ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས། བཙན་བྱོལ་རང་དབང་ལུང་པའི་ནང་གནས་སྡོད་བྱེད་བཞིན་པའི་བྱེས་འབྱོར་བོད་མི་རྩམ་གཟན་པ་ཡོངས་ནས་བོད་ཀྱི་ཆོས་རིག་ལེགས་བྱང་དང་སྐད་ཡིག་གོམས་སྲོལ་བཟང་པོ་དེ་དག་འཛིན་སྐྱོང་སྤེལ་གསུམ་བྱ་རྒྱུར་སྔར་ལྷག་འབད་འབུངས་ཞུ་ཐུབ་པའི་གཞེན་སྐུལ་ཞུས་འདུག
དེ་རིང་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཚབ་ཞུས་ཏེ། བོད་པའི་སློབ་གྲྭ་ཁག་ཏུ་བྱིས་པའི་ཉིན་མོ་སྲུང་གཙི་ཞུ་བཞིན་པར་སློབ་ཕྲུག་ཡོངས་ལ་འཚམས་འདྲི་ཞུས་འདུག་པ་དང་། རྒྱ་ནག་གིས་བོད་ནང་གི་བྱིས་པ་ཚོ་བཙན་གྱིས་བཅའ་སྡོད་སློབ་གྲྭར་བཅུག་སྟེ། རྒྱ་སྐད་རྒྱ་ཡིག་ཁོ་ནའི་སྟེང་ནས་སློབ་ཁྲིད་བྱེད་ཀྱི་ཡོད་སྟབས། བོད་ཀྱི་ཆོས་དང་རིག་གཞུང་། སྐད་ཡིག་དང་གོམས་སྲོལ་སོགས་སྦྱངས་བརྩོན་བྱེད་པའི་གོ་སྐབས་ཏིལ་འབྲུ་ཙམ་ཡང་མེད་ཅིང་། སློབ་སྦྱོང་དང་ཞལ་ལག་གི་མཐུན་རྐྱེན་ཚད་ལྡན་མེད་ཁར། སློབ་ཕྲུག་རྣམས་ལ་བཙན་གཡེམ་དང་གདུག་རྩུབ་གཏོང་གི་ཡོད་པས། བཙན་བྱོལ་རང་དབང་ལུང་པའི་ནང་ཡོད་པའི་བོད་མི་ཚོས་བོད་ཀྱི་ཆོས་དང་རིག་གཞུང་། སྐད་ཡིག ཡུལ་སྲོལ་གོམས་གཤིས། ཡ་རབས་སྤྱོད་བཟང་སོགས་སྔར་ལྷག་གིས་འཛིན་སྐྱོང་སྤེལ་གསུམ་བྱེད་པར་འབད་འབུངས་ཞུ་དགོས་པའི་སྐུལ་མ་གནང་འདུག
དེ་འབྲེལ་གསུང་འཕྲིན་ནང་། སློབ་ཕྲུག་རྣམས་ནས་ཡིག་རྒྱུགས་དང་བརྒྱ་ཆ་ཁོ་ནའི་ཆེད་དུ་སློབ་གཉེར་བྱེད་པ་མ་ཡིན་པར་ནམ་ཞག་རྒྱུན་གཏན་ནས་ཀློག་རྩལ་དང་།འབྲི་རྩལ། ཉན་རྩལ། བཤད་རྩལ་སོགས་ཀྱི་ཐོག་ལ་དམིགས་བསལ་ཤུགས་སྣོན་བརྒྱབ་སྟེ་ཕྱོགས་ཡོངས་ནས་སློབ་སྦྱོང་ཆ་ཚང་བ་ཞིག་བྱེད་ཐུབ་པ་དགོས་རྒྱུ་དང་། ད་ལྟའི་ཆར་བཀླག་བྱའི་དཔེ་དེབ་ཀྱི་མཐུན་རྐྱེན་ཧ་ཅང་བཟང་ནའང་། ཀློག་པ་པོ་ཉུང་བའི་དཀའ་ངལ་ལྟ་བུ་མངོན་པས། དེ་དོན་སློབ་ཕྲུག་རང་ཉིད་ཀྱི་རྒྱུད་ལ་དཔེ་ཀློག་གི་གོམས་གཤིས་འཇགས་ཐབས་བྱ་རྒྱུ་ནི་གལ་འགངས་ཆེ་ཤོས་ཆགས་ཡོད།
