ད་ལྟའི་ཆར་ཉི་ཧོང་དང་རྒྱ་ནག་བར་ཐའེ་ཝན་གྱི་གནད་དོན་དང་འབྲེལ་ནས་རྩོད་རྙོག་ཆེར་འགྲོ་བཞིན་པ་དང་བསྟུན། ཕྱོགས་གཉིས་ནས་ཕན་ཚུན་གྱི་མི་མང་ལ་འགྲོ་འོང་སོགས་ཀྱི་ཐད་ཡིད་གཟབ་དང་དོགས་ཟོན་བྱ་དགོས་པའི་སྐུལ་མ་བྱས་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་ཏུ་ཡོད་པའི་ཉི་ཧོང་གཞུང་ཚབ་ཁང་གིས་བརྡ་ཁྱབ་ཅིག་སྤེལ་ཏེ། རྒྱ་ནག་དང་ཉི་ཧོང་གི་འབྲེལ་ལམ་གྱི་གནས་སྟངས་དང་འབྲེལ་ནས་ད་ལྟ་རྒྱ་ནག་ཏུ་ཉི་ཧོང་བར་ལྟ་སྟངས་ཤིག་ཡོང་གི་ཡོད་པའི་གནས་སྟངས་འོག རྒྱ་ནག་ནང་གནས་པའི་ཉི་ཧོང་མི་མང་གིས། གལ་སྲིད་རང་ཉིད་ཀྱི་རྗེས་དང་ཉེ་འཁོར་སོགས་སུ་དོགས་གཞི་ཅན་གྱི་མི་སྒེར་དང་ཚོགས་པ་གང་རུང་མཐོང་ཚེ། འཕྲལ་དུ་ས་གནས་དེ་ནས་གཡོལ་ཐབས་བྱ་དགོས་པ་དང་། ཕྱིར་འགྲོ་སྐབས་དོགས་གཞི་ཅན་གྱི་མི་སྒེར་གྱི་ཉེ་སར་འགྲོ་བ་དང་། མི་ཚོགས་མང་པོ་ཡོད་སར་འགྲོ་བ། ཉི་ཧོང་གི་མི་སེར་གཞན་མང་པོ་ཡོད་སར་འགྲོ་བ་སོགས་ལ་གཟབ་དགོས། གལ་སྲིད་རང་ཉིད་ཀྱི་བདེ་འཇགས་ལ་ཉེན་ཁ་མཐོང་ཚེ་འཕྲལ་དུ་ཉི་ཧོང་གཞུང་ཚབ་ཁང་ལ་འབྲེལ་བ་བྱ་དགོས་སྐོར་སོགས་བརྗོད་འདུག་ལ། ཉི་ཧོང་གིས་བརྡ་ཁྱབ་དེ་ནི་ཆེད་དུ་མི་མང་གི་བདེ་འཇགས་ལ་དམིགས་པ་ཡིན་པའི་འགྲེལ་བརྗོད་བྱས་འདུག
དེ་བཞིན། ཁ་སང་རྒྱ་ནག་གཞུང་གིས། རྒྱ་ནག་ཏུ་སྟོན་འཆར་ཡོད་པའི་ཉི་ཧོང་གི་གློག་བརྙན་གྲགས་ཅན་གཉིས་རྒྱ་ནག་ནང་སྟོན་རྒྱུ་མཚམས་བཞག་ཡོད་ཅིང་། རྒྱ་ནག་དབུས་བརྙན་འཕྲིན་(CCTV) ལས་ཁུངས་ཀྱིས། དེ་ནི་རྒྱ་ནག་མི་མང་གི་སེམས་ཚོར་ལ་གཞིགས་ནས་ཐག་གཅོད་བྱས་པ་ཞིག་ཡིན་པར་བརྗོད་པ་མ་ཟད། རྒྱ་ནག་ཕྱི་སྲིད་ལྷན་ཁང་གིས་བདེ་འཇགས་ལ་དམིགས་ནས་རྒྱ་རིགས་མི་མང་ཚོ་འདི་ལོའི་ལོ་མཇུག་བར་ཉི་