ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་འཛམ་གླིང་གི་རྒྱལ་ཁབ་མི་འདྲ་བ་ ༡༥ ནས་གློག་བརྙན་གྲངས་ ༨༨ སྟོན་རྒྱུ་ཡིན་པའི་ཁྲོད་བོད་མིས་བཟོ་སྐྲུན་བྱས་པའི་གློག་བརྙན་གསུམ་སྟོན་འཆར་འདུག
དེ་རིང་ཉིན་གུང་ཆུ་ཚོད་ ༡༡།༣༠ ཐོག་དྷ་རམ་ས་ལའི་ཀ་ཅཱ་རི་རྫོང་དཔོན་ལས་ཁུངས་ཀྱི་ཚོགས་ཁང་དུ། ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་འགན་འཛིན་བསྟན་འཛིན་བསོད་ནམས་ལགས་དང་། ཁོང་གི་བཟའ་ཟླ་རི་ཏུ་ས་རིན་(Ritu Sarin)ལགས་གཉིས་ཀྱིས། ཟླ་འདིའི་ཕྱི་ཚེས་ ༣༠ ནས་ཕྱི་ཟླ་ ༡༡ ཚེས་ ༢ བར་ཉིན་བཞིའི་རིང་དྷ་སྟེང་བོད་ཕྲུག་ཁྱིམ་སྡེ་རུ། ཕྱི་ལོ་ ༢༠༢༥ ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་(DIFF) ཐེངས་ ༡༤ པ་འཚོག་རྒྱུ་ཡིན་པའི་གསལ་བསྒྲགས་གནང་སོང་བ་དང་།ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་རྒྱལ་ཁབ་མི་འདྲ་བ་ ༡༥ ལྷག་ནས་ཐོན་པའི་གློག་བརྙན་རིང་ཐུང་ཁྱོན་བསྡོམས་ ༨༨ སྟོན་འཆར་འདུག
འདི་གའི་གསར་འགོད་པས་ཐེངས་འདིའི་གློག་བརྙན་དུས་སྟོན་སྐོར་དྲིས་པར་བསྟན་འཛིན་བསོད་ནམས་ལགས་ཀྱིས། ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་དྷ་སྟེང་བོད་ཕྲུག་ཁྱིམ་སྡེ་རུ་འཚོག་དགོས་པའི་རྒྱུ་མཚན་ནི་དྷ་སྟེང་བོད་ཕྲུག་ཁྱིམ་སྡེར་ས་ཆ་ཆེན་པོ་ཡོད་པ་དང་། ད་ལོར་ང་ཚོས་གློག་བརྙན་སྟོན་སའི་ཚོགས་ཁང་བཞི་གོ་སྒྲིག་ཞུ་བཞིན་ཡོད། ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་གློག་བརྙན་རིང་ཐུང་ཁྱོན་བསྡོམས་ ༨༨ སྟོན་རྒྱུ་ཡིན་ཞིང་། སྐབས་དེར་གློག་བརྙན་བཟོ་སྐྲུན་པ་མང་པོ་མཉམ་ཞུགས་གནང་གི་ཡོད། དེའི་ཁྲོད་ཀྱི་མང་ཆེ་ཤོས་རྒྱ་གར་ནས་ཡོང་གི་ཡོད། གློག་བརྙན་བཟོ་སྐྲུན་པ་དང་མཉམ་དུ་བགྲོ་གླེང་ཡང་བྱ་རྒྱུ་ཡིན་སྐོར་འགྲེལ་བརྗོད་གནང་བྱུང་།
