ལྷ་སྤྱི་ཚོགས་ཞབས་ཞུ་དང་ཤེས་ཡོན་བསྟི་གནས་ཁང་གི་གོ་སྒྲིག་འོག་བོད་ཀྱི་ཟློས་གར་ཚོགས་པའི་ཚོགས་ཁང་དུ་༸རྒྱལ་བའི་བཀའ་དྲིན་རྗེས་དྲན་གྱི་ཁྱད་མཁས་མི་སྣའི་བགྲོ་གླེང་འཚོགས་སོང་།
དེ་རིང་ཕྱི་ཚེས་ ༡ ཉིན་བོད་ཀྱི་ཟློས་གར་ཚོགས་པའི་ཚོགས་ཁང་དུ། ལྷ་སྤྱི་ཚོགས་ཞབས་ཞུ་དང་ཤེས་ཡོན་བསྟི་གནས་ཁང་གི་གོ་སྒྲིག་འོག ༸གོང་ས་མཆོག་དགུང་གྲངས་ ༩༠ ལ་ཕེབས་པའི་སྐུའི་འཁྲུངས་སྐར་དང་བྱམས་བརྩེའི་ལོ་སྲུང་གཙི་དང་འབྲེལ་བཀའ་དྲིན་རྗེས་དྲན་གྱི་ཁྱད་མཁས་མི་སྣའི་ཆེད་དོན་བགྲོ་གླེང་འཚོགས་སོང་། ཚོགས་ཐོག་ཏུ་སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། དམིགས་བསལ་སྐུ་མགྲོན་བཀའ་ཟུར་ཐུབ་བསྟན་ལུང་རིགས་མཆོག ཆེ་བསྟོད་སྐུ་མགྲོན་བོད་མི་མང་ཆེས་མཐོའི་ཁྲིམས་ཞིབ་ཁང་གི་ཁྲིམས་དཔོན་ཡེ་ཤེས་དབང་མོ་མཆོག་གི་དབུས་ཁྱད་མཁས་མི་སྣ་དང་ཚོགས་བཅར་བ་བཅས་འཛོམས་འདུག
ཐོག་མར་ལྷ་སྤྱི་ཚོགས་ཞབས་ཞུ་དང་ཤེས་ཡོན་བསྟི་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ངག་དབང་རབ་རྒྱས་ལགས་ཀྱིས་ཕེབས་བསུའི་གཏམ་བཤད་གནང་གྲུབ་མཚམས། ཚོགས་པའི་འགན་འཛིན་བསོད་ནམས་དཔལ་ལྡན་ལགས་ཀྱིས། འདི་ལོ་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་གོ་སྟོན་དང་བྱམས་བརྩེའི་ལོ་སྲུང་གཙི་ཞུ་ཡི་ཡོད་པ་ལྟར། དབུས་བོད་མིའི་སྒྲིག་འཛུགས་གཙོས་པའི་བོད་མིའི་ཚོགས་སྡེ་ཁག་དང་དགོན་སྡེ་ཁག སློབ་གྲྭ་ཁག མི་སྒེར་སོ་སོའི་ངོས་ནས་གོ་སྟོན་དང་འབྲེལ་བའི་ལས་རིམ་དང་སྤྱི་ཚོགས་ཞབས་ཞུའི་ལས་འཆར་མང་པོ་ཞིག་བསྒྲུབས་དང་སྒྲུབ་བཞིན་པ་རེད། དེར་བརྟེན་ལྷ་སྤྱི་ཚོགས་ཞབས་ཞུ་ཁང་གིས་ད་ལོའི་གོ་སྐབས་འདི་དང་བསྟུན་ནས་༸གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་གྱི་ཆ་ཤས་ཆུང་ཤས་ཙམ་ཞིག་འགྲུབ་ཐུབ་རྒྱུའི་ཆེད་དུ་དེ་རིང་གི་༸རྒྱལ་བའི་བཀའ་དྲིན་རྗེས་དྲན་གྱི་ཁྱད་མཁས་མི་སྣའི་ཆེད་དོན་བགྲོ་གླེང་གོ་སྒྲིག་ཞུ་རྒྱུ་བྱུང་། ཞེས་དང་། ལྷ་སྤྱི་ཚོགས་ཞབས་ཞུ་དང་ཤེས་ཡོན་བསྟི་གནས་ཁང་གི་འབྱུང་རིམ་དང་ལོ་རྒྱུས་སོགས་ངོ་སྤྲོད་གནང་སོང་།
