ཐའེ་ཝན་དང་འབྲེལ་ནས་ཉི་ཧོང་དང་རྒྱ་ནག་བར་རྩོད་རྙོག་བྱུང་སྟེ་ད་ལྟའང་ཕྱོགས་གཉིས་ཀྱིས་ཕན་ཚུན་ལ་བརྒྱུད་ལམ་འདྲ་མིན་གྱི་ཐོག་ནས་ལན་འདེབས་བྱེད་རེས་བྱེད་བཞིན་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉེ་ལམ་ཉི་ཧོང་གི་སྲིད་བློན་གསར་པ་ལྕམ་ས་ནའེ་ཊ་ཀའེ་ཆི་ (Sanae Takaichi) ལགས་ཀྱིས། གལ་སྲིད་རྒྱ་ནག་གིས་ཐའེ་ཝན་ལ་དྲག་རྒོལ་བྱས་ཚེ། དེ་ནི་ཉི་ཧོང་གི་འཚོ་གནས་ལ་འཇིགས་སྐུལ་བྱས་པའི་གནས་སྟངས་ཤིག་ཆགས་ཀྱི་ཡོད་པས། ཉི་ཧོང་གི་ངོས་ནས་དམག་འཁྲུག་གི་བརྡ་ལན་རྒྱག་སྲིད་སྐོར་བརྗོད་ཡོད་པར་བརྟེན། ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཇེན་ཟེར་བས། ལྕམ་ས་ནའེ་ཊ་ཀའེ་ཆི་ལགས་ཀྱི་སྐད་ཆ་དེ་དག་ཕྱིར་འཐེན་བྱ་དགོས་པ་དང་དེ་ལྟར་མ་བྱུང་ན་མཇུག་འབྲས་ངན་པ་འབྱུང་སྲིད་པའི་བརྡ་ལན་བསློགས་འདུག
རྒྱ་གར་ཧིན་རྡུན་གསར་ཁང་གིས་སྤེལ་བའི་གནས་ཚུལ་ལྟར་ན། རྒྱ་ནག་ཕྱི་སྲིད་ལྷན་ཁང་གིས་ལྕམ་ས་ནའེ་ཊ་ཀའེ་ཆི་ལགས་ཀྱིས་བཤད་པའི་ཐའེ་ཝན་སྐོར་གྱི་སྐད་ཆ་དེ་ནི་ཧ་ཅང་ཚབས་ཆེན་ཡིན་པ་དང་ཐད་ཀར་རྒྱ་ནག་གི་ནང་སྲིད་ལ་ཐེ་གཏོགས་བྱས་པ་ཡིན་པས། སྐད་ཆ་དེ་ཕྱིར་འཐེན་མ་བྱས་ཚེ། རྒྱ་ནག་གིས་ཉི་ཧོང་ལ་རྒོལ་ལན་བསློག་རྒྱུ་ཡིན་སྐོར་བརྗོད་འདུག
ཉི་ཧོང་གི་ཕྱི་སྲིད་བློན་ཆེན་ཏོ་ཤི་མི་ཙུ་མོ་ཏེ་གི (Toshimitsu Motegi) ལགས་ཀྱིས། རྒྱ་ནག་གིས་གཞི་རྒྱ་ཆེ་བའི་རྒྱལ་ཁབ་གཉིས་ཀྱི་འབྲེལ་ལམ་ལ་ཤུགས་རྐྱེན་མི་ཐེབས་པའི་དོན་དུ། གནད་དོན་འདིའི་ཐད་འོས་འཚམ་གྱི་བྱ་སྤྱོད་སྤེལ་བའི་སྐུལ་མ་གཏོང་གི་ཡོད་ཅེས་བརྗོད་འདུག
ཡང་རྒྱ་ནག་ཕྱི་སྲིད་ལྷན་ཁང་གིས། ཉི་ཧོང་གིས་ལོ་རྒྱུས་ལས་བསླབ་བྱ་བླངས་ཏེ། ཧོར་རྒྱུག་གི་ཉེན་ཁ་མི་ལེན་པ་དང་ལྷག་པར་དུ་ཐའེ་ཝན་མཚོ་འགག་གི་ཁུལ་དུ་དམག་གིས་ཐེ་གཏོགས་བྱ་རྒྱུ་སོགས་ཀྱིས་ཉི་ཧོང་ལ་ཕམ་ཁ་ཆེན་པོ་རག་རྒྱུ་ཡིན་པ་མ་ཟད། སྣོ་ལྕགས་ལྟར་ངར་བའི་རྒྱ་ནག་མི་དམངས་བཅིང་གྲོལ་དམག་གི་གདོང་ནས་ཕམ་ཁ་མྱང་རྒྱུ་ཡིན་སྐོར་སོགས་ཀྱང་བརྗོད་འདུག