སློབ་ཕྲུག་རྣམས་འཚར་ལོངས་བྱེད་བཞིན་པའི་གནས་སྐབས་སུ་ཕྱིའི་ལུས་ལ་གནོད་པའི་མངར་ཟས་དང་། ཁེངས་ཟས། འགྱིག་ཤོག་ནང་གི་བཅུད་མེད་ཟས་རིགས་རྣམས་མཆོད་མི་དགོས་པ་གཙོ་འདོན་གནང་རྒྱུ་དང་། ནང་སེམས་ཁམས་ཀྱི་འཕྲོད་བསྟེན་ལ་ཕན་པའི་༸གོང་ས་མཆོག་གི་བཀའ་སློབ་ཁག་ལྟ་ཀློག་ཉན་གསུམ་བྱ་རྒྱུ་དང་། གཞན་ཕན་གྱི་བསམ་པས་ཀུན་ནས་བསླངས་ཏེ་ཕན་ཚུན་བྱམས་སྐྱོང་དང་རོགས་སྐྱོར་གནང་ཐུབ་པ་སོགས་བྱུང་ཚེ་ལུས་སེམས་གཉིས་ཀའི་འཕྲོད་བསྟེན་ལ་ཕན་ཐོགས་ཆེ་བ་ཡོང་ངེས།
ཕ་མ་རྣམས་ཀྱི་ངོས་ནས་ཀྱང་རང་རང་སོ་སོའི་བུ་ཕྲུག་གི་མི་ཚེའི་མདུན་ལམ་དང་ཤེས་ཡོན་སློབ་གསོའི་མཐུན་རྐྱེན་སྦྱོར་སྤྲོད་ཐུབ་པ་སོགས་ཀྱི་འབྱུང་རྩ་གཙོ་བོ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་ནས་སྐུ་ན་ཕྲ་སྒང་ནས་བོད་དང་བོད་མིའི་རྩ་དོན་ཆེད་དུ་སྐུ་ངལ་ལ་གདོང་ལེན་མི་ཉུང་བ་ཞིག་བསྐྱོན་པའི་འབྲས་བུ་ལ་བརྟེན་ནས་བྱུང་བ་ཞིག་ཡིན་པས་བཀའ་དྲིན་རྗེས་དྲན་ཞུ་དགོས་པ་མ་ཟད། རང་གི་བུ་ཕྲུག་ལའང་༸གོང་ས་མཆོག་གི་བཀའ་དྲིན་ཡིན་པ་ངེས་པར་གསུང་དགོས།
ཕྲུ་གུ་ཚོར་ཕ་མའི་བྱ་སྤྱོད་བཟང་ངན་རྣམས་མིག་སྔར་ཡང་ཡང་མཐོང་གི་ཡོད་པའི་ཆ་ནས་སེམས་ནང་མང་བ་འཇགས་ཀྱི་ཡོད་སྟབས། ཕ་མའི་སྒོ་གསུམ་གྱི་སྤྱོད་པ་འཁྱེར་སྟངས་ནི་བསླབ་བྱ་གཙོ་བོ་ཆགས་ཀྱི་ཡོད་པས། ཕྲུ་གུར་བསླབ་བྱ་ཁོ་ན་བསྐྱོན་པ་ལས་ཕ་མ་རང་ཉིད་ཀྱི་ངོས་ནས་སྒོ་གསུམ་གྱི་སྤྱོད་ལམ་བཟང་པོ་ཞིག་ལག་བསྟར་གྱིས་མིག་དཔེ་སྟོན་ཐུབ་པ་ཡིན་ན་གྲུབ་འབྲས་གནད་དུ་སྨིན་པ་ཞིག་ཡོང་རྒྱུ་ངེས་པ་ཡིན།
བོད་ཀྱི་སྲོལ་རྒྱུན་རིག་གནས་སྤྱི་དང་། བྱེ་བྲག་ཏུ་ནང་པ་སངས་རྒྱས་པའི་བཀའ་བསྟན་ཡོངས་སུ་རྫོགས་པ་འགྲེལ་བརྗོད་ཐུབ་མཁན་ནི་བོད་ཀྱི་ཐུན་མོང་མ་ཡིན་པའི་སྐད་ཡིག་ཁོ་ན་ཡིན་པས། རང་རེའི་ན་གཞོན་གཙོ་བོར་གྱུར་བའི་བོད་མི་སེར་སྐྱ་བགྲེས་གཞོན་མཆོག་དམན་ཀུན་གྱིས་སྦྱངས་བརྩོན་ལྷོད་མེད་གནང་སྐྱོང་ཡོང་བ་མ་ཟད། སྐད་ཡིག་གཞན་གྱིས་བསྲེ་ལྷད་མི་ཞུགས་པར་བོད་སྐད་གཙང་མ་བསྐྱོན་རྒྱུར་སྒོ་ཀུན་ནས་འབད་རྩོལ་གནང་གལ་ཆེ་བ་དང་། ཤེས་འཇོན་ལྷག་བསམ་ལྡན་པའི་དགེ་ལས་ཡོངས་ནས་སྔར་ལྷག་ངལ་བ་ཁྱད་བསད་ཀྱིས་ཡ་རབས་བཟང་སྤྱོད་དང་ལྡན་ཞིང་། ཕྱི་ནང་ཤེས་ཡོན་གྱིས་ཕྱུག་པའི་བོད་མིའི་སྣེ་ཁྲིད་མི་སྣ་གང་མང་སྐྱེད་སྲིང་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན། ཞེས་གསུངས་འདུག
