བོད་ཀྱི་དཀྱིལ་འཁོར་གྱི་བཟོ་བཀོད་ལྡན་པའི་ལྷ་ཁང་མཐའ་མ་རྗེ་འབུམ་སྒང་དེ་སྒྱུ་རྩལ་འགྲེམས་སྟོན་ཁང་ཞིག་ཏུ་བསྒྱུར།

བོད་ཀྱི་དམག་གིས་མན་ཇུའི་ཨམ་བན་ནམ་མན་ཇུའི་བློན་ཆེན་དང་དམག་སྣ་མང་པོ་དུས་གཅིག་ཏུ་དཀྲོངས་སའི་བོད་ཀྱི་རྒྱལ་ས་ལྷ་སར་ཡོད་པའི་རྗེ་འབུམ་སྒང་ལྷ་ཁང་དེ་རྒྱའི་སྒྱུ་རྩལ་འགྲེམས་སྟོན་ལྟེ་གནས་ཁང་ཞིག་ཏུ་བསྒྱུར་ཡོད་འདུག

ཟླ་འདིའི་ཕྱི་ཚེས་ ༢༦ ཉིན་རྒྱ་རིགས་ཁང་བཟོ་འཆར་འགོད་པ་ཞ་ཡུས་ཅུན་ (夏玉君) ཟེར་བ་གཙོ་བྱས་པའི་རྒྱ་རིགས་སྒྱུ་རྩལ་བ་ཁག་ཅིག་གིས། དུས་རབས་བཅོ་བརྒྱད་པའི་ནང་༸རྒྱལ་དབང་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་གིས་ཕྱག་བཏབ་པའི་བོད་ཀྱི་རྒྱལ་ས་ལྷ་སར་ཡོད་པའི་རྗེ་འབུམ་སྒང་ལྷ་ཁང་དེ་དེང་རབས་ཀྱི་དགོས་མཁོ་དང་སྤྱི་ཚོགས་ཀྱི་འཕེལ་འགྲོས་དང་མཐུན་པ་བཟོས་ཡོད་ཟེར་ནས་དེང་རབས་སྒྱུ་རྩལ་འགྲེམས་སྟོན་ལྟེ་གནས་ཁང་ཞིག་ཏུ་བསྒྱུར་ཏེ། ལྷ་སར་བཙན་འཛུལ་ས་གནས་རྒྱ་གཞུང་དང་རྒྱ་རིགས་སྒྱུ་རྩལ་བ་ཤ་སྟག་གིས་རྒྱའི་སྒྱུ་རྩལ་འགྲེམས་སྟོན་ཁོ་ནའི་འོག་རྗེ་འབུམ་སྒང་དེ་རྒྱ་རིགས་ཚོར་ཡོང་འབབ་བཟོ་ས་ཞིག་ཏུ་བེད་སྤྱོད་གཏོང་གི་ཡོད་འདུག

དེ་འབྲེལ་ཧོང་ཀོང་དུ་རྟེན་གཞི་བྱས་པའི་ (Media OutReach) གསར་ཁང་གིས་བཅར་འདྲི་བྱས་པའི་ལེན་ཚན་ཞིག་ཏུ་རྒྱ་རིགས་སྒྱུ་རྩལ་བ་ཞ་ཡུས་ཅུན་ཟེར་བས། ང་ཚོས་རྗེ་འབུམ་སྒང་དེ་སྔོན་འབྲི་མཛོད་ཁང་དང་གློག་སྒྱུར་ས་ཚིགས་སུ་བེད་སྤྱོད་བཏང་མྱོང་བ་ཤེས་ཀྱིན་ཡོད། འོན་ཀྱང་། ངས་བོད་ནས་ཅི་ཞིག་བྱ་ཐུབ་བམ་བསམས་ནས་འདང་བརྒྱབ་རྗེས། རྗེ་འབུམ་སྒང་དེ་དེང་རབས་དང་མཐུན་པའི་སྒྱུ་རྩལ་འགྲེམས་སྟོན་ཁང་ཞིག་ཏུ་བསྒྱུར་ན་ཧ་ཅང་ལེགས་པོ་ཡོད་པའི་ཚོར་སྣང་བྱུང་། ཞེས་དང་། ལྷ་ཁང་དང་ཁང་པ་ཚང་མ་སྤྱི་དམངས་འགྲེམས་སྟོན་ཁང་ཞིག་ཏུ་བསྒྱུར་ཐབས་མེད་མོད། རྗེ་འབུམ་སྒང་གི་དཀྱིལ་འཁོར་གྱི་བཟོ་བཀོད་ཀྱིས་མི་རྣམས་འཚོལ་ཞིབ་ཀྱི་འགྲུལ་བཞུད་ཅིག་གི་སྟེང་དུ་འཁྲིད་ཐུབ་པ་དང་། རྗེ་འབུམ་སྒང་གི་བར་འཁྱམ་ནས་ནང་གི་མཆོད་ཁང་དང་མཆོད་རྟེན་གཙོ་བོ་སོགས་ཀྱིས་བོད་ཀྱི་དེང་རབས་སྒྱུ་རྩལ་དང་ལྷ་སར་རྒྱུས་ལོན་ཐུབ་པའི་ཁྱད་ཆོས་ལྡན་ཡོད་སྐོར་དང་།  རྗེ་འབུམ་སྒང་དེང་རབས་སྒྱུ་རྩལ་འགྲེམས་སྟོན་ལྟེ་གནས་ཁང་ཞིག་ཏུ་བསྒྱུར་སྐབས། ཁ་སྣོན་རྒྱག་རྒྱུར་གཙོ་འཛིན་མ་བྱས་པར་རིག་དངོས་ཁག་ཅིག་ཇེ་ཉུང་དུ་བཏང་ནས་རྗེ་འབུམ་སྒང་གི་ཐོག་མའི་བཟོ་དབྱིབས་དང་དེའི་སྙིང་བོ་སོགས་ཕྱིར་སྟོན་ཐབས་བྱས་ཡོད་སྐོར་སོགས་བརྗོད་འདུག

བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས་ལགས་ཀྱིས། རྒྱ་ནག་གཞུང་གི་འགྲེལ་བཤད་རྒྱག་སྟངས་བྱས་པ་ཡིན་ན། རྗེ་འབུམ་སྒང་སྒྱུ་རྩལ་ལྟེ་གནས་ཁང་གིས་བོད་ཀྱི་དེང་དུས་རིག་གནས་ཀྱི་རྣམ་པའི་ཐོག་ནས་བོད་ཀྱི་རིག་གཞུང་ངོ་སྤྲོད་བྱ་རྒྱུ་ཡིན་སྐོར་བརྗོད་འདུག འོན་ཀྱང་། ཕྱི་ལོ་ ༢༠༢༡ ལོར་སྒྱུ་རྩལ་ཁང་དེ་མགོ་བཙུགས་པ་ནས་བཟུང་རྒྱ་རིགས་སྒྱུ་རྩལ་བ་རྐྱང་རྐྱང་སྐད་བཏང་འདུག དེ་ནས་ང་ཚོས་ག་རེ་མཐོང་གི་འདུག་ཞུས་ན། རྗེ་འབུམ་སྒང་ལྷ་ཁང་ཞིག་ནས་སྒྱུ་རྩལ་གྱི་ལྟེ་གནས་འགྲེམས་སྟོན་ཁང་ཞིག་ཏུ་བསྒྱུར་བ་དང་། ལས་གཞི་དེ་མགོ་འཛུགས་མཁན་རྒྱ་རིགས་ཡིན་པ་དང་བཟོ་བཀོད་སོགས་བསྐྲུན་མཁན་རྒྱ་རིགས་ཡིན་པ། དེ་བཞིན། ད་སྔ་བར་རྒྱ་རིགས་སྒྱུ་རྩལ་བ་ཤ་སྟག་གི་སྒྱུ་རྩལ་འགྲེམས་སྟོན་བྱས་ཏེ། བོད་མི་ཚོར་གོ་སྐབས་མ་སྤྲད་པ་དང་བོད་མི་གཅིག་ཀྱང་ཉམས་ཞུགས་བྱས་བཅུག་མི་འདུག