ཨ་རིའི་གྲོས་ཚོགས་ཀྱི་སྔོན་རྩིས་ཚོགས་ཆུང་ཞིག་གིས་ཨ་རིའི་འཛམ་གླིང་གསར་འགྱུར་ལས་ཁུངས་ལ་ཨ་སྒོར་ས་ཡ་ ༦༥༣ སྤྲོད་པའི་རྒྱབ་སྐྱོར་ཁྲིམས་འཆར་བཏོན་འདུག
ཟླ་འདིའི་ཕྱི་ཚེས་ ༡༣ ཉིན་ཨ་རིའི་ཆབ་སྲིད་ཚོགས་པ་གཉིས་ཀྱི་འཐུས་མི་ལྡན་པའི་ཨ་རིའི་གྲོས་ཚོགས་ཀྱི་སྔོན་རྩིས་ཚོགས་ཆུང་གིས། སྲིད་འཛིན་ཊོམ་ཕུར་དགག་བྱ་ལ་མ་ལྟོས་པར་ཨ་རིའི་རླུང་འཕྲིན་ཁང་ལ་ཨ་སྒོར་ས་ཡ་ ༦༥༣ གྱི་རོགས་དངུལ་མུ་མཐུད་སྤྲོད་པའི་ཐག་གཅོད་བྱས་འདུག རོགས་དངུལ་དངོས་སུ་བཀའ་འཁྲོལ་གཏན་འབེབས་ཡོང་བར་ཨ་རིའི་གྲོས་ཚོགས་གོང་འོག་གཉིས་བརྒྱུད་ནས་རྒྱབ་སྐྱོར་ཐོབ་རྗེས། སྲིད་འཛིན་ཊོམ་ཕུས་མཚན་རྟགས་བསྐྱོན་དགོས་པ་ཞིག་ཡིན་འདུག་ལ། ད་ལྟའི་ཆར་ཨ་རིའི་གྲོས་ཚོགས་གོང་འོག་བརྒྱུད་པ་ཡིན་ནའང་། ཊོམ་ཕུས་མཚན་རྟགས་རྒྱག་མིན་ཐད་བསམ་ཚུལ་འདྲ་མིན་ཡོང་གི་འདུག
འཛམ་གླིང་རླུང་འཕྲིན་ (Radio World) གྱིས་སྤེལ་བའི་གནས་ཚུལ་ལྟར་ན། ཨ་རིའི་གྲོས་ཚོགས་ཀྱིས་ཐེངས་འདིར་རོགས་དངུལ་ཨ་སྒོར་ས་ཡ་ ༦༥༣ བཀོལ་སྤྱོད་བྱེད་ཕྱོགས་ཀྱི་ལམ་སྟོན་གསལ་བོ་གནང་ཡོད་ཅིང་། རོགས་དངུལ་ལས་ཨ་སྒོར་ས་ཡ་ ༡༩༩ ཨ་རིའི་རླུང་འཕྲིན་ཁང་དང་། ཨེ་ཤ་ཡ་རང་དབང་རླུང་འཕྲིན་ཁང་ལ་ས་ཡ་ ༥༣།༥ ། དེ་བཞིན་ཡུ་རོབ་རང་དབང་རླུང་འཕྲིན་དང་རང་དབང་རླུང་འཕྲིན་ཁང་གཉིས་ལ་ཨ་སྒོར་ས་ཡ་ ༡༡༢ ། དཀྱིལ་ཤར་ཡུལ་གྲུའི་རྒྱང་བསྒྲགས་དྲ་རྒྱར་ས་ཡ་ ༦༩། ཁོའུ་བྷ་རྒྱང་བསྒྲགས་ཁང་ལ་ཉུང་མཐར་ཨ་སྒོར་ས་ཡ་ ༣༠ བཅས་བགོ་འགྲེམས་བྱ་དགོས་ཀྱི་ཡོད་འདུག
ཨ་རིའི་གྲོས་ཚོགས་ཀྱི་ཁྲིམས་འཆར་དེའི་འོག་ནས་ཨ་རིའི་འཛམ་གླིང་གསར་འགྱུར་ལས་ཁུངས་ (USAGM) ལ་གོང་བརྗོད་གསར་ཁང་དག་ལ་དངུལ་བགོ་འགྲེམས་བྱེད་པའི་ཐོབ་ཐང་ཡོད་ཀྱང་། གསར་ཁང་རེ་རེའི་མ་དངུལ་དེ་གྲོས་ཚོགས་ལ་སྔོན་བརྡ་མ་བཏང་བར་བརྒྱ་ཆ་བཅུ་ལས་ཉུང་བར་གཏོང་ཆོག་གི་མེད་པའི་ཁར། ཨ་རིའི་འཛམ་གླིང་གསར་འགྱུར་ལས་ཁུངས་ཀྱི་སྤྱི་གཉེར་བས། ཕྱི་ལོ་ ༢༠༢༧ ཟླ་ ༩ ཚེས་ ༣༠ བར་ལོ་རེའི་ཟླ་གསུམ་རིང་གི་རྒྱང་བསྒྲགས་རླུང་འཕྲིན་གྱི་ལས་དོན་དང་མཐུན་རྐྱེན། ཁང་དངོས་སོགས་ཀྱི་གནས་སྟངས་གྲོས་ཚོགས་ལ་སྙན་སེང་ཞུ་དགོས་ཀྱི་ཡོད་འདུག