ཐེངས་འདིའི་གློག་བརྙན་དུས་ཐོག་གློག་བརྙན་འདེམས་ཐོན་བྱེད་སྟངས་སྐོར་ལ་ཁོང་གིས། གློག་བརྙན་དུས་སྟོན་ཐོག་གློག་བརྙན་འདེམས་མཁན་ཚོགས་མི་དགུ་ལས་གྲུབ་པའི་ཚོགས་ཆུང་ཞིག་ཡོད། གློག་བརྙན་བཟོ་མཁན་རྣམས་ཀྱིས་ལོ་གཅིག་རིང་གློག་བརྙན་དུས་སྟོན་ཆེད་གློག་བརྙན་ལ་ལྟ་བཞིན་ཡོད་པ་རེད། ད་ལོའི་དུས་སྟོན་ཐོག་གློག་བརྙན་ཁྱོན་གྲངས་ ༨༠༠ ལྷག་ཐོ་འགོད་བྱས་བྱུང་། དེའི་ཁྲོད་ཀྱི་གློག་བརྙན་གྲངས་ ༧༠༠ ལྷག་དྲ་ལམ་བརྒྱུད་ནས་བསྟན་ཡོད། གློག་བརྙན་ ༨༨ ད་ལོའི་གློག་བརྙན་དུས་སྟོན་ཐོག་འདེམས་ཐོན་བྱུང་བ་རེད། གློག་བརྙན་འདེམས་རྒྱུ་ཧ་ཅང་ཁག་པོ་འདུག གློག་བརྙན་ཚང་མ་སྟོན་ཐུབ་ཀྱི་མི་འདུག ཅེས་འགྲེལ་བརྗོད་གནང་བྱུང་།
གསར་འགོད་པས་ཐེངས་འདིའི་དུས་སྟོན་ཐོག་བོད་ཀྱི་གློག་བརྙན་ཅི་ཙམ་ཡོད་མེད་དྲིས་པར་བསྟན་འཛིན་བསོད་ནམས་ལགས་ཀྱིས། ཐེངས་འདིའི་གློག་བརྙན་དུས་སྟོན་ཐོག་བོད་པ་རང་ཉིད་ཀྱིས་བཟོས་པའི་གློག་བརྙན་དྲུག་ཐོ་འགོད་བྱས་བྱུང་། སྔོན་མ་དང་མི་འདྲ་བར་གློག་བརྙན་ཡག་པོ་བཟོས་འདུག དེའི་ཁྲོད་ནས་གློག་བརྙན་གསུམ་འདེམས་ཐོན་བྱུང་བ་རེད། གཅིག་ནི་ཁེ་ན་ཌར་གནས་སྡོད་བོད་ཀྱི་གཞོན་སྐྱེས་གློག་བརྙན་འཁྲབ་ཁྲིད་པ་སྐྱིད་རོང་ཀུན་བཟང་ལགས་ཀྱི་གློག་བརྙན་ (100 sunset) ཞེས་པ་དེ་རེད། གློག་བརྙན་དེ་ནི་ཊོ་རོན་ཊོ་རྒྱལ་སྤྱིའི་གློག་བརྙན་དུས་ཐོག་བསྟན་ཡོད་པ་རེད། བོད་པར་མཚོན་ན་དེ་ནི་སྤོབས་པ་སྐྱེ་དགོས་པའི་གནས་ཚུལ་ཞིག་རེད། གཉིས་པ་སུད་སིར་གནས་སྡོད་གཡང་འཛོོམས་ (Yangzom Brauen) ལགས་དང་ཁོང་མོའི་པ་ལགས་གཉིས་ཀྱིས་བཟོས་པའི་གློག་བརྙན་རྨོ་ལགས་ཞེས་པ་དེ་རེད། གློག་བརྙན་དེ་གཡང་འཛོམས་ཀྱི་རྨོ་ལགས་ཀྱི་ལོ་རྒྱུས་སྐོར་རེད། གསུམ་པ་དེ་བཀྲས་མཐོང་ཁི་རི་སི་ཌི་ལགས་ཀྱི་(far from home) ཞེས་པ་དེ་རེད། གློག་བརྙན་དེ་ནི་བཀྲས་ཟུར་བཀྲས་མཐོང་ལགས་ཀྱི་ལོ་རྒྱུས་རེད། ཅེས་འགྲེེལ་བརྗོད་གནང་བྱུང་།
