རྩོམ་པ་པོ། སྤྱི་ཟུར་ཆབ་བྲག་ལྷ་མོ་སྐྱབས།
རྩོམ་ཁུངས། བོད་ཀྱི་དུས་བབ།
ཁ་སང་དེ་རིང་ཡང་བཙན་བྱོལ་བོད་མིའི་སྲིད་སྐྱོང་དང་སྤྱི་འཐུས་འོས་བསྡུའི་དུས་ལ་ཉེ་བས། དྲྭ་ལམ་ཁག་ན་མི་མང་གི་བསམ་ཚུལ་སྣ་ཚོགས་ཤིག་འབྱུང་བཞིན་འདུག ངས་དེ་དག་གི་སྐོར་ལ་ལེགས་ཉེས་ཅི་ཡང་བཤད་འདོད་མེད། བཤད་འོས་མིན་དང་ཕན་ཐོགས་མིན་ཡང་མི་ཤེས། ངས་འདིར་ཚང་མས་ངེས་པར་གསལ་རྟོགས་ཐུབ་དགོས་པའི་དོན་གནད་ཅིག་གླེང་ན་འདོད།
སྲིད་སྐྱོང་དང་སྤྱི་འཐུས་གང་ཡིན་ཡང་རང་ངོས་ནས་རེ་བ་བྱས་ནས་ལངས་མཁན་རྣམས་ལ་མི་མང་གིས་དོ་སྣང་དང་རྒྱུས་ལོན་གང་ཐུབ་བྱེད་དགོས། དེའི་ཐོག་ལ་མི་གཞན་དག་གིས་རེ་སྐུལ་དང་མཚམས་སྦྱོར་བྱེད་པ་རྣམས་ལ་ཡང་དེ་བཞིན་དོ་སྣང་རྒྱུས་ལོན་བྱེད་དགོས། དེའི་རྒྱུ་མཚན་ནི། དེ་དག་གི་ནང་ནས་སུ་དང་གང་དག་ལ་མང་མོས་འཐོབ་ངེས་པས་ཡིན། དེ་དག་སུ་ཡང་མ་ཡིན་པའི་སོ་སོ་དགའ་ས་ཙམ་ཞིག་ལ་འོས་འཕངས་ན་དེ་ནི་ཆུ་ནང་ལ་རྡོ་འཕངས་པ་དང་འདྲ་ལ། ཡང་འོས་མི་གཞན་དག་ལ་རང་ངོས་ནས་དོ་སྣང་དང་རྒྱུས་ལོན་མ་བྱས་པར་གཞན་དག་གི་འུར་བསྟོད་རྗེས་སུ་འབྲངས་ཏེ་འོས་འཕེན་པ་དག་ནི་མུན་ནག་མདའ་འཕེན་དང་འདྲ་བས། མདའ་དེ་འདྲ་འཕེན་པ་ལས་མ་འཕངས་ན་ལེགས།
འོ་ན། ཚད་ལྡན་གྱི་སྤྱི་འཐུས་འོས་མི་དེ་གང་འདྲ་ཞིག་ཡིན་དགོས་ཟེར་ན། གཞི་རྩའི་ཆ་ནས་བཅའ་ཁྲིམས་ནང་གསལ་གྱི་འོས་ཆོས་ཚང་ཞིང་དམ་འབུལ་ཇི་བཞིན་ལག་ལེན་ཐུབ་མཁན་ཞིག་ངེས་པར་ཡིན་དགོས། དེ་ཡང་འོས་ཆོས་ཚང་མཁན་ནི་འོས་འཕེན་པ་ཕལ་མོ་ཆེ་ཡང་ཡིན་མོད་ཀྱང་། དམ་བཅའ་ལག་ལེན་ཐུབ་མཁན་ནི་ཤིན་ཏུ་དཀོན་པར་མཐོང་།
