ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་རིག་གཞུང་དུས་སྟོན་འཚོག་བཞིན་པ།

ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་འགན་འཛིན་བཀའ་ཟུར་བློ་བཟང་སྙན་གྲགས་ལགས་ཀྱིས་སྒྲིག་འཛུགས་ཀྱི་སྒྲིག་གཞི་སོགས་ལ་བསྐྱར་ཞིབ་དང་དུས་རབས་དང་མཐུན་པའི་འགྱུར་བ་གཏང་རྒྱུ་དང་མུ་མཐུད་བོད་ཀྱི་བཟོ་རིག་དང་སྐད་ཡིག་གི་ཐད་ལ་ཞབས་འདེགས་བསྒྲུབ་རྒྱུ་ཡིན་སྐོར་གསུངས་བྱུང་།

 དེ་རིང་དང་སང་ཉིན་བཅས་ཉིན་གྲངས་གཉིས་རིང་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་དང་བསྟུན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ། ཕྱི་ལོ་ ༢༠༢༥ ལོའི་ནོར་གླིང་རིག་གཞུང་དུས་སྟོན་ཞིག་འཚོག་མུས་ཡིན་ཞིང་། དེ་རིང་དབུ་འབྱེད་མཛད་སྒོར་སྐྱབས་རྗེ་གླིང་རིན་པོ་ཆེ་མཆོག་གིས་དབུས། དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་རྣམ་པ་གསུམ་དང་། རྒྱ་གར་གྱི་འཇར་མན་དོན་གཅོད་ཀྱི་ཆབ་སྲིད་དྲུང་ཆེ་སྐུ་ཞབས་ནི་ཁོ་ལ་སི་(Nikolause Koch)ལགས། དགལ་ལྡན་པོ་བྲང་གི་དྲུང་ཆེ་བློ་བཟང་སྦྱིན་པ་ལགས།  གནས་ཆུང་སྐུ་རྟེན་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། དེ་བཞིན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ལས་བྱེད་དང་། ཕྱོགས་ཡོང་གི་མགྲོན་པོ་སོགས་འཛོམས་འདུག

ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་འགན་འཛིན་བཀའ་ཟུར་བློ་བཟང་སྙན་གྲགས་ལགས་ཀྱིས་འདི་ག་བོད་ཀྱི་དུས་བབ་གསར་ཁང་གི་གསར་འགོད་པར། ད་ལོ་ལོ་ཧྲིལ་པོ་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་དང་འབྲེལ་བ་ཆགས་ཀྱི་ཡོད་རེད། དེ་འདྲ་སོང་ཙང་ཚོགས་སྡེ་ཆེ་ཆུང་གང་འདྲ་ཞིག་ཡིན་ན་ཡང་། གོ་སྟོན་དང་སྟབས་བསྟུན་ནས་དུས་དྲན་སྲུང་གཙི་ཞུ་རྒྱུར་འབད་བརྩོན་ཞུ་དུས། ང་ཚོ་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ལའང་གོ་སྐབས་ཡག་པོ་ཞེ་དྲགས་ཤིག་བྱུང