དེར་བརྟེན། རྒྱ་མི་ཚོས་རྒྱ་ནག་གི་སྒྱུ་རྩལ་དང་དེང་རབས་སྒྱུ་རྩལ་གྱི་རྣམ་པ་འཁྱེར་ནས་བོད་པའི་སྒྱུ་རྩལ་ཚོང་རྒྱག་སའི་ས་ཆ་ཞིག་ཆགས་ཡོད་ལ། ལྷག་པར་དུ་བོད་མི་ཚོར་སྐད་ཆ་གང་ཡང་མ་དྲིས་པར་དཀྱིལ་འཁོར་གྱི་བཟོ་བཀོད་ལྡན་པའི་བོད་པའི་དགོན་པ་གཅིག་པུ་དེ་རྒྱ་མིས་བོད་པའི་སྒྱུ་རྩལ་ཚོང་རྒྱག་སའི་ལྟེ་གནས་ཁང་དུ་བསྒྱུར་ཏེ། བོད་མི་ཚོར་གོ་སྐབས་རྩ་བ་ནས་མེད་པར་རྒྱ་མི་ནང་ཁུལ་་གྱི་ཁེ་ཕན་བསྐྲུན་སའི་ཡུལ་ཞིག་ཆགས་ཡོད། ཅེས་བརྗོད་བྱུང་།

རྒྱ་ནག་གཞུང་གིས་བོད་ཀྱི་ཤུལ་བཞག་རིག་དངོས་ལ་བདག་པོ་རྒྱག་གི་མེད་སྐོར་ལ་ཕན་ཐོགས་ལགས་ཀྱིས། རྗེ་འབུམ་སྒང་དེ་དུས་རབས་བཅོ་བརྒྱད་ནང་གི་བོད་པའི་དགོན་པ་རྩ་ཆེན་ཞིག་ཆགས་ཡོད། རྒྱ་ནག་གིས་བོད་ལ་བཙན་འཛུལ་བྱས་ཏེ་རིག་གནས་གསར་བརྗེའི་སྐབས་སུ་མཛོད་དུ་བེད་སྤྱོད་བྱས་ཡོད། སྙིང་རྗེ་བ་ཞིག་ལ་རྗེ་འབུམ་སྒང་གི་ཉེ་འཁྲིས་བོད་མི་དངོས་གྲུབ་ཞུ་བ་ཞིག་གིས། ཕྱི་ལོ་ ༢༠༢༣ ལོར་རྗེ་འབུམ་སྒང་གི་རྗེ་ཙོང་ཁ་བའི་ཚ་ཚ་སོགས་བདག་ཉར་བྱས་ཡོད་པའི་རིག་དངོས་སུམ་སྟོང་ཙམ་ལྟེ་གནས་ཁང་དེར་ཞལ་འདེབས་ཕུལ་འདུག སྐབས་དེར་ཁོང་གིས་ཕྱི་ལོ་ ༢༠༠༠ ལོར་རྒྱ་ནག་གཞུང་གིས་ལས་གཞིའི་ཐོག་ནས་རྗེ་འབུམ་སྒང་གི་གསང་སྤྱོད་ལ་འགྱུར་བ་བཏང་དུས། ཡུར་བའི་ནང་ནས་ཅ་དངོས་དེ་དག་རྙེད་སོན་བྱུང་ཡོད་པ་བཅར་འདྲིའི་ནང་བརྗོད་ཡོད་ལ། ཁོང་གིས་ཅ་དངོས་དེ་དག་གཏོར་བརླག་མི་འགྲོ་བའི་ཆེད་དུ་ལོ་ངོ་ ༢༠ ལྷག་རིང་བདག་ཉར་བྱས་ཡོད། དེའི་ཐོག་ནས་རྒྱ་ནག་གཞུང་གིས་བོད་ཀྱི་རིག་དངོས་ལ་བདག་པོ་རྒྱག་གི་ཡོད་ཅེས་ཞེ་དྲགས་བསྒྲགས་ཀྱིན་ཡོད་ཀྱང་། ཕྱི་ལོ་ ༢༠༠༠ རྗེས་ནས་ཀྱང་རྒྱ་ནག་གིས་བོད་ཀྱི་རིག་དངོས་ལ་བདག་པོ་རྒྱག་ཐུབ་མེད་པ་དེས། བོད་པའི་རིག་གཞུང་དང་རིག་དངོས་ཀྱི་བདག་པོ་ངོ་མ་བོད་པ་ཡིན་པ་དང་བདག་པོ་རྒྱག་ཐུབ་མཁན་ཡང་བོད་པ་ཡིན་པ་གསལ་བོ་བསྟན་ཡོད། ལྷག་པར་དུ་རྗེ་འབུམ་སྒང་དེ་བོད་མི་ཚོར་ཧ་ཅང་གལ་ཆེན་ཡིན་ཡང་། རྒྱ་མི་ཚོས་སོ་སོའི་དགོས་མཁོ་ལས་བོད་མི་གཅིག་ལ་གོ་སྐབས་སྤྲད་མེད་ལ། དེང་དུས་ཀྱི་རིག་གཞུང་འགྲེམས་སྟོན་ཟེར་བའི་འོག་ནས་རྒྱ་མིའི་སྒྱུ་རྩལ་བ་ཚོའི་འཁྲབ་སྟོན་འཁྲབ་ས་དང་བོད་ཀྱི་རིག་གཞུང་བཙོང་སའི་ཡུལ་ཞིག་ཏུ་བསྒྱུར་ཡོད། དེས་ས་གནས་ཀྱི་བོད་མི་རྣམས་ལ་སྐད་ཆ་མ་དྲིས་པར་བོད་ཀྱི་རིག་གཞུང་དང་སྒྱུ་རྩལ་ལ་རྡོག་རོལ་བཏང་བ་ཞིག་ཆགས་ཡོད་ཅེས་བརྗོད་བྱུང་།

རྗེ་འབུམ་སྒང་ལྷ་ཁང་དེང་རབས་སྒྱུ་རྩལ་གྱི་འགྲེམས་སྟོན་ལྟེ་གནས་ཁང་ཞིག་ཏུ་བསྒྱུར་བའི་ལས་གཞི་དེ། ཐོག་མར་ཕྱི་ལོ་ ༢༠༡༧ ལོ་ནས་རྒྱ་རིགས་ཁང་བཟོ་འཆར་འགོད་པ་ཞ་ཡུས་ཅུན་སོགས་ཀྱིས་ལྷ་ཁང་དེའི་ལོ་རྒྱུས་དང་འཆར་འགོད་སོགས་ལ་ཞིབ་འཇུག་བྱས་ཏེ། དེང་གི་སྤྱི་ཚོགས་ཀྱི་དགོས་མཁོ་དང་མཐུན་པར་བསྒྱུར་ཆེད་འཆར་འགོད་བྱས་པ་ནས་བྱུང་ཞིང་། ཕྱི་ལོ་ ༢༠༢༡ ལོར་ལས་གཞི་དེ་དངོས་སུ་གྲུབ་ཡོད་པ་དང་། ཕྱི་ལོ་ ༢༠༢༢ ལོར་རྒྱ་ནག་གཞུང་འབྲེལ་གོ་ལའི་དུས་བབ་ཀྱིས། རྗེ་འབུམ་སྒང་དེང་རབས་སྒྱུ་རྩལ་འགྲེམས་སྟོན་ལྟེ་གནས་ཁང་དེར་བཅོས་འགོད་བྱས་ཏེ། རྒྱ་ནག་གི་སྲོལ་རྒྱུན་མཛེས་དཔྱོད་རིག་པའི་སློབ་གསོ་དར་སྤེལ་གཏོང་ཡུལ་བོད་ཀྱི་གནའ་བོའི་ལྷ་ཁང་ཐོག་མར་གྱུར་ཡོད་སྐོར་བསྒྲགས་འདུག་པ་མ་ཟད། ལྟེ་གནས་ཁང་དེའི་གྱང་ངོས་སུ་རྒྱ་ནག་གི་ཆིན་རྒྱལ་རབས་སྐབས་ཀྱི་ལྡེབས་རིས་སོགས་ཀྱང་ཡོད་སྐོར་བརྗོད་འདུག