ཐེངས་འདིའི་ཉི་ཧོང་དང་རྒྱ་ནག་བར་གྱི་རྩོད་རྙོག་དེ། ཟླ་འདིའི་ཕྱི་ཚེས་ ༧ ཉིན་ཉི་ཧོང་གྲོས་ཚོགས་ནང་ཁ་གཏད་སྲིད་དོན་ཚོགས་པའི་འཐུས་མི་ཞིག་གིས། གནས་སྟངས་ག་འདྲ་ཞིག་གི་འོག་ནས་ཐའེ་ཝན་གྱི་གནད་དོན་དེ་ཉི་ཧོང་གི་འཚོ་གནས་ལ་འཇིགས་སྐུལ་བྱས་པར་ངོས་འཛིན་བྱེད་སྲིད་དམ་ཞེས་དྲི་བ་དྲིས་པར། སྲིད་བློན་གསར་བ་ལྕམ་ས་ནའེ་ཊ་ཀའེ་ཆི་ལགས་ཀྱིས། གལ་སྲིད་ཐའེ་ཝན་མཚོ་འགག་ཏུ་དམག་འཁྲུག་མཚོ་གྲུ་དང་དྲག་ཤུགས་བཀོལ་སྤྱོད་བྱས་ཚེ། དེ་ནི་ཉི་ཧོང་གི་འཚོ་གནས་ལ་འཇིགས་སྐུལ་བྱས་པར་ངོས་འཛིན་བྱ་རྒྱུ་ཞེས་ལན་འདེབས་བྱས་པ་ལ་བརྟེན་ནས་བྱུང་ཡོད་པ་རེད།
འཚོ་གནས་ལ་འཇིགས་སྐུལ་ཞེས་པ་ནི་ཕྱི་ལོ་ ༢༠༡༥ ལོར་གཏན་འབེབས་བྱས་པའི་ཉི་ཧོང་གི་བདེ་སྲུང་ཁྲིམས་ཤིག་ཡིན་པ་དང་། ཁྲིམས་དེའི་ནང་ཉི་ཧོང་གི་མཐུན་གྲོགས་རྒྱལ་ཁབ་ཅིག་གི་སྟེང་དུ་དམག་གི་དྲག་ཤུགས་བཀོལ་སྤྱོད་བྱས་ཚེ། དེ་ནི་ཉི་ཧོང་གི་འཚོ་གནས་ལ་འཇིགས་སྐུལ་བྱས་པར་ངོས་འཛིན་བྱེད་པ་དང་། ཉི་ཧོང་གིས་རྒྱལ་སྲུང་མ་ལག་གི་འཐབ་འཁྲུག་གོ་མཚོན་བེད་སྤྱོད་བྱས་ཏེ་རྒོལ་ལན་བསློག་ཆོག་པ་ཡིན་པའི་འགྲེལ་བརྗོད་བྱས་ཡོད་པ་རེད།
སྤྱིར་ཉི་ཧོང་དང་རྒྱ་ནག་བར་ཕྱི་ལོ་ ༡༨༩༤ ནས་ ༡༨༩༥ བར་དམག་འཁྲུག་ཐེངས་དང་པོ་ཤོར་ཞིང་། འཛམ་གླིང་དམག་ཆེན་གཉིས་པའི་སྐབས་ཏེ། ཕྱི་ལོ་ ༡༩༣༧ ནས་ ༡༩༤༥ བར་དམག་འཁྲུག་ཐེངས་གཉིས་པ་ཤོར། དམག་འཁྲུག་གཉིས་ཀྱི་ཁྲོད་དུ་རྒྱ་ནག་ལ་ཕམ་ཁ་ཆེན་པོ་བྱུང་བ་དང་དམག་འཁྲུག་དང་པོའི་སྐབས་ཉི་ཧོང་གིས་མན་ཇུའི་རྒྱལ་སྲིད་ཕམ་ཉེས་བཏང་སྟེ་ད་ལྟའི་ཐའེ་ཝན་གྱི་ས་ཁུལ་ལ་བདག་བཟུང་བྱས། དམག་འཁྲུག་གཉིས་པའི་སྐབས་སུ་རྒྱ་ནག་གི་ས་ཁུལ་གཞན་དུའང་ཉི་ཧོང་གི་དབང་ཤུགས་རྒྱ་སྐྱེད་དུ་ཕྱིན་ཡོད་ལ། སྐབས་དེར་ཉི་ཧོང་གི་དམག་གིས་རྒྱ་ནག་དམག་མི་དང་མི་མང་སྡེབ་གསོད། བུད་མེད་ལ་བཙན་གཡེམ་བྱས་ཡོད་ཟེར་བའི་ནན་ཅི་དོན་རྐྱེན་ཆེན་མོ་ཟེར་བ་སོགས་བྱུང་ཡོད།
གསར་འགོད་པ། སྐལ་བཟང་སྦྱིན་པ།
