞེས་དང་། གསར་འགོད་པས་གསར་འགྱུར་འབྲི་བའི་སྐབས་དྲང་བདེན་དང་དངོས་ཡོད་གནས་ཚུལ་གང་ཡོད་པ་དེ་ཇི་མ་ཇི་བཞིན་འགོད་དགོས་གལ་ཆེན་པོ་རེད། ལོ་རྒྱུས་དང་འབྲེལ་ནས་གནས་ཚུལ་འབྲི་སྐབས་རྒྱབ་ལྗོངས་ཀྱི་གནས་ཚུལ་ལ་ཉམས་ཞིབ་ཏོག་ཙམ་གནང་ཐུབ་ན། གནས་ཚུལ་དེ་ཁྱབ་ཆེན་པོ་འགྲོ་ཡི་ཡོད་པས་མིས་གོ་བ་དེ་དངོས་ཡོད་གནས་ཚུལ་གོ་ཐུབ་ན་ཕན་ཐོགས་ཆེན་པོ་ཡོང་གི་རེད་བསམ་གྱི་འདུག དེར་བརྟེན་གསར་འགོད་པས་དངོས་ཡོད་གནས་ཚུལ་ཇི་མ་ཇི་བཞིན་འགོད་དགོས་པ་དང་། ཕྱོགས་ལྷུང་གི་གནས་ཚུལ་རྩ་བ་ནས་མེད་པ་དང་དྲང་བདེན་གྱི་གནས་ཚུལ་འགོད་དགོས་པའི་ཐད་དགོངས་པ་བཞེས་རོགས་གནང་། ཞེས་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