རྗེ་འབུམ་སྒང་གི་འདས་པའི་ནང་བཟོ་བཀོད་དང་ད་ལྟ་བཅོས་བསྒྱུར་ཟིན་པའི་བཟོ་དབྱིབས་སོགས་ཀྱི་གནས་ཚུལ་རྒྱས་པ་ཤེས་རྟོགས་ཐུབ་རྒྱུ་ཁག་པོ་ཡིན་ཡང་། ལོ་ངོ་ཉིས་བརྒྱ་ལྷག་གི་རིན་ཐང་ལྡན་པའི་རྗེ་འབུམ་སྒང་གི་ལོ་རྒྱུས་ད་ལྟའང་བོད་ཀྱི་ཡིག་ཆ་ཁག་ཏུ་གསལ་ཐང་ངེར་ཡོད་པ་ལྟར། རྗེ་འབུམ་སྒང་ནི་བོད་ཀྱི་རྒྱལ་ས་ལྷ་སའི་ར་ས་འཕྲུལ་སྣང་གཙུག་ལག་ཁང་ནས་ར་མོ་ཆེར་འགྲོ་སའི་ལམ་གྱི་ཤར་ངོས་རྒྱུད་སྨད་གྲྭ་ཚང་གི་ནུབ་ངོས་སུ་ཆགས་པའི་ལྷ་ཁང་ཞིག་ཡིན་པ་དང་། ཕྱི་ལོའི་དུས་རབས་བཅོ་བརྒྱད་པའི་ནང་༸རྒྱལ་དབང་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་གིས་ཕྱག་བཏབ། རྗེ་འབུམ་སྒང་ནི་བོད་ཀྱི་སྐུ་དྲག་མི་དྲག་བར་དབང་ཆའི་འཐབ་རྩོད་བྱུང་བ་ལ་བརྟེན་ནས། ཡིག་ཆ་ཁག་ཏུ་ཨམ་བན་ཞེས་འབོད་པའི་མན་ཇུའི་བློན་ཆེན་དང་དམག་བོད་དུ་དྲངས་པའི་ལོ་རྒྱུས་ཀྱི་ཀྱོག་མཚམས་ཤིག་ལས་བྱུང་ཞིང་། ཐོག་མའི་ཆར་རྗེ་འབུམ་སྒང་ལ་རྒྱ་འབུམ་སྒང་ཞེས་མིང་ཆགས།

དེ་ཡང་དུང་དཀར་ཚིག་མཛོད་སོགས་སུ། ཕྱི་ལོ་ ༡༧༢༡ ལོར་བོད་ཀྱི་བཀའ་བློན་ཡིན་པའི་ང་ཕོད་པ་རྡོ་རྗེ་རྒྱལ་པོ་དང་། གུང་ལུམ་པ་བ་བཀྲ་ཤིས་རྒྱལ་པོ། སྦྱར་ར་བ་བློ་གྲོས་རྒྱལ་པོ་བཅས་ང་ལམ་སྦྱར་གསུམ་དང་། ཁང་ཆེན་པཱ་དུར་བསོད་ནམས་རྒྱལ་པོ་དང་ཕོ་ལྷ་བསོད་ནམས་སྟོབས་རྒྱལ་བཅས་ཀྱི་བར་རྩོད་རྙོག་བྱུང་སྟེ། ང་ལམ་སྦྱར་གསུམ་གྱིས་མན་ཇུར་བློ་དཀར་བའི་ཁང་ཆེན་བསོད་ནམས་རྒྱལ་པོ་དཀྲོངས་པ་དང་། ཕོ་ལྷ་བསོད་ནམས་སྟོབས་རྒྱལ་གྱིས་མན་ཇུ་ལ་མཉམ་འབྲེལ་བྱས་ཏེ་མན་ཇུའི་དམག་བོད་དུ་དྲངས་ནས་ང་ལམ་སྦྱར་གསུམ་དུས་གཅིག་ཏུ་སྲོག་ཐོག་བཏང་། སྐབས་དེ་ནས་བཟུང་བོད་དུ་གནས་སྡོད་ཨམ་བན་ཐོག་མ་བྱུང་བར་གྲགས། ཕོ་ལྷ་བསོད་ནམས་སྟོབས་རྒྱལ་གྱིས་ཕྱི་ལོ་ ༡༧༢༧ ནས་ ༡༧༤༧ བར་བོད་ཀྱི་སྲིད་དབང་བསྐྱངས། ཁོའི་སྲས་འགྱུར་མེད་རྣམ་རྒྱལ་གྱིས་ ༡༧༤༧ ནས་ ༡༧༥༠ བར་སྲིད་བསྐྱངས། འགྱུར་མེད་རྣམ་རྒྱལ་གྱིས་བོད་སྡོད་ཨམ་བན་ཤུགས་རྐྱེན་ཇེ་ཆུང་དུ་གཏོང་ཐབས་སུ་ཨམ་བན་བོད་ནས་མཐར་དཀྲོལ་གཏོང་ཐབས་བྱས་སྟབས། བོད་སྡོད་ཨམ་བན་ཏཱ་ཞན་ཕུ་ཆེན(博啮)དང་ཨབ་ཏུན(拉布敦)གཉིས་ཀྱིས་ལྷ་སའི་ཁྲོམ་གཟིགས་ཁང་དུ་འགྱུར་མེད་རྣམ་རྒྱལ་གསོལ་སྟོན་ཐོག་གདན་ཞུས་ཀྱིས་གོ་སྐབས་བཟུང་ནས་དཀྲོངས་བས། འགྱུར་མེད་རྣམ་རྒྱལ་གྱི་མགྲོན་གཉེར་བློ་བཟང་བཀྲ་ཤིས་དང་ཡ་སོར་གཉིས་ཀྱིས་གནས་ཚུལ་དེ་ཤེས་འཕྲལ་བོད་དམག་ཁྲིད་དེ་བོད་སྡོད་ཨམ་བན་གཉིས་དང་། རྒྱའི་ཞི་དྲག་མི་སྣ་བརྒྱ་ལྷག་དུས་གཅིག་ཏུ་ཁྲོམ་གཟིགས་ཁང་ཉེ་འགྲམ་དུ་རྐྱེན་ལམ་དུ་བཏང་བས་ས་ཆ་དེར་ཐོག་མར་རྒྱ་འབུམ་སྒང་ཞེས་གྲགས། རྒྱལ་དབང་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་ནས་མི་བསད་པ་ཚོའི་སྒྲིབ་སྦྱོང་དུ་རྗེ་ཙོང་ཁ་བའི་སྐུ་བརྙན་སོར་ལྔ་བྱས་པ་འབུམ་གཅིག་བཞེངས་གནང་སྟེ་མཆོད་རྟེན་ཐོག་བརྩེགས་ལྔ་ལྡན་པ་ཞིག་གསར་བཞེངས་མཛད། མཆོད་རྟེན་གྱི་མཐའ་བཞིར་ལྕགས་ཐག་གི་དྲིལ་བུ་ཡོད་པ། དེ་ལ་རླུང་བུས་བསྐུལ་ནས་སྒྲ་དབྱངས་གྲོང་ཁྱེར་གྱི་ཕྱོགས་བཞིར་ཁྱབ་པ་དང་། ད་དུང་ལྷ་ཁང་ནང་ནས་དབུ་ཏོག་བར་སྐས་འཛེགས་ཏེ་འགྲོ་ས་ཡོད་པས། རྒྱ་འབུམ་མཐོ་བའི་སྒང་ལ། །མཐོ་རིང་སྐས་འཛེགས་བཙུགས་བཞག །ཕྱོགས་བཞི་གང་ནས་བལྟས་ཀྱང་། །སྙན་པའི་དྲིལ་བུའི་སྐད་རེད། །ཅེས་པའི་དམངས་གཞས་ཀྱང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།