དེ་ཡང་འདི་ལྟ་སྟེ། “བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས། སྤྱི་འཐུས་ཀྱི་ལས་ཁུར་ཞུ་སྒོ་མཐའ་དག བཅའ་ཁྲིམས་ཀྱི་འབྲུ་དོན་འགལ་མེད་ཐོག རང་དོན་ཕྱོགས་ལྷུང་དང༌འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི༼མཆོག་གསུམ་དབང་བཙུགས་ཀྱི༽དམ་བཅའ་བརྟན་པོ་ཞུ་རྒྱུ།” ཞེས་པའི་དམ་འབུལ་གྱི་ཚིག་དོན་ལྟར་ན། བློ་གཏད་གཅིག་དང་། མེད་པ་ལྔ། ཡོད་པ་གཉིས་བཅས་ཚང་དགོས་པ་འདི་མི་མང་ཆེ་བས་སྒྲུབ་དཀའ་བ་ཞིག་མ་རེད་དམ།
གཙོ་བོ་ནི། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱིས་བཅའ་ཁྲིམས་ཀྱི་དགོངས་དོན་ཙམ་མིན་པར་འབྲུ་དོན་ཇི་བཞིན་མི་འགལ་བར་ཁྲིམས་སྲུང་སྐྱོབ་ཐུབ་མཁན་ཞིག་དགོས། དེ་དགོས་ན་བཅའ་ཁྲིམས་ལེགས་པོ་ཞིག་ངེས་དགོས་པ་བཤད་ཅི་ལ་དགོས། དེ་ནས་སྒེར་སེམས་དོན་གཉེར་གྱི་རང་དོན་མེད་པ་དང་གཅིག རང་གཞན་བཀར་ནས་ཕྱོགས་སུ་ལྷུང་བ་མེད་པ་དང་གཉིས། ཕྱིའི་དགྲ་ཟླ་དང་དཀའ་ངལ་ཅི་རིགས་ལ་འཇིགས་ཞུམ་མེད་པ་དང་གསུམ། སོ་སོའི་དགའ་ཉེ་སོགས་རང་ཕྱོགས་ལ་ཆགས་ཞེན་ངོ་འཛིན་མེད་པ་དང་བཞི། རང་ཉིད་མི་དགའ་ས་སོགས་ཕ་རོལ་བར་ཞེ་སྡང་འཁོན་སེམས་མེད་པ་དང་ལྔ། ད་དུང་གཡོ་སྒྱུ་མེད་པར་གཏམ་སྤྱོད་གང་ཡིན་དྲང་བདེན་དོན་གཉེར་ཅན་ཞིག་དང་། སྤྱི་ཕན་ལྷག་བསམ་དཀར་བ་བཅས་བསམ་སྤྱོད་གཉིས་ལེགས་ཤིག་དགོས་པ་གཞིར་བྱས་ཏེ། གྲོས་ཚོགས་ཀྱི་ར་བའི་ནང་ཙམ་མ་ཡིན་པར་ནམ་རྒྱུན་སྤྱི་འཐུས་ཀྱི་ལས་ཁུར་ཞུ་སྒོ་མཐའ་དག་ལ་རང་གི་ནུས་པ་ཅི་ཡོད་འདོན་ཐུབ་པ་བཅས་ཡོངས་སུ་ཚང་ན། ད་གཟོད་བོད་མི་མང་གི་སྤྱི་འཐུས་ཞེས་པའི་མཚན་ཉིད་ཡོངས་སུ་ཚང་བའི་སྤྱི་མི་ཞིག་ཆགས་ཀྱི་ཡོད།
དེ་བས། ཁྱོད་ཅག་གིས་འཚོལ་དགོས་པའི་འོས་མི་དེ་དག་ནི། བྱེ་མའི་ནང་ནས་གསེར་བཙགས་བཙགས་ཀྱིས་བསལ་དགོས་བ་ཞིག་ལས་མཚོ་འགྲམ་ནས་རྡེའུ་འཐུ་འཐུ་བྱེད་ཆོག་པ་ཞིག་མིན་པས་ངེས་པར་གཟབ་ནན་དགོས་པའི་རེ་བ་འདོན་གྱིན་ཡོད།