དམིགས་བསལ་སྐུ་མགྲོན་བཀའ་ཟུར་ཐུབ་བསྟན་ལུང་རིགས་མཆོག་གིས། དེ་རིང་གི་བགྲོ་གླེང་གི་བརྗོད་གཞི་དེ་དག་དོན་སྙིང་ལྡན་པ་ཞིག་དང་། དུས་ཚོད་ཀྱི་ཆ་ནས་དགོས་མཁོར་འཚམ་པ་དང་དུས་ལ་བབས་པ་ཞིག་བྱུང་འདུག་བསམ་སོང་། དེར་བརྟེན་དམིགས་བསལ་གྱིས་ཐུགས་རྗེ་ཆེ་ཞུ་འདོད་བྱུང་། ༸རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་དགོངས་པ་སྔོན་ལ་རྫོགས་པ་དང་། སྐུ་ཕྲེང་བཅུ་བཞི་པ་ཆེན་པོ་མདོ་སྨད་ཡུལ་དུ་སྐུ་འཁྲུངས་པ་དེ་དག་ང་ཚོ་བོད་པའི་འབྱུང་འགྱུར་གྱི་གནས་ཚུལ་མང་པོ་ཞིག་ལ་དགོངས་པ་བཞེས་ཏེ་བྱུང་བ་ཞིག་ཡིན་པ་ཚང་མས་གསལ་པོ་མཁྱེན་ཐུབ་པ་ཆགས་ཡོད་པ་རེད་བསམ་གྱི་འདུག ལྷག་པར་དུ་བོད་ཀྱི་ཆབ་སྲིད་ཀྱི་ཐུགས་འགན་བཞེས་པ་དེ་དག་ལས་སླ་པོ་དང་བཀྲ་ཤིས་པོའི་ཐོག་ནས་བྱུང་མེད། འོན་ཀྱང་། ༸གོང་ས་མཆོག་གིས་དགུང་ལོ་ ༡༦ ཐོག་ཆབ་སྲིད་ཀྱི་ཐུགས་འགན་ཆ་ཚང་བཞེས་ཏེ། ཞི་འགྲིག་ཡོང་རྒྱུའི་དགོངས་པ་བཞེས་རྒྱུ་དང་ཐབས་ཤེས་གནང་རྒྱུ། མཐའ་མ་ང་ཚོ་བཙན་བྱོལ་དུ་འབྱོར་ཐུབ་པ་སོགས་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་རེད། དེ་བཞིན་༸གོང་ས་མཆོག་གིས་ནང་ཆོས་ངོ་སྤྲོད་གནང་བ་ནས་བཟུང་ནང་ཆོས་ཟེར་བ་གང་འདྲ་ཞིག་ཡིན་པ་གཞི་ནས་གསལ་པོ་ཞིག་ཚང་མས་གོ་རྟོགས་ཡོང་བ་དང་། ད་ལྟའི་ཆར་ཆོས་ལུགས་ཚང་མ་མཐུན་སྒྲིལ་ཡོང་བ་སོགས་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་རེད། ཅེས་གསུངས།
ཡང་བཀའ་ཟུར་མཆོག་གིས། ལྷག་པར་དུ་རྒྱལ་སྤྱིའི་ནང་ཆ་བཞག་ན། བོད་ཟེར་བ་དེ་གོ་ཐོས་མ་བྱུང་བ་ཞིག་ཡིན་ཡང་། ད་ལྟའི་ཆར་རྒྱལ་སྤྱིའི་ནང་ས་ཁྱབ་རྡོ་ཁྱབ་ཆགས་པ་དེའང་༸མགོན་པོ་གང་ཉིད་མཆོག་གི་མཛད་པ་འཕྲིན་ལས་དང་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཡིན་པ་དེ་དག་གི་ཐོག་ནས་༸མགོན་པོ་གང་ཉིད་མཆོག་ང་ཚོར་གལ་གནད་ཇི་ཙམ་ཆགས་ཀྱི་ཡོད་པ་གསལ་པོ་རེད། ༸གོང་ས་རྒྱལ་བ་རིན་པོ་ཆེ་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་ཆ་ཚང་ང་ཚོར་གསོལ་རས་གནང་བ་རེད། གསོལ་རས་གནང་བའི་སྐབས་བཀའ་ལྕི་མོ་ཞིག་ཕེབས་ཏེ། ཡར་གསོལ་བ་བཏབ་རུང་མ་གསན་པར་མ་འོངས་པར་མི་གཅིག་ལ་བརྟེན་དགོས་པ་ཞིག་མ་ཡིན་པ་དང་། མང་ཚོགས་ཀྱིས་འོས་བསྡུ་བྱས་པའི་ལས་ཀྱི་སྣེ་མོ་བས་འགན་འཁུར་དགོས་པ་དང་། བཅའ་ཁྲིམས་བསྐྱར་བཅོས་བྱེད་དགོས་པ་སོགས་བཀའ་ཕེབས་པ་ལྟར། ང་ཚོས་བཅའ་ཁྲིམས་བསྐྱར་བཅོས་བྱས་ཏེ་འཛིན་སྐྱོང་དང་དེའི་འགན་ཆ་ཚང་ལས་ཀྱི་སྣེ་མོ་བར་ཡོད་པ་གཏན་ལ་ཕབ་པ་རེད། ཅེས་དང་། དེ་རིང་གི་བརྗོད་གཞི་དེའི་ཐོག་ལ་བགྲོ་གླེང་གནང་བའི་རྗེས་སུ་གྲུབ་དོན་དེ་མང་ཚོགས་ནང་ལ་ཁྱབ་ཐུབ་རྒྱུ་དང་། མང་ཚོགས་ཀྱིས་༸གོང་ས་མཆོག་བོད་མི་རྣམས་ལ་གལ་གནད་ཇི་ཙམ་ཆགས་ཀྱི་ཡོད་པ་དང་། འབྲེལ་བ་གང་འདྲ་ཆགས་ཀྱི་ཡོད་པ་སོགས་ཤེས་རྟོགས་དགོས་སྐོར་དང་། ད་ལན་གྱི་བགྲོ་གླེང་གི་གྲུབ་དོན་གྱི་ཐོག་ནས་ཚང་མ་རྡོག་རྩ་གཅིག་སྒྲིལ་ཡོང་ཐུབ་རྒྱུའི་ཐོག་ལ་ཕྱག་ལས་གནང་ཐུབ་རྒྱུའི་རེ་བ་ཞུ་ཡི་ཡོད་སྐོར་སོགས་གསུངས་སོང་།
སྐུ་མགྲོན་གཙོ་བོ་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེ་རིང་ཁམས་གསུམ་ཆོས་ཀྱི་རྒྱལ་པོ་རྩ་བའི་བླ་མ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་དང་འབྲེལ་ནས་ཁོང་ང་ཚོར་བཀའ་དྲིན་ཆེན་པོ་ག་ཚོད་ཡིན་མིན་སྐོར་ལ་ཞུ་དགོས་དུས་ཁག་པོ་འདུག་སྟེ། ང་ཚོ་ཚང་མས་ཁོང་བཀའ་དྲིན་ཆེན་པོ་ཡིན་པ་ཤོད་ཀྱི་ཡོད་སྟབས། ཁོང་གིས་ད་ལྟའི་བར་དུ་སྐུ་ལས་བསྐྱོན་ནས་བསྐྱངས་ཡོད་པའི་ལས་དོན་དག་མཇུག་སྐྱོང་དགོས་པ་དང་དོན་ཕན་ཡོང་བ་ཞིག་བྱེད་དགོས་ཀྱི་འདུག དེ་ཡང་བཙན་བྱོལ་ནང་ཡོད་པའི་བོད་མི་སྦར་མོ་གང་ཙམ་མིན་པར་བོད་ནང་དུ་བཞུགས་པའི་བོད་མི་ཡོངས་ལའང་བདེ་སྐྱིད་ཡོང་བ། བོད་ཀྱི་བདེན་མཐའ་གསལ་བ་དང་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་གྱི་ཆེད་དུ་ཁོང་ནང་བཞིན་ཞིག་མི་ཡོང་ནའང་ང་ཚོས་རང་ཉིད་ཀྱི་འཇོན་ཚོད་དཔག་ཚོད་བཞིན་ཤུགས་བསྐྱོན་རྒྱུ་གལ་ཆེན་ཡིན། ཞེས་དང་། ང་ཚོ་བཙན་བྱོལ་ནང་ཡོད་པ་ཚོས་གཞན་ལ་རྒན་བདག་འཐོན་རྒྱུ་མ་ཡིན་པར་རང་གིས་རང་ཉིད་ལ་རྒན་བདག་བྱེད་པའི་དུས་ཚོད་ཅིག་བསླེབས་ཡོད་པ་མཐོང་གི་འདུག