ནམ་མཁའི་སྔུར་སྒྲ་ཞེས་པའི་ཆེད་སྒྲིག་ལ་ཨོ་གླིང་གི་དེང་རབས་ཆེད་སྒྲིག་ཡག་ཤོས་ཀྱི་བྱ་དགའ་ཐོབ།

ཨོ་གླིང་དུ་གནས་སྡོད་གཞས་པ་བསྟན་འཛིན་ཆོས་རྒྱལ་ལགས་ཀྱིས་ཆེད་སྒྲིག་ནམ་མཁའི་སྔུར་སྒྲ་ཞེས་པའི་ཆེད་སྒྲིག་ལ་ཕྱི་ལོ་ ༢༠༢༥ ལོའི་ཨོ་གླིང་གི་དེང་རབས་ཆེད་སྒྲིག་ཡག་ཤོས་ཀྱི་བྱ་དགའ་ཐོབ་འདུག

ཁ་སང་ཨོ་གླིང་གི་སྒྲ་ཕབ་ལས་བཟོ་མཐུན་ཚོགས་ཀྱིས་ཕྱི་ལོ་ ༢༠༢༥ ལོའི་ཨ་རེ་ཡ་ (Aria) གླུ་གཞས་སྒྱུ་རྩལ་གཟེངས་རྟགས་གནང་བའི་ཁྲོད། ཨོ་གླིང་དུ་གནས་སྡོད་བོད་ཀྱི་གཞས་པ་བསྟན་འཛིན་ཆོས་རྒྱལ་ལགས་ཀྱི་ནམ་མཁའི་སྔུར་སྒྲ་ཞེས་པའི་ཆེད་སྒྲིག་ལ་དེང་རབས་ཆེད་སྒྲིག་ཡག་ཤོས་ཀྱི་བྱ་དགའ་ཐོབ་འདུག

དེའི་ཐད་སྒེར་ཀྱི་སྤྱི་ཚོགས་དྲ་ལམ་སྟེང་ཆོས་རྒྱལ་ལགས་ཀྱིས། ངས་སྤྲོ་སེམས་ཁོལ་བའི་ངང་ནས་ཞུ་འདོད་པ་ཞིག་ལ། ཆེད་སྒྲིག་ནམ་མཁའི་སྔུར་སྒྲ་ཞེས་པར་ཨོ་གླིང་གི་ཕྱི་ལོ་ ༢༠༢༥ ལོའི་དེང་རབས་གླུ་གཞས་ཆེད་སྒྲིག་གི་བྱ་དགའ་ཐོབ་སོང་། ཞེས་དང་། ད་ལན་རང་ཉིད་དངོས་སུ་མཛད་སྒོར་བཅར་མ་ཐུབ་ཀྱང་། བསྟན་འཛིན་ཡེ་ཤེས་ལགས་ཀྱིས་ཚབ་གནང་བར་བཀའ་དྲིན་ཆེ། ད་ལན་གྱི་བྱ་དགའ་དེ་ནི་བྱམས་བརྩེའི་ལོ་དང་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པའི་སྐབས་འདིར་ཆེས་དོན་སྙིང་ལྡན་པ་ཞིག་ཏུ་ངོས་འཛིན་བྱེད་ཀྱི་ཡོད། ཅེས་བརྗོད་འདུག

ཕྱི་ལོ་ ༢༠༢༠ ལོར་བསྟན་འཛིན་ཆོས་རྒྱལ་ལགས་ཀྱི་བརྩམས་ཆོས་བར་དོ་ཞེས་པ་རྒྱལ་སྤྱིའི་གྷེ་རམ་མེ་ (Grammy) གཟེངས་རྟགས་ཀྱི་ཁོངས་སུ་ཚུད་མྱོང་ཡོད་ལ། དེ་ནི་བོད་མི་སྒེར་བ་ཞིག་གི་རོལ་དབྱངས་སྒྱུ་རྩལ་གྱི་བརྩམས་ཆོས་གྷེ་རམ་མེ་ (Grammy) གཟེངས་རྟགས་ཀྱི་ཁོངས་སུ་ཚུད་པ་ཐེངས་གཉིས་པ་དེ་ཡིན་ཞིང་། ཕྱི་ལོ་ ༢༠༠༡ ལོར་གླིང་བུ་བ་ངག་དབང་མཁས་མཆོག་ལགས་ཀྱི་གླུ་གཞས་རྒྱང་རིང་གི་ས་དེ་ན་ཞེས་པའང་ཚུད་ཡོད་འདུག ཕྱི་ལོ་ ༢༠༠༤ ལོར་སྟོད་རྒྱུད་གྲྭ་ཚང་གི་དགེ་འདུན་པ་བཞིའི་ཆོས་དབྱངས་གྷི་རམ་མེ་གཟེངས་རྟགས་ཀྱི་འོས་གཞིའི་ཁོངས་སུ་ཚུད་དེ་མཇུག་མཐར་བྱ་དགའ་ཡང་ཐོབ་ཡོད་འདུག

གཞས་པ་བསྟན་འཛིན་ཆོས་རྒྱལ་ལགས་ནི་གཞས་པ་དང་རོལ་དབྱངས་བ། དབྱངས་རྩོམ་པ་པོ་བཅས་ཡིན་འདུག་ལ། རོལ་དབྱངས་ཆེད་བསྒྲིགས་གྲངས་ ༩ ཙམ་ཡོད་འདུག ཁོང་ནི་བོད་མངའ་རིས་ཁུལ་གྱི་ས་མ་འབྲོག་གི་གཞི་ཁྱིམ་དཀྱུས་མ་ཞིག་ཏུ་སྐྱེས་ཤིང་། ཕྱི་ལོ་ ༡༩༧༠ དོན་གྲངས་ནང་རྒྱ་གར་ནང་བཙན་བྱོལ་དུ་སླེབས་ཏེ་དྷ་རམ་ས་ལའི་བོད་ཁྱིམ་སློབ་གྲྭའི་ནང་འཚར་ལོངས་བྱུང་ཡོད་པ་དང་། ཕྱི་ལོ་ ༡༩༩༧ ལོར་ཨོ་གླིང་དུ་གཞིས་སྤོས་བྱས་རྗེས་རྐྱང་གཞས་དང་ཕྱིའི་རོལ་ཚོགས་གཞན་དང་ལྷན་དུ་གླུ་གཞས་སྣ་ཚོགས་བླངས་དང་ལེན་མུས་ཡིན་འདུག་ལ། ཨོ་གླིང་གྲོས་ཚོགས་སུ་བོད་དོན་ཞུ་གཏུགས་དང་ཨོ་གླིང་དུ་བོད་མིའི་གནད་ཡོད་མི་སྣ་གདན་འདྲེན་སོགས་ཞུས་ཏེ་བོད་དོན་ལས་འགུལ་སྤེལ་བ་སོགས་གནང་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།