ཨ་རུ་ན་ཅལ་རྒྱ་ནག་གི་ཆ་ཤས་ཡིན་ཚུལ་གྱི་ཧམ་བཤད་ལ་རྒྱ་གར་གཞུང་གིས་རྒོལ་གཏམ་ནན་པོ་བསྒྲགས།

རྒྱ་ནག་གཞུང་གིས་ཨ་རུ་ན་ཅལ་མངའ་སྡེ་རྒྱ་ནག་གི་ཆ་ཤས་ཡིན་ཚུལ་གྱི་ཧམ་བཤད་བྱས་ཏེ་དཀའ་རྙོག་བཟོས་པ་དེ་རྒྱལ་སྤྱིའི་མཁའ་འགྲུལ་ཁྲིམས་སྒྲིག་དང་འགལ་བའི་བྱ་སྤྱོད་ཅིག་ཡིན་པའི་རྒོལ་གཏམ་བསྒྲགས།

ཟླ་འདིའི་ཕྱི་ཚེས་ ༢༡ ཉིན་རྒྱ་གར་བྱང་ཤར་ཨ་རུ་ན་ཅལ་མངའ་སྡེ་ནས་ཡིན་ཞིང་དབྱིན་ཡུལ་དུ་གནས་སྡོད་བྱེད་བཞིན་པའི་པདྨ་དབང་འཛོམས་(Pema Wangjom ) ཞེས་པའི་བུད་མེད་ཅིག་རྒྱ་ནག་ཧྲང་ཧེ་གནམ་ཐང་བརྒྱུད་ཉི་ཧོང་དུ་འགྲོ་སྐབས། གནམ་ཐང་གི་ལས་བྱེད་པས་ཁོང་མོ་གནམ་ཐང་དུ་ཆུ་ཚོད་ ༡༨ ཙམ་རིང་བཀག་འགོག་བྱས་ཏེ། ཨ་རུ་ན་ཅལ་མངའ་སྡེ་ནི་རྒྱ་ནག་གི་ས་ཁོངས་ཡིན་པས་བུད་མེད་དེས་རྒྱ་ནག་གི་མི་སེར་ལག་འཁྱེར་བཟོ་དགོས་པ་སོགས་ཀྱི་ཧམ་བཤད་བྱས་པའི་གནད་དོན་དེ་རྒྱ་དཀར་ནག་བར་གྱི་གླེང་གཞི་ཆེ་ཤོས་ཤིག་ཆགས་བསྡད་ཡོད་འདུག

ཁ་སང་ཕྱི་ཚེས་ ༢༥ ཉིན་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་མའོ་ཉིང་(Mao Ning) ཟེར་བ་དེས་རྒྱུན་ལྡན་གསར་འགོད་གསལ་བསྒྲགས་ཤིག་གི་སྟེང་། བོད་ཀྱི་ལྷོ་རྒྱུད་ཨ་རུ་ན་ཅལ་མངའ་སྡེ་ནི་རྒྱ་ནག་གི་རང་སྐྱོང་གི་ས་ཁུལ་ཞིག་ཡིན་ཞིང་། རྒྱ་གར་གྱིས་ཁྲིམས་མཐུན་མིན་པའི་ཐོག་ནས་ཨ་རུ་ན་ཅལ་མངའ་སྡེ་ཞེས་འབོད་པར་ངོས་ལེན་གཏན་ནས་མེད། ང་ཚོས་ཤེས་རྟོགས་བྱུང་བ་ལྟར་ན། དུས་སྐབས་ཡོངས་སུ་རྒྱ་ནག་གི་ས་མཚམས་ཞིབ་བཤེར་ལས་ཁུངས་ཀྱིས་ཁྲིམས་དང་སྒྲིག་གཞི་ལྟར་ཞིབ་བཤེར་བྱས་པ་དང་། ཁྲིམས་ལག་བསྟར་བྱེད་སྟངས་དྲང་བདེན་དང་གདུག་རྩུབ་མེད་པ། འབྲེལ་ཡོད་མི་སྣའི་ཁྲིམས་མཐུན་གྱི་ཐོབ་ཐང་དང་ཁེ་ཕན་ཡོངས་སུ་སྲུང་སྐྱོབ་བྱས་ཡོད་པ་དང་། ཁོ་མོར་བཙན་ཤེད་ཀྱི་བྱ་སྤྱོད་གང་ཡང་སྤེལ་མེད་ལ། དེ་བཞིན་ “བཀག་ཉར་” བྱས་པ་དང་ “སུན་གཙེར་” སོགས་ཀྱི་གནས་ཚུལ་གང་ཡང་བྱུང་མེད། མཁའ་འགྲུལ་ལས་ཁུངས་ཀྱིས་ཁོ་མོར་ངལ་གསོ་བྱེད་ས་དང་ཟ་མ་སོགས་མཁོ་སྤྲོད་བྱས་ཡོད། གནས་ཚུལ་ཞིབ་ཕྲ་གཞན་དག་གི་ཐད་ལ་འབྲེལ་ཡོད་དབང་ཚད་ལྡན་པའི་ལས་ཁུངས་ལ་བཀའ་འདྲི་གནང་རོགས། ཞེས་བརྗོད་འདུག

