བོད་གཅིག་སྒྲིལ་རྫོང་ཉེན་རྟོག་པས་མཆོག་སྤྲུལ་རྡོ་རྗེ་བརྟན་མཆོག་ཟི་ལིང་དུ་བཀག་ཉར་བྱས་ཡོད་སྐོར་ཙམ་བརྗོད་པ་ལས་ཁོང་གི་གནས་སྟངས་ཐོག་གསལ་ཁ་ཅི་ཡང་བཟོས་མི་འདུག
བོད་མཚོ་སྔོན་ཞིང་ཆེན་མགོ་ལོག་ཁུལ་གཅིག་སྒྲིལ་རྫོང་སྨིན་ཐང་དགོན་འོད་གསལ་ཐེག་མཆོག་ཆོས་འཁོར་གླིང་གི་དགོན་བདག་དང་། རྡོ་རྗེ་བརྟན་མི་རིགས་ལས་རིགས་ལག་རྩལ་སློབ་གྲྭ་གསར་འཛུགས་གནང་མཁན་མཆོག་སྤྲུལ་རྡོ་རྗེ་བརྟན་མཆོག་ཟླ་འདིའི་ཕྱི་ཚེས་ ༤ ཉིན་རྒྱ་གཞུང་གིས་འཛིན་བཟུང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་པའི་གནས་ཚུལ་འདི་ག་དུས་བབ་གསར་ཁང་དུ་འབྱོར་ཡོད། ཉེ་སྔོན་མགོ་ལོག་ཁུལ་གཅིག་སྒྲིལ་རྫོང་ཉེན་རྟོག་པས་རིན་པོ་ཆེ་མཆོག་མཚོ་སྔོན་ཞིང་ཆེན་གྱི་ཟི་ལིང་གྲོང་ཁྱེར་དུ་བཀག་ཉར་བྱས་ཏེ་འདྲི་གཅོད་བྱེད་བཞིན་ཡོད་ཚུལ་བཤད་པ་ལས། ཁོང་བཀག་ཉར་ཁང་གང་དུ་ཡོད་པ་དང་།གནས་སྟངས་ག་འདྲ་ཡོད་མེད་སོགས་གསལ་བཤད་གང་ཡང་བྱས་མེད་པ་མ་ཟད། ཁོང་འཛིན་བཟུང་བྱས་ཏེ་ཉིན་ ༢༦ འགོར་ཡོད་ཀྱང་གཉེན་ཉེ་སོགས་ལ་ཡང་ཐུག་འཕྲད་བྱེད་དུ་བཅུག་མི་འདུག་ལ། སྨིན་ཐང་གི་དགོན་གྲོང་གཉིས་ལ་དངོས་ཤུགས་བརྒྱུད་གསུམ་ནས་དམ་དྲག་དང་གནོན་ཤུགས་སྤྲོད་བཞིན་ཡོད་འདུག
འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། མཆོག་སྤྲུལ་རྡོ་རྗེ་བརྟན་རིན་པོ་ཆེ་མཆོག་གི་གནད་དོན་དང་འབྲེལ་ནས་རྒྱ་གཞུང་གིས་ས་གནས་ཡུལ་མི་རྣམས་ལ་རྒྱུན་དུ་ཚོགས་འདུ་བསྐོང་འཚོག་བྱེད་བཞིན་ཡོད་པ་དང་། ཚོགས་འདུའི་ཁྲོད་དུ་ཏང་གི་སློབ་གསོ་ཁྱབ་བསྒྲགས་དང་། ཞི་ཅིན་ཕིང་གི་མི་རིགས་སློབ་གསོའི་དགོངས་པ་ལག་བསྟར་བྱ་དགོས་པའི་སྐོར། རྒྱ་གཞུང་གི་བཀའ་མ་ཉན་ན་གྲོང་གསེབ་བཅོས་སྐྱོང་གསོག་སྐར་གྱི་དངུལ་སྤྲོད་རྒྱུ་མིན་པའི་སྐོར་སོགས་བརྗོད་དེ་གནོན་ཤུགས་སྤྲོད་བཞིན་ཡོད་འདུག