སུད་སིའི་ཨར་ཁང་ཞིག་ལ་མེ་སྐྱོན་བྱུང་སྟེ་ཤི་རྨས་ཆེན་པོ་བྱུང་།

ཕྱི་ལོ་གསར་ཚེས་ཀྱི་ཚེས་གཅིག་ཉིན་སུད་སིའི་ཨར་ཁང་ཞིག་ནང་མེ་སྐྱོན་བྱུང་སྟེ་མི་གྲངས་ ༤༠ རྐྱེན་འདས་དང་མི་ ༡༡༥ ལ་རྨས་སྐྱོན་ཆེན་པོ་ཕོག་ཡོད་པས་དེ་རིང་ཉིན་གཅིག་རིང་ཡུལ་དེའི་རྒྱལ་ཡོངས་ནང་མྱ་ངན་ཞུ་བཞིན་འདུག

ཁ་སང་ཕྱི་ཚེས་ ༡ ཉིན་གྱི་མཚན་གུང་ཆུ་ཚོད་ ༡ ཡོལ་ཙམ་ལ་སུད་སིའི་ལྷོ་ཕྱོགས་ཝེ་ལེ་སི་(Valais)ལི་ཁོན་སི་ཊིལ་ལཱ་ཤིན་ཨར་ཁང་(Le Constellation bar)ནང་གློ་བུར་མེ་སྐྱོན་བྱུང་སྟེ། ད་ལྟ་བར་དུ་མི་གྲངས་ ༤༠ རྐྱེན་འདས་དང་། མི་གྲངས་ ༡༡༥ ལྷག་ལ་རྨས་སྐྱོན་ཕོག་ཡོད་འདུག་ལ། རྨས་སྐྱོན་ཕོག་མཁན་ནང་རང་ལོ་ ༡༥ ཅན་ཡང་ཡོད་འདུག

ད་ལྟའི་ཆར་དོན་རྐྱེན་གྱི་འབྱུང་རྐྱེན་ལ་ཞིབ་འཇུག་བྱེད་བཞིན་པའི་སྒང་ཡིན་འདུག་ལ། འཚིག་རྐྱེན་ཆེན་པོ་བྱུང་ཡོད་པས་རྐྱེན་འདས་སུ་ཕྱིན་པའི་མི་མང་པོ་ཞིག་ངོས་འཛིན་བྱེད་དཀའ་བའི་གནས་སུ་ལྷུང་ཡོད་འདུག

སུད་སིའི་སྲིད་འཛིན་གྷའེ་པར་མི་ལིན་ (Guy Parmelin)མཆོག་གིས། དོན་དངོས་སུ་ཕྱི་ལོ་གསར་ཚེས་ཀྱི་ཉིན་མོ་དེ་དགའ་དགའ་སྤྲོ་སྤྲོའི་ཉིན་མོ་ཞིག་ཡིན་ཡང་། ཨར་ཁང་དུ་མེ་སྐྱོན་ཚབས་ཆེན་བྱུང་སྟེ་མི་གྲངས་མང་པོ་རྐྱེན་འདས་སུ་གྱུར་བར་བརྟེན། མྱ་ངན་གྱི་ཉིན་མོ་ཞིག་ཏུ་གྱུར་སོང་། ཞེས་དང་། ནང་མི་ཁག་ཅིག་གིས་སོ་སོའི་བུ་ཕྲུག་འདས་གྲོངས་སུ་གྱུར་ཡོད་མེད་ཀྱི་གནས་ཚུལ་ཤེས་རྟོགས་ཐུབ་ཀྱི་མེད་སྐོར་དང་། དོན་རྐྱེན་དེའི་ཁྲོད་རྐྱེན་འདས་སུ་ཕྱིན་པའི་མི་རྣམས་ཀྱི་ནང་མི་དང་སྤུན་མཆེད་རྣམས་ལ་གདུང་སེམས་མཉམ་སྐྱེད་ཡོད་སྐོར་གསུངས་འདུག་ལ། ཧྥ་རན་སི་དང་། འཇར་མ་ནི། ཨི་ཊ་ལི་བཅས་ཀྱི་སྲིད་འཛིན་རྣམས་ཀྱིས།  མེ་སྐྱོན་ཁྲོད་རྐྱེན་འདས་སུ་གྱུར་བའི་མི་རྣམས་ཀྱི་ནང་མི་རྣམས་ལ་གདུང་སེམས་མཉམ་སྐྱེད་ཡོད་སྐོར་གསུངས་འདུག

ཁ་སང་མེ་སྐྱོན་ཁྲོད་མི་མང་པོ་རྐྱེན་འདས་དང་རྨས་སྐྱོན་ཕོག་ཡོད་པར་བརྟེན། དེ་རིང་སུད་སི་རུ་ཉིན་གཅིག་རིང་རྒྱལ་ཡོངས་མྱ་ངན་ཞུ་བཞིན་ཡོད་འདུག་ལ། མེ་སྐྱོན་ཆག་སྒོ་དེ་ནི་ཕྱི་ལོ་ ༢༠༢༦ ལོ་མགོ་བཙུགས་པའི་ཉིན་དང་པོར་བྱུང་བའི་གོད་ཆག་ཆེ་ཤོས་ཏུ་གྱུར་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།