ངས་དེ་སྔ་ནས་རང་བསྟོད་དང་གཞན་སྨད་བྱས་ནས་བསྡད་ན་ང་ཚོའི་སྤྱི་ཚོགས་ལ་ཕན་ཐོགས་གང་ཡང་མི་འདུག་ཅེས་ཞུས་མྱོང་། རང་ཉིད་ཡག་པོ་ཡོད་ཚེ་གཞན་ཡང་ཡག་པོ་ཡོང་བའི་ཆེད་དུ་ག་རེ་གནང་དགོས་པ་དེ་གནང་དགོས་ཀྱི་འདུག་མ་གཏོགས། ང་ཡག་པོ་དང་དད་པ་ཆེན་པོ་ཡིན་པ་དང་ཁོ་ཅིག་ཅིག་རེད་མདོག་མདོག་བཤད་བསྡད་ན་ཕན་ཐོགས་མི་འདུག བཀའ་དྲིན་རྗེས་དྲན་དངོས་གནས་ཤིག་དྲན་གྱི་ཡོད་ཚེ། ༸སྐྱབས་མགོན་རིན་པོ་ཆེས་སྐུ་ཚེ་ཧྲིལ་བོར་སྐུ་ལས་གང་དང་གང་བསྐྱོན་པར་བསམ་བློ་གཏོང་རྒྱུ་གལ་ཆེན་ཡིན། ང་ལྟ་བུ་བཙན་བྱོལ་ནང་སྐྱེས་པའི་བོད་མི་དཀྱུས་མ་ཞིག་གི་ངོས་ནས་བཤད་པ་ཡིན་ནའང་། རྒྱ་གར་གཞུང་དང་རྒྱ་གར་གྱི་སྲིད་བློན་དམ་པ་ནེ་རུ་མཆོག་སོགས་ང་ཚོ་བོད་ལ་དཔེ་མི་སྲིད་པའི་བཀའ་དྲིན་ཆེན་པོ་རེད། རྒྱ་ནག་གིས་བོད་ལ་བཙན་འཛུལ་བྱས་པ་དང་༸གོང་ས་མཆོག་དགུང་གྲངས་ཉི་ཤུ་ཙམ་ནས་རྒྱལ་ཁབ་གཞན་ལ་ཕེབས་དུས་མི་མང་སྐྱབས་བཅོལ་བ་བྱས་ནས་འཁྲིད་ཐུབ་པ་སོགས་ད་ལྟ་ཡོད་བསྡད་པའི་གཞི་རྟེན་འདི་རིམ་པ་རིམ་པ་བྱས་ཡོང་བ་རེད་མ་གཏོགས་ཉིན་གཅིག་ལ་བྱུང་བ་དེ་འདྲ་མ་རེད། སྐུ་ལས་མ་བྱུང་བ་དེ་འདྲ་མ་རེད་ལ་ཡིན་ཤག་ཤག་བྱ་རྒྱུ་ཡོད་པ་དེ་འདྲ་ཞིག་རེད་མི་འདུག ཅེས་གསུངས།
ཡང་བཀའ་བློན་མཆོག་གིས། ༸སྐྱབས་མགོན་རིན་པོ་ཆེས་ངོས་ཀྱི་མི་མང་དང་རྒྱབ་ཁབ་ཆེད་དུ་སྐད་ཆ་དང་ལས་ཀ་བྱེད་མི་ཆོག་ཚེ། ངོས་འདིར་བསྡད་ནའང་ཁྱད་པར་གང་ཡང་མེད་པའི་བཀལ་མོལ་གསུངས་མྱོང་ཡོད་པ་དང་། དེ་བཞིན། མཉམ་འབྲེལ་རྒྱལ་ཚོགས་ནང་བོད་དོན་དང་འབྲེལ་བའི་གྲོས་ཆོད་གསུམ་བཞག་ཐུབ་ཡོད། དེ་ཚོ་ཧ་ལས་པའི་གལ་ཆེན་པོ་རེད། རྒྱལ་སྤྱིའི་ཁྲིམས་ལུགས་ཀྱི་ཐོག་ནས་བོད་ཀྱི་གནས་བབ་གང་ཡིན་པ་དག་དང་ད་ལྟ་ང་ཚོས་མཇུག་སྐྱོང་བཞིན་པ་དང་བཤད་བསྡད་པ་ཚང་མ་བོད་དོན་རྒྱབ་སྐྱོར་བ་དང་བོད་ཀྱི་གྲོགས་པོ་ཡིན་པ་ཚང་མ་བརྒྱ་ཆ་དགུ་ཅུ་གོ་དགུ་༸གོང་ས་མཆོག་དང་ཐད་ཀར་འབྲེལ་བ་ཡོད་པ་ཡིན་སྟབས། རྒྱལ་ཁབ་དང་མི་སུ་འདྲ་ཞིག་ཡིན་རུང་ཚང་མ་༸གོང་ས་མཆོག་ལ་བརྟེན་ནས་བྱུང་བ་རེད། ང་ཚོས་དེ་དག་བདག་པོ་རྒྱག་རྒྱུ་གལ་ཆེན་པོ་རེད། དེར་བརྟེན་དུས་ཚོད་མང་པོ་མེད་དུས། ང་ཚོས་གཟབ་གཟབ་བྱེད་དགོས་པ་དང་ནང་ཁུལ་འཆམ་མཐུན་བྱེད་དགོས་རེད། ཅེས་གསུངས་སོང་།
