དེ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་ཆོས་རྭ་གསར་པའི་ནང་ཨེ་མོ་རི་དང་བོད་ཀྱི་ཚན་རིག་ཟབ་སྦྱོང་གི་ཚོགས་བཅར་བ་དགུ་བཅུ་ཙམ་དང་། ཨ་རི་ནས་ཆེད་དུ་ཟབ་འཁྲིད་གནང་བར་ཕེབས་མཁན་གྱི་དགེ་རྒན་ཚུད་པའི་མི་གྲངས་ ༣༠༠ ལྷག་ལ་མཇལ་ཁ་འསྩལ་སོང་།
སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་ནས། རིགས་ལམ་གྱི་འགྲོ་སྟངས་ཐོག་ལ་དེང་སང་གི་ཤེས་ཡོན་གྱི་འགྲོ་སྟངས་སྦྲེལ་ནས་ཏན་ཏན་ཡོང་གི་རེད། སྔོན་མ་ངོས་རང་སེ་འབྲས་ལ་གྲྭ་སྐོར་དུ་ཕྱིན་པའི་སྐབས་སུ་ནམ་རྒྱུན་ཡིག་ཆ་ལ་གོམས་བསྡད་ཡོད་པ་གཏོང་དུས་རྟགས་གསལ་འབེལ་བོ་འདུག སྐབས་དེར་དམ་བཅའ་འཇོག་མཁན་སྐྱོ་ཤོས་དེ་བདེ་ཡངས་རེད། ངོས་རང་ནས་སྒོ་མང་བསམ་བློ་ཁང་ཚན་ནས་དཔེ་ཆར་བལྟས། རྟགས་གསལ་གཏོང་དུས་ངོས་ནས་རྟགས་གསལ་དགའ་རབ་གཏོང་ཐུབ་ཀྱི་ཡོད། གང་ལྟར་ང་ཚོ་བོད་ཀྱི་རིག་གཞུང་ནང་རྩོད་པ་རྩོད་པའི་རིག་གནས་འདི་ཧ་ཅང་རྩ་ཆེན་པོ་རེད། དེར་བརྟེན། ང་ཚོས་རྟགས་གསལ་གཏོང་བའི་འགྲོ་སྟངས་འདིའི་ཐོག་ནས་དེང་སང་གི་ཚན་རིག་དང་མཐུན་མ་མཐུན་གྱི་གནས་ཚུལ་གང་ཡོད་མེད་བརྟག་དགོས། ང་ཚོའི་རྟགས་གསལ་གྱི་ནང་དུ་ཀླད་པའི་སྐོར་རྒྱ་ཆེན་པོ་ཡོད་པ་མ་རེད། ཚན་རིག་པས་ཀླད་པའི་སྐོར་ལ་མང་པོ་བཤད་ཀྱི་ཡོད་པས་ང་ཚོས་དེ་དག་དང་ཕན་ཚུན་སྦྲེལ་ནས་རྩོད་ཐུབ་ན་ཡག་པོ་འདུག ཅེས་དང་། འཆད་རྩོད་རྩོམ་གསུམ་ལས་རྩོད་པ་འགྲོ་བཞིན་པ་དང་། རྩོམ་ཡང་ཡོད། ང་ཚོ་བོད་ལ་འཆད་རྩོད་རྩོམ་གསུམ་ཧ་ཅང་འཛོམས་པོ་ཞེ་དྲགས་རེད། དཔེ་ཡག་པོ་རེད། སྔ་མོ་ངོས་ནས་འཆད་རྩོད་རྩོམ་གསུམ་ཐོག་ལ་སློབ་སྦྱོང་བྱས་པ་རེད། ཅེས་གསུངས་སོང་།
མཇལ་ཁ་གྲུབ་རྗེས་ཨེ་མོ་རི་བྱམས་བརྩེ་ལྟེ་གནས་ཁང་གི་སཱི་ཤེས་ཡོན་སློབ་གསོ་ཚན་པའི་འགན་འཛིན་གཞོན་པ་བརྩོན་འགྲུས་བསམ་འཕེལ་ལགས་ཀྱིས། ད་ལྟ་ང་ཚོའི་ཟབ་སྦྱོང་འགྲོ་བསྡད་པ་དེ་ཞིབ་འཇུག་ཁང་ལ་རེད། རུ་ཁག་གཉིས་ཡོད་རེད། རུ་ཁག་གཅིག་ལ་ང་ཚོས་རྒྱུན་འཁྱོངས་རུ་ཁག་ལབ་ཀྱི་ཡོད་རེད། ཁོང་ཚོས་ཞིབ་འཇུག་གི་ཐབས་ལམ་ད་ལོ་ནས་མགོ་འཛུགས་ཀྱི་ཡོད་རེད། དེ་ནས་འཛིན་གྲྭ་དམའ་བ་དེ་རེད། འཛིན་གྲྭ་མཐོ་བ་དེ་ཆེད་སྦྱོང་གི་རུ་ཁག་ལབ་ཀྱི་ཡོད་རེད། དགེ་འདུན་པ་དེ་དག་གི་ལོ་དགུ་བཅུ་ལ་ཚན་རིག་སློབ་གཉེར་གནངས། ད་ལྟ་རིགས་གཅིག་རྐང་འཛིན་བྱ་རྒྱུའི་འཚམས་ལ་སླེབས་ནས། ཁག་ཅིག་གིས་དངོས་ཁམས་ལ་ཆེད་སྦྱོང་དང་་ཁ་ཤས་ཀྱིས་སྐྱེས་དངོས། དབང་རྩ་བྱས་ནས་ཆེད་སྦྱོང་གནང་གི་ཡོད་རེད། ང་ཚོས་དགུན་ཁ་ཟབ་སྦྱོང་འཚོགས་པ་དེ་གཙོ་བོ་ཚན་རིག་གི་ཞིབ་འཇུག་བྱེད་སྟངས་སྐོར་རེད་ལ། འདས་པའི་ཟླ་བ་གཅིག་ལྷག་གི་རིང་ལ་ཞིབ་འཇུག་གི་ཟབ་སྦྱོང་འགྲོ་བསྡད་རེད། དེ་རིང་ཆེད་སྦྱོང་དང་རྒྱུན་འཁྱོངས་ནང་ཡོད་མཁན་གྱི་དགེ་འདུན་པ་རྣམས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་ལ་ཚན་རིག་གི་ཐོག་ནས་རྟགས་གསལ་ཡར་སྤྱན་འབུལ་ཞུས་གནང་སོང་། དུས་ཚོད་ཞེ་དྲགས་མེད་ཙང་རུ་ཁག་བཞི་རུ་དབྱེ་བའི་ཁྲོད། གཅིག་གིས་དངོས་ཁམས་དང་། སྐྱེས་དངོས། དབང་རྩ། ཚན་རིག་གི་ཐབས་ལམ་བཅས་སྡེ་ཚན་བཞི་ཡི་ཐོག་རྟགས་གསལ་ཐོག་ནས་ཚན་རིག་གི་གནད་དོན་ལ་བདར་ཤ་དཔྱད་ནས་རྟགས་གསལ་སྤྱན་འབུལ་ཞུས་པ་རེད། ཞེས་བརྗོད་བྱུང་།
ཡང་ཁོང་གིས་། ཨེ་མོ་རི་ཡིས་འགྲོ་གྲོན་མང་པོ་བཏང་ནས་དགེ་རྒན་མང་པོ་ཞེ་དྲགས་ཤིག་ཕྱི་རྒྱལ་ནས་གདན་འདྲེན་ཞུས་ནས་དེ་འདྲ་གནང་རྒྱུའི་དགོས་པ་ག་རེ་རེད་ཟེར་ན། ༸གོང་ས་རྒྱལ་བ་རིན་པོ་ཆེ་མཆོག་ནས་སྔོན་མ་ནས་ཚན་རིག་སློབ་གཉེར་དེ་དགོན་སྡེ་ཁག་ལ་དགོས་ཀྱི་འདུག་ཅེས་བཀའ་མང་པོ་ཕེབས་ཡོད་རེད། བཀའ་སློབ་ཀྱི་ནང་དོན་སྙིང་པོ་ནི་བོད་པའི་ནང་ཆོས་ནང་མིའི་སེམས་ཁམས་ཡར་རྒྱས་གཏང་རྒྱུ་དང་། བདེ་སྐྱིད་གོང་འཕེལ་གཏང་རྒྱུའི་ཐབས་ལམ་མང་པོ་དཔེ་ཡོད་རེད། དེ་འདྲ་བའི་ཐབས་ལམ་དེ་དག་སྤྱི་ཚོགས་ཀྱི་སྡེ་ཚན་ཆུང་ཆུང་ཞིག་གིས་མ་གཏོགས་ལོངས་སུ་སྤྱོད་ཐུབ་ཀྱི་ཡོད་པ་མ་རེད། གང་ཡིན་ཟེར་ན་སློབ་གཉེར་གནང་མཁན་དེ་དག་དགོན་སྡེ་གྲྭ་ཚང་གི་དགེ་འདུག་པ་དང་བཙུན་མ་རེད། བོད་པའི་མི་སྐྱ་ལ་བསམ་བློ་བཏང་ན་ཚན་རིག་སློབ་གཉེར་གཏིང་ཟབ་པོ་གནང་ཐུབ་ཀྱི་ཡོད་པ་མ་རེད། ཐབས་ལམ་ཕྱུག་པོ་ཞེ་དྲགས་ཤིག་འཛམ་གླིང་མི་མང་ལ་ཕན་མ་ཐོགས་པར་ལྷག་བསྡད་ཡོད་རེད། ཡིན་ཡང་། ༸གོང་ས་རྒྱལ་བ་རིན་པོ་ཆེ་མཆོག་ནས་ཐབས་ལམ་དེ་དག་འཛམ་གླིང་གི་མི་སྤྱི་ལ་ཁྱབ་ནས་ཁོང་ཅག་གིས་སྦྱོང་ཐུབ་པ་ཡིན་ན། སེམས་ལ་ཞི་བདེ་ཇེ་མང་དང་། ནང་སེམས་ཀྱི་ཉོན་མོངས་ཇེ་ཉུང་། ཀུན་སྤྱོད་བཟང་དུ་ཕྱིན་ཏེ་འཛམ་གླིང་ལ་ཞི་བདེ་ཟེར་བ་འདི་རང་བཞིན་གྱིས་ཡོང་ཡ་ཞིག་ཡིན་པར་དགོངས་ནས། ངས་༸གོང་ས་རྒྱལ་བ་རིན་པོ་ཆེ་མཆོག་ནས་ཆོས་ལུགས་ལ་མ་བརྟེན་པའི་བཟང་སྤྱོད་དེ་དགོས་ཀྱི་འདུག་གསུངས་པའི་གནད་འགག་ཅིག་འདི་མཐོང་གི་འདུག དཔེར་ན། ནུབ་ཕྱོགས་ཀྱི་རྒྱལ་ཁབ་མང་པོ་ཞིག་ཏུ་དྲན་པ་ཉེར་བཞག་གི་ལག་ལེན་ཤུགས་ཆེན་ཁྱབ་བསྡད་ཡོད་རེད། དེང་སང་དྲན་པ་ཉེར་བཞག་གི་སྐོར་དེ་སྨན་བཅོས་དང་། ཚོང་དོན། མགོ་ཁྲིད་ཀྱི་སྦྱོང་བརྡར། ཤེས་ཡོན་གྱི་ནང་དུའང་བཀོལ་སྤྱོད་བྱེད་ཀྱི་ཡོད་པས་དཔེ་ཁྱབ་ཆེན་པོ་རེད། བྱས་ན་དྲན་པ་ཉེར་བཞག་ལབ་པ་དེ་ག་བ་ནས་ཡོང་རེད་ཟེར་ན་ང་ཚོའི་ནང་པའི་རིག་གཞུང་ནས་ཡོང་བ་རེད། ཅེས་བརྗོད་བྱུང་།
གསར་འགོད་པ་དཔལ་ལྡན་གྱིས་དཔལ་ལྡན་འབྲས་སྤུངས་སྒོ་མང་ནས་སྤེལ། རྩོམ་སྒྲིག་བྱེད་མཁན། པདྨ་མཚོ།