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གིས་འདས་པའི་མི་ལོ་སུམ་ཅུའི་རིང་ལ་འཛིན་སྐྱོང་གི་དབུ་འཛིན་གནང་མཁན་དང་། རྒན་ལགས་རྣམ་པ། ལས་བྱེད་རྣམ་པ་ཚོས་ཕྱག་ལས་གང་འཇམ་པ་དང་གང་གྲུབ་འབྲས་ཐོན་པ་དེ་དག་རྒྱལ་སྤྱིའི་ནང་སྤོབས་པ་མཐོ་བའི་ཐོག་ནས་འགྲེམས་སྤེལ་ཞུ་ཐུབ་རྒྱུ་དེ་ང་ཚོའི་དམིགས་ཡུལ་གཅིག་ཡིན། དེ་དང་ཆགས་ཅིག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དེ། རང་ཁ་རང་གསོའི་སྒྲིག་འཛུགས་ཤིག་ཡིན་ཡིན་དུས། ཚོང་འགྲེམས་སོགས་ལ་དམིགས་ནས་དུས་སྟོན་དེ་གོ་སྒྲིག་ཞུས་པ་ཞིག་ཡིན། ཞེས་གསུངས་བྱུང་།

ཡང་ཁོང་གིས། སྤྱིར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དེའི་འཛིན་སྐྱོང་གི་ཐོག་ལ་ཕྲན་བུ་ཕྲན་བུ་ཡར་རྒྱས་གཏང་དགོས་པ་དང་། ཚགས་ཚུད་དུ་གཏང་དགོས་པའང་ཡོང་གི་འདུག དེ་ང་ཚོ་ནོར་གླིང་གཅིག་པུ་མ་རེད། ཡུན་རིང་གནས་པའི་སྒྲིག་འཛུགས་ལ་བསྐྱར་ཞིབ་བྱས་ཏེ། སྒྲིག་འཛུགས་གང་འདྲ་ཞིག་ཡིན་རུང་ཚགས་ཚུད་དུ་འགྲོ་རྒྱུ་དང་། ལྷག་པར་དེང་སང་གི་དུས་ཚོད་དང་བསྟུན་པའི་ཐོག་ནས་འགྱུར་འགྲོས་འགྲོ་དགོས་པ་དེ་ཆོས་ཉིད་ཅིག་རེད། ང་ཚོ་ཡིན་ནའང་དེ་བཞིན་དུ་འཛིན་སྐྱོང་གི་ལས་དོན་བྱེད་ཕྱོགས་དང་། དེ་བཞིན་ལས་འཆར་སྤེལ་ཕྱོགས་ཙམ་མ་ཟད། ལས་འཆར་གསར་པ་ག་རེ་སྤེལ་དགོས་མིན་སོགས། ཐོག་མའི་དམིགས་ཡུལ་གཞིར་བཟུང་བཟོ་རིག་པའི་སྒྱུ་རྩལ་མི་ཉམས་གོང་འཕེལ་དང་ཉམས་པ་སླར་གསོ་བྱ་ཐུབ་རྒྱུའི་ཐད་ལ་དམིགས་ཡུལ་བཟུང་བ་བཞིན། གང་ལ་གང་འཚམ་གྱི་ཡག་པོ་ཞིག་ཡོང་གི་འདུག དེ་དང་མཉམ་དུ་དེ་སྔ་ཡིན་ན་ནོར་གླིང་གིས་མཐོ་སློབ་ཅིག་ཀྱང་བཙུགས་ཏེ། སློབ་འཇུག་གནང་མཁན་མེད་ཙང་མཐོ་སློབ་སྒོ་རྒྱབ་པ་རེད་དེ། ད་ལྟ་ང་ཚོའི་བསམ་བློའི་ནང་འཆར་གཞི་སྒྲིག་ཡ་དེ། བོད་ཀྱི་རིག་གཞུང་དང་སྐད་ཡིག་དེ་ཡིན་གཅིག་མིན་གཅིག་མཐོ་སློབ་ཡོད་མེད་ལ་མ་བལྟོས་པར་རྒྱ་གར་གཙོས། ཕྱིའི་རྒྱལ་ཁབ་ཁག་གི་བོད་ཀྱི་ན་གཞོན་ཚོ་ལ་དུས་ཐུང་གི་སློབ་ཁྲིད་དང་སློབ་ཡོན་སྤྲད་ཐུབ་རྒྱུར་བང་ཞིག་བསྒྲིགས་ཡོད་པ་དང་། དེ་དང་དེ་འདྲ་བའི་བསམ་བློའི་ནང་ལས་འཆར་མང་པོ་ཞིག་ཡོད། དེ་དག་རིམ་པའི་རིམ་པའི་ལག་ལེན་བསྟར་ཐུབ་པ་ཡིན་ན། ཐོག་མར་བཙུགས་པའི་དམིགས་ཡུལ་གཞི་བཟུང་གི་ཐོག་ནས་ལས་ཀ་བྱ་ཐུབ་རྒྱུ་ཞིག་རེད། ཅེས་གསུངས་བྱུང་། 

དེ་བཞིན་སྐུ་མགྲོན་གཙོ་བོ་གླིང་རིན་པོ་ཆེ་མཆོག་གིས། ང་ཚོ་ཚང་མས་མཁྱེན་གསལ་བཞིན། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དང་། ཐུགས་རྗེའི་གཟིགས་པའི་ཐོག་ནས་ང་རང་ཚོའི་ནོར་གླིང་འདི་མི་ལོ་སུམ་ཅུ་ཙམ་གྱི་གོང་དུ་ཐོག་མར་དབུ་འཛུགས་བྱས། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་མང་པོ་ཕེབས་ཡོད་རེད་ལ། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གིས་ཕྱག་དངུལ་གསོལ་རས་སྩལ་ཡོད་རེད། སྦྱིན་བདག་མང་དག་ཅིག་ཀྱང་ངོ་སྤྲོད་གནང་ཡོད་རེད། དེ་འདྲའི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་གཟིགས་པའི་ཐོག་ནས་དབུ་འཛུགས་གནང་ཐུབ་པ་ཞིག་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་གཞུང་གི་དབུ་འཁྲིད་ཀྱི་ཐོག་ནས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དེ་ཆོས་དོན་ལས་ཁུངས་ཀྱི་ཁྱབ་ཁོངས་སུ་བཞག་འདུག དེ་ནས་རིམ་པས་ཚོགས་པ་འདི་དགོས་པ་རྒྱུ་མཚན་མང་དག་ཅིག་ལ་བརྟེན་ནས་ཟུར་དུ་བཙུགས་གནང་ནས་དེབ་སྐྱེལ་བྱས། སྐབས་དེར་ཐང་ཀ་དང་། བརྐོས་སོགས་ཀྱི་སྒྱུ་རྩལ་གཙོ་བོ་བྱས་ནས་སྒྱུ་རྩལ་མཁན་མང་པོ་ཞིག་རུབ་རུབ་བཟོ་ཐུབ་པ་བྱུང་། ང་ཚོ་བཙན་བྱོལ་ནང་མི་སྒེར་གྱིས་བོད་ཀྱི་སྲོལ་རྒྱུན་མི་ཉམས་རྒྱུན་འཛིན་བྱེད་མཁན་མི་ཉུང་བ་ཞིག་ཡོད་རེད་དེ། སྤྱི་བའི་སྒྲིག་འཛུགས་ཤིག་གི་ཐོག་ནས་ཉར་ཚགས་བྱེད་མཁན་གྱི་སྡེ་ཚན་ཞིག་མེད་པ་ཡིན་དུས།  སྐབས་དེར་སྒྱུ་རྩལ་བ་རྣམས་རུབ་རུབ་བཟོས་ནས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དེ་གཙོ་བོ་གཟེངས་སུ་ཐོན་འཇུག་མཁན་ནི། གཙོ་བོ་སྒྱུ་རྩལ་མཁན་རྣམས་དང་བཀའ་བློན་ཁྲི་ཟུར་སྐལ་བཟང་ཡེ་ཤེས་ལགས་ཀྱིས་ཐུགས་ཁུར་ཆེ་བཞེས་གནང་ནས། ཕྱག་ལས་གཞི་རྒྱ་ཆེན་པོ་ཞིག་གནང་ནས་ད་བར་འདི་ལྟར་ཚུགས་ཐུབ་པ་བྱུང་བ་རེད། ཅེས་གསུངས་སོང་། 

