རྒྱལ་སྤྱིའི་བོད་དོན་ལས་འགུལ་ཁང་གིས་བོད་ནི་ཨེ་ཤ་ཡའི་ཆུ་མཛོད་ཡིན་པར་ངོས་འཛིན་བྱས་ཏེ་གཏོར་བཤིག་གི་ལས་གཞི་ལས་སྐྱོབ་དགོས་པའི་འབོད་སྐུལ་ཞུས་འདུག
ཟླ་འདིའི་ཕྱི་ཚེས་ ༦ ནས་ ༢༡ བར་ལྷོ་ཨ་མི་རི་ཁའི་རྒྱལ་ཁབ་བྷི་ཛལ་དུ། མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་ཐེངས་ ༣༠ པ་འཚོག་བཞིན་ཡོད་པ་ལྟར། རྒྱལ་སྤྱིའི་བོད་དོན་ལས་འགུལ་ཁང་གིས། ཚོགས་འདུར་མཉམ་ཞུགས་བྱེད་མཁན་གྱི་རྒྱལ་ཁབ་ཁག་གི་མགོ་ཁྲིད་དང་ཁོར་ཡུག་ལས་འགུལ་བ་སོགས་ཀྱིས་ཚོགས་འདུ་དེའི་སྟེང་བོད་ཀྱི་ཁོར་ཡུག་གི་ཛ་དྲག་གནད་དོན་ཁག་གླེང་སློང་བྱེད་དགོས་པའི་འབོད་སྐུལ་ཞུས་འདུག
དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས། འཛམ་གླིང་གི་མགོ་ཁྲིད་ཚོས་རང་བྱུང་ཁམས་ཀྱི་ནུས་ཤུགས་བསྐྱར་གསོའི་ཐབས་ལམ་སྐོར་ལ་གྲོས་བསྡུར་བྱེད་བཞིན་པའི་སྐབས་འདིར། བོད་ཀྱི་གནམ་གཤིས་འགྱུར་ལྡོག་གི་གནས་བབ་ནི་ཧ་ཅང་དྲང་བདེན་མིན་པའི་མཚམས་ཐིག་ཞིག་ཏུ་ལྷུང་ཡོད། རྒྱ་ནག་གིས་གཞུང་འབྲེལ་གྱི་ཐོག་ནས་ལྗང་མདོག་གི་ནུས་ཤུགས་ལ་ཁ་གཡར་ནས། བོད་ཀྱི་གཙང་པོ་ཁག་ཏུ་ཆུ་གློག་ས་ཚིགས་འཛུགས་སྐྲུན་གྱི་ལས་གཞི་སྤེལ་བཞིན་པ་དེས། བོད་ཀྱི་སྐྱེ་ཁམས་ཁོར་ཡུག་ལ་སླར་གསོ་མི་ཐུབ་པའི་གཏོར་སྐྱོན་དང་ས་གནས་མི་མང་གནས་སྤོ་བྱེད་དུ་འཇུག་གི་ཡོད། རྒྱ་ནག་གིས་བསྐྲུན་པའི་ཆུ་མཛོད་ཆེན་པོ་དེ་དག་གིས་ཉམས་ཆུང་བའི་སྐྱེ་ཁམས་མ་ལག་ལ་གཏོར་བརླག་དང་ཨེ་ཤ་ཡའི་ཆུའི་བདེ་འཇགས་ལ་ཉེན་ཁ་བཟོ་བཞིན་ཡོད་པ་མ་ཟད། བོད་མི་རྣམས་ཀྱི་ཆོས་དང་རིག་གཞུང་གི་ཤུལ་བཞག་རྣམས་རྩ་བརླག་ཏུ་གཏོང་བཞིན་ཡོད། ཅེས་བརྗོད་འདུག