རྒྱ་གར་ཕྱི་སྲིད་བློན་ཆེན་ལས་ཁུངས་ཀྱིས། རྒྱ་ནག་གི་དབང་འཛིན་པ་ཚོས་རྒྱལ་སྤྱིའི་མཁའ་འགྲུལ་སྐྱེལ་འདྲེན་གྱི་སྒྲིག་གཞི་ཁག་ཅིག་དང་འགལ་བའི་བྱ་སྤྱོད་སྤེལ་ཡོད་ལ། ཁོང་ཚོའི་བྱེད་སྟངས་དེ་རྒྱ་ནག་རང་ཉིད་ཀྱི་སྒྲིག་གཞི་དང་ཡང་འགལ་ཡོད་དེ། རྒྱལ་ཁབ་ཚང་མའི་མི་སེར་ལ་ཆུ་ཚོད་ཉེར་བཞིའི་རིང་ཐོངས་མཆན་མེད་པ་(Visa-free transit) བརྒྱུད་འགྲོ་ཆོག་པའི་ཆོག་མཆན་སྤྲད་དགོས། ཞེས་བསྒྲགས་འདུག་ལ། རྒྱ་གར་གྱི་མགྲིན་ཚབ་པ་སྐུ་ཞབས་རན་དྷིར་( Randhir Jaiswa) ལགས་ཀྱིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། ཨ་རུ་ན་ཅལ་མངའ་སྡེེ་ནི་རྒྱ་གར་གྱི་ཆ་ཤས་གལ་ཆེན་དང་ཁ་བྲལ་ཐབས་མེད་པ་ཞིག་ཡིན་པ་ནི་རང་བཞིན་གྱིས་ར་སྤྲོད་བྱས་པའི་དོན་དངོས་ཤིག་རེད། རྒྱ་ནག་ཕྱོགས་ནས་དགག་པ་ཇི་ཙམ་བྱས་ཀྱང་འདི་ནི་བསྙོན་དུ་མེད་པའི་དོན་དངོས་ཤིག་རེད། ཅེས་དང་། རྒྱ་གར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། ང་ནི་རྒྱ་ནག་གནས་སྤོ་ལས་ཁུངས་ཀྱིས་ཨ་རུ་ན་ཅལ་མངའ་སྡེ་ནས་ཡིན་པའི་རྒྱ་གར་གྱི་མི་སེར་པདྨ་དབང་འཛོམས་ཀྱི་ལག་ཁྱེར་ངོས་ལེན་མ་བྱས་པར་ཧང་སངས་སོང་། རྒྱ་གར་གྱི་ཕྱག་འཁྱེར་ཡང་དག་པ་ཞིག་ཡོད་བཞིན་དུ་མོ་ལ་ངོ་ཚ་དང་མི་རིགས་དབྱེ་འབྱེད་ཀྱི་བརྙས་བཅོས་བྱས་པ་ནི་ཧ་ཅང་ཡིད་སྐྱོ་བ་ཞིག་རེད། ཅེས་གསུངས་འདུག

འདས་པའི་ལོ་ཤས་ནང་རྒྱ་ནག་གཞུང་གིས་རྒྱ་གར་བྱ་ཤར་ཨ་རུ་ན་ཅལ་མངའ་སྡེ་ནི་རྒྱ་ནག་གི་ཆ་ཤས་ཡིན་ལུགས་བཤད་ནས། རྒྱ་ནག་དམངས་སྲིད་ལྷན་ཁང་(Ministry of Civil Affairs) གིས་བོད་ལྷོ་རྒྱུད་ཀྱི་ཡུལ་དེའི་རི་དང་། རྒྱུག་ཆུ། མཚེའུ། ལ་ཆུང་། མི་མང་སྡོད་གནས་བཅས་སུ་མིང་གསར་པ་བཏགས་ནས། རྒྱ་ནག་གི་མངའ་ཁུལ་ཡིན་པའི་ཧམ་བཤད་བཅང་གི་ཡོད། སྤྱིར་འདས་པའི་ལོ་ཤས་རིང་བོད་ཧིན་མཐའ་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་ལན་མང་བྱུང་ནས་ཕྱོགས་གཉིས་ཀྱི་དམག་དོན་གྱི་འབྲེལ་ལམ་ཇེ་ཞན་དུ་གྱུར་ཏེ། ཉེ་ལམ་རྒྱ་གར་དཀར་ནག་གི་དཔོན་རིགས་བར་ཐུག་འཕྲད་ལན་མང་བྱས་ཏེ་འབྲེལ་ལམ་ཅུང་ཇེ་བཟང་དུ་ཕྱིན་ཡོད་ཀྱང་། ཕྱི་ལོ་ ༢༠༢༢ ལོའི་ཟླ་ ༡༢ ནང་རྒྱ་གར་གྱི་ཨ་རུ་ན་ཅལ་མངའ་སྡེའི་ཤར་ཕྱོགས་ཡང་རྩེ་ས་ཁུལ་དུ། རྒྱ་དཀར་ནག་གཉིས་ཀྱི་དམག་མི་གདོང་ཐུག་བྱུང་བའི་ཁྲོད། རྒྱ་གར་གྱི་དམག་མི་ ༦ དང་རྒྱ་ནག་གི་དམག་མི་ ༩ ཙམ་རྨས་སྐྱོན་ཕོག་པའི་གནས་ཚུལ་ཐོན་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།

འབྲེལ་ཡོད་གནས་ཚུལ། https://tibettimes.net/2025/11/24/247371/