རྒྱལ་སྤྱིའི་ཚོགས་སྡེ་སུམ་ཅུ་ལྷག་གིས་ཨི་རན་གཞུང་གིས་འགྲོ་བ་མིའི་ཐོབ་ཐང་ལ་བརྩི་འཇོག་དགོས་པའི་བསྒྲགས་གཏམ་སྤེལ། 

རྒྱལ་སྤྱིའི་པེན་རྩོམ་པ་པོ་མཐུན་ཚོགས་ཀྱིས་སྣེ་འཁྲིད་ནས་ཚོགས་སྡེ་ཁག་སུམ་ཅུ་ལྷག་གིས་ཨི་རན་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་དང་གང་བྱུང་འཛིན་བཟུང་བཀག་ཉར་བྱས་པ་རྣམས་ཀློད་གྲོལ་གཏང་དགོས་པའི་རེ་སྐུལ་གནང་འདུག

ཁ་སང་ཕྱི་ཚེས་ ༡༥ ཉིན་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་དང་ཡན་ལག་ཁག་ཅིག་གཙོས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་རྒྱལ་སྤྱིའི་ཚོགས་སྡེ་ཁག་སུམ་ཅུ་ལྷག་གིས། འདི་ལོར་ཨི་རན་ནང་ངོ་རྒོལ་དང་ཕྱོགས་འགལ་གྱི་ལྟ་བ་འཛིན་མཁན་ལ་གདུག་རྩུབ་ཆེན་པོས་དྲག་གནོན་དང་། འབྲེལ་མཐུད་ཡོངས་སུ་ཆད་ལ་ཉེ་བའི་ཛ་དྲག་གི་དུས་སྐབས་འདིར། ཨི་རན་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་དང་། གསར་འགོད་པ་དང་རང་དབང་གི་རྩོམ་པ་པོ་རྣམས་བཙོན་འཇུག་བྱ་རྒྱུ་མཚམས་འཇོག རྒྱལ་ཡོངས་སུ་སྨྲ་བརྗོད་དང་འདུ་འཛོམས་རང་དབང་སྤྲད་དགོས་པའི་རེ་སྐུལ་གྱི་མཉམ་འབྲེལ་བསྒྲགས་གཏམ་ཞིག་སྤེལ་འདུག

བསྒྲགས་གཏམ་དེའི་ཁྲོད། ཨི་རག་ནང་བཀག་ཉར་ཁང་སོགས་སུ་བཙོན་པ་རྣམས་ལ་མནར་གཅོད་དང་རྡུང་རྡེག་སོགས་ཚབས་ཆེན་གཏོང་གིན་ཡོད་པའི་རྐྱེན་གྱིས་ཡུལ་དེར་ཟིང་འཁྲུག་དང་གཏོར་རྒོལ་ཡོང་གི་ཡོད་ཅིང་། ལྷག་པར་དུ་ཚོགས་པ་ཁག་ཅིག་གིས། ཁྲིམས་མཐུན་མིན་པའི་ཐོག་ནས་དམར་གསོད་དང་། རྨས་སྐྱོན་བཟོས་པ། བཙོན་འོག་ནས་གར་སོང་ཆ་མེད་དུ་བཏང་བ།  བཙོན་པ་རྣམས་ཀྱིས་ཚད་ལས་འདས་པའི་སྡུག་བསྔལ་མྱོང་གིན་ཡོད་པ་མ་ཟད། མི་མང་པོ་ཡུན་རིང་ནས་ཕྱི་ཕྱོགས་ལ་འབྲེལ་འདྲིས་མེད་པར་བཀག་སྡོམ་འོག་བཅུག་ཡོད་པ། སྲིད་གཞུང་གི་ཕྱོགས་འགལ་བ་ཚོར་འབུར་འཇོམས་དང་། གང་བྱུང་འཛིན་བཟུང་བཀག་ཉར་སོགས་ཀྱིས་མཚོན་པའི་ཕྱོགས་ཡོངས་ནས་དྲག་གནོན་བྱེད་ཀྱིན་ཡོད་སྐོར་གསལ་འདུག

