གོ་སྟོན་རྒྱལ་ཡོངས་ཤེར་ཕྱིན་བགྲོ་གླེང་ཚོགས་ཆེན་འཚོག་བཞིན་འདུག

༧སྐྱབས་རྗེ་ཟམ་གདོང་རིན་པོ་ཆེ་མཆོག་གིས་དེང་སང་བོད་བརྒྱུད་ནང་བསྟན་གྱི་བགྲོ་གླེང་སྐབས་རྩོད་པ་མ་གཏོགས་རྩོམ་ཡིག་བྲིས་ཏེ་བགྲོ་གླེང་བྱེད་པའི་ལམ་སྲོལ་དེ་ཉམས་བསྡད་ཡོད། ཅེས་གསུངས་སོང་།

དེ་རིང་ཕྱི་ཚེས་ ༡ ནས་ ༥ བར་ཉིན་གྲངས་ལྔའི་རིང་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ཨ་ཏི་ཤ་ཚོགས་ཁང་དུ། གཙུག་ལག་ཁང་སློབ་གཉེར་ཁང་གི་རང་གཞུང་སྡེ་ཚན་གྱི་གོ་སྒྲིག་འོག ༧སྐུའི་གོ་སྟོན་རྒྱལ་ཡོངས་ཤེར་ཕྱིན་བགྲོ་གླེང་ཚོགས་ཆེན་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ ༸སྐྱབས་རྗེ་ཁྲི་ཟུར་ཟམ་གདོང་རིན་པོ་ཆེ་མཆོག་དང་། ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སློབ་དཔོན་དབང་ཕྱུག་རྡོ་རྗེ་ནེ་གཱི་ལགས། གཏན་ཚིགས་དང་ནང་དོན་རིག་པའི་སྡེ་ཚན་གྱི་འགན་འཛིན་སློབ་དཔོན་གྲགས་པ་སེང་གེ་ལགས། རང་གཞུང་སྡེ་ཚན་གྱི་འགན་འཛིན་མཁན་པོ་གསང་སྔགས་བསྟན་འཛིན་ལགས། དེ་བཞིན་གདན་ས་དང་བཤད་གྲྭ་ཁག  མཐོ་སློབ་ཀྱི་སློབ་དཔོན་བཅས་ཁྱོན་བགྲོ་གླེང་བ་གྲངས་ ༢༦ དང་། མཐོ་སློབ་ཀྱི་དགེ་ལས་སློབ་ཕྲུག་བཅས་མཉམ་ཞུགས་གནང་འདུག

ཐེངས་འདིའི་ཚོགས་འདུའི་སྐོར་ལ་སློབ་དཔོན་གྲགས་པ་སེང་གེ་ལགས་ཀྱིས། དེང་སང་གི་དུས་རབས་ཀྱི་གནས་སྟངས་དང་བསྟུན་པའི་ཐོག་ནས་གདན་ས་ཆེན་མོ་དང་བཤད་གྲྭ་ཁག་ཏུ་གཞུང་ཆེན་ཁག་ལ་བགྲོ་གླེང་འཚོགས་དང་འཚོག་མུས་ཡིན་པ་ལྟར། ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གིས་ཀྱང་ལོ་ལྟར་ཚོགས་འདུ་གོ་སྒྲིག་བྱེད་བཞིན་ཡོད་ཅིང་།ད་ལོ་རང་གཞུང་བཀའ་ཤག་གིས་འཛམ་གླིང་ཡོངས་སུ་༧སྐུའི་གོ་སྟོན་ཆེད་བྱམས་བརྩེའི་ལོ་སྲུང་གཙི་བྱེད་བཞིན་ཡོད་པ་དང་བསྟུན། དམིགས་བསལ་གཞུང་ཆེན་ཤེར་ཕྱིན་གྱི་ཐོག་བགྲོ་གླེང་འཚོག་གི་ཡོད་ལ།འདས་ལོར་༧སྐྱབས་རྗེ་ཟམ་གདོང་རིན་པོ་ཆེ་མཆོག་གིས་གཞུང་ཆེན་ཐོག་བགྲོ་གླེང་མང་ཙམ་གནང་བའི་ལམ་སྟོན་བཞིན། ཐེངས་འདིའི་ཤེར་ཕྱིན་གྱི་བགྲོ་གླེང་ཉིན་ལྔའི་རིང་འཚོག་བཞིན་ཡོད། གཙུག་ལག་ཁང་འདི་ལ་མཚོན་ན་གཞུང་ཆེན་ཐོག་ཉིན་ལྔའི་རིང་བགྲོ་གླེང་འཚོགས་པ་ཐེངས་དང་པོ་ཡིན། གཞུང་ཆེན་བཀའ་པོད་ལྔའི་ནང་ནས་སྙིང་པོ་དེ་ཕར་ཕྱིན་ཆགས་ཀྱི་ཡོད་པས། འདས་ལོར་མངོན་པ་མཛོད་ཀྱི་ཐོག་བགྲོ་གླེང་འཚོགས་པ་རེད། ད་ལོའི་༧སྐུའི་གོ་སྟོན་ལ་མ་སྒྲིག་ལྷུན་འགྲུབ་ཀྱི་ཚུལ་དུ་ཕར་ཕྱིན་གྱི་གཞུང་ཆེན་ཐོག་བགྲོ་གླེང་གནང་བ་རེད། ད་ལོའི་ཕྱི་ཟླ་ ༥ པ་ནས་ཐེངས་འདིའི་བགྲོ་གླེང་གི་དཔྱད་རྩོམ་འབྲི་མགོ་བཙུགས་ཡོད་པས། བགྲོ་གླེང་གི་དཔྱད་རྩོམ་ཞིབ་ཚགས་པོ་ཡོང་ཡོད་བསམ་གྱི་འདུག ཅེས་བརྗོད་སོང་།

