རྒྱལ་རྩེ་རྫོང་ཁུལ་དུ་ཤོག་སྦག་གི་སྒྱུ་རྩལ་འགྲེམས་སྟོན་བྱས་པ་དང་འབྲེལ། རྒྱ་གཞུང་གིས་རྒྱ་རིགས་སྒྱུ་རྩལ་བ་ཚའེ་གོ་ཆང་དང་རྒྱ་ནག་གི་གྱོན་ཆས་བཟོ་ཚོང་ཁང་ (Arc’teryx) གཉིས་ཀྱི་གཙོས་འབྲེལ་ཡོད་ས་གནས་ཀྱི་དམར་ཤོག་དྲུང་ཆེ་དང་བདེ་འཇགས་ལས་ཁུངས་ཀྱི་མགོ་ཁྲིད། ད་དུང་ས་གནས་སྲིད་གཞུང་གི་མགོ་ཁྲིད་རྡོ་རྗེ་ཕུན་ཚོགས་སོགས་ལས་གནས་ནས་ཕྱིར་ཕུད་བཏང་ཡོད་འདུག
ཟླ་འདིའི་ཕྱི་ཚེས་ ༡༥ ཉིན་བོད་གཞིས་ཀ་རྩེ་གྲོང་ཁྱེར་གཞུང་གིས། གཞིས་ཀ་རྩེ་རྒྱལ་རྩེ་རྫོང་ར་ལུང་གྲོང་སྡེའི་རི་ངོས་ཤིག་ཏུ་ཤོག་སྦག་ཕོན་ཆེན་སྤར་བའི་གནད་དོན་དེས། བོད་ཀྱི་རྩ་ཐང་དང་སྐྱེ་ཁམས་ཁོར་ཡུག་ལ་གཏོར་བརླག་དང་སྟོངས་ཉེན་ཡོད་པའི་རི་སྐྱེས་སྲོག་ཆགས་ལ་འཇིགས་སྐུལ་དང་ཉེན་ཁ་བསྐྲུན་པ། ད་དུང་ཤོག་སྦག་སྤར་བའི་གནད་དོན་དེ་ནི་བོད་ཀྱི་ཁོར་ཡུག་སྲུང་སྐྱོབ་ཀྱི་བཅའ་ཁྲིམས་དང་འགལ་ཡོད་པ་སོགས་ལ་བརྟེན་ནས། རྒྱ་རིགས་སྒྱུ་རྩལ་བ་ཚའེ་གོ་ཆང་ (Cai Guo-qiang) དང་རྒྱ་ནག་གི་གྱོན་ཆས་བཟོ་ཚོང་ཁང་ (Arc’teryx) གཉིས་ལ་ཉེས་ཆད་བཅད་པ་དང་། རྒྱལ་རྩེ་རྫོང་གི་འབྲེལ་ཡོད་མགོ་ཁྲིད་ཁག་ཅིག་ལས་གནས་ནས་ཕྱིར་ཕུད་བཏང་བ་དང་ལས་བྱེད་པ་དྲུག་ལ་མུ་མཐུད་ཞིབ་བཤེར་བྱེད་ཀྱི་ཡོད་འདུག
དེ་འབྲེལ་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། རྒྱ་རིགས་སྒྱུ་རྩལ་བ་ཚའེ་གོ་ཆང་ (Cai Guo-qiang) དང་རྒྱ་ནག་གི་གྱོན་ཆས་བཟོ་ཚོང་ཁང་ (Arc’teryx) གཉིས་ཀྱིས་བོད་ཀྱི་སྐྱེ་ཁམས་ཁོར་ཡུག་ལ་གཏོར་སྐྱོན་བཏང་བར་ཁྲིམས་ལུགས་ལྟར་གུན་ཚབ་འཇལ་དགོས་པ་མ་ཟད། གནོད་སྐྱོན་ཐེབས་པའི་ཁོར་ཡུག་བསྐྱར་གསོའི་ལས་འགན་དང་དུ་ལེན་དགོས་པའི་ཉེས་ཆད་བཅད་ཡོད་ཅིང་། རྒྱལ་རྩེ་རྫོང་གི་དམར་ཤོག་ཚོགས་པའི་ཚོགས་མི་དང་རྫོང་སྲིད་གཞུང་། ད་དུང་འབྲེལ་ཡོད་ལས་ཁུངས་ཁག་ཅིག་གིས། ཁྲིམས་ལུགས་ལག་བསྟར་གྱི་གོ་རིམ་འཐུས་ཚང་མེད་ཁར་ཕྲག་ཏུ་བབ་པའི་འོས་འགན་ཡང་ཁུར་ཐུབ་མེད་པའི་རྒྱུ་མཚན་འོག