ཡང་བསྒྲགས་གཏམ་ཁྲོད། ཉེ་ལམ་ཨི་རན་གཞུང་གིས་འཛིན་བཟུང་བཀག་ཉར་བྱས་པའི་ཁྲོད། སྤྱི་ཚོགས་སུ་ཆེ་མཐོང་ཡོད་པའི་མི་སྣ་མང་པོ་ཞིག་ཡོད་ཅིང་། དེའི་ནང་དུ་ནོ་བྷེལ་ཞི་བདེའི་གཟེངས་རྟགས་ཐོབ་མཁན་ནཱར་གྷེས་མོ་ཧཱ་མཱ་ཌི་(Narges Mohammadi)དང་། སེ་པི་ཌེ་གྷོལ་ཡཱན་(Sepideh Gholian) ། ཨ་ལི་ཡེ་མོ་ཊ་ལེབ་ཛ་དྷེ་ (Alieh Motalebzadeh) ། ཇཱ་ཝཱཌ་ཨ་ལི་ཀོར་ཌི་(Javad Alikord) ། ཧཱ་སི་ཊི་ཨ་མི་རི་(Hasti Amiri)། པུར་ཨཱན་ནཱ་ཛེ་མི་(Pooran Nazemi) ། དེ་བཞིན་འགྲོ་བ་མིའི་ཐོབ་ཐང་སྲུང་སྐྱོབ་པ་དང་གསར་འགོད་པ་གཞན་ཁག་ཅིག་ཀྱང་ཚུད་ཡོད་ཅིང་། ཁོང་ཚོ་ཕྱི་ཚེས་ ༡༢ ཉིན་ཁྲིམས་རྩོད་པ་ཁོ་སི་རོའུ་ཨ་ལི་ཀོར་ཌིའི་(Khosrow Alikordi) དྲན་གསོའི་མཛད་སྒོ་མཱ་ཤ་ཧཱཌ་(Mashhad) གྲོང་ཁྱེར་དུ་འཚོགས་རྗེས་དྲག་པོའི་ཐོག་ནས་འཛིན་བཟུང་བྱས་ཡོད་པ་དང་། ཟླ་བ་གཅིག་ལྷག་གི་རིང་ལ་བཀག་ཉར་བྱས་ཏེ་ཁོང་རྣམས་ཀྱི་གནས་སྟངས་གང་ཡང་ཤེས་རྟོགས་བྱུང་མེད་པའི་ཁར། ནོ་བྷེལ་ཞི་བདེའི་གཟེངས་རྟགས་ཐོབ་མཁན་ནཱར་གྷེས་མོ་ཧཱ་མཱ་ཌི་ལགས་ལ་ཁྲིམས་རྩོད་པ་དང་། ནང་མིར་སོགས་ལའང་ཐུག་འཕྲད་བྱེད་དུ་བཅུག་མེད་སྐོར་གསལ་འདུག