ཧོང་དུ་འགྲོ་རྒྱུ་མཚམས་འཇོག་དགོས་པ་དང་། འགྲོ་གཏན་ཁེལ་ཟིན་པའི་མི་མང་ལ་ལམ་གྲོན་སོགས་ཀྱི་འགྲོ་གྲོན་ཡོངས་གཞུང་ངོས་ནས་ཕྱིར་སློག་བྱ་རྒྱུ་ཡིན་པ་དང་དམིགས་བསལ་ཉི་ཧོང་དུ་སློབ་སྦྱོང་བྱེད་འཆར་ཡོད་པའི་རྒྱ་རིགས་ཚོས་བསམ་བློ་གཉིས་པ་གཏོང་དགོས་སྐོར་ལ་སྐུལ་མ་བྱས་འདུག
ཟླ་འདིའི་ཕྱི་ཚེས་ ༡༦ ནས་ ༢༡ བར་རྒྱ་ནག་གི་རྒྱལ་ས་པེ་ཅིན་དུ་འཚོགས་གཏན་ཁེལ་བའི་རྒྱ་ནག་དང་ཉི་ཧོང་གི་ལོ་འཁོར་གླེང་སྟེགས་དེ་རྒྱ་ནག་གི་གོ་སྒྲིག་པས་རེ་འདོད་ལྟར་ཕྱིར་འགྱངས་བྱས་ཡོད་པ་དང་། ལོ་འཁོར་ཚོགས་འདུ་དེ་ནི་རྒྱལ་ཁབ་གཉིས་བར་ཆབ་དཔལ་རིག་གསུམ་གྱི་གཙོས་གལ་གནད་ཆེ་བའི་གནད་དོན་མང་པོའི་ཐོག་གཞུང་འབྲེལ་མི་སྣ་དང་ཆེད་མཁས་པ་སོགས་ཀྱིས་བགྲོ་གླེང་བྱས་ཏེ། རྒྱལ་ཁབ་གཉིས་ཀྱི་འབྲེལ་ལམ་གོང་འཕེལ་དང་མཉམ་ལས་རྒྱ་སྐྱེད་སོགས་ལ་དམིགས་པ་ཞིག་ཡིན་འདུག་ལ། ཕྱི་ལོ་ ༢༠༠༥ ནས་ཐོག་མར་མགོ་འཛུགས་བྱས་པའི་གླེང་སྟེགས་གལ་ཆེན་ཞིག་ཡིན་པ་རེད།
ཉི་ཧོང་དང་རྒྱ་ནག་བར་གྱི་རྩོད་རྙོག་དེ་ཟླ་འདིའི་ཕྱི་ཚེས་ ༧ ཉིན་ཉི་ཧོང་གྲོས་ཚོགས་སུ་ཉི་ཧོང་གི་སྲིད་བློན་གསར་པ་ལྕམ་ས་ནའེ་ཊ་ཀའེ་ཆི་ (Sanae Takaichi) ལགས་ཀྱིས། ཐེ་ཝན་ལ་དྲག་པོའི་དཔུང་འཇུག་བྱུང་ཚེ། དམག་དཔུང་བཀོལ་སྤྱོད་བྱེད་སྲིད་པའི་གཏམ་བཤད་གནང་བར་བརྟེན་ནས་བྱུང་ཞིག་ཡིན་པ་དང་། དེ་ཡང་ཕྱི་ལོ་ ༢༠༡༥ ལོར་གཏན་འབེབས་བྱས་པའི་ཉི་ཧོང་གི་བདེ་སྲུང་ཁྲིམས་ཡིག་ཅིག་ཏུ། ཉི་ཧོང་གི་མཐུན་གྲོགས་རྒྱལ་ཁབ་ཁག་ལ་དྲག་པོའི་དཔུང་འཇུག་བྱས་ཚེ། དེ་ནི་ཉི་ཧོང་གི་འཚོ་གནས་ལ་འཇིགས་སྐུལ་བྱས་པར་ངོས་འཛིན་བྱེད་པ་དང་། ཉི་ཧོང་གིས་རྒྱལ་སྲུང་མ་ལག་གི་འཐབ་འཁྲུག་གོ་མཚོན་བེད་སྤྱོད་བྱས་ཏེ་རྒོལ་ལན་བསློག་ཆོག་སྐོར་འཁོད་ཡོད་འདུག