རྒྱ་གཞུང་གིས་གཞུང་འབྲེལ་ཐོག་ནས་རྡོ་རྗེ་བརྟན་མི་རིགས་ལས་རིགས་ལག་རྩལ་སློབ་གྲྭ་ཚོགས་མི་ཆོག་པའི་བཀའ་རྒྱ་འབྱོར་མེད་ཀྱང་། རྡོ་རྗེ་བརྟན་རིན་པོ་ཆེ་མཆོག་འཛིན་བཟུང་བཙན་ཁྲིད་བྱས་རྗེས་སློབ་གྲྭ་འཚོགས་མ་ཐུབ་པར་ལྷག་འདུག་ལ། ཉེན་རྟོག་པས་དགོང་མོ་རྟག་པར་སྨིན་ཐང་དགོན་འོད་གསལ་ཐེག་མཆོག་ཆོས་འཁོར་གླིང་དགོན་པར་ལྟ་ཞིབ་བྱེད་བཞིན་ཡོད་འདུག ཅེས་འགྲེལ་བརྗོད་གནང་བྱུང་།
མཆོག་སྤྲུལ་རྡོ་རྗེ་བརྟན་ནམ་མཆོག་སྤྲུལ་ཐུབ་བསྟན་ཡེ་ཤེས་ཉི་མ་མཆོག་ནི་ཕྱི་ལོ་ ༡༩༦༧ ལོའི་བོད་ཟླ་ ༡༠ ཚེས་ ༢༥ ཉིན་ཨ་སྐྱོང་ཁང་སར་སྨིན་ཐང་དུ་སྐུ་འཁྲུངས། ༧ཆོས་རྗེ་དམ་པ་ཡིད་བཞིན་ནོར་བུ་སོགས་དམ་པ་དུ་མའི་མདུན་ནས་མདོ་སྔགས་ཀྱི་གཞུང་ལ་ཐོས་བསམ་བླ་མེད་གནང་། གསེར་ལྗོངས་བླ་རུང་ལྔ་རིག་ནང་བསྟན་སློབ་གླིང་ནས་སྡོམ་བརྩོན་སྡེ་སྣོད་འཛིན་པའི་མཁན་པོའི་ལག་འཁྱེར་ཐོབ། གཞི་ཆེན་དབོན་སྤྲུལ་ཐུབ་བསྟན་ལུང་རྟོགས་རྒྱ་མཚོ་དང་། གཞི་ཆེན་བེེ་རོ་འཇམ་དབྱངས་བསྟན་པའི་རྒྱལ་མཚན་ཟུང་གིས་གཞི་ཆེན་མཆོག་སྤྲུལ་མགོ་སེར་མཁྱེན་རབ་རྒྱ་མཚོའི་ཡང་སྲིད་དུ་ངོས་འཛིན་མཛད་ཅིང་སྨིན་དགོན་སྨིན་ཐང་དགོན་འོད་གསལ་ཐེག་མཆོག་གླིང་གི་དགོན་བདག་ཡིན།
རྡོ་རྗེ་བརྟན་ལས་རིགས་ལག་རྩལ་སློབ་གྲྭ་ནི་ཕྱི་ལོ་ ༢༠༡༠ ལོར་རྒྱ་གཞུང་གིས་ཆོག་མཆན་ཐོབ་པ་ལྟར་མགོ་བཙུགས་ཡོད་ཅིང་། སློབ་གྲྭ་སྤྱིའི་རྒྱ་ཁྱོན་ལ་རྨིད་གྲུ་བཞི་མ་ ༩༦༠༠༠ ཡོད་འདུག སློབ་གྲྭའི་ནང་དགེ་རྒན་ ༦༦ དང་། ད་བར་སློབ་མ་ ༡༣༠༠ མཐར་ཕྱིན་ཡོད་འདུག སློབ་གྲྭ་ནང་རྨང་གཞིའི་བསླབ་བྱའི་ནང་བོད་ཡིག་དང་། རྒྱ་ཡིག དབྱིན་ཡིག གྲངས་རིག ཆབ་སྲིད། བསམ་བློ་ཀུན་སྤྱོད། ལུས་རྩལ་སོགས་སློབ་སྦྱོང་དང་། ཆེད་ལས་བསླབ་བྱ་ཁྲོད་སྒྲ་རིག་དང་། ཐང་ག་སྒྱུ་རྩལ། བོད་ཀྱི་གསོ་བ་རིག་པ། གེ་སར་རིག་གནས་སྒྱུ་རྩལ། སྲོལ་རྒྱུན་གླུ་གར་ཆེད་སྦྱོང་། སྲོལ་རྒྱུན་འཚེམ་བཟོ། ཡུལ་སྐོར་དོ་དམ་ཞབས་འདེགས་བཅས་ཀྱི་ཐོག་ཆེད་སྦྱོང་བྱེད་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
