༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་མང་པོ་བཙན་འཕྲོག་བྱས་འདུག 

རྒྱ་ནག་གཞུང་གིས་བོད་བླ་བྲང་བཀྲ་ཤིས་འཁྱིལ་དགོན་པ་གཙོས་ཁུལ་དེའི་ལྷ་སྡེ་མང་པོར་སྔོག་བཤེར་བྱས་ཏེ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱས་ཡོད་པ་རྣམས་ཁྲིམས་འགལ་ཡིན་ལུགས་བརྗོད་དེ་སྐུ་པར་ཁུག་མ་ཆེན་པོ་བཞི་ཙམ་བཙན་འཕྲོག་བྱས་ཡོད་འདུག

འདི་ག་བོད་ཀྱི་དུས་བབ་གསར་ཁང་ལ་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༡༦ ཉིན་ནས་བོད་བླ་བྲང་བཀྲ་ཤིས་འཁྱིལ་དགོན་པ་དང་ཐང་ནག སྔོན་ཆགས། གླས་དྲུག བསང་ཁོག མར་སྟེང་སོགས་སུ། རྒྱ་ནག་གཞུང་དང་རྫོང་སྲིད་གཞུང་གི་བཀའ་རེད་ཟེར་ནས་བོད་རིགས་ལས་བྱེད་གསུམ་གྱིས། དགོན་པའི་གྲྭ་ཤག་དང་། ཁྱིམ་ཚང་སོགས་ཀྱི་ནང་བཙན་གྱིས་སྔོག་བཤེར་བྱས་ཏེ། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱས་པ་ནི་ཁྲིམས་འགལ་ཡིན་ལུགས་བརྗོད་དེ་བཙན་འཕྲོག་བྱས་འདུག ཡིན་ནའང་།  ཟླ་འདིའི་ཕྱི་ཚེས་ ༡༩ ཉིན་ནས་བཟུང་འབྲེལ་བ་བྱེད་མ་ཐུབ་པར་བརྟེན་ད་ལྟའི་གནས་སྟངས་ཐད་རྒྱུས་ལོན་བྱེད་ཐུབ་ཀྱི་མི་འདུག 

འདི་གའི་གསར་འགོད་པར་འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས། རྒྱ་ནག་གཞུང་གིས་བདུན་ཕྲག་སྔོན་མའི་རེས་གཟའ་ཕུར་བུ་ནས་བོད་བླ་བྲང་བཀྲ་ཤིས་འཁྱིལ་དགོན་པ་དང་། ཁུལ་དེའི་ཐང་ནག་དང་། སྔོན་ཆགས། གླས་དྲུག བསང་ཁོག་སོགས་ནས་བཙན་གྱིས་སྐུ་པར་ཕྲོགས་ཡོད་པ་མ་ཟད། མར་སྟེང་གཅིག་པུ་ནས་བོད་པའི་ཁྱིམ་ཚང་སོགས་ཀྱི་ནང་སྔོག་བཤེར་ནན་པོ་བྱས་ཏེ། སྐུ་པར་གྱིས་ཁུག་མ་ཆེན་པོ་གསུམ་ཁེངས་ཟིན་ཡོད་པ་མ་ཟད། ཁུག་མ་ཆེན་པོ་བཞི་པ་དེའང་ཁེངས་གྲབས་འདུག ཅེས་དང་། ཞིབ་བཤེར་བྱེད་མཁན་གསུམ་ཀ་བོད་པ་ཡིན་པ་མ་ཟད། ཁྱིམ་ཚང་ཁག་ཅིག་གིས་སྐུ་པར་སྔོན་ཚོད་ནས་སྦས་སྐུང་བྱས་ཐུབ་ཡོད་པས། དེ་དག་ལ་ལས་བྱེད་གསུམ་པོས་ཁྱེད་ཚོ་དཔེ་ཡག་པོ་རེད་ཅེས་བཤད་ནས་བསྔགས་བརྗོད་ཀྱང་བྱས་སོང་། ཞེས་བརྗོད་བྱུང་། 

ཡང་འབྲེལ་ཡོད་གནས་ཚུལ་མཁོ་སྤྲོད་པས། ད་ལན་རྒྱ་ནག་གཞུང་གིས་གོང་རིམ་གྱི་བཀའ་རེད་ཟེར་ནས་ཡུལ་དགོན་དེ་དག་ནས་སྐུ་པར་མང་པོ་བཙན་འཕྲོག་བྱས་ཡོད་ཀྱང་། ཟླ་འདིའི་ཕྱི་ཚེས་ ༡༦ ནས་ ༡༩ བར་ཉིན་གྲངས་བཞིའི་རིང་མི་མང་ལ་གཅར་རྡུང་དང་འཛིན་བཟུང་བཙན་འཁྲིད་བྱས་པའི་གནས་ཚུལ་བྱུང་མེད་ནའང་། ཁག་ཅིག་གིས་གློ་བུར་དུ་ཁྱིམ་དུ་སྔོག་བཤེར་བྱེད་སྐབས་ཞེད་སྣང་སྐྱེས་ནས་མི་འདོད་བཞིན་དུ་སྐུ་པར་སྤྲད་དགོས་བྱུང་འདུག ཅེས་བརྗོད་བྱུང་། 