རྒྱལ་རྩེ་རྫོང་དམར་ཤོག་ཚོགས་པའི་དྲུང་ཆེ་ཁྲན་ཝོ་ (Chen Wu) དང་། རྒྱལ་རྩེ་རྫོང་སྲིད་གཞུང་གི་མགོ་ཁྲིད་རྡོ་རྗེ་ཕུན་ཚོགས། ས་གནས་བདེ་འཇགས་ལས་ཁུངས་ཀྱི་མགོ་ཁྲིད་ལི་ཅི་ཕིན་ (Li Jiping)། ས་གནས་ཀྱི་ཁོར་ཡུག་དང་རང་བྱུང་ཐོན་ཁུངས་སྲུང་སྐྱོབ་སྡེ་ཚན་གྱི་ལས་བྱེད་པ་གཉིས་བཅས་ལས་གནས་ནས་ཕྱིར་ཕུད་བཏང་ཡོད་ཅིང་། ད་དུང་འབྲེལ་ཡོད་ལས་བྱེད་དྲུག་ལ་ཞིབ་བཤེར་བྱེད་མུས་ཡིན་འདུག
གཞིས་ཀ་རྩེ་གྲོང་ཁྱེར་སྲིད་གཞུང་གིས། ཆེད་ལས་མི་སྣས་གྲུབ་པའི་རྟོག་ཞིབ་ཚན་ཁག་ཅིག་ར་ལུང་གྲོང་སྡེའི་རི་ངོས་སུ་ཞིབ་འཇུག་བྱེད་པར་བཀོད་མངག་བྱས་ཡོད་ཅིང་། ཚའེ་གོ་ཆང་གིས་ཤོག་སྦག་འཇོག་སྣོན་ ༡༠༥༠ བཀོལ་སྤྱོད་ཀྱིས་ས་ཁྱོན་སྤྱི་ཆིང་ཁྲི་ ༣༠།༠༦ གི་རྩ་ཐང་ལ་གནོད་སྐྱོན་བཟོས་ཡོད་པ་མ་ཟད། ལས་གཞི་དེའི་ཆེད་ས་བརྐོ་དང་། མི་དང་རླངས་འཁོར་སོགས་ཡར་འགྲོ་མར་འོང་བྱས་པའི་རྐྱེན་གྱིས་ཡུལ་དེའི་ས་གཤིས་དང་རྩི་ཤིང་སྐྱེ་འཕེལ་གྱི་འཁོར་རྒྱུག རྩ་ས་བཅས་ཀྱི་ས་ཁྱོན་སྤྱི་ཆིང་ཁྲི་ ༡༥།༢༩ ལ་གནོད་སྐྱོན་ཐེབས་ཡོད་པ་དང་། ཤོག་སྦག་འབར་གས་བྱུང་རྗེས་ཀྱི་གད་སྙིགས་དང་འགྱིག་སྙིགས་སོགས་གཙང་བཟོ་བྱེད་མ་ཐུབ་པར་འབག་བཙོག་བཟོས་ཡོད་སྐོར་བརྗོད་འདུག
ར་ལུང་གི་རི་ངོས་སུ་ཤོག་སྦག་གི་སྒྱུ་རྩལ་འགྲེམས་སྟོན་བྱེད་མཁན་དང་འབྲེལ་ཡོད་ས་གནས་ཀྱི་དཔོན་རིགས་ཚོར་ཞིབ་བཤེར་བྱས་ཏེ་ཉེས་ཆད་གཅོད་དོན་གཙོ་བོ་ནི། ས་གནས་བོད་མི་ཚོས་ངོ་རྒོལ་བྱས་པ་མ་ཡིན་པར། རྒྱ་ནག་རྒྱལ་ཡོངས་ཀྱི་རྒྱ་རིགས་ཁྲི་སྟོང་མང་པོས་དྲ་ལམ་དུ་སྐྱོན་བརྗོད་བྱས་པ་ལ་