ཕྱི་ལོ་ ༥༣༦ ཡས་མས་ལ་བཞེངས་བའི་མི་ལོ་ ༡༥༠༠ ལྷག་གི་ལོ་རྒྱུས་ལྡན་པའི་རྒྱ་ནག་ཅང་སུའུ་ཞིང་ཆེན་ཀྲང་ཅཱ་ཀང་གི་ཡོང་ཆིང་ནང་པའི་ལྷ་ཁང་ཞིག་ལ་མེ་སྐྱོན་ཆེན་པོ་བྱུང་འདུག
1,500-year-old Buddhist Yongqing Temple in China hit by massive fire on 12th November 2025.
ཟླ་འདིའི་ཕྱི་ཚེས་ ༡༢ ཉིན་འབྲི་ཆུའི་འགྲམ་རྒྱུད་དུ་ཆགས་པའི་རྒྱ་ནག་ཅང་སུའུ་ཞིང་ཆེན་ཀྲང་ཅཱ་ཀང་( Zhang jiagang) དུ་ཡོད་པའི་ཡོང་ཆིང་ཞེས་པའི་ནང་པའི་ལྷ་ཁང་རྙིང་པ་ཞིག་ལ་མེ་ཤོར་ཏེ་ཕྱི་ནང་གི་རྟེན་དང་བརྟེན་པར་འཚིག་སྐྱོན་ཆེན་པོ་བྱུང་ཡོད་འདུག་ལ། ས་གནས་གཞུང་ཕྱོགས་ནས་སྔར་གྱི་བཟོ་བཀོད་ལྟར་ལྷ་ཁང་ཉམས་གསོ་བྱ་རྒྱུ་ཡིན་སྐོར་བསྒྲགས་འདུག
ས་གནས་གཞུང་ཕྱོགས་ཀྱིས་མེ་སྐྱོན་དེ་ནི་ལྷ་ཁང་ཞིག་ལ་ཉམས་གསོ་བྱེད་སྐབས་བྱུང་ཡོད་པའི་ཚོད་དཔག་བྱེད་ཀྱིན་ཡོད་སྐོར་བཤད་འདུག་ལ། མེ་གསོད་རུ་ཁག་དང་ཛ་དྲག་མྱུར་སྐྱོབ་རུ་ཁག་གིས་གནས་ཚུལ་འབྱོར་མ་ཐག་ཡུལ་དངོས་སུ་ཕྱིན་ཏེ་མེ་བསད་དེ་ཞིབ་འཇུག་བྱེད་བཞིན་ཡོད་སྐོར་བརྗོད་འདུག ཆེད་མཁས་པ་ཁག་ཅིག་གིས། གློག་སྐུད་སྐྱོན་ཅན་དང་། སྤོས་བེད་སྤྱོད་བྱས་པ། ལྷ་ཁང་གི་བཟོ་བཀོད་ཀྱི་ཞན་ཆ་སོགས་ཀྱིས་མེ་སྐྱོན་བྱུང་བ་ཡིན་སྐོར་བཤད་ཡོད་འདུག
གནའ་བོའི་ཤིང་གི་སྒྱུ་རྩལ་གྱི་མཛེས་ཉམས་ལྡན་པའི་ལྷ་ཁང་དེའི་ཐོག་རྩེག་ཚང་མ་འཚིགས་ཡོད་པ་མ་ཟད། རིན་ཐང་གཞལ་དུ་མེད་པའི་རིག་དངོས་ཁག་ཅིག་ཀྱང་མེས་འཚིགས་ཡོད་སྟབས། སྤྱི་ཚོགས་དྲ་ལམ་དུ་མི་མང་པོས་བརྙན་ཐུང་དང་པར་རིས་བཀྲམ་སྟེ་བློ་ཕམ་ཆེན་པོ་བྱེད་བཞིན་འདུག
ལྷ་ཁང་དེར་དུས་རབས་མང་པོར་ཉམས་གསོ་བྱས་ཡོད་ཀྱང་ནང་པའི་ཤུལ་བཞག་རིག་དངོས་རྩ་ཆེན་མང་པོ་ཉར་ཚགས་བྱས་ཡོད་འདུག་ལ། ལྷ་ཁང་དེའི་དམིགས་བསལ་གྱི་ཁྱད་ཆོས་ནི། གདོད་མའི་དུས་ཀྱི་རང་བྱུང་གི་རྡོ་རྩིག་ཅིག་དང་། མི་ལོ་སྟོང་ཕྲག་ལྷག་གི་ལོ་རྒྱུས་ཡོད་པའི་ཤུག་སྡོང་དང་། དེང་རབས་ཀྱི་ནང་པའི་རིག་གཞུང་སྐྱེད་ཚལ་ནང་བྱང་ཆུབ་སེམས་དཔའི་སྐུ་བརྙན་ཆེན་པོ་ཞིག དེ་བཞིན་དགྲ་བཅོམ་པ་ལྔ་བརྒྱ་ལྷག་གི་སྐུ་འདྲ་བཞུགས་སའི་ལྷ་ཁང་སོགས་ཡོད་སྟབས། དུས་རབས་མང་པོར་འཛམ་གླིང་གི་ཡུལ་སྐོར་བའི་ལྟེ་གནས་ཤིག་ཏུ་གྱུར་ཡོད་འདུག
མི་ལོ་ ༡༥༠༠ ལྷག་གི་ལོ་རྒྱུས་ལྡན་པའི་ལྷ་ཁང་དེ་ནི། ཀྲང་ཅཱ་ཀང་གི་ཕིན་ཧོང་རི་བོའི་(Fenghuang Mountain ) འདབས་རོལ་དུ་ཆགས་ཡོད་ཅིང་། ས་ཁུལ་དེའི་ནང་པའི་ལྷ་ཁང་རྙིང་ཤོས་གྲས་ཀྱི་གཅིག་ཡིན་འདུག ལོ་རྒྱུས་ཀྱི་ཡིག་ཚགས་ལྟར་ན། དགོན་པ་འདི་ཐོག་མར་ལྷོ་ལིང་རྒྱལ་རབས་(Southern Liang Dynasty) ཀྱི་གོང་མ་ཏ་ཐོང་(Datong) གི་དུས་སྐབས་ཏེ། ཕྱི་ལོ་ ༥༣༦ ཙམ་ལ་བཞེངས་ཡོད་པ་དང་། ཐང་རྒྱལ་རབས་ཀྱི་སྙན་ངག་པ་ཏུ་མུ་(Du Mu) ཡིས་བྲིས་པའི་སྙན་ངག་གྲགས་ཅན་ཞིག་ཏུ་སྔོན་ཆད་ལྷ་ཁང་དེ། ལྷོ་རྒྱལ་རབས་( Southern Dynasties) ཀྱི་ལྷ་ཁང་ ༤༨༠ ཡི་གྲས་སུ་ཚུད་ཡོད་སྐོར་གསལ་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
