མཁན་པོ་ཉི་མ་ཀུན་ཁྱབ་མཆོག་བལ་གཞུང་གི་ནང་ཆོས་དར་སྤེལ་དང་དགོན་པ་ཡར་རྒྱས་ལྷན་ཚོགས་ཀྱི་ཚོགས་གཙོར་བསྐོས།

བལ་ཡུལ་དོལ་པོ་སྨད་ཀྱི་བར་གླེ་གཡུང་དྲུང་ཤུག་ཚལ་དགོན་གྱི་མཁན་པོ་ཉི་མ་ཀུན་ཁྱབ་མཆོག་བལ་གཞུང་ནང་ཆོས་དར་སྤེལ་དང་དགོན་པ་འཕེལ་རྒྱས་ལྷན་ཚོགས་ཀྱི་ཚོགས་གཙོར་བསྐོ་བཞག་གནང་འདུག

བལ་གཞུང་བློན་ཆེན་ལྷན་ཚོགས་ཀྱི་ཐག་གཅོད་གནང་བ་ལྟར། ཁ་སང་ཕྱི་ཚེས་ ༡༤ ཉིན་བལ་ཡུལ་རིག་གཞུང་དང་ཡུལ་སྐོར། དེ་བཞིན་མི་འབོར་འགྲིམ་འགྲུལ་བློན་ཆེན་ཨ་ནིལ་ཀུ་མར་སིང་ཧཱ་(Anil Kumar Sinha)མཆོག་གིས། སྨན་རིའི་དགེ་བཤེས་མཁན་པོ་ཉི་མ་ཀུན་ཁྱབ་མཆོག་བལ་གཞུང་ནང་ཆོས་དར་སྤེལ་དང་དགོན་པ་འཕེལ་རྒྱས་ལྷན་ཚོགས་(the Buddhist Philosophy Promotion and Monastery Development Committee)ཀྱི་ཚོགས་གཙོར་བསྐོ་བཞག་བྱུང་བའི་ཕྱག་ཡིག་གནང་ཡོད་འདུག་ལ། ཁོང་གིས་མ་འོངས་ལོ་ལྔའི་རིང་ཚོགས་གཙོའི་ཐུགས་འགན་བཞེས་དགོས་ཀྱི་ཡོད་འདུག

མཁན་པོ་ཉི་མ་ཀུན་ཁྱབ་མཆོག་ནི་བལ་ཡུལ་དོལ་པོ་སྨད་དུ་སྐུ་འཁྲུངས་པ་དང་། ཆུང་དུས་ནས་ཆོས་ཞུགས་གནང་སྟེ་ཕྱི་ལོ་ ༡༩༨༢ ནས་ ༡༩༩༤ བར་དུ་རྒྱ་གར་ཧི་མ་ཅལ་མངའ་སྡེའི་སྨན་རིའི་གླིང་དུ་སློབ་གཉེར་གནང་ཡོད་པ་དང་། དེ་ནས་ཕྱི་ལོ་ ༡༩༩༤ ནས་ ༢༠༠༧ བར་ལོ་ ༡༣ རིང་ཝ་ཎ་མཐོ་སློབ་ཏུ་བོན་གཞུང་དགེ་རྒན་གནང་། དེ་བཞིན་ཕྱི་ལོ་ ༢༠༠༧ ནས་ ༢༠༡༤ བར་དུ་བལ་ཡུལ་བོན་གྱི་ཆེས་མཐོའི་ལྷན་ཚོགས་ཀྱི་ཚོགས་གཞོན་དང་། ༢༠༡༥ ནས་ ༢༠༢༦།༡།༡༤ བར་དུ་ལྷན་ཚོགས་དེའི་ཚོགས་གཙོའི་འགན་བཞེས། ༸སྐྱབས་རྗེ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་མཆོག་གི་བཀའ་འབྲེལ་འོག ཕྱི་ལོ་ ༢༠༢༠ ཟླ་ ༡ ཚེས་ ༨ ཉིན་མཁན་པོ་མཆོག་དོལ་པོ་སྨད་ཏི་ཆུ་རོང་གི་ཁོངས་གཏོགས་ཀྱི་བར་གླེ་གཡུང་དྲུང་ཤུག་ཚལ་དགོན་གྱི་མཁན་པོར་ཁྲི་འདོན་མཛད།

མཁན་པོ་མཆོག་གིས་ཕྱི་ལོ་ ༢༠༠༩ ལོར་དོལ་པོའི་རྫོང་དུང་ཉལ་ཞེས་པར་དོལ་པོ་བོན་གྱི་སློབ་གཉེར་ཁང་ཞེས་པ་གསར་འཛུགས་གནང་ཡོད་པ་དང་། ད་ལྟའི་ཆར་སློབ་ཕྲུག་གྲངས་ ༩༥ ཙམ་དང་འཛིན་རིམ་ ༨ བར་ཡོད་པ་མ་ཟད།  སློབ་གཉེར་ཁང་དེས་དོལ་པོའི་ཡུལ་གྱི་དབུལ་ཕོངས་དང་ཉམ་ཐག་བྱིས་པ་རྣམས་ལ་ཟས་གོས་གནས་མལ་གྱི་མཐུན་རྐྱེན་ཡང་གནང་གི་ཡོད་འདུག་ལ། དགེ་སློབ་རྣམས་དོལ་པོའི་ཡུལ་གྱི་ས་སྐྱེས་རྡོ་སྐྱེས་ཀྱི་བུ་ཕྲུག་རྐྱང་རྐྱང་ཡིན་འདུག