རྒྱ་ནག་གིས་ལྕམ་ས་ནའེ་ཊ་ཀའེ་ཆི་ལགས་ཀྱི་ཐའེ་ཝན་དང་འབྲེལ་གཏམ་བཤད་དེ་ཕྱིར་འཐེན་བྱེད་པའི་དགོས་འདུན་བཏོན་པ་དང་། ཉི་ཧོང་གིས་ལྕམ་ས་ནའེ་ཊ་ཀའེ་ཆི་ལགས་ཀྱི་གཏམ་བཤད་དེ་ནི་ཚོད་དཔག་ཡིན་པ་དང་། ཉི་ཧོང་གིས་མུ་མཐུད་རྒྱལ་ཁབ་གཉིས་བར་བཞག་པའི་ཕྱི་ལོ་ ༡༩༧༢ ལོའི་གྲོས་མཐུན་ལ་འགྱུར་བ་གང་ཡང་མེད་པའི་ལན་འདེབས་བྱས་ཡོད་ཅིང་། གྲོས་མཐུན་དེའི་ནང་ཉི་ཧོང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ནི་རྒྱ་ནག་གི་གཞུང་ངོས་དེ་ཡིན་པར་ངོས་འཛིན་བྱེད་པ་དང་རྒྱ་ནག་གིས་ཐའེ་ཝན་དེ་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཤིག་ཡིན་གཙོ་འདོན་བྱས་པར་ཉི་ཧོང་གིས་ཀྱང་ལངས་ཕྱོགས་དེར་ངོས་ལེན་དང་བརྩི་བཀུར་བྱ་རྒྱུའི་ཁས་ལེན་བྱས་ཡོད་འདུག
སྤྱིར་ཉི་ཧོང་དང་རྒྱ་ནག་བར་ཕྱི་ལོ་ ༡༨༩༤ ནས་ ༡༨༩༥ བར་དམག་འཁྲུག་ཐེངས་དང་པོ་ཤོར་ཞིང་། འཛམ་གླིང་དམག་ཆེན་གཉིས་པའི་སྐབས་ཏེ། ཕྱི་ལོ་ ༡༩༣༧ ནས་ ༡༩༤༥ བར་དམག་འཁྲུག་ཐེངས་གཉིས་པ་ཤོར། དམག་འཁྲུག་གཉིས་ཀྱི་ཁྲོད་དུ་རྒྱ་ནག་ལ་ཕམ་ཁ་ཆེན་པོ་བྱུང་བ་དང་དམག་འཁྲུག་དང་པོའི་སྐབས་ཉི་ཧོང་གིས་མན་ཇུའི་རྒྱལ་སྲིད་ཕམ་ཉེས་བཏང་སྟེ་ད་ལྟའི་ཐའེ་ཝན་གྱི་ས་ཁུལ་ལ་བདག་བཟུང་བྱས། དམག་འཁྲུག་གཉིས་པའི་སྐབས་སུ་རྒྱ་ནག་གི་ས་ཁུལ་གཞན་དུའང་ཉི་ཧོང་གི་དབང་ཤུགས་རྒྱ་སྐྱེད་དུ་ཕྱིན་ཡོད་ལ། སྐབས་དེར་ཉི་ཧོང་དམག་དཔུང་གིས་རྒྱ་ནག་གི་དམག་མི་དང་མི་མང་སྡེབ་གསོད། བུད་མེད་ལ་བཙན་གཡེམ་བྱས་ཡོད་ཟེར་བའི་ནན་ཅི་དོན་རྐྱེན་ཆེན་མོ་ཟེར་བ་སོགས་བྱུང་ཡོད།
གསར་འགོད་པ། སྐལ་བཟང་སྦྱིན་པ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
