སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་སྨོན་ལམ་བོད་ཡིག་བཞི་པ་དང་། སྨོན་ལམ་ཚིག་མཛོད་ཆེན་མོའི་མཉེན་ཆས་གསར་པ། སྨོན་ལམ་རིག་ནུས་དྲ་ཚིགས། བརྡ་མཛོད་ཆེན་མོ་ (LLM) བཅས་མངོན་གྱུར་བཞི་དབུ་འབྱེད་དང་ངོ་སྤྲོད་གནང་སོང་།
དེ་རིང་ཕྱི་དྲོའི་ཆུ་ཚོད་ ༤།༣༠ ཐོག་བོད་ཀྱི་ཟློས་གར་ཚོགས་ཁང་དུ། ༢༠༢༥ ལོའི་སྨོན་ལམ་མངོན་གྱུར་གྱི་མཛད་སྒོ་འཚོགས་སོང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས། སྤྱི་འཐུས་ཁག་ཅིག དེ་བཞིན་དགའ་ལྡན་ཕོ་བྲང་གི་དྲུང་ཆེ་རྣམ་པའི་དབུས་གཞུང་ཞབས་དང་། ཚོགས་སྡེ་ཁག་གི་སྐུ་ཚབ། ཕྱི་རྒྱལ་ཁག་གི་མགྲོན་པོ། དྷ་སྟེང་བོད་ཁྱིམ་སློབ་གྲྭའི་དབུ་འཛིན་དང་སློབ་མ་སོགས་འཛོམས་འདུག
སྐབས་དེར་སྨོན་ལམ་རིག་ནུས་ཀྱི་ལས་གཞི་གསར་གཏོད་པ་འབུམ་རམས་པ་དགེ་བཤེས་བློ་བཟང་སྨོན་ལམ་ལགས་ཀྱིས། ང་ཚོའི་དམིགས་ཡུལ་ནི་ཕྱི་ལོ་ ༢༠༢༥ ནས་ ༢༠༣༥ བར་ལོ་བཅུའི་ནང་སྨོན་ལམ་རིག་ནུས་ཀྱི་ནུས་པ་ལ་བརྟེན་ནས་བོད་ཀྱི་ཆོས་དང་རིག་གཞུང་། དེང་རབས་ཀྱི་རིག་གནས་རྣམས་འཛམ་གླིང་གི་འཕྲུལ་རིག་གི་བརྒྱུད་རིམ་ནང་རྗེས་ཟིན་ཐུབ་པ་བཟོ་རྒྱུ་དང་། མ་འོངས་པའི་ཤེས་ཡོན་ནི་རིགས་གཅིག་རྐང་འཛིན་གྱི་ལམ་བུ་མ་རེད། དེ་སྔ་རིགས་གཅིག་རྐང་འཛིན་ཧ་ཅང་གི་གལ་ཆེན་པོར་རྩིས་ཡོད་ཀྱང་། ད་ལྟའི་མིས་བཟོས་རིག་ནུས་ཀྱི་ནུས་པ་ལ་བརྟེན་ནས། གཙུག་ལག་རབ་འབྱམས་པ་ (Master) དང་འབུམ་རམས་པའི་ (Ph. D) ལམ་ལུགས་དེ་དག་དགོས་མཁོ་མེད་པའི་གནས་སྟངས་ཤིག་ཆགས་ཀྱི་ཡོད་པ་རེད། གློག་གི་ནང་དུ་ལམ་ལུགས་དེ་དག་ཆ་ཚང་བཟོ་རྒྱུའི་བང་སྒྲིག་ཡོད་ལ། དེ་དག་བྱེད་པར་གཙོ་བོ་ཤེས་ཡོན་དང་བཟང་སྤྱོད་ཚད་ལྡན་དགོས། མ་འོངས་པའི་ཤེས་ཡོན་ནི་ཤེས་ཡོན་གྱི་བརྗོད་གཞི་གང་དང་གང་ཡིན་རུང་གཞི་རྩའི་སྒྲོམ་གཞི་ཚད་ལྡན་ཡག་པོ་ཞིག་ཧ་གོ་དགོས་པ་དང་། ལག་ལེན་གང་འདྲ་བསྟར་དགོས་ཀྱི་ཡོད་མེད་ཀྱི་སློབ་སྦྱོང་སྤྲོད་དགོས། ཞེས་དང་། གནའ་བོའི་རིག་གཞུང་དེ་སོ་སོའི་སྐད་ཡིག་ནང་ཚད་དང་ལྡན་པ་དང་། དོན་དང་ལྡན་པ་ཞིག་བཟོས་བའི་ཐོག