ཡང་རིན་པོ་ཆེ་མཆོག་གིས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གིས་གཙོ་བོ་བོད་ཀྱི་རིག་གནས་ཀྱི་ནང་ནས་བཟོ་རིག་པའི་སྒྱུ་རྩལ་གྱི་གལ་ཆེན་པོ་ཞེ་དྲགས་ཤིག་མི་ཉམས་གོང་འཕེལ་དང་། ཉམས་པ་སླར་གསོ་བྱུང་ཐུབ་པ་ཞིག་དང་། གང་ལྟར་དྷ་རམ་ས་ལར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་མཁན་རྣམས་ཀྱིས། གཙུག་ལག་ཁང་དུ་ཆོས་མཇལ་ཞུས་ཚར་བའི་རྗེས་སུ། ཚང་མས་དགའ་པོ་བྱས་ནས་ཡོང་ས་དེ་ནོར་བུ་གླིང་ག་ཆགས་ཀྱི་འདུག བྱས་ཙང་དེ་འདྲ་ཡིན་དུས་ལྟེ་གནས་ཁང་འདིའི་ཐོག་ནས་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་དང་ཉམས་པ་སླར་གསོ་ཡོང་སླད་ཞབས་འདེགས་ཞེ་དྲགས་ཀྱི་རྒྱ་ཆེན་པོ་ཞིག་བསྒྲུབས་ཐུབ་ཡོད་རེད། དེ་རིང་དུས་སྟོན་ཐེངས་དང་པོར་འཚོག་གི་ཡོད་ཙང་། བརྒྱུད་ལམ་འདིའི་ཐོག་ནས་སྐུ་ངོ་སྐལ་བཟང་ཡེ་ཤེས་གཙོ་བོར་གྱུར་བའི་སྐབས་དེ་དུས་ཀྱི་ཕྱག་ལས་གནང་མཁན་མང་པོ་ཞིག་དགོངས་པ་རྫོགས་ཚར་རེད་ལ། ད་ལྟ་བཞུགས་པའང་ག་ཙམ་ཞིག་ཡོད་པ་ཚང་མར་དམིགས་བསལ་ཐུགས་རྗེ་ཆེ་ཞུ་ཡ་དང་། ད་ད་ལོ་ང་ཚོ་ལོ་སུམ་ཅུ་འཁོར་བའི་དུས་སྟོན་ཁེལ་བསྡད་ཀྱི་འདུག བྱས་ཙང་ཞབས་ལོ་སུམ་ཅུ་འཁོར་མཁན་དང་། དེ་བཞིན་ཞབས་ལོ་ཉི་ཤུ་འཁོར་མཁན་རྣམས་ལ་བཀའ་དྲིན་རྗེས་དྲན་ཞུ་རྒྱུའི་བཀའ་མོལ་ཞིག་བྱུང་སོང་། དེ་བཞིན་སྐུ་ངོ་སྐལ་བཟང་ཡེ་ཤེས་ལགས་སུའང་དམིགས་བསལ་གྱི་བཀའ་དྲིན་རྗེ་དྲན་གྱི་གཟེངས་རྟགས་ཤིག་དབུལ་རྒྱུའི་བཀའ་མོལ་ཡང་བྱུང་། ང་ཚོ་མི་རབས་གོང་མ་རྣམས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་ལས་དོན་གཉེར་རྒྱུ་གལ་ཆེན་རེད། ཅེས་གསུངས་སོང་།

