རྒྱ་གར་ཧི་མ་ཅལ་མངའ་སྡེའི་ཅམ་པ་ (Chamba) རྫོང་ནས་ཡིན་པའི་བཀྲ་ཤིས་དོན་འགྲུབ་ཞུ་བ་ཞིག་རྒྱ་ནག་ཧྲང་ཧེ་གནམ་ཐང་ནས་བཀག་སྟེ་ཁོའི་ངོ་གདོང་རྒྱ་གར་བར་འདྲ་བོ་མེད་སྐོར་བརྗོད་དེ་ཆུ་ཚོད་ ༦ ལྷག་རིང་བཀག་འགོག་བྱས་རྗེས་ཕྱིར་ལོག་བཏང་འདུག
ཁ་སང་ཕྱི་ཚེས་ ༡ ཉིན་བཀྲ་ཤིས་དོན་འགྲུབ་རྒྱ་ནག་ཧྲང་ཧེ་གནམ་ཐང་དུ་འབྱོར་ཡོད་པ་དང་། སྐབས་དེར་རྒྱ་གར་བ་གཞན་མང་པོ་ཡོད་ཀྱང་ཁོང་བཀག་སྟེ་བཏང་མེད་པ་མ་ཟད། ཆུ་ཚོད་ ༦ ལྷག་རིང་གནམ་ཐང་ཉེན་རྟོག་པས་འདྲི་རྩད་བྱས་པའི་སྐོར་འདི་ག་བོད་ཀྱི་དུས་བབ་གསར་ཁང་གི་གསར་འགོད་པར་ཁོང་གིས། ཁོང་ཚོས་ངའི་གདོང་པར་བལྟས་ནས་སྐད་ཆ་འདྲི་ཡི་འདུག ཁྱེད་རང་ལ་རྒྱ་གར་གྱི་མི་སེར་ཐོབ་ཐང་ལག་འཁྱེར་ག་འདྲ་བྱས་ནས་རག་སོང་ཞེས་དྲིས་བྱུང་། ངས་ང་རྒྱ་གར་ནང་སྐྱེས་བ་ཡིན་ལབ་ཡིན། དེ་ནས་ཁྱེད་རང་ལ་རྒྱ་ནག་ནང་དུ་སྤུན་མཆེད་ཡོད་དམ་ཟེར། ང་ལ་སྤུན་མཆེད་མེད་ལབ་པ་ཡིན། ཡང་རྒྱ་གར་དྷ་རམ་ས་ལར་འབྲེལ་བ་ཡོད་དམ་ཟེར། དྷ་རམ་ས་ལར་འབྲེལ་བ་མེད། ངའི་ནང་ཅམ་པཱ་ནས་ཡིན། ནང་མི་ཚང་མ་ཅམ་པཱ་ལ་ཡོད་ལབ་པ་ཡིན་ཏེ། ཁྱོད་ཚོ་འདྲ་བོ་རྒྱ་གར་ལ་ག་འདྲ་བྱས་ནས་བསླེབས་པ་རེད་ཅེས་དྲི་བ་ཁེད་མཚར་དེ་འདྲ་དྲིས་བྱུང་ཞེས་བརྗོད་བྱུང་ལ། ཁོང་གི་ཁ་པར་ནང་གི་པར་ཚང་མར་སྔོག་བཤེར་བྱས་ཏེ། འདྲ་པར་ནང་གི་མི་རེ་རེའི་འབྲེལ་བའི་སྐོར་འགྲེལ་བཤད་རྒྱག་དགོས་བྱུང་ཡོད་འདུག་ལ། ཁོང་གི་རྒྱབ་ཁུག་དང་པར་ཆས། ད་དུང་ཁ་པར་ནང་གི་ངོ་དེབ་དང་ཨིན་སི་ཊ་གྷི་རམ་ (Instagram) སོགས་སུའང་ཞིབ་བཤེར་བྱས་ཡོད་འདུག
ཡང་ཁོང་གིས། ང་ལ་རྐུབ་སྟེགས་ཤིག་གི་སྟེང་དུ་ཆུ་ཚོད་ ༦ ལྷག་གི་རིང་འདྲི་རྩད་བྱས་མཐར། ཁ་སྐོམ་པ་དང་གྲོད་ཁོག་ལྟོགས་ཀྱི་འདུག་ལབ་ཡིན་ཡང་ཁྱོན་ནས་སྤྲོད་ཀྱི་མི་འདུག འདྲི་རྩད་བྱས་ཚར་རྗེས་ཕོར་བ་ཆུང་ཆུང་ཞིག་གི་ནང་ཆུ་ཉུང་ཉུང་ཞིག་སྤྲད་སོང་། དེ་ནས་བག་ལེབ་སྐམ་པོ་ཞིག་འཁྱེར་ཡོང་ནས་འདི་ཟོ་ཟེར་གྱི་འདུག ཁོ་ཚོས་ཁ་པར་ནས་ངས་བག་ལེབ་ཟ་བཞིན་པ་བརྙན་དུ་བླངས་ཏེ་ཁ་ལག་སྤྲད་ཡིན་ཞེས་མི་ལ་སྟོན་རྩིས་བྱེད་ཀྱི་འདུག འོན་ཀྱང་། བག་ལེབ་རྙིང་པ་རེད་འདུག་པས་ངས་ཟོས་མེད། ཁོ་ཚོའི་ལས་སྟངས་བྱེད་སྟངས་སྡུག་ཅག་དཔེ་འདུག ང་ལ་ཞེད་སྣང་དང་འཇིགས་སྣང་སྐྱེས་སོང་། ཞེས་དང་། རྒྱ་གར་ལ་ཐད་ཀར་གནམ་གྲུ་མེད་སྐོར་བརྗོད་པར་བརྟེན། ཧྲང་ཧེ་ནས་ཐའེ་ལན་ཌིར་འགྲོ་དགོས་བྱུང་སྐོར་དང་། ཧྲང་ཧེ་གནམ་ཐང་ནས་ཐའེ་ཝན་ཌིར་འགྲོ་མཁན་གནམ་གྲུའི་ནང་བར་དུ་ཉེན་རྟོག་པ་གཉིས་ཀྱིས་གཡས་གཡོན་ནས་འཇུས་ཏེ་ཉེས་ཅན་ལྟར་ནང་དུ་བཅུག་ཡོད་སྐོར་བརྗོད་བྱུང་།