སྤྱིར་རྒྱ་ནག་གཞུང་གིས་བོད་ནང་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱེད་པར་དམ་དྲག་ཆེན་པོ་བྱས་ཏེ་བོད་མི་མང་པོར་ཉེས་མིང་སྣ་ཚོགས་གཡོགས་ནས་གཅར་རྡུང་འཛིན་བཟུང་བྱས་པའི་གནས་ཚུལ་བྱུང་དང་འབྱུང་བཞིན་ཡོད་པ་རེད། ཕྱི་ལོ་ ༢༠༢༡ ཟླ་ ༣ ཚེས་ ༡༧ ཉིན་རྒྱ་ནག་གཞུང་གིས་དཀར་མཛེས་ཁུལ་སེར་ཤུལ་རྫོང་རྫ་དབོན་པོ་ཡུལ་ཚོའི་བོད་མིའི་ཁྱིམ་ཚང་རེ་རེར་སྔོག་བཤེར་བྱས་ཏེ། ༧གོང་ས་མཆོག་གི་སྐུ་པར་རྣམས་བཙན་གྱིས་མར་ལེན་དུ་བཅུག་སྟེ། དེའི་ཚབ་ཏུ་རྒྱ་ནག་གཞུང་གི་མགོ་འཁྲིད་ཚོའི་པར་བཀལ་བ་མ་ཟད། བོད་མི་རྣམས་ཀྱིས་༧གོང་ས་མཆོག་གི་སྐུ་པར་སྒྲིག་གཤོམ་མི་བྱེད་པའི་དོན་ཚན་ ༥ ཅན་གྱི་ཁས་ལེན་ཡི་གེ་ཞིག་ལ་མིང་རྟགས་ཀྱང་འགོད་བཅུག་ཡོད་པ་དང་། ཁས་ལེན་ཡི་གེ་དེའི་ནང་དུ། ཏང་གི་བཀའ་དྲིན་ཚོར་བ་དང་མེས་རྒྱལ་ལ་དགའ་ཞེན། ཁྲིམས་ལུགས་སྲུང་བའི་འདུ་ཤེས་ཟབ་ཏུ་གཏོང་ཆེད། རང་ཁྱིམ་དུ་བཀག་སྡོམ་ལས་འགལ་བའི་ཏཱ་ལའི་སྐུ་བྲིས་བཞག་མི་ཆོག་པ་དང་། རང་ཉིད་ཀྱི་གཉེན་ཉེ་ཁྱིམ་ཚང་ལ་བཀག་སྡོམ་ལས་འགལ་བའི་ཏཱ་ལའི་སྐུ་པར་བཞག་མི་ཆོག་པའི་སྐུལ་སློང་བྱེད་དགོས་པ། བཀག་སྡོམ་ལས་འགལ་བའི་ཏཱ་ལའི་སྐུ་པར་སྒེར་ཉར་དང་། བརྒྱུད་སྤྲོད། པར་འགྲེམ་བཅས་བྱེད་མི་ཆོག དེ་བཞིན་དྲ་ཐོག་ནས་ཏཱ་ལའི་སྐུ་པར་དང་རི་མོ། དེ་བཞིན་ཁྲིམས་འགལ་གྱི་གཏམ་བརྗོད། རྩོམ་སྒྲིག་དང་བརྒྱུད་སྤེལ་བྱ་རྒྱུ་གཏན་འགོག་བྱེད་དགོས་པ། རང་ཉིད་ཆབ་སྲིད་ཀྱི་ལམ་ལ་ཕྱོགས་ནས་ཏང་ལ་མིག་དཔེ་བལྟས་ཏེ་ཏང་གི་རྗེས་སུ་འབྲང། ཁྲིམས་འགལ་གྱི་རིགས་དབྱེ་བར་འཐབ་རྩོད་བྱས་ནས་དྲང་བདེན་གྱི་ལམ་ལ་བསྒྱུར་དགོས། ཞེས་གསལ་ཡོད་པ་མ་ཟད།  གལ་ཏེ་བོད་མི་སུ་རུང་དོན་ཚན་དེ་དག་དང་འགལ་ཚེ། རྒྱལ་ཁབ་ཀྱི་འཚོ་བའི་རོགས་དངུལ་ཡོངས་རྫོགས་དང་རོགས་སྐྱོར་གཅིག་ཀྱང་མེད་པ་བྱ་རྒྱུ་ཡིན་སྐོར་སོགས་ཀྱི་འཇིགས་སྐུལ་བྱས་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།