རྒྱ་ནག་གིས་བོད་ནང་ལག་བསྟར་བྱེད་བཞིན་པའི་ལས་གཞི་དེ་དག་ལ་ས་གནས་མི་མང་གི་ངོས་ལེན་དང་འདོད་བློ་མེད་བཞིན་དུ་བཙན་གྱིས་རྒྱག་བཞིན་པ་ནི་རྒྱལ་སྤྱིའི་ཚད་གཞིར་འགལ་བ་མ་ཟད། བོད་མི་ཚོར་ཁོང་ཚོའི་ས་ཆ་དང་། འཚོ་བའི་རྟེན་གཞི། མ་འོངས་པ་བཅས་ལ་ཐག་གཅོད་བྱེད་པའི་དབང་ཆ་མེད་པར་བཟོས་ཡོད། དེར་བརྟེན། ཐེངས་འདིའི་ཚོགས་འདུའི་ཐོག་བོད་མི་མང་གི་འཚོ་རྟེན་དང་ཐོབ་ཐང་སྲུང་སྐྱོབ་ཐུབ་པའི་གནམ་གཤིས་འགྱུར་ལྡོག་གི་སྲིད་བྱུས་འཛིན་རྒྱུ་གལ་ཆེན་ཡིན་པ་དང་། གནམ་གཤིས་དང་ནུས་པའི་སྲིད་བྱུས་ཚང་མའི་ནང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་དགོས་པ། དེ་བཞིན་བོད་ནི་ཨེ་ཤ་ཡའི་ཆུ་མཛོད་ཡིན་པར་ངོས་འཛིན་བྱས་ཏེ་གཏོར་བཤིག་གི་ལས་གཞི་ལས་སྐྱོབ་དགོས་སྐོར་སོགས་ཀྱི་འབོད་སྐུལ་ཞུས་འདུག
ཉེ་ཆར་རྒྱལ་སྤྱིའི་བོད་དོན་ལས་འགུལ་ཁང་གིས་ཞིབ་འཇུག་བྱས་པ་ལྟར་ན། ཕྱི་ལོ་ ༢༠༠༠ ནས་བཟུང་རྒྱ་ནག་གིས་བོད་ནང་ཆུ་གློག་འཛུགས་སྐྲུན་གྱི་ལས་གཞི་ཉུང་མཐར་ ༡༩༣ མགོ་བཙུགས་ཡོད་པ་དང་། དེ་དག་ལས་བརྒྱ་ཆ་ ༨༠ ཙམ་ཆུ་མཛོད་ཆེན་པོ་དང་ཆུ་མཛོད་ཧ་ཅང་ཆེན་པོ་ ( 100 MW ) ཡིན་པ་གསལ་སྟོན་བྱས་ཡོད་འདུག འདས་ལོའི་ཕྱི་ཟླ་ ༡༢ ནང་རྒྱ་ནག་གཞུང་གིས་བོད་ཀྱི་ཀོང་པོ་ཉིང་ཁྲིའི་མེ་ཏོག་རྫོང་གི་ཡར་ཀླུང་གཙང་པོའི་སྨད་ཕྱོགས་ཀྱི་བཞུར་རྒྱུན་དུ། འཛམ་གླིང་གི་ཆེས་ཆེ་བའི་ཆུ་རགས་གསར་རྒྱག་གི་ལས་གཞི་བརྩམས་ཡོད་པ་དེ་ནི་ཆུ་རགས་ལྔ་བརྩེགས་ཀྱི་ཆུ་མཛོད་ཅིག་ཡིན་པ་དང་། ཆུ་རགས་དེ་ནི་དེ་སྔོན་རྒྱ་ནག་གཞུང་གིས་འབྲི་ཆུའི་བཞུར་རྒྱུན་དུ་བརྒྱབ་པའི་འགག་གསུམ་ཆུ་རགས་ (Three Gorges Dam) ལས་ལྡབ་ ༣ གྱི་ཆེ་བ་ཡོད་པ་དང་། ལས་གཞི་དེ་ལེགས་གྲུབ་བྱུང་ཚེ། ཡར་ཀླུང་གཙང་པོའི་བཞུར་རྒྱུན་དུ་གནས་པའི་མི་གྲངས་ ༡།༢ ཙམ་སྲོལ་རྒྱུན་གྱི་གཞིས་ཁྱིམ་དང་ས་ཆ་ནས་ཕྱིར་འབུད་བྱ་རྒྱུ་ཡིན་པ་བསྟན་འདུག
གསར་འགོད་པ། སྐལ་བཟང་སྦྱིན་པ།