བརྟེན་ནས་བྱུང་བ་ཞིག་ཡིན་པ་དང་། དེ་མིན་ད་སྔ་བར་རྒྱ་ནག་གཞུང་གིས་བོད་མི་ཁོར་ཡུག་སྲུང་སྐྱོབ་པ་དང་ཁོར་ཡུག་སྲུང་སྐྱོབ་ཀྱི་ཞུ་གཏུགས་བྱེད་མཁན་རྣམས་ལ་ཉེས་རྡུང་གཏོང་བ་དང་འཛིན་བཟུང་སོགས་བྱེད་པ་ལས་དེ་འབྲེལ་རྒྱ་ནག་གི་བཟོ་གྲྭ་ཁག་དང་ས་གནས་ཀྱི་དཔོན་རིགས་ཚོར་ཉེས་ཆད་སོགས་གང་ཡང་གཅོད་ཀྱི་མེད་སྐོར་བོད་གནས་བསྐྱར་ཞིབ་ཁང་གིས་བརྗོད།
འདི་ལོའི་ཕྱི་ཟླ་ ༩ ཚེས་ ༡༩ ཉིན་གྱི་ཕྱི་དྲོར་བོད་རྒྱལ་རྩེ་རྫོང་ར་ལུང་གྲོང་སྡེའི་རི་ངོས་ཤིག་ཏུ། སྒྱུ་རྩལ་དང་རང་བྱུང་ཁོར་ཡུག་གི་དུས་སྟོན་ཟེར་བའི་མིང་འོག་ནས་རྒྱ་རིགས་སྒྱུ་རྩལ་བ་ཚའེ་གོ་ཆང་ (Cai Guo-qiang) ཟེར་བ་ཞིག་དང་། རྒྱ་ནག་གི་གྱོན་ཆས་བཟོ་ཚོང་ཁང་ (Arc’teryx)གཉིས་མཉམ་འབྲེལ་གྱིས་འབྲུག་དབྱིབས་སུ་ཚོན་མདངས་སྣ་ལྔའི་ཤོག་སྦག་ཕོན་ཆེན་སྤར་ཡོད་སྟབས། བོད་ཕྱི་ནང་གཉིས་དང་ལྷག་པར་དུ་རྒྱ་རིགས་སྟོང་ཕྲག་མང་པོས་ཡིག་བརྙན་སོགས་བརྒྱུད་ལམ་འདྲ་མིན་གྱི་ཐོག་ནས་བོད་མཐོ་སྒང་གི་ཁོར་ཡུག་ལ་གསོ་ཐབས་བྲལ་བའི་གནོད་སྐྱོན་འབག་བཙོག་བཟོས་བ་དང་། རི་སྐྱེས་སེམས་ཅན་གྱི་འཚོ་གནས་ལ་གནོད་པ་བཟོས་པར་སྐྱོན་བརྗོད་ཤུགས་ཆེན་བྱས་སྟབས། སྐབས་དེར་ས་གནས་སྲིད་གཞུང་གིས་གནད་དོན་དེར་ཞིབ་འཇུག་མི་བྱེད་ཀ་མེད་ལྟ་བུར་གྱུར་ཏེ། ད་ལྟ་འབྲེལ་ཡོད་སྒྱུ་རྩལ་བ་དང་གྱོན་ཆས་བཟོ་ཚོང་ཁང་། ས་གནས་ཀྱི་དཔོན་རིགས་ཁག་བཅས་ལ་ཉེས་ཆད་བཅད་པའི་བརྒྱུད་རིམ་འདི་བྱུང་ཡོད་འདུག
གསར་འགོད་པ། སྐལ་བཟང་སྦྱིན་པ།
དུས་བབ་གསར་ཁང་གི་མཛད་སྤྱོད་པ་ཞིག་གོ་ངོས་ནས་བཤད་ན། ཚར་པར་གྱི་ནང་དོན་འཐུས་ཚང་ཡོང་བར་བྱེད་པ་ལ། ཚག་འགོད་པའི་ཕྱོགས་ལྷུང་གི་རྣམ་པ་ཡོངས་སུ་སྤངས་དགོས་ལ། དོན་དངོས་ཀྱི་གནས་ཚུལ་འདོན་སྤེལ་བྱེད་པ་གཙོ་གནད་དུ་འཛིན་དགོས།