ཐེངས་འདིའི་དུས་སྟོན་ཐོག་བོད་ནང་བཟོ་སྐྲུན་བྱས་པའི་གློག་བརྙན་ཡོད་མེད་དྲིས་པར་ཁོང་གིས། བོད་ནང་ནས་བཟོ་སྐྲུན་བྱས་པའི་གློག་བརྙན་རྣམས་ང་ཚོའི་གློག་བརྙན་དུས་སྟོན་ཐོག་སྟོན་རྒྱུ་ཧ་ཅང་ཁག་པོ་འདུག དྷ་རམ་ས་ལ་རྒྱལ་སྤྱིའི་གློག་བརྙན་དུས་སྟོན་གྱི་མིང་གི་ཐོག་ནས་དཀའ་ངལ་འཕྲད་ཡོད་ས་རེད། འདས་ལོར་གློག་བརྙན་དུས་སྟོན་ཐོག་བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ཀྱི་གློག་བརྙན་གསའ་སྟོན་པའི་ཐབས་ཤེས་མང་པོ་བྱས་པ་ཡིན། གློག་བརྙན་དེའི་ཚོགས་པ་དེ་རྒྱ་ནག་ནང་དུ་འདུག ང་ཚོས་འབྲེལ་བ་བྱས་ཀྱང་མཐའ་མར་ཆོག་མཆན་ཐོབ་མ་བྱུང་། དེ་ཧ་ཅང་ཡ་མཚར་ཞིག་རེད། གློག་བརྙན་དེ་རྒྱ་གར་གྷོ་ཝ་གློག་བརྙན་དུས་སྟོན་ཐོག་བསྟན་པ་རེད། དེ་ཡང་རྒྱ་གར་ནང་དུ་གློག་བརྙན་དེ་སྟོན་མ་ཆོག་པ་མ་ཡིན་པར། དྷ་རམ་ས་ལའི་གློག་བརྙན་དུས་སྟོན་ཡིན་པས་དམིགས་བསལ་ཆོག་མཆན་མ་སྤྲད་པ་ཞིག་ཡིན་ས་རེད། དེ་བས་བོད་ནང་ནས་བཟོ་སྐྲུན་བྱས་པའི་གློག་བརྙན་སྟོན་རྒྱུ་ཧ་ཅང་ཁག་པོ་འདུག ཅེས་འགྲེལ་བརྗོད་གནང་བྱུང་།
ཧི་མ་ལ་ཡའི་རྒྱུད་ནས་གློག་བརྙན་དུས་སྟོན་ཐོག་མཉམ་ཞུགས་བྱས་ཡོད་མེད་དྲིས་པར་ཁོང་གིས། ཐེངས་འདིའི་གློག་བརྙན་དུས་སྟོན་ཐོག་འབྲུག་ཡུལ་ནས་གློག་བརྙན་རིང་པོ་གཅིག་དང་ཐུང་བ་གཉིས་ཁྱོན་གློག་བརྙན་གསུམ་ཡོད་ཅིང་། གློག་བརྙན་བཟོ་སྐྲུན་བྱེད་མཁན་ ༡༢ ཙམ་མཉམ་ཞུགས་བྱེད་ཀྱི་ཡོད། དྷ་རམ་ས་ལ་གློག་བརྙན་དུས་སྟོན་དང་འབྲུག་ཡུལ་གཉིས་ཀྱི་བར་འབྲེལ་བ་ཆེ་རུ་འགྲོ་བཞིན་ཡོད། རྒྱ་གར་ཨ་རུ་ན་ཅལ་མངའ་སྡེ་ནས་ཐོན་པའི་གློག་བརྙན་གཅིག་ཡོད། དེ་ཡང་བོད་པའི་རིག་གཞུང་དང་ཧ་ཅང་འབྲེལ་བ་ཆེན་པོ་ཡོད་རེད། ཨ་རུ་ན་ཅལ་ནང་གི་དགེ་འདུན་པ་ཞིག་གིས་དྭ་ཕྲུག་སློབ་གྲྭ་བཙུགས་པའི་སྐོར་རེད། ལ་དྭགས་དང་བལ་ཡུལ་སོགས་ནས་གློག་བརྙན་མེད། ཅེས་འགྲེལ་བརྗོད་གནང་བྱུང་།
