བོད་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཚན་པའི་ལས་མི་དང་འགན་འཛིན་གཞོན་པ་ཟུར་པ་བསྟན་འཛིན་ཞེས་པ་ཞིག་གིས་ཏང་གཤིས་དང་ཐོག་མའི་ཕུགས་འདུན་མི་ལེགས་པར་རྨོངས་དད་ངང་ཆོས་ལུགས་བྱེད་སྒོ་སྤེལ་བའི་ཉེས་མིང་འོག་ལས་གནས་ནས་ཕུད་འདུག
བོད་རིགས་དཔོན་པོ་བསྟན་འཛིན་དང་རྒྱ་ནག་གཞུང་གི་ཆོས་ལུགས་ལས་དོན་བཀག་སྡོམ་གྱི་བཅའ་ཁྲིམས། པར་དུས་བབ་ཀྱིས་བསྒྲིགས།
ཉེ་སྔོན་མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ཨུ་ལྷན་ཟེར་བས་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཚན་པའི་ལས་མི་དང་འགན་འཛིན་གཞོན་པ་ཟུར་པ་བོད་མི་བསྟན་འཛིན་ཞེས་པ་ཞིག་གིས། རྒྱ་ནག་དམར་ཤོག་རིང་ལུགས་ཀྱི་ཆབ་སྲིད་སྒྲིག་ཁྲིམས་དང་། རྩ་འཛུགས་ཀྱི་སྒྲིག་ཁྲིམས། སྤྱོད་གཙང་གི་སྒྲིག་ཁྲིམས་བཅས་ལ་འགལ་བ་དང་ཕུགས་བསམ་དང་དད་མོས་ཤོར་བ། ཏང་གཤིས་དང་ཐོག་མའི་ཕུགས་འདུན་མི་ལེགས་པར་རྨོངས་དད་ངང་ཆོས་ལུགས་བྱེད་སྒོ་སྤེལ་ཡོད་པའི་ཉེས་མིང་འོག དམར་ཤོག་ཚོགས་པའི་ནང་ནས་ཕུད་དེ་རྒྱུ་ནོར་ཡང་གཞུང་གིས་འཕྲོག་ཡོད་འདུག
རྒྱ་ནག་གཞུང་གིས་ཞིབ་འཇུག་དང་བརྟག་དཔྱད་བྱས་ཡོད་ལུགས་བཤད་ནས་གསལ་བསྒྲགས་ཤིག་སྤེལ་བའི་ནང་། བསྟན་འཛིན་གྱིས་ཏང་ཡོན་མགོ་ཁྲིད་ལས་བྱེད་པ་ཡིན་པའི་ཆ་ནས། ཕུགས་བསམ་དང་དད་མོས་ཤོར་བ་དང་། ཏང་གཤིས་དང་ཐོག་མའི་ཕུགས་འདུན་མི་ལེགས་པར་རྨོངས་དད་ངང་ཆོས་ལུགས་བྱེད་སྒོ་སྤེལ་བ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་སྣང་མེད་དུ་བཞག་ནས་སྒྲིག་འགལ་གྱིས་ལག་རྟགས་དང་ལག་དངུལ་བླངས་པ་དང་། རྩ་འཛུགས་ཀྱི་འདུ་ཤེས་སྣང་མེད་བཏང་བ་དང་། གཏན་འབེབས་ལྟར་མི་སྒེར་གྱི་འབྲེལ་ཡོད་དོན་དག་སྙན་སེང་མི་ཞུ་བ། སྤྱོད་གཙང་གི་གཞི་ཐིག་