བསྒྲགས་གཏམ་གྱི་རེ་སྐུལ་ནང་དུ། ཨི་རན་རྒྱལ་ཁབ་ཏུ་དོན་མེད་མང་ཚོགས་འཛིན་བཟུང་བཀག་ཉར་དང་། དམར་གསོད། དྲག་སྤྱོད་ཀྱི་ལས་འགུལ་སྣ་མང་སྤེལ་མུས་ཡིན་སྟབས། ང་ཚོས་ཨི་རན་གྱི་མི་མང་གིས་རང་དབང་གི་ལས་འགུལ་དང་མང་གཙོའི་ཁེ་དབང་ཆེད་དུ་འཐབ་རྩོད་བྱེད་བཞིན་པར་རྒྱབ་སྐྱོར་ཆ་ཚང་ཞུ་བཞིན་ཡོད། ང་ཚོས་རྒྱལ་སྤྱིའི་སྤྱི་ཚོགས་ནས་མི་སྲོག་ཤོར་བ་མང་དུ་མི་འགྲོ་བ་དང་། ཨི་རན་གྱིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་འཁྲི་བསྒྲུབ་དགོས་པའི་འབོད་སྐུལ་ཞུ་རྒྱུ་ཡིན། ཞེས་དང་། ཨི་རན་གྱི་རང་དབང་འཐབ་རྩོད་པ་དང་ཕྱི་ལོ་ ༢༠༢༥ ལོའི་ནོ་བྷེལ་ཞི་བདེའི་གཟེངས་རྟགས་ཐོབ་མཁན་ནཱར་གྷེས་མོ་ཧཱ་མཱ་ཌི་གཙོས།  འགྲོ་བ་མིའི་ཐོབ་ཐང་དང་བུད་མེད་ཀྱི་ཐོབ་ཐང་སྲུང་སྐྱོབ་བྱེད་མཁན། སྤྱི་ཚོགས་ལས་འགུལ་བ། གསར་འགོད་པ། ཁྲིམས་རྩོད་པ། རྩོམ་པ་པོ། སྒྱུ་རྩལ་བ། ཆོས་ལུགས་དང་མི་རིགས་གྲངས་ཉུང་གི་འཐུས་མི། ཁོར་ཡུག་དང་ངལ་རྩོལ་སྲུང་སྐྱོབ་བྱེད་མཁན། སློབ་ཕྲུག་བཅས་དང་། གཞན་ཡང་རང་རང་གི་གཞི་རྩའི་ཁེ་དབང་ལག་བསྟར་བྱས་པའི་རྐྱེན་གྱིས་བཀག་ཉར་བྱས་པའམ་ཉེན་ཁའི་ནང་ཚུད་པའི་མི་ཚང་མ་མྱུར་དུ་ཆ་རྐྱེན་གང་ཡང་མེད་པར་ཀློད་གྲོལ་གཏང་དགོས། དྲ་རྒྱ་དང་འཕྲིན་གཏོང་ཞབས་ཕྱིར་ཚད་བཀག་མེད་པའི་སྤྱོད་སྒོ་བསྐྱར་གསོ་བྱེད་པ་དང་། རྒྱལ་ཡོངས་ཀྱི་གནས་ཚུལ་བཀག་སྡོམ་བྱས་ནས་གསར་འགྱུར་སྤེལ་བར་བཀག་འགོག་བྱེད་མཚམས་འཇོག་དགོས་པ། འགྲོ་བ་མིའི་ཐོབ་ཐང་རྡོག་རོལ་གཏོང་བའི་གནས་ཚུལ་ར་སྤྲོད་བྱེད་པར་འགོག་རྐྱེན་བཟོ་བའི་བྱ་སྤྱོད་མཚམས་འཇོག་བྱ་དགོས། ཞེས་སོགས་གསལ་འདུག

ཐེངས་འདིའི་ངོ་རྒོལ་དེ་ཕྱི་ལོ་ ༢༠༢༥ ཕྱི་ཟླ་ ༡༢ ཚེས་ ༢༨ ཉིན་ནས་བཟུང་མགོ་བཙུགས་ཏེ།  མི་མང་གིས་རྒྱལ་ཁབ་ཀྱི་དཔལ་འབྱོར་ཉམས་རྒུད་དུ་འགྲོ་བཞིན་ལས་ཛ་དྲག་སྐྱོབ་ཐབས་དགོས་པ་དང་། ལྐོག་ཟ་རུལ་སུངས་བཀག་འགོག་པ།  ཨི་རན་གྱི་སྲིད་འཛིན་མ་སུ་ཌི་ (Masoud Pezeshkian)ཀྱིས་ལས་གནས་ནས་རྩ་དགོངས་ཞུ་དགོས་པ་སོགས་ཀྱི་འབོད་སྒྲ་སྒྲོག་བཞིན་ཡོད་འདུག་ལ། ཝི་ཀེ་རིག་མཛོད་ལྟར་ན། ཡུལ་དེའི་ཞིང་ཆེན་ ༣༡ གི་གྲོང་ཁྱེར་ཁག་ ༡༨༠ ལྷག་གི་ནང་མི་མང་གིས་ངོ་རྒོལ་ལས་འགུལ་སྤེལ་བཞིན་ཡོད་འདུག་ཀྱང་། ད་ལྟ་བར་དུ་མི་གྲངས་ ༢༠༠༠ ལྷག་རྐྱེན་འདས་ཕྱིན་པའི་གནས་ཚུལ་ཐོན་གྱི་འདུག་ཀྱང་བརྒྱུད་ལམ་ཁག་ལ་བཀག་སྡོམ་ཆེན་པོ་བྱེད་ཀྱི་ཡོད་པའི་རྐྱེན་གྱིས་འཛིན་བཟུང་བཙོན་འཇུག་བྱས་པའི་གྲངས་འབོར་སོགས་ཀྱི་གནས་ཚུལ་ཁ་གསལ་མི་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།