གློག་བརྙན་དུས་སྟོན་གྱི་གལ་གནད་སྐོར་ལ་ཁོང་གིས། གློག་བརྙན་དུས་སྟོན་འདི་ནི་རྒྱལ་སྤྱིའི་གློག་བརྙན་དུས་སྟོན་ཞིག་ཆགས་ཡོད་པ་དང་། བོད་དང་དམིགས་བསལ་འབྲེལ་བ་མེད་ཀྱང་། བོད་དོན་ལ་གལ་ཆེན་པོ་མཐོང་གི་འདུག སྔོན་མ་བོད་ཀྱི་ཟློས་གར་ཁང་དུ་འཚོགས་པ་རེད་ལ། དེང་སྐབས་བོད་ཕྲུག་ཁྱིམ་སྡེའི་སློབ་གྲྭར་འཚོགས་བཞིན་ཡོད། གློག་བརྙན་དུས་སྟོན་འཚོགས་ས་བོད་པའི་སྤྱི་ཚོགས་ཤིག་ཆགས་ཡོད་དུས། འཛམ་གླིང་གི་རྒྱལ་ཁབ་འདྲ་མིན་དང་རྒྱ་གར་ནས་ཡོང་མཁན་རྣམས་ཀྱིས་བོད་དོན་ཐོག་དམིགས་བསལ་དོ་སྣང་ཡོང་གི་འདུག ངས་འདི་ནི་འཇམ་པོའི་སྟོབས་ཤུགས་(soft power)ཤིག་རེད་བསམ་གྱི་འདུག འདི་བརྒྱུད་ནས་བོད་དོན་ཐོག་གོ་རྟོགས་ཆེན་པོ་ཡོང་གི་འདུག ཅེས་འགྲེལ་བརྗོད་གནང་བྱུང་།
དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ནི་ཕྱི་ལོ་ ༢༠༡༢ ལོར་ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་འགན་འཛིན་བསྟན་འཛིན་བསོད་ནམས་ལགས་དང་ཁོང་གི་བཟའ་ཟླ་རི་ཏུ་ས་རིན་(Ritu Sarin)ལགས་གཉིས་ཀྱིས་མགོ་བཙུགས་པ་ཞིག་ཡིན་ཞིང་། ཕྱི་ལོ་ ༢༠༢༣ ལོར་གློག་བརྙན་དུས་སྟོན་ཐོག་རྒྱ་གར་གྱི་གློག་བརྙན་བཟོ་སྐྲུན་པ་ ༥༠ ལྷག་མཉམ་ཞུགས་གནང་གི་ཡོད་པ་དང་། འཛམ་གླིང་རྒྱལ་ཁབ་འདྲ་མིན་ ༤༠ ལྷག་ནས་ཐོན་པའི་གློག་བརྙན་རིང་གྲས་དང་ཐུང་གྲས་ཁྱོན་བསྡོམས་ ༩༢ སྟོན་ཡོད་པ་དང་། འདས་ལོར་འཛམ་གླིང་རྒྱལ་ཁབ་འདྲ་མིན་ ༢༨ ལྷག་ནས་ཐོན་པའི་གློག་བརྙན་རིང་གྲས་དང་ཐུང་གྲས་ཁྱོན་བསྡོམས་ ༩༡ བསྟན་ཡོད་པའི་ཁྲོད། ༧གོང་ས་མཆོག་གི་མཛད་རྣམ་བདེ་སྐྱིད་ཀྱི་ཤེས་རབ་དང་། བོད་པ་རང་ཉིད་ཀྱིས་བཟོ་སྐྲུན་བྱས་པའི་གློག་བརྙན་གསུམ་བཅས་བསྟན་ཡོད་འདུག་ལ། ལོ་རེ་བཞིན་བོད་མིས་བཟོས་པའི་གློག་བརྙན་ཇེ་མང་དང་སྤུས་ཚད་ཇེ་ལེགས་སུ་འགྲོ་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
བོད་ནང་གི་གློག་བརྙན་སྟོན་རྒྱུ་ག་རེ་བྱས་ནས་དཀའ་ངལ་འཕྲད་པ་རེད་དམ་་་