ཉེ་བའི་རིགས་བདག་སློབ་དཔོན་དབང་ཕྱུག་རྡོ་རྗེ་ནེ་གཱི་ལགས་ཀྱིས། ད་ལྟའི་ཆར་འཛམ་གླིང་ཡུལ་གྲུ་ཀུན་དུ་བོད་བརྒྱུད་ནང་བསྟན་དར་དང་དར་བཞིན་པ་དེ། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་དུ་ཆིབས་བསྒྱུར་བསྐྱངས་ཏེ། བསྟན་པ་དང་འགྲོ་བར་ཕན་པའི་ཕུགས་རྒྱང་རིང་པོར་བསམ་བློ་བཏང་བར་བརྟེན་ནས་བྱུང་བ་ཞིག་ཡིན་པས། ང་ཚོས་ཀྱང་བཀའ་དྲིན་རྗེས་དྲན་ཞུ་དགོས་ལ། ༧གོང་ས་རྒྱལ་བ་རིན་པོ་ཆེ་མཆོག་ནས་དགུང་གྲངས་ ༡༡༣ བཞུགས་རྒྱུའི་ཞལ་བཞེས་གནང་ཡོད་པ་ལྟར། རྗེས་མཇུག་པ་ཡོངས་ཀྱིས་ཚོགས་བསགས་སྒྲིབ་སྦྱོང་དང་། བླ་མའི་བཀའ་གསུང་ཅི་བསྒྲུབ་བྱས་ཏེ་སྨོན་ལམ་འདེབས་རྒྱུ་གལ་ཆེན་པོ་རེད། ཅེས་དང་། ང་ཚོས་ཤེར་ཕྱིན་ལ་བལྟས་ཏེ་ཐེག་པ་ཆེ་ཆུང་གི་བསམ་བློ་གཏོང་ཕྱོགས་གཅིག་པ་ཡིན་པའི་ངེས་ཤེས་རྙེད་ཐུབ་ན། ང་ཚོས་ཤེར་ཕྱིན་གྱི་བགྲོ་གླེང་འཚོགས་པའི་དགོས་པ་འགྲུབ་པ་རེད་དྲན་གྱི་འདུག སྤྱིར་༧གོང་ས་རྒྱལ་བ་རིན་པོ་ཆེ་མཆོག་ནས་ནང་པ་སངས་རྒྱས་པ་ཙམ་མིན་པར་ཕྱི་རོལ་པ་ཚང་མས་མཉམ་དུ་མཐུན་སྒྲིལ་བྱེད་དགོས་པ་དེ་ཐུགས་བསྐྱེད་དམ་བཅའ་བཞིའི་ནང་དུ་ཡོད་པ་རེད། ང་ཚོས་ནང་པ་གཅིག་པ་ཡིན་པ་བསྒྲུབ་མ་ཐུབ་ན་ཉམས་ལེན་མེད་པའི་རྟགས་རེད། ཅེས་བརྗོད་སོང་།