གཞན་ཡང་། དེང་སང་བཙན་བྱོལ་བོད་མི་ཚོ་རྒྱ་བལ་འབྲུག་གསུམ་ཙམ་མིན་པར་ནུབ་ཕྱོགས་སུ་ཁ་ཐོར་ནས་ཡོད་པའི་སྐབས་ཤིག་ཡིན་པ་དང་། ལྷག་པར་དུ་རྒྱལ་ཁབ་མི་འདྲ་བ་དང་མི་རིགས་མི་འདྲ་བ་དེ་དག་གི་ནང་དུ་བོད་དོན་དང་འབྲེལ་བའི་ལས་འགུལ་ཅི་རིགས་སྤེལ་དགོས་པ་ཤིན་ཏུ་ནས་གལ་ཆེན་པོ་ཡིན་པས། ཕྱོགས་བཞུགས་སྤྱི་འཐུས་རྣམས་ནི་ངེས་པར་དུ་ཨིན་ཡིག་སོགས་རྒྱལ་ཁབ་གང་དེའི་སྐད་ཡིག་ལ་རང་རྐྱ་འཕེར་བ་དང་། གཞུང་དང་ཚོགས་སྡེ། གནད་ཡོད་མི་སྣ་སོགས་ལ་འབྲེལ་འདྲིས་ཐུབ་པའི་ཤེས་འཇོན་ལྡན་པ་ཞིག་ཤིན་ཏུ་མཁོ། དེ་མེད་ན་དམ་བཅའི་ཚིག་དོན་“རང་ནུས་གང་ཐེག་ཞུ་རྒྱུ”ཞེས་པའི་རང་ནུས་དེ་ཡང་ཉམ་ཆུང་ནུས་མེད་ཅིག་ལས་འདོན་དཀའ་འོ།།
ད་དུང་ཞོར་དུ་བཤད་འདོད་པ་ཞིག་ལ། སྤྱི་ཚོགས་ཞབས་ཞུའི་ཉམས་མྱོང་གང་འཚམ་མེད་པ་དང་། བོད་ཕྱི་ནང་གི་གནས་སྟངས་དང་བོད་ཀྱི་ལོ་རྒྱུས་དང་རིག་གནས་ལ་རྒྱུས་མངའ་དེ་ཙམ་མེད་པ་དག་ཀྱང་སྤྱི་འཐུས་འོས་མིའི་ཞན་ཆ་ཞིག་ཡིན་ལ། དགེ་རྒན་དང་སྨན་པ། ཞིབ་འཇུག་ཆེད་ལས་པའི་བྱ་བ་འགངས་ཆེན་ཡོད་པ་དག་ཀྱང་གྲོས་ཚོགས་འཐུས་མིར་སླེབས་ན་སོ་སོའི་བྱ་གཞག་ལ་འཐུས་ཤོར་འགྲོ་ཉེན་དང་མཚན་གནས་ལ་ཡང་གནོད་རྐྱེན་མི་ཡོང་བའི་ངེས་པ་མེད་པས་སྔ་འདང་ཕྱི་འདང་མ་ནོར་བ་ཞིག་རྒྱག་དགོས།
མདོར་ན། གོང་གསལ་འོས་ཆོས་སམ་ཆ་རྐྱེན་རྣམས་ཚང་བའི་ཐོག སོ་སོ་རང་ངོས་ནས་ཀྱང་གྲོས་ཚོགས་འཐུས་མི་གནང་འདོད་མཁན་ཞིག་ཡིན་ན་དེ་ལ་ངེས་པར་དུ་འོས་ཤོག་འཕེན་དགོས་སོ།།
སླར་སྨྲས་པ།
སྒེར་སེམས་མི་ཆེ་ཕྱོགས་སུ་མི་ལྷུང་བ། །འཇིགས་ཞུམ་མེད་ཅིང་ཆགས་སྡང་དབང་མི་འགྲོ།
དྲང་བདེན་སྐྱོང་ཞིང་ལྷག་བསམ་ཟོལ་མེད་སྒོས། །བཅའ་ཁྲིམས་སྲུང་བརྩི་སྲི་ཞུའི་འཇོན་ཐང་ཅན།།
གང་ན་སུ་ཡོད་སྤྱི་བའི་འཐུས་མིར་བསྔགས། །གདམ་གསེས་མ་ནོར་བཙན་བྱོལ་བོད་མི་རྣམས།།
མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ།