བདག་ཉིད་ཆེན་པོ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་༸གོང་ས་རྒྱལ་བ་རིན་པོ་ཆེ་མཆོག་དང་གངས་ཅན་བོད་མིའི་བར་གྱི་འདོར་ཐབས་མེད་པའི་འོས་འགན་དང་དད་དམ་སྐོར་གསུང་འཕྲིན་གནང་བ་བརྙན་པར་བརྒྱུད་གཟིགས་འབུལ་ཞུས་པའི་ནང་། ང་ཚོ་བོད་མི་ཡོངས་ཀྱི་ལས་འགན་ནི་འགྲོ་བ་མིའི་བདེ་སྐྱིད་སྲུང་སྐྱོབ་བྱ་རྒྱུ་དེ་རེད། དེ་ཡང་འཚེ་བ་མེད་པའི་སྤྱོད་པ་ལ་བརྟེན་ནས་བདེ་སྐྱིད་སྲུང་སྐྱོབ་བྱེད་དགོས། དེར་བརྟེན་ང་ཚོ་ཚང་མ་འཚེ་མེད་ཞི་བའི་སྤྱོད་པ་ལ་གནས་ཐུབ་པ་ཞིག་དང་། འཚེ་བ་བཀག་པ་ཙམ་མ་ཡིན་པར་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་རྒྱུ་དང་ཉམས་ལེན་བྱེད་དགོས། ༸གོང་ས་མཆོག་གི་གོ་སྟོན་གྱི་ལོ་འཁོར་སྲུང་གཙི་ཞུས་པ་དེ་ལའང་བྱམས་བརྩེའི་ལོ་ཞེས་མིང་བཏགས་པ་དེ་དོན་དང་ལྡན་པ་ཞིག་རེད། འོན་ཀྱང་། མིང་བཏགས་པ་ཙམ་དུ་མིན་པར་རང་གི་རྒྱུད་ལ་ངེས་པར་དུ་བྱམས་པ་དང་བརྩེ་བའི་བསམ་བློ་བསླེབས་ཐུབ་པ་བྱ་རྒྱུ་དེ་ང་ཚོའི་འོས་འགན་རེད། འོས་འགན་འདི་ཡག་པོ་བསྒྲུབས་ཐུབ་པ་ཡིན་ན་རང་ཤུགས་ལ་དད་པ་དང་དམ་ཚིག་མ་ཉམས་པར་ཡོང་གི་རེད། འཇིག་རྟེན་སྤྱི་ཡོངས་ལ་གྲུབ་པའི་ལས་འགན་དེ་ངོ་ཤེས་པར་བྱས་ཏེ་ཚུལ་བཞིན་དུ་འགྲུབ་རྒྱུའི་འབད་བརྩོན་བྱེད་ན། ༸གོང་ས་མཆོག་དང་དམ་ཚིག་འགལ་རྒྱུ་མེད། དམ་ཚིག་མ་འགལ་བ་ཡིན་ན་དད་པ་ཉམས་རྒྱུ་མེད། དད་པ་མ་ཉམས་པ་དེ་དམ་ཚིག་མ་ཉམས་པའི་རྒྱུ་ལ་ཆགས་ཀྱི་རེད། དམ་ཚིག་མ་ཉམས་པ་དེ་ལ་བརྟེན་ནས་དད་པ་གོང་འཕེལ་འགྲོ་ཡི་རེད། དེར་བརྟེན་ང་ཚོའི་འོས་འགན་ནི་འཇིག་རྟེན་སྤྱི་ཡོངས་ལ་གྲུབ་པའི་ལས་འགན་དེ་འགྲུབ་དགོས་གལ་ཆེན་པོ་རེད། འཇིག་རྟེན་སྤྱི་ཡོངས་ལ་གྲུབ་པའི་ལས་འགན་འགྲུབ་ཟེར་དུས་ཕན་ཚུན་བྱམས་བརྩེའི་སྒོ་ནས་འཆམ་མཐུན་བྱ་རྒྱུ་དེ་རེད། ཅེས་དང་། གཅིག་གིས་གཅིག་ལ་བྱམས་པ་དང་བརྩེ་བ་ཡོད་ན་འཐབ་རྩོད་མེད་པ་ཆགས་ཏེ་གཅིག་སྒྲིལ་རང་བཞིན་གྱིས་ཡོང་གི་ཡོད་སྐོར་དང་། འདོར་ཐབས་མེད་པའི་ལས་འགན་ནི་༸གོང་ས་རྒྱལ་བ་རིན་པོ་ཆེ་མཆོག་གི་བཀའ་རྣམས་ཚུལ་བཞིན་དུ་འགྲུབ་རྒྱུ་དང་། ཚུལ་བཞིན་དུ་འགྲུབ་པའི་སྐབས་སྐྱེས་བུ་གཞན་སུ་ལའང་གནོད་སེམས་དང་ཁོང་ཁྲོ་ལ་སོགས་པའི་ཉོན་མོངས་ཀྱི་དབང་དུ་མ་སོང་བར། ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པའི་ཐོག་ལ་ག་ཚོད་ཐུབ་ཐུབ་ཀྱིས་འབད་བརྩོན་བྱ་དགོས་སྐོར་དང་། དེ་ལ་བརྟེན་ནས་༸གོང་ས་མཆོག་ལ་དད་པ་དང་དམ་ཚིག་མ་འགལ་བ་ཡོང་གི་རེད་བསམ་གྱི་ཡོད་སྐོར་གསུངས་སོང་།
ཐེངས་འདིའི་ཁྱད་མཁས་མི་སྣའི་བགྲོ་གླེང་ཐོག དགའ་ལྡན་ཕོ་བྲང་ཡིག་ཚང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་༸གོང་ས་ཏཱ་ལའི་བླ་མ་བོད་དང་རྒྱ་གར་བོད་ཀྱི་གནའ་བོའི་རིག་གཞུང་ལྟེ་གནས་ཁང་གསར་འཛུགས་ཀྱི་དགོངས་གཞི་དང་གལ་གནད་སྐོར་དང་། སྐུའི་གསུང་འབུམ་ཞུ་སྒྲིག་པ་དགེ་བཤེས་ལྷ་རམས་པ་རོང་པོ་བློ་བཟང་སྙན་གྲགས་ལགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་གི་བཀའ་རྩོམ་དང་དེའི་གལ་གནད་སྐོར། དྷ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་གི་ཚན་རིག་དང་ནང་ཆོས་དབར་འབྲེལ་ལམ་གསར་གཏོད་ཀྱིས་བོད་བརྒྱུད་ནང་བསྟན་ལ་ཕན་འབྲས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་ཟུར་བློ་བཟང་སྙན་གྲགས་ལགས་ཀྱིས་རྒྱལ་སྤྱིའི་འགྱུར་འགྲོས་དང་བསྟུན་ནས་འབྱུང་འགྱུར་བོད་ཀྱི་གནས་བབ་ཐོག་༸གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་གལ་གནད། ས་རཱ་བོད་ཀྱི་མཐོ་སློབ་ཀྱི་ལོ་རྒྱུས་སློབ་དཔོན་འབུམ་རམས་པ་གཙང་ཕྲུག་སྟོན་ལགས་ཀྱིས་༸གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱིས་བོད་ཀྱི་ཆོས་སྲིད་གཉིས་ཀྱི་ཐོག་ཁྱབ་ཚད་དང་ཤུགས་རྐྱེན། ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་འབུམ་རམས་པ་བསོད་ནམས་རྒྱལ་མཚན་ལགས་ཀྱིས་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དང་པོ་ནང་འཁོད་པའི་༸གོང་ས་མཆོག་གི་མཚན་གནས་ཁག་གི་གལ་གནད་དང་འབྱུང་འགྱུར་གྱི་གནས་བབས་ཐད་གསུང་བཤད་དང་བགྲོ་གླེང་གནང་བཞིན་འདུག
གསར་འགོད་པ། སྐལ་བཟང་སྦྱིན་པ་དང་། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
