བོད་མཚོ་སྔོན་ཞིང་ཆེན་མང་ར་རྫོང་མགོ་མང་གྲོང་རྡལ་དམུ་གེ་ཐང་རྩྭ་ཐང་དུ་གློ་བུར་འཕུར་མདེལ་ཞིག་ལྷུང་ནས་འབར་གས་ཆེན་པོ་བྱུང་ཡོད་ཀྱང་རྒྱ་ནག་གཞུང་ཕྱོགས་ནས་འཕུལ་མདེལ་དེ་སུས་འཕངས་བ་ཡིན་སོགས་གང་ཡང་བཤད་མེད་པ་རེད།
ཟླ་འདིའི་ཕྱི་ཚེས་ ༡༣ ཉིན་བོད་མཚོ་སྔོན་ཞིང་ཆེན་མང་ར་རྫོང་མགོ་མང་གྲོང་རྡལ་གྱི་འབྲོག་རུ་སྡེ་བ་དང་ཆོས་ཚ་སྡེ་བ་གཉིས་ཀྱི་བར་དུ་ཡོད་པའི་དམུ་གེ་ཐང་གི་རྩྭ་ཐང་དུ། གློ་བུར་དུ་འཕུར་མདའ་ཞིག་ལྷུང་སྟེ་འབར་གས་བྱུང་ཡོད་ཅིང་། ས་གནས་མི་མང་གིས་བརྒྱབ་པའི་བརྙན་ཐུང་ནང་དུ་དངངས་སྐྲག་ཆེན་པོས་འཕུར་མདེལ་དེ་ཁྱིམ་ཚང་ཞིག་གི་ཐོག་ལྷུང་ན་དཔེ་བསག་རྒྱུ་ཡིན་པའི་སེམས་འཚབ་ཆེན་བྱེད་ཀྱི་འདུག འབར་གས་བྱུང་རྗེས་ས་གནས་ཀྱི་འབྲེལ་ཡོད་མགོ་འཁྲིད་ཡུལ་དངོས་སུ་ཕྱིན་ནས་རྟོག་ཞིབ་བྱས་ཡོད་ཚུལ་བརྗོད་འདུག་ཀྱང་གནད་དོན་ཀྱི་འབྱུང་རྩ་གང་ཡིན་སོགས་བརྗོད་མེད་པ་རེད།
འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། དངོས་ཡོད་གནས་ཚུལ་གང་ཡིན་གསལ་པོ་མེད་ཀྱང་། ས་གནས་མི་མང་གིས་འཕུར་མདེལ་དེ་ལན་ཀྲུའུ་གྲོང་ཁྱེར་ཕྱོགས་ནས་མང་ར་རྫོང་ཁོངས་ཀྱི་མང་རའི་བྱེ་མ་ཐང་དུ་ཚོད་ལྟ་ཆེད་འཕངས་བ་ཞིག་ཡིན་སྲིད་ཀྱང་། བྱེ་མ་ཐང་ནས་སྤྱི་ལེ་ ༦ ཙན་ལས་མེད་པའི་དམུ་གེ་ཐང་དུ་ལྷུང་ནས་འབར་གས་བྱུང་བ་ཞིག་ཡིན་པའི་ཚོད་དཔག་བྱེད་ཀྱི་ཡོད་སྐོར་དང་། འབར་གས་སོང་ཤུལ་གྱི་ཆག་རོ་ཧ་ཅང་ཆེན་པོ་ཞིག་ཡིན་སྐོར་འགྲེལ་བརྗོད་གནང་བྱུང་ལ། མང་རའི་བྱེ་མ་ཐང་ནི་མཚོ་ལྷོ་བོད་རིགས་རང་སྐྱོང་ཁུལ་མང་ར་རྫོང་མགོ་མང་གྲོང་རྡལ་ནས་ནུབ་ལྷོའི་ཕྱོགས་སུ་ཧ་ལམ་སྤྱི་ལེ་ ༣༠ ཙམ་གྱི་མཚམས་སུ་ཡོད་ཅིང་། རྒྱ་ཁྱོན་ལ་སྤྱི་ལེ་གྲུ་བཞི་མ་ ༡༣༡༣ ཡོད་འདུག
