ཟླ་འདིའི་ཕྱི་ཚེས་ ༡༧ ཉིན་དབྱིན་ཇིའི་རྒྱལ་ས་ལོ་ཌོན་དུ་བོད་མི་དང་ཡུ་གུར་བ། ཧོང་ཀོང་གི་དམངས་གཙོ་དོན་གཉེར་བ་སོགས་ཀྱིས་དབྱིན་ཡུལ་དུ་རྒྱ་ནག་གི་གཞུང་ཚབ་གསར་རྒྱག་ལ་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ་འཆར་འདུག
ཟླ་འདིའི་ཕྱི་ཚེས་ ༢༠ ཙམ་ལ་དབྱིན་ཡུལ་དུ་རྒྱ་ནག་གཞུང་ཚབ་གསར་རྒྱག་གི་ལས་འཆར་ལ་ཐག་གཅོད་གནང་འཆར་ཡོད་པ་ལྟར། དབྱིན་ཇིའི་རྒྱལ་ས་ལོ་ཌོན་གྱི་ཐོག་ཁང་ཆེན་མོའི་མདུན་དུ། རྒྱལ་སྤྱིའི་བོད་དང་གཉའ་གནོན་འོག་ཚུད་པའི་གྲངས་ཉུང་མི་རིགས་ཀྱི་མཐུན་ཚོགས་ (GATPM) དང་། རྒྱལ་སྤྱིའི་གྲོས་ཚོགས་འཐུས་མིའི་རྒྱ་ནག་ལྟ་ཞིབ་ཚོགས་པའི་ཚོགས་མི། བོད་མི་དང་ཡུ་གུར་བ། ཧོང་ཀོང་གི་དམངས་གཙོ་དོན་གཉེར་བ་སོགས་ལས་འགུལ་བ་སྟོང་ཕྲག་འདུ་འཛོམས་བྱས་ཏེ། དབྱིན་ཡུལ་དུ་རྒྱ་ནག་གཞུང་ཚབ་ཁང་གསར་རྒྱག་གི་ལས་གཞིར་ངོ་རྒོལ་ལས་འགུལ་སྤེལ་འཆར་ཡོད་འདུག
རྒྱལ་སྤྱིའི་བོད་དང་གཉའ་གནོན་འོག་ཚུད་པའི་གྲངས་ཉུང་མི་རིགས་ཀྱི་མཐུན་ཚོགས་ཀྱི་གསར་འཛུགས་འགན་འཛིན་ཚེ་རིང་པ་སངས་ལགས་ཀྱིས། གཞུང་ཚབ་གསར་རྒྱག་གི་འཆར་གཞི་འདི་ནི་ས་གནས་ཀྱི་གནད་དོན་ཙམ་མ་ཡིན་པར། རྒྱལ་སྤྱིའི་འགྲོ་བ་མིའི་ཐོབ་ཐང་གི་གནད་དོན་ཞིག་རེད་ལ། བོད་མི་དང་གཉའ་གནོན་འོག་ཚུད་པའི་མི་རིགས་གཞན་རྣམས་ལ་མཚོན། འདི་ནི་སྲིད་གཞུང་ཞིག་གིས་མི་མཐུན་པའི་བསམ་ཚུལ་ལ་གཉའ་གནོན་དང་། ཉུལ་ཞིབ། དྲག་གནོན་སོགས་ཀྱི་ཁྱབ་ཚད་རྒྱ་སྐྱེད་གཏོང་བཞིན་པ་མཚོན་གྱི་ཡོད། དབྱིན་ཇིའི་གཞུང་གིས་ཟླ་འདིའི་ཕྱི་ཚེས་ ༢༠ སྔོན་ལ་འཆར་གཞི་དེར་ཐག་གཅོད་བྱ་རྒྱུའི་ཚོད་དཔག་བྱེད་ཀྱི་ཡོད་པས། ཕྱི་ཟླ་ ༡ ཚེས་ ༡༧ ཉིན་གྱི་ངོ་རྒོལ་འདི་ནི་དམངས་གཙོའི་རིན་ཐང་སྲུང་སྐྱོབ་དང་། གནོད་འཚེ་ཕོག་པའི་མི་མང་དང་མཉམ་དུ་ལངས་ཏེ། འགྲོ་བ་མིའི་ཐོབ་ཐང་ནི་ཆབ་སྲིད་ཀྱི་སྟབས་བདེའི་ཆེད་དུ་བློས་གཏོང་བྱ་རྒྱུ་མིན་པའི་བརྡ་ལན་གཏོང་བའི་དུས་སྐབས་གལ་ཆེན་ཞིག་ཆགས་ཡོད་ཅེས་བརྗོད་འདུག