༸སྐྱབས་རྗེ་ཁྲི་ཟུར་ཟམ་གདོང་རིན་པོ་ཆེ་མཆོག་གིས། བགྲོ་གླེང་ཚོགས་འདུ་ཟེར་བ་དེ་བོད་ཀྱི་སློབ་གཉེར་བྱེད་པའི་ལམ་སྲོལ་གྱི་ནང་དུ་བགྲོ་གླེང་དང་རྩོད་པ་ཞེས་མིང་བཏགས་སྟངས་ཀྱི་ཁྱད་པར་མ་གཏོགས་ཡོད་པ་རེད། མཁས་པའི་བྱ་བའི་ནང་དུ་འཆད་རྩོད་རྩོམ་གསུམ་ཞེས་ཐོག་མ་ནས་དར་བའི་ལམ་སྲོལ་ཞིག་རེད། དེའི་ནང་ནས་རྩོད་པ་ཞེས་པ་དེ་དོན་དུ་བགྲོ་གླེང་གི་གནས་སྟངས་ཤིག་རེད། རྒྱ་གར་དང་ཡུལ་ལུང་གཞན་པར་དར་བའི་ཆོས་དང་རིག་གཞུང་གི་སྲོལ་རྒྱུན་གང་དུ་བལྟས་ཀྱང་། གོང་ནས་གོང་དུ་འདྲི་བ་དང་ལན་འདེབས་པའི་བརྗོད་གཞིའི་དོན་ལ་གནད་དུ་སྨིན་པའི་གོ་དོན་གྲོལ་ཐུབ་པའི་ལམ་སྲོལ་དེ། སངས་རྒྱས་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་དུས་ནས་བྱུང་བ་ཞིག་རེད་མ་གཏོགས། དེའི་སྔོན་རྒྱ་གར་གྱི་མཚོན་པའི་ཆོས་དང་ལྟ་གྲུབ་ཀྱི་སྲོལ་རྒྱུན་གང་དུའང་སློབ་མས་བླ་མར་དྲི་བ་དྲིས་པ་དང་། དྲི་བའང་གོང་ནས་གོང་དུ་དྲིས་པའི་རིག་པའི་ལམ་སྲོལ་དེ་དར་ཡོད་པ་མ་རེད། སངས་རྒྱས་ཀྱིས་ཆོས་སྟོན་པའི་ཚུལ་དེ་སངས་རྒྱས་སྔོན་གྱི་མུ་སྟེགས་སྟོན་པ་དྲུག་ལ་སོགས་བྱུང་ཟིན་པ་ཕལ་ཆེ་བས་བསྟན་བཅོས་དང་ལུང་ལ་བལྟས་པ་ཡིན་ན། རིག་བྱེད་རྣམ་པ་བཞིའི་མཚོན་པའི་ལུང་ལ་བལྟས་ན་དྲི་བ་དྲིས་ལན་གྱི་སྒོ་ནས་འགྲོ་བའི་གཞུང་མེད་པ་རེད། སྟོན་པས་གང་གསུངས་པ་དེ་ཉན་པ་པོས་དེ་ག་རང་ཆ་བཞག་པ་ལས། དེ་ལ་དོགས་པ་དང་བགྲོ་གླེང་བྱེད་པའི་ལམ་སྲོལ་མེད་པ་རེད། ཅེས་གསུངས་སོང་།