འདས་ལོའི་ཕྱི་ཟླ་ ༣ ནང་ཨ་རིའི་སྲིད་འཛིན་ཊོམ་ཕུས་རོགས་དངུལ་མཚམས་འཇོག་གི་བཀོད་ཁྱབ་ཅིག་བཏང་སྟེ། ཨ་རིའི་འཛམ་གླིང་གསར་འགྱུར་ལས་ཁུངས་ཀྱི་གཙོས་གསར་འགྱུར་ལས་རིགས་དང་འབྲེལ་བའི་ལས་ཁུངས་དྲུག་གི་ལས་མཚམས་འཇོག་དགོས་པ་དང་། ལས་བྱེད་ཕྱིར་ཕུད་དང་ལས་ཁུངས་སྒོ་རྒྱག་དགོས་སྐོར་སོགས་ནན་བརྗོད་བྱས་སྟབས། ཨ་རི་ཙམ་དུ་མ་ཟད་འཛམ་གླིང་ཡུལ་གྲུ་གང་སར་གནས་པའི་གསར་འགོད་པ་མང་པོའི་ལས་ཀ་ཤོར་ཡོད་ལ། གསར་འགོད་པ་མང་པོ་ཞིག་གིས་རང་ཉིད་དྲང་བདེན་མིན་པའི་ཐག་གཅོད་འོག་ལས་གནས་ནས་ཕྱིར་ཕུད་བཏང་བར་ཁྲིམས་གཏུགས་བྱས་དང་བྱེད་བཞིན་ཡོད་པར་བརྟེན། ད་ལྟ་ཨ་རིའི་འཛམ་གླིང་གསར་འགྱུར་ལས་ཁུངས་ལའང་དཀའ་ངལ་མང་དག་ཅིག་འཕྲད་མུས་ཡིན་པ་དང་། ཨ་རིའི་གྲོས་ཚོགས་འོག་མ་དང་གོང་མ་གཉིས་ནས་རོགས་དངུལ་སྤྲོད་པའི་ཐག་གཅོད་དེར་རྒྱབ་སྐྱོར་བྱེད་སྲིད་ནའང་། སྲིད་འཛིན་ཊོམ་ཕུས་རོགས་དངུལ་ཟུར་འཇོག་གིས་བགོ་བཤའ་རྒྱག་པའི་གནས་བབ་ཅིག་མཐོང་བ་ཡིན་ན། ཁྲིམས་འཆར་དེར་རྒྱབ་སྐྱོར་བྱེད་མི་སྲིད་སྐོར་ཉམས་ཞིབ་པས་བརྗོད་འདུག
ཨ་རིའི་འཛམ་གླིང་གསར་འགྱུར་ལས་ཁུངས་ཀྱི་འགན་འཛིན་ཀེ་རེ་ལེག་ལགས་ཀྱིས། སྔར་ལོ་དང་བསྡུར་ན་རོགས་དངུལ་ལ་ཆག་ཡང་བྱུང་བ་ནི་ཡར་རྒྱས་ཀྱི་ཕྱོགས་སུ་གོམ་པ་སྤོས་པ་ཞིག་ཡིན་རུང་། ཨ་རིའི་རྒྱང་བསྒྲགས་ལས་ཁུངས་ཀྱིས་ད་དུང་སྲིད་འཛིན་ཊམ་གྱི་གཏམ་བཤད་དང་ཨ་རིའི་གཏམ་རྒྱུད་འཛམ་གླིང་ལ་བཤད་ཐུབ་པ་མ་ཟད། ཁྲལ་འབབ་མང་པོ་འཕྲོ་བརླག་ཏུ་གཏོང་མི་དགོས་ཞེས་བརྗོད་འདུག་ལ། ཐེངས་འདིའི་རོགས་དངུལ་གྱི་གྲངས་འབོར་དེ་ཕྱི་ལོ་ ༢༠༢༣ ལོར་བཀའ་འཁྲོལ་ཐོབ་པའི་རོགས་དངུལ་ལས་ཨ་སྒོར་ས་ཡ་ ༢༡༤ ཉུང་བ་ཆགས་ཡོད།