རྒྱལ་སྤྱིའི་བོད་དང་གཉའ་གནོན་འོག་ཚུད་པའི་གྲངས་ཉུང་མི་རིགས་ཀྱི་མཐུན་ཚོགས་ཀྱིས། ང་ཚོས་འདས་པའི་ལོ་ལྔའི་རིང་རྒྱ་ནག་གི་གཞུང་ཚབ་རྒྱག་ཡུལ་གྱི་ས་གནས་མི་མང་དང་གནོད་འཚེ་ཕོག་པའི་མི་མང་ལ་རྒྱབ་སྐྱོར་དང་། དེ་བཞིན་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་སོགས་ཀྱི་རྒྱབ་ཏུ་ལངས་ཏེ། དབྱིན་ཡུལ་ནང་རྒྱ་ནག་ག་གཞུང་ཚབ་གསར་རྒྱག་ལ་ངོ་རྒོལ་བྱས་ཡོད། ང་ཚོས་དབྱིན་ཇིའི་མིན་ཊི་རྒྱལ་པོའི་ཁྲོམ་ར་མཐུན་ཚོགས་ (RMCRA) ཀྱིས་བཏོན་པའི་ཁྲིམས་གཏུགས་དང་ཁྲིམས་ཞིབ་དགོས་པའི་གནས་ལུགས་ལ་རྒྱབ་སྐྱོར་ཤུགས་ཆེན་བྱེད་ཀྱི་ཡོད། མཐུན་ཚོགས་འདིས་ས་གནས་ཀྱི་དམངས་གཙོ་དང་། ཕྱི་གསལ་ནང་གསལ། ཁྲིམས་ཀྱི་དབང་བསྒྱུར་སོགས་སྲུང་སྐྱོབ་བྱེད་མཁན་མཐའ་མ་དེ་མཚོན་གྱི་ཡོད། ང་ཚོས་དམངས་གཙོའི་འགན་ཁུར་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་མཁན་ཚང་མས། དབྱིན་ཇིའི་མིན་ཊི་རྒྱལ་པོའི་ཁྲོམ་ར་མཐུན་ཚོགས་ལ་དངོས་ཤུགས་བརྒྱུད་གསུམ་གྱི་ཐོག་ནས་རྒྱབ་སྐྱོར་བྱས་ཏེ་རྒྱ་ནག་གི་ལས་གཞི་དེ་གཏན་དུ་མཚམས་འཇོག་བྱེད་པར་ཤུགས་སྣོན་རྒྱག་དགོས་ཞེས་བརྗོད་འདུག་ལ། དབྱིན་ཇིའི་མིན་ཊི་རྒྱལ་པོའི་ཁྲོམ་ར་མཐུན་ཚོགས་ནི་དབྱིན་ཡུལ་ནང་རྒྱ་ནག་གི་གཞུང་ཚབ་འཛུགས་སྐྲུན་གྱི་ལས་གཞིར་ངོ་རྒོལ་བྱེད་པའི་དབྱིན་ཇིའི་ཚོགས་སྡེ་ཆེ་ཤོས་དང་གཅིག་པུ་དེ་ཡིན་ཞིང་། ཚོགས་པ་དེས་འདས་པའི་ལོ་ངོ་ལྔ་ལྷག་གི་རིང་རྒྱ་ནག་གཞུང་ཚབ་གསར་རྒྱག་གི་ལས་གཞི་དེས་ས་གནས་མི་མང་ཙམ་དུ་མ་ཟད། དབྱིན་ཇིའི་དམངས་གཙོ་དང་རྒྱལ་སྲིད་བདེ་འཇགས་སོགས་ལ་ཉེན་ཁ་བསྐྲུན་གྱི་ཡོད་པའི་སྐྱོན་བརྗོད་བྱས་དང་བྱེད་བཞིན་ཡོད་པ་རེད།
ཕྱི་ལོ་ ༢༠༡༨ ལོར་དབྱིན་ཡུལ་གྱི་རྒྱལ་ས་ལོ་ཌོན་དུ་རྒྱ་ནག་གཞུང་གིས་རོ་ཡུལ་མིན་ཊི་ས་གནས་སུ་ས་ཆ་ཞིག་ཉོས་ཏེ། རྗེས་སུ་རྒྱ་ནག་གཞུང་གིས་གཞུང་ཚབ་ཁང་ཆེན་པོ་ཞིག་འཛུགས་སྐྲུན་བྱ་འཆར་ཡོད་ཀྱང་། ཕྱི་ལོ་ ༢༠༢༢ ཟླ་ ༡༢ ནང་ས་གནས་གཞུང་ནས་ཆོག་མཆན་ཐེངས་གཉིས་བཀག་ཡོད་ཅིང་། དབྱིན་ཡུལ་ནང་རྒྱ་ནག་གཞུང་གིས་གཞུང་ཚབ་གསར་རྒྱག་གི་ལས་གཞིའི་ཐད་མི་མང་ཁྲོད་གླེང་སློང་ཆེན་པོ་བྱས་ཡོད་པ་མ་ཟད། བོད་པ་དང་། ཡུ་གུར། ཧོང་ཀོང་བ། དམངས་གཙོ་དོན་གཉེར་བ་སོགས་ཀྱིས་ཐེངས་མང་པོར་ངོ་རྒོལ་བྱས་ཡོད་འདུག
གསར་འགོད་པ། སྐལ་བཟང་སྦྱིན་པ།