 རྒྱ་གར་གྱི་འཇར་མན་དོན་གཅོད་ཀྱི་སྤྱི་ཁྱབ་ཆབ་སྲིད་དྲུང་ཆེ་སྐུ་ཞབས་ནི་ཁོ་ལ་སི་མཆོག་གིས། ངས་དེ་རིང་དུས་སྟོན་གྱི་དབུ་འབྲེལ་མཛད་སྒོའི་ཐོག བོད་ཀྱི་རིག་གཞུང་གཅེས་སྐྱོང་གི་འགན་འཛིན་བློ་བཟང་སྙན་གྲགས་མཆོག་དང་། དགེ་རྒན་རྣམ་པ། སློབ་མ་རྣམ་པ། ནོར་གླིང་མཐོ་སློབ་ཀྱི་སློབ་མ་བཅས་ཀྱིས་གྲུབ་འབྲས་ཡག་པོ་ཐོན་པར་བསྔགས་བརྗོད་ཞུ། ཁྱེད་ཅག་གིས་ཡིག་ཚགས་དང་བཟོ་རིག་གི་ལམ་ནས་བོད་ཀྱི་རིག་གཞུང་གཅེས་སྐྱོང་དང་བདག་ཉར་བྱ་རྒྱུའི་དམིགས་ཡུལ་བཟུང་ཡོད། དེ་ནི་དངོས་གནས་རླབས་ཆེན་གྱི་བྱ་གཞག་ཅིག་རེད། ང་ཚོ་ནི་ཚོང་ལས་ཐོན་རྫས་བཟོ་བསྐྲུན་དང་ཉོ་ཚོང་དེ་གལ་ཆེ་ཤོས་སུ་གཙི་བའི་དུས་རབས་ཤིག་ཏུ་འཚོ་གནས་བྱེད་མུས་ཡིན། དེང་སྐབས་བཟོད་བསྲན་དང་བརྩོན་འགྲུས་ལས། འཕྲུལ་རིག་བཟོ་སྐྲུན་གྱི་ལས་དོན་ལ་མང་བ་གཞོལ་ཐུབ་ཚེ་དེས་ཁྲོམ་རར་དབང་བསྒྱུར་ཐུབ་ཀྱང་། ཁྱེད་ཅག་གིས་ལག་ཤེས་བཟོ་རྩལ་གྱི་ལས་ལ་གཞོལ་བའི་ལམ་བུ་ཞིག་འདེམས་པ་རེད། ཁྱེད་ཅག་གིས་གསར་གཏོད་དང་ཁྱེད་རང་གིས་ག་རེ་བཟོ་སྐྲུན་བྱས་པའི་མཛེས་སྡུག་ལ་དོ་སྣང་བྱས་ཏེ། ཅ་དངོས་ཉོ་ཚོང་བྱེད་མཁན་གྱི་ཡིད་སེམས་བཀུག་ནས་ཕན་ཚུན་འབྲེལ་བ་བྱུང་བས། ཁྱེད་ཅག་ལ་མི་མང་གི་དགའ་མོས་བྱེད་བཞིན་ཡོད། རིག་གཞུང་ནི་སྤྱི་ཚོགས་ཀུན་གྱི་རྨང་གཞི་ལྟ་བུ་ཡིན་ཡང་། དེ་ནི་དམག་དོན་དང་བཙན་གནོན་སོགས་ཀྱི་དབང་གིས་ཉམས་ཆག་དང་། མི་རྣམས་ཀྱི་སྣང་ངོར་རིག་གཞུང་གི་གལ་ཆེ་རང་བཞིན་དེ་བརྗེད་འགྲོ་བ་ཡིན། ཞེས་གསུངས་སོང་། 

དེ་བཞིན་ནོར་གླིང་བོད་ཀྱི་རིག་གཞུང་དུས་སྟོན་ཐོག བོད་ཀྱི་ཐང་ཁ་དང་། བོད་སྨན། བཟོ་བཀོད། དེ་བཞིན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གིས་བཟོ་སྐྲུན་བྱས་པའི་ཐོན་རྫས། རི་མོའི་བརྩམས་ཆོས་དང་། བྱིས་པས་བྲིས་པའི་རི་མོ། ཆོས་ཕྱོགས་ཀྱི་ཆོ་ག་སོགས་ཀྱི་འགྲེམས་སྟོན་དང་། བོད་ཀྱི་དཔེ་མཛོད་ཁང་གིས་དཔེ་དེབ་ཚོང་འགྲེམས། བོད་ཀྱི་འགྲེམས་སྟོན་ཁང་གིས་༧གོང་ས་རྒྱལ་མཛད་རྣམ་གྱི་པར་རིས་འགྲེམས་སྟོན་སོགས་གནང་དང་གནང་མུས་ཡིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།