འཛམ་གླིང་ལ་ཁྱབ་སྤེལ་གཏོང་རྒྱུ། འཛམ་གླིང་གི་དེང་དུས་ཀྱི་ཤེས་ཡོན་ཡོངས་སུ་རྫོགས་པ་དེ་བོད་ཀྱི་སྐད་ཡིག་ནང་ཚད་དང་ལྡན་པ་བཟོ་རྒྱུ་གལ་ཆེན་པོ་ཡིན་སྐོར་དང་། ཤེས་ཡོན་ནི་འགྲོ་བ་མིའི་དགོས་མཁོ་སྒྲུབ་ཆེད་ཡིན་པ། དངོས་པོ་དེ་ག་ཚོད་ཕྲ་རུ་འགྲོ་བ་དེའི་ཚོད་ཀྱིས་རྣམ་དཔྱོད་དང་ནུས་པ་གོང་འཕེལ་དུ་འགྲོ་ཡི་ཡོད་པས། བོད་མི་རིགས་ཀྱི་གཞོན་སྐྱེས་རྣམས་ཀྱི་བསམ་བློའི་ནུས་པ་ཕྲ་མོ་དེ་དག་གློག་གི་ནུས་པ་དང་ཟུང་འབྲེལ་བྱས་ཏེ་མིའི་རྣམ་དཔྱོད་དང་སློབ་སྦྱོང་ཡར་རྒྱས་གང་འདྲ་གཏོང་དགོས་ཀྱི་ཡོད་མེད་ཐད་ཞིབ་འཇུག་བྱེད་བཞིན་ཡོད་སྐོར་སོགས་གསུངས་སོང་།
ཞིབ་འཇུག་ཁང་གི་ཡིག་གཟུགས་བཟོ་སྐྲུན་པ་བློ་བཟང་དཔལ་ལྡན་ལགས་ཀྱིས། དེ་སྔ་སྔགས་ཡིག་དང་། ཡིག་ནོར་ཡོད་པ་དེ་དག་ལ་ཉམས་ཞིབ་བྱས་ཏེ་བསྐྱར་བཅོས་བྱས་ཡོད། སྨོན་ལམ་བོད་ཡིག་བཞི་པའི་ནང་ཡིག་གཟུགས་གསར་པ་གསུམ་བཟོས་ཡོད་ཅིང་། ཡིག་གཟུགས་དེ་དག་ནི་སྨོན་ལམ་ལཉྫ་དང་། སྨོན་ལམ་ཚུགས་མ་འཁྱུག སྨོན་ལམ་དབུ་ཅན་ལག་བྲིས་བཟོས་ཡོད་སྐོར་དང་། མ་འོངས་པར་མུ་མཐུད་དུ་ཡིག་གཟུགས་སྐོར་ཞིབ་འཇུག་དང་། ཡིག་གཟུགས་གསར་པ་བཟོ་རྒྱུ། ཡིག་གཟུགས་ཐོག་ལས་ཀ་མང་པོ་བྱ་འཆར་ཡོད་སྐོར་སོགས་འགྲེལ་བརྗོད་གནང་སོང་།
སྨོན་ལམ་མེ་ལོང་དང་འབྲེལ་ནས་རིག་ནུས་སློབ་སྟོན་པ་བསྟན་འཛིན་དགེ་བྱེད་ལགས་ཀྱིས། འདས་པའི་ལོ་གཅིག་གི་ནང་སྨོན་ལམ་མེ་ལོང་ནང་འགྱུར་བ་དང་ཡར་རྒྱས་མང་པོ་བཏང་ཡོད། ད་ལོའི་མེ་ལོང་ནི་ལོ་རྒྱུས་དང་རྩོམ་རིག བརྡ་སྤྲོད་ཐོག་མཁས་པ་ཆགས་ཡོད། ད་ལོར་རྒྱུ་ཆ་ཐེར་འབུམ་ཉེར་བཞི་མཁོ་སྒྲུབ་དང་། སྔོན་མ་ལས་བརྒྱ་ཆ་ ༣༠ ཆེ་རུ་སོང་བ། མེ་ལོང་ནང་ཚེག་བར་ ༡༣༠,༠༠༠ འཇུག་ཐུབ་ཀྱི་ཡོད་པ། སྐད་ཡིག་ ༡༤༠ ནང་བོད་ཀྱི་ལོ་རྒྱུས་དང་བརྡ་སྤྲོད། རྩོམ་རིག་བཅས་ཀྱི་ཐོག་ལ་དྲི་བ་དྲིས་ལན་བྱེད་ཐུབ་ཀྱི་ཡོད་པ། པར་རིས་དང་ཡི་གེ་བཅུག་སྟེ་བེད་སྤྱོད་བྱེད་ཐུབ་པ། མེ་ལོང་དབྱེ་ཞིབ་གསར་པ་བཟོས་ཡོད་ལ། མེ་ལོང་དབྱེ་ཞིབ་བརྒྱུད་ལན་སྤུས་དག་པ་དང་ལེགས་པོ་རྒྱག་གི་ཡོད་སྐོར་དང་། ད་ལྟ་ཡོད་པའི་བརྡ་མཛོད་ཆེན་མོ་ཚང་མའི་ནང་ནས་བོད་ཡིག་ཐོག་ལ་མཁས་པ་དེ་མེ་ལོང་ཆགས་ཀྱི་ཡོད་སྐོར་སོགས་འགྲེལ་བརྗོད་གནང་སོང་།
ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས། སྨོན་ལམ་བརྡ་མཛོད་ཆེན་མོའི་རྒྱུ་ཆ་འཚོལ་སྒྲུབ་བྱེད་པར་བོད་ཀྱི་དཔེ་མཛོད་ཁང་དང་། དྲ་ཐོག་གི་དཔེ་མཛོད་ཁང་། གཞུང་། སྒེར། དགོན་སྡེ་ཁག་སོགས་ནས་ཡིག་ཆ་མང་པོ་མཁོ་སྒྲུབ་བྱས་ཡོད་པ་དང་། ཚིག་གི་ཆ་ཤས་ཐེར་འབུམ་ ༢༤ མཁོ་སྒྲུབ་བྱས་ཡོད་པའི་ནང་ནས་ཐེར་འབུམ་ ༡༨ བོད་ཡིག་ཁོ་ནའི་རྒྱུ་ཆ་ཕྱོགས་སྒྲིག་བྱས་ཐུབ་ཡོད་ལ། དེབ་ ༡༤༠,༠༠༠ རྒྱུ་ཆ་མཁོ་སྒྲུབ་བྱས་ཡོད། རྒྱུ་ཆ་ལ་རིམ་པ་གསུམ་གྱི་ཐོག་ནས་དབྱེ་ཞིབ་བྱས་ཡོད། དེ་ཡང་རྒྱུ་ཆ་ཚད་ལྡན་ཡིན་མིན་དང་། ཉེར་མཁོའི་རྒྱུ་ཆ་གང་ཡིན་པ། ཁུངས་ཐུབ་ཡིན་མིན་སོགས་ལ་ཞིབ་འཇུག་བྱས་ཡོད་སྐོར་དང་། རྒྱུ་ཆ་ཕྱོགས་བསྒྲིགས་བྱས་པར་བོད་ཀྱི་གནའ་སྔ་མོའི་ཐུན་མོང་མ་ཡིན་པའི་རིག་གནས་བཅུའི་ནང་སྡེ་ཚན་དུ་དབྱེ་ཡོད་སྐོར་དང་། འགྲེལ་བཤད་ཀྱི་ཚད་གཞི་སྡེ་ཚན་ ༧༥ གཏན་འབེབས་བྱས་ཡོད་སྐོར། རྩོམ་སྒྲིག་དངོས་སུ་བྱས་པར་ཆེད་ལས་པ་ ༢༠ ཡིས་དྲི་བ་དྲིས་ལན་ ༤,༥༠༠,༠༠༠ བསྒྲིགས་ཐུབ་ཡོད་སྐོར། མ་འོངས་པར་བོད་ཀྱི་རིག་གནས་བཅུ་པོ་རྣམས་རིམ་པས་མུ་མཐུད་དུ་བསྒྲིགས་ཏེ་ཡར་རྒྱས་གཏོང་འཆར་ཡོད་ལ། བོད་ཀྱི་རིག་གནས་རྒྱུན་འཛིན་ཙམ་མིན་པར་མི་ཐོགས་གོང་མའི་རླབས་ཆེ་བའི་ཤེས་རབ་ཀྱིས་བསྐྲུན་པའི་བླ་ན་མེད་པའི་མཛད་རྗེས་དེ་དག་གིས་འཛམ་གླིང་གི་འགྲོ་བ་མིའི་རིགས་ཡོངས་ལ་ཞབས་འདེགས་རླབས་ཆེན་པོ་འགྲུབ་ཐུབ་རྒྱུའི་རེ་བ་དང་དམིགས་ཡུལ། རྨི་ལམ་དང་སྨོན་ལམ་འདེབས་ཀྱི་ཡོད་སྐོར་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