ཡང་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས། སྟོན་པ་བཅོམ་ལྡན་འདས་ཀྱིས་སྟོན་པ་གཞན་དང་མི་འདྲ་བ་བྱས་ཏེ། ལེགས་པར་བརྟག་ལ་ང་ཡི་བཀའ།། བླང་བར་བྱ་ཡི་གུས་ཕྱིར་མིན།། དད་པའི་གུས་ཞབས་ཐོག་ནས་ཁས་བླངས་ན་འགྲིག་གི་མ་རེད། སོ་སོས་བལྟ་དགོས་པ་རེད་ཅེས་གསུངས་ཡོད་པ་དེ་རླབས་ཆེན་གྱི་ལམ་སྟོན་ཆེན་མོ་ཞིག་རེད། དེ་ནི་དེང་རབས་ཀྱི་ལྟ་གྲུབ་དང་སྲོལ་རྒྱུན་འཛིན་མཁན་ཚོ་དང་། ལྷག་པར་དུ་དེང་རབས་ཀྱི་ཚན་རིག་སྨྲ་བ་ཚོས་གཟི་བརྗིད་ཀྱི་ལམ་སྟོན་ཞིག་ཡིན་པར་ངོས་འཛིན་བྱེད་ཀྱི་ཡོད། སངས་རྒྱས་ཀྱི་གསུངས་དང་བཀའ་མདོ་སྡེ་གང་འདྲ་ཞིག་ལ་བལྟས་ཀྱང་། དྲི་བ་དྲིས་ལན་དང་འགལ་ལན་གྱི་ཚུལ་དུ་ཡོད་པ་ལས།  སྟོན་པ་རང་ཉིད་ཀྱིས་ཐག་བཅད་དེ་གསུངས་པའི་མདོ་དང་རྒྱུད་དཀོན་པོ་རེད། བོད་བརྒྱུད་ནང་བསྟན་གྱི་བགྲོ་གླེང་བྱེད་པའི་སྐབས་སུ་རྩོད་པ་མ་གཏོགས། དེང་སང་རྩོམ་ཡིག་བྲིས་ཏེ་བགྲོ་གླེང་བྱེད་པའི་ལམ་སྲོལ་དེ་ཉམས་བསྡད་ཡོད་པ་རེད། ཞིབ་འཇུག་ཐོག་ནས་རྩོམ་ཡིག་བྲིས་ཏེ་བགྲོ་གླེང་བྱས་པ་དེ་འཆད་རྩོད་རྩོམ་གསུམ་ཡ་མ་བྲལ་བ་ཞིག་དང་། རྩོད་པ་དང་ཤེས་བྱ་སོགས་ཡིག་ཐོག་ཏུ་བཞག་པའི་ལམ་སྲོལ་ཡོད་པའང་བླང་བར་འོས་པ་དང་ཕན་ཐོགས་ཡོད་པ་ཞིག་རེད། ཅེས་གསུངས་སོང་།

ཐེངས་འདིའི་ཚོགས་འདུའི་ཐོག་གྲུབ་མཐའ་བཞིའི་ཆོས་འཁོར་གྱི་བཞེད་ཚུལ་རྒྱ་གཞུང་ལ་ཁུངས་གཏུགས་ཏེ་དཔྱད་པ་དང་། མཆོད་ཡུམ་གྱི་རྣམ་གཞག་ལ་བཀའ་བརྒྱུད་ཀྱི་ཐུན་མིན་གྱི་བཞེད་པ། ཆོས་བཞིའི་མཐའ་དཔྱོད་རྒྱ་གཞུང་ལ་ཁུངས་གཏུགས་ཏེ་དཔྱད་པ། མཁྱེན་གསུམ་གྱིས་དོན་བརྒྱད་བསྡུས་པའི་ཚུལ་ལ་རི་བོ་དགེ་ལྡན་པའི་ཐུན་མིན་གྱི་བཞེད་པ། ལམ་ཐམས་ཅད་བསྐྱེད་པར་བྱ་ཞིང་ཞེས་པ་ལས་འཕྲོས་ཏེ་རྫོགས་སྨིན་སྦྱངས་གསུམ་ལ་རི་བོ་དགེ་ལྡན་པའི་ཐུན་མིན་གྱི་བཞེད་པ། ཐེག་ཆེན་སེམས་བསྐྱེད་ལ་སེམས་སེམས་བྱུང་གང་འདོད་སོགས་ཀྱི་སྐོར་ལ་གསང་སྔགས་རྙིང་མ་བའི་ཐུན་མིན་གྱི་བཞེད་མཚམས། ཁམས་ཆེན་པོ་བརྒྱད་ལས་ལམ་གྱི་ཁམས་བརྒྱད་དང་ས་ལམ་བགྲོད་ཚུལ་ལ་དཔྱད་པ་སོགས་ཀྱི་བརྗོད་གཞིའི་ཐོག་བགྲོ་གླེང་གནང་གི་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།