ཨ་རིའི་རླུང་འཕྲིན་ཁང་ལ་རོགས་དངུལ་ཐོབ་པའི་གནས་ཚུལ་ཐོན་མ་ཐག བོད་མི་མང་པོ་ཞིག་གིས་ཨ་རིའི་རླུང་འཕྲིན་ཁང་དང་ཨེ་ཤ་ཡའི་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་ནས་མགྱོགས་མྱུར་ལས་དོན་གཉེར་ཐུབ་པར་རེ་སྨོན་རྒྱག་གིན་འདུག ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་ནི་ཕྱི་ལོ་ ༡༩༩༠ ཕྱི་ཟླ་ ༢ ཚེས་ ༡༦ ཉིན་ཨ་རིའི་གྲོས་ཚོགས་ཀྱིས་གཏན་འབེབས་ཐོག་བོད་སྐད་ཐོག་རྒྱང་སྲིང་བྱེད་མགོ་བཙུགས་ཡོད་པ་དང་། བདུན་ཕྲག་རེར་བོད་སྐད་ཐོག་ཆུ་ཚོད་གཉིས་རེའི་བརྙན་འཕྲིན་གྱི་ལས་རིམ་དང༌། དེ་བཞིན་བོད་ནང་རླུང་འཕྲིན་གྱི་ལས་རིམ་ཁག་ཐད་ཀར་རྒྱང་སྲིང་བྱེད་བཞིན་ཡོད་འདུག
ཨེ་ཤ་ཡ་རང་དབང་རླུང་འཕྲིན་ཁང་ནི་ཕྱི་ལོ་ ༡༩༩༦ ལོར་ཨ་རིའི་གྲོས་ཚོགས་ཀྱིས་འགྲོ་གྲོན་འོག་ཨེ་ཤ་ཡའི་ཡུལ་གྲུ་ཁག་ཅིག་གི་ནང་སྨྲ་བརྗོད་ཀྱི་རང་དབང་མེད་པའི་མི་མང་ཚོར་དངོས་བྱུང་ཁུངས་ལྡན་གྱི་གནས་ཚུལ་གོ་རྟོགས་ཐུབ་པའི་ཆེད་དུ་བཙུགས་པའི་རླུང་འཕྲིན་ཁང་ཞིག་ཡིན་པ་རེད། བདུན་ཕྲག་རེའི་ནང་འཛམ་གླིང་ཐོག་ཨེ་ཤ་ཡ་རང་དབང་རླུང་འཕྲིན་ཁང་ལ་གསན་གཟིགས་གནང་མཁན་མི་གྲངས་ས་ཡ་ ༦༠ ཙམ་ཡོད་འདུག ཨེ་ཤ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ནང་དབུས་གཙང་གི་སྐད་དང༌། ཨམ་སྐད། ཁམས་སྐད་བཅས་ཀྱི་ཐོག་གནས་ཚུལ་རྒྱང་སྲིང་བྱེད་བཞིན་ཡོད་ཅིང་། གསར་འགྱུར་ལས་རིམ་ནི་རླུང་འཕྲིན་དང་། བརྙན་འཕྲིན། སྤྱི་ཚོགས་དྲ་རྒྱ་དང་དྲ་ཐོག་བཅས་ཀྱི་བརྒྱུད་ནས་རྒྱང་སྲིང་བྱེད་བཞིན་ཡོད་འདུག
ཨ་རིའི་རླུང་འཕྲིན་ཁང་ (VOA) ནི་ཕྱི་ལོ་ ༡༩༤༢ ལོར་འཛམ་གླིང་དམག་ཆེན་གཉིས་པ་དང་གྲང་དམག་གི་སྐབས་སུ་རང་དབང་གི་ཐོག་ནས་གནས་ཚུལ་ཤེས་རྟོགས་ཆེད་དུ་མགོ་བཙུགས་ཡོད་ཅིང་། ཕྱི་ལོ་ ༡༩༧༦ལོའི་ཟླ་༧ ཚེས་ ༡༢ ཉིན་ཨ་རིའི་སྲིད་འཛིན་ཟུར་པ་ཇེ་རལ་ཌི་(Gerald R. Ford) མཆོག་གིས་ཨ་རིའི་ཁྲིམས་མཐུན་ཐོག་ནས་ངོས་འཛིན་ཡོད་པའི་མཚན་རྟགས་བཀོད་འདུག ཨ་རིའི་རྒྱང་སྲིང་འགན་འཛིན་ལྷན་ཚོགས་ཀྱིས་བཀོད་འདོམས་འོག་སྐད་རིགས་ ༥༠ ཙམ་ལ་རྒྱང་སྲིང་བྱེད་བཞིན་པའི་རྒྱལ་སྤྱིའི་གསར་ཁང་ཞིག་ཏུ་ཆགས་ཡོད་ལ། ད་ལྟའི་ཆར་བདུན་ཕྲག་རེར་འཛམ་གླིང་ཐོག་རླུང་འཕྲིན་ཁང་དེར་གསན་གཟིགས་གནང་མཁན་མི་གྲངས་ས་ཡ་ ༣༥༤ ཙམ་ཡོད་འདུག
གསར་འགོད་པ། སྐལ་བཟང་སྦྱིན་པ།