ཤོར་བ་དང་། འགན་དབང་སྤྱད་དེ་གཉེན་ཉེར་ཁེ་ཕན་དོན་གཉེར་བྱེད་པ་དང་། རང་གི་འགན་དབང་བེད་སྤྱད་ནས་གཉེན་ཉེས་ཁེ་ཕན་དོན་གཉེར་བྱེད་པའི་བྱ་སྤྱོད་རྒྱ་ཡན་དུ་བཏང་བ། ཧམ་ཟའི་འདོད་རྔམ་ཆེ་རུ་ཕྱིན་པ་དང་། དབང་དངུལ་ཉོ་ཚོང་ཆེན་པོ་བྱེད། ཅེས་ཐག་གཅོད་ནན་པོ་བྱ་དགོས་སྐོར་བསྒྲགས་འདུག
ཕྱི་ལོ་ ༢༠༡༤ ལོར་《རྒྱལ་ཁབ་བདེ་འཇགས་དེབ་སྔོན་པོ་》ཟེར་བ་ཞིག་དང་། ཕྱི་ལོ་ ༢༠༡༨ ལོར་《ཆོས་ལུགས་ལས་དོན་སྲོལ་ཡིག》། 《རྒྱལ་ཁབ་ཀྱི་ཆོས་དད་རང་མོས་འགན་སྲུང་སྲིད་བྱུས་དང་ལག་བསྟར།》དེ་བཞིན་ཕྱི་ལོ་ ༢༠༢༢ ལོར་《དྲྭ་རྒྱའི་ཆོས་ལུགས་ཆ་འཕྲིན་ཞབས་ཞུ་དོ་དམ་བྱ་ཐབས་》བཅས་བོད་ནང་ཆོས་ལུགས་དང་འབྲེལ་བའི་ཡིག་ཆ་བཞི་བཏོན་ཡོད་པ་མ་ཟད། བོད་ནང་ཆོས་ལུགས་དམ་དྲག་དང་དགོན་སྡེ་སོགས་དོ་དམ་སླད་སྲོལ་ཡིག་བཅུ་གྲངས་ཤིག་བཀྲམ་ཡོད་པ་མ་ཟད། བོད་ནང་གི་རྒྱ་ནག་གཞུང་གི་ལས་བྱེད་རྣམས་ཀྱིས་ཆོས་བྱས་པ་དང་། མཆོད་རྟེན་སོགས་ལ་སྐོར་བ། བསང་སོགས་ཕུད་བར་དམ་དྲག་ཤུགས་ཆེན་བྱས་ཡོད། དཔེར་ན། ཕོ་བྲང་པོ་ཏ་ལའི་འཛུལ་སྒོ་རུ་གློག་གིས་དོ་བདག་གི་ཐོབ་ཐང་ལག་ཁྱེར་བཤེར་འབེབ་གཏོང་གི་ཡོད་ཅིང་། ཉེ་བའི་ལོ་ཤས་ནས་བཟུང་ལྷ་ས་ཁུལ་གྱི་སྲིད་གཞུང་གི་ལས་བྱེད་དང་། བོད་ལྗོངས་སློབ་གྲྭ་ཆེན་མོའི་དགེ་ལས་སློབ་ཕྲུག་ལྟ་བུ། དེ་བཞིན་མིང་ཐོ་ནག་པོའི་ནང་ཚུད་པ་རྣམས་ཕོ་བྲང་པོ་ཏ་ལའི་ནང་མཆོད་མཇལ་དུ་ཕྱིན་པ་ཡིན་ན། གློག་གིས་ཐོབ་ཐང་ལག་ཁྱེར་བཤེར་འབེབ་གཏོང་སྐབས་འགོག་སྒྲ་བཏང་སྟེ་ནང་དུ་འཛུལ་བཅུག་གི་མེད་པ་མ་ཟད། ཕྱི་ལོ་ ༢༠༡༩ ལོར་བོད་རང་སྐྱོང་ལྗོངས་སྲིད་གཞུང་གིས་བརྡ་ཐོ་ཞིག་བཏང་སྟེ། ལོ་དེའི་ཕྱི་ཟླ་ ༨ ཚེས་ ༡༨ ཉིན་གྱི་ཉིན་གུང་ཆུ་ཚོད་ ༡༢།༣༠ སྔོན་དུ་འབྲེལ་ཡོད་ལས་ཁུངས་ཁག་ནས་རྒས་ཡོལ་རྣམས་ཀྱི་མིང་དང་། ཁོང་ཚོ་སྐོར་བར་འགྲོ་རྒྱུར་སྟངས་འཛིན་བྱས་ཡོད་པའི་སྙན་ཐོ་ས་གནས་ཀྱི་དམར་ཤོག་ཚོགས་པའི་རྒས་ཡོལ་ལྟ་སྐྱོང་ལས་ཁུངས་ལ་སྤྲོད་དགོས་སྐོར་བརྗོད་ཡོད་པ་མ་ཟད། དམར་ཤོག་ཚོགས་མི་རྒས་ཡོལ་དང་གཞུང་ཞབས་རྒས་ཡོལ་རྣམས་དགོན་པ་སོགས་ལ་སྐོར་བར་འགྲོ་བའི་སྣང་ཚུལ་འབྱུང་གི་ཡོད་མེད་ལ་རྟོག་ཞིབ་བྱེད་དགོས་སྐོར་བཀའ་བཏང་ཡོད་པ་རེད།
འདས་པའི་མི་ལོ་གཉིས་ལྷག་གི་རིང་ཉུང་མཐར་བོད་ཁུལ་གྱི་མཐོ་རིམ་དཔོན་རིགས་ ༢༠ ཙམ་གནས་དབྱུང་ཞིབ་བཤེར་བྱས་ཡོད་པའི་ཁྲོད། འདི་ལོའི་ཕྱི་ཟླ་༢ ཚེས་ ༡༢ ཉིན་རྒྱ་ནག་གཞུང་གིས་རྒྱལ་ཁབ་ལ་བློ་མི་དཀར་བ་དང་ཏང་གཤིས་རྩ་དོན་ཤོར་བར། བོད་སྐྱེ་རྒུ་མདོ་ཁུལ་གྱི་དམར་ཤོག་དྲུང་ཆེ་གཞོན་པ་ཤེས་རབ་རྒྱ་མཚོ་དང་། འདི་ལོའི་ཕྱི་ཟླ་ ༡ ཚེས་ ༢༣ ཉིན་བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་གཙོ་ཆེ་དགྲ་ལྷ། དེ་བཞིན་འདས་ལོའི་ཕྱི་ཟླ་ ༡༢ ཚེས་ ༡༡ ཉིན། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་པ་ཝུའུ་ཡེན་ཇེ་(Wu Yingjie)ཡིས། ཏང་ལ་དད་སེམས་ཉམས་པ་དང་ཏང་གཤིས་ཀྱི་རྩ་དོན་ཤོར་བ། ཕུགས་བསམ་ཉམས་པ་སོགས་ཀྱི་ཉེས་མིང་འོག་དམར་ཤོག་ཚོགས་ཁོངས་ནས་ཕྱིར་ཕུད་བཏང་། འདས་ལོའི་ཕྱི་ཟླ་ ༦ ཚེས་ ༡༤ ཉིན་བོད་རང་སྐྱོང་ལྗོངས་རྒྱུན་ལས་ལྷན་ཁང་གི་མགོ་ཁྲིད་གཞོན་པ་ཅང་ཅེ། དེ་བཞིན་བོད་རང་སྐྱོང་ལྗོངས་མི་མང་སྲིད་གཞུང་ཟེར་བའི་དམར་ཤོག་ཚོགས་པའི་ཁོངས་མི་དང་དྲུང་ཡིག་ཆེན་མོ། གཞུང་དོན་ཁང་གི་དམར་ཤོག་ཚོགས་པའི་དྲུང་ཡིག་ཀྲུའུ་ཆང་ལ་ཁྲིམས་འགལ་ཚབས་ཆེན་བྱས་པའི་དོགས་གཞི་འོག བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཁང་ཟེར་བས་ཞིབ་བཤེར་བྱས་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