འདི་ལོའི་ཕྱི་ཟླ་ ༡༠ ནང་རྒྱ་དཀར་ནག་བར་མཁའ་འགྲུལ་ཤར་གཏོང་བྱས་པ་དང་བསྟུན། བཀྲ་ཤིས་དོན་འགྲུབ་ལགས་ཀྱིས་རྒྱ་ནག་ནང་སྤྲོ་འཆམ་དུ་འགྲོ་བའི་ཐོངས་མཆན་ཞུས་ཏེ་རག་ཡོད་ཀྱང་། ཁ་སང་ཧྲང་ཧེ་གནམ་ཐང་དུ་འབྱོར་སྐབས་ཁོང་དང་རྒྱ་གར་བ་གཞན་མང་པོ་ཡོད་ཀྱང་བཀྲ་ཤིས་དོན་འགྲུབ་ལགས་བཏང་མེད་པ་མ་ཟད། དྷ་རམ་ས་ལར་འབྲེལ་བ་ཡོད་མེད་སོགས་ཀྱི་འདྲི་རྩད་སྣ་ཚོགས་བྱས་ཏེ་ཆུ་ཚོད་ ༦ ལྷག་རིང་བཀག་རྗེས་ཡིག་ཆ་ཚད་ལྡན་མེད་ལུགས་བརྗོད་དེ་ཕྱིར་ལོག་བཏང་ཡོད་འདུག་ལ། དེ་རིང་ཁོང་གིས་སྤྱི་ཚོགས་དྲ་གནས་ཨིན་སི་ཊ་གྷི་རམ་ནང་དུ། བོད་པ་དང་ངོ་གདོང་འདྲ་བ་རྣམས་ལ་རྒྱ་ནག་གཞུང་གིས་དམ་དྲག་ཤུགས་ཆེན་བྱེད་ཀྱི་འདུག་པས། རྒྱ་གར་བྱང་ཤར་དང་། སྤི་ཏི། བལ་ཡུལ་སོགས་ཧི་མ་ལ་ཡའི་རི་རྒྱུད་པ་ཚོ་རྒྱ་ནག་ཏུ་འགྲོ་བར་ཡིད་གཟབ་དང་བསམ་བློ་ནན་པོ་གཏོང་དགོས་པའི་འབོད་སྐུལ་ཞུས་འདུག
གསར་འགོད་པས་རྒྱུས་ལོན་བྱས་པ་ལྟར་ན། བཀྲ་ཤིས་དོན་འགྲུབ་ལགས་ཀྱི་པ་ལགས་བོད་པ་ཡིན་པ་དང་། ཨ་མ་ལགས་རྒྱ་གར་ཧི་མ་ཅལ་ཅམ་པཱ་ནས་ཡིན་འདུག ཆུང་དུས་ནས་དྷ་ལ་ཧོ་སི་གཏན་སློབ་ཏུ་སློབ་སྦྱོང་བྱས་ཡོད་འདུག་ལ། དུས་རྒྱུན་བོད་མི་མང་པོར་འབྲེལ་འདྲིས་ཡག་པོ་ཡོད་འདུག
རྒྱ་དཀར་ནག་གཉིས་བར་མཁའ་འགྲུལ་སྒོ་ཕྱེས་ཡོད་ནའང་ཕྱི་ཟླ་ ༡༡ ཚེས་ ༢༡ ཉིན་རྒྱ་གར་བྱང་ཤར་ཨ་རུ་ན་ཅལ་མངའ་སྡེ་ནས་ཡིན་ཞིང་དབྱིན་ཡུལ་དུ་གནས་སྡོད་བྱེད་བཞིན་པའི་པདྨ་དབང་འཛོམས་(Pema Wangjom ) ཞེས་པའི་བུད་མེད་ཅིག་རྒྱ་ནག་ཧྲང་ཧེ་གནམ་ཐང་བརྒྱུད་ཉི་ཧོང་དུ་འགྲོ་སྐབས། གནམ་ཐང་གི་ལས་བྱེད་པས་ཁོང་མོ་གནམ་ཐང་དུ་ཆུ་ཚོད་ ༡༨ ཙམ་རིང་བཀག་འགོག་བྱས་ཏེ། ཨ་རུ་ན་ཅལ་མངའ་སྡེ་ནི་རྒྱ་ནག་གི་ས་ཁོངས་ཡིན་པས་བུད་མེད་དེས་རྒྱ་ནག་གི་མི་སེར་ལག་འཁྱེར་བཟོ་དགོས་པ་སོགས་ཀྱི་ཧམ་བཤད་བྱས་པའི་གནད་དོན་དེ་རྒྱ་དཀར་ནག་བར་གྱི་རྙོག་དྲ་ཆེན་པོ་ཆགས་ཡོད་པ་རེད།
གསར་འགོད་པ། སྐལ་བཟང་སྦྱིན་པ། རྩོམ་སྒྲིག་བྱེད་མཁན། པདྨ་མཚོ།