ཡང་འབྲེལ་ཡོད་བོད་མི་གཞན་ཞིག་གིས་འདི་གའི་གསར་འགོད་པར། ས་གནས་བོད་མི་རྣམས་ཀྱིས་ས་གནས་སྲིད་གཞུང་ལ་མེ་ཤུགས་འཕུར་མདེལ་དེ་གང་ནས་འཕངས་ཡོད་མེད་དང་། མེ་ཤུགས་འཕུར་མདེལ་དེ་འཕེན་དགོས་པའི་རྒྱུ་མཚན་ཅི་ཡིན་སོགས་དྲིས་ཡོད་ཀྱང་། གཞུང་ཕྱོགས་ནས་གནས་ཚུལ་དེར་གསལ་ཁ་གང་ཡང་བཟོས་མི་འདུག དེ་བཞིན་ས་གནས་ཀྱི་གསར་ཁང་ཁག་གིས་ཀྱང་གནས་ཚུལ་དེའི་སྐོར་ལ་གང་ཡང་སྤེལ་མི་འདུག རྒྱ་གཞུང་གིས་གསང་བའི་ཐོག་མེ་ཤུགས་འཕུར་མདེལ་ལ་ཚོད་ལྟ་བྱས་པ་ཞིག་ཡིན་ས་རེད། ཅེས་འགྲེལ་བརྗོད་གནང་བྱུང་།
ཁ་སང་ཕྱི་ཚེས་ ༡༤ ཉིན་རྒྱ་ནག་གི་སྐར་དམར་གསར་ཁང་(红星新闻)གི་གསར་འགོད་པས། འཕུར་མདེལ་དེའི་སྐོར་ལ་མང་ར་རྫོང་མྱུར་སྐྱོབ་ཚན་པར་སྐད་ཆ་དྲིས་པར། ས་གནས་དེར་ཆག་རོ་བརྡབ་སྐྱོན་མ་བྱུང་གོང་ནས་མྱུར་སྐྱོབ་བྱ་རྒྱུར་གྲ་སྒྲིག་བྱས་ཡོད་ལུགས་དང་། ས་གནས་ཀྱི་ཡུལ་མི་རྣམས་གནས་སྤོ་རུ་བཅུག་ཡོད་ཚུལ་བཤད་འདུག ཡིན་ནའང་། འབྲེལ་ཡོད་བོད་མི་ཞིག་གིས་ས་གནས་བོད་མིར་གོང་རིམ་ནས་བརྡ་ལན་གང་ཡང་འབྱོར་མེད་སྐོར་བརྗོད་བྱུང་།
བོད་ཡུལ་དུ་གློ་བུར་འཕུར་མདེལ་ལྷུང་སྟེ་འབར་གས་བྱུང་བ་ད་ལན་ཐེངས་དང་པོ་མིན་པར་དེ་སྔོན་ཡང་འབྲོག་ཁུལ་གྱི་རྫི་བོ་སོགས་ཀྱིས་གང་ནས་ལྷུང་བ་ཡིན་མི་ཤེས་པའི་འཕྲུལ་ཆས་ཆེན་པོ་རེ་རི་ཀླུང་དུ་འབར་གས་བྱུང་བའི་ཆག་རོ་མཐོང་བའི་གནས་ཚུལ་ཁག་ཅིག་བྱུང་ཡོད་ལ། དེ་བཞིན་རྒྱ་ནག་དམར་གཞུང་གི་བཙན་བཟུང་འོག་ཡོད་པའི་ལྷོ་སོག་གི་ཨོ་ཐོག་ཨལ་བྷ་སི་སུ་མོ་(Albas Sumu)ཞེས་པའི་རྩྭ་ཐང་དུ་ཕྱི་ལོ་ ༢༠༡༤ ཟླ་ ༨ ཚེས་ ༧ ཉིན་འཕུལ་མདེལ་ཞིག་འབར་གས་བྱུང་སྟེ་། དུག་རྫས་ཤུགས་ཆེར་འཕྱུར་ནས་དབུགས་གཏོང་ལེན་བྱེད་པ་ལའང་དཀའ་ངལ་བྱུང་བའི་གནས་ཚུལ་ཐོན་ཡོད་པ་དང་། དྲ་ལམ་ནས་འབར་རྫས་ཀྱི་ཆག་རོ་རྣམས་མེ་ཤུགས་འཕུལ་མདེལ་གྱི་ལྷུ་ལག་ཡིན་པའི་དཔྱད་གླེང་མང་པོ་བྱུང་བར་བརྟེན། རྒྱ་ནག་གཞུང་ཕྱོགས་ནས་དེ་འབྲེལ་གནས་ཚུལ་རྣམས་ནག་གསུབ་བཏང་བའི་གནས་ཚུལ་བྱུང་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
