རྒྱ་གཞུང་གིས་ ༢༠༢༥ ལོར་བོད་ཁུལ་ནས་སློབ་མ་ཁྲི་གཅིག་ལྷག་བསྡུས་ཏེ་རྒྱ་ནག་ནང་འཁྲིད་འདུག

ཉེ་སྔོན་བོད་རང་སྐྱོང་ལྗོངས་ཟེར་བའི་སློབ་གསོ་ཁང་ནས་གནས་ཚུལ་ཐོན་པ་ལྟར་ན། ཕྱི་ལོ་ ༢༠༢༥ ལོར་རྒྱ་ནག་གི་གྲོང་ཁྱེར་ཆེ་ཁག་ཏུ་བོད་ལྗོངས་འཛིན་གྲྭ་ཟེར་བའི་སློབ་གྲྭ་ཁག་ ༥ གསར་དུ་བཙུགས་ཏེ། བོད་ལྗོངས་དམའ་འབྲིང་འཛིན་གྲྭ་ ༡༥༠ གསར་འཛུགས་དང་། སློབ་མ་བསྡུ་གྲངས་ ༢༠༠༠། བོད་ལྗོངས་མཐོ་འབྲིང་འཛིན་གྲྭ་ ༢༠༥ དང་། སློབ་མ་བསྡུ་གྲངས་ ༤༥༠༠། བོད་ལྗོངས་འབྲིང་རིམ་ལས་རིགས་འཛིན་གྲྭ་ ༢༢༣ དང་། སློབ་མ་བསྡུ་གྲངས་ ༤༠༠༠། གྲངས་འབོར་དེའི་ནང་བོད་རང་སྐྱོང་ལྗོངས་ནས་སློབ་མ་ ༣༢༡༥ དང་། མཚོ་སྔོན་ཞིང་ཆེན་ནས་སློབ་མ་ ༧༨༥ ཡོད་འདུག

འདི་གའི་གསར་འགོད་པས་ཁ་པར་བརྒྱུད་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་བ་ཟླ་བ་ཚེ་རིང་ལགས་སུ་གནད་དོན་སྐོར་ནས་བཀའ་འདྲི་ཞུས་པར་ཁོང་གིས། རྒྱ་ནག་གཞུང་གིས་བོད་མི་རྣམས་ཆོས་ལུགས་ལ་མགོ་འཁོར་བསྡད་པ་ཡིན་ན་བོད་པ་རྗེས་ལུས་ཡིན་རབས་སོགས་བཤད་ནས་ལོ་བཅུ་གྲངས་ནས་ཉི་ཤུ་ཡས་མས་ཀྱི་བོད་པའི་སློབ་མ་རྣམས་རྒྱ་ནག་ཏུ་འཁྲིད་ཀྱི་ཡོད། རྒྱ་ནག་ཏུ་འཁྲིད་རྗེས་ཁོང་ཚོའི་བོད་མི་རིགས་ཀྱི་ཞེན་ཁོག་བརླག་གི་མེད་ཀྱང་།  རྒྱ་ནག་གི་སློབ་གསོའི་ཁོར་ཡུག་ཏུ་རྒྱའི་རིག་གཞུང་དང་ལྟ་གྲུབ་གཞིར་བཞག་གིས་སློབ་གསོ་སྤྲད་དེ། ཕྱིར་ཕ་ཡུལ་དུ་ལོག་པར་བཀག་འགོག་ཡུན་རིང་བྱེད་ཀྱི་ཡོད་ལ། རྒྱ་ནག་གིས་དེང་རབས་ལ་ཁ་ཕྱོགས་ནས་ཡར་རྒྱས་འགྲོ་དགོས་པ་དང་ལྷག་པར་དུ་ཚན་རིག་དང་དངོས་པོའི་ཡར་རྒྱས་འགྲོ་དགོས་པ་སོགས་བཤད་ནས་རྒྱའི་སློབ་གསོ་སྤྲོད་པའི་དམིགས་ཡུལ་བཟུང་ཡོད། གཉིས་རྒྱ་ནག་ཏུ་སློབ་སྦྱོང་བྱེད་མཁན་གྱི་བོད་པའི་སློབ་མ་ཚོ་སློབ་མཐར་ཕྱིན་རྗེས། རྒྱ་ནག་གཞུང་གིས་ཕྱིར་བོད་པའི་སྤྱི་ཚོགས་ནང་དུ་མངགས་ཏེ་ལས་ཀ་དང་གོ་གནས་སྤྲོད་ཀྱི་ཡོད་ལ། ཁོང་ཚོ་བོད་མི་ཡིན་པ་དང་སློབ་སྦྱོང་ཡོད་པ། ད་དུང་མི་རིགས་ཀྱི་ཞེན་ཁོག་ཡོད་སྟབས། གཅིག་ནས་བོད་མི་ཚོས་ཁོང་ཚོར་ཡིད་ཆེས་བྱེད་པ་དང་བོད་པའི་སྤྱི་ཚོགས་ནང་གི་མིག་དཔེ་ལྟ་ས་ཆགས་ཀྱི་རེད་བསམ་གྱི་ཡོད། ཕྱོགས་གཞན་ནས་ཁོང་ཚོའི་ལས་ཀ་བྱེད་སྟངས་ཚང་མ་རྒྱའི་རིག་གཞུང་དང་འབྲེལ་བསྡད་ཡོད་པས། བོད་མི་རྣམས་རྒྱ་བསྒྱུར་བྱེད་པའི་དམིགས་ཡུལ་བཟུང་ཡོད་ཅེས་གསུངས་སོང་ལ། འདི་གའི་གསར་འགོད་པས་རྒྱུས་ལོན་བྱས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། རྒྱ་ནག་གཞུང་གིས་བོད་པའི་སློབ་མ་རྩེ་ཕུད་ཀྱི་རིགས་རྒྱ་ནག་ཏུ་འཁྲིད་ནས་རིན་མེད་ཐོག་རྒྱ་བསྒྱུར་སློབ་གསོ་སྤྲོད་ཀྱི་ཡོད་པ་མ་ཟད། སྡོད་ཁང་དང་ཟ་མ་སོགས་ཀྱི་མཐུན་རྐྱེན་ཡག་པོ་བསྐྲུན་པའི་ཐོག གུང་སེང་སྐབས་རྒྱ་ནག་གི་གྲོང་ཁྱེར་ཆེ་ཁག་ཏུ་འཁྲིད་པ་སོགས་བྱས་ཏེ་བོད་ཀྱི་སྐད་ཡིག་དང་རིག་གཞུང་དང་ཁ་ཐག་རིང་དུ་གཏོང་གི་ཡོད་འདུག

ཡང་རྒྱ་ནག་གཞུང་འབྲེལ་གྱི་གནས་ཚུལ་དེའི་ནང་བཀོད་པ་ལྟར་ན། ཕྱི་ལོ་ ༢༠༢༣ ནས་བཟུང་བོད་ལྗོངས་འཛིན་གྲྭའམ་བོད་ལྗོངས་སློབ་འབྲིང་ཟེར་བ་སོགས་ཆེད་འཛུགས་ཀྱི་ལས་གཞི་རྒྱ་ཆེ་རུ་བཏང་སྟེ། ཕྱི་ལོ་ ༢༠༢༥ བར་གྱི་བསྟུད་མར་ལོ་གསུམ་རིང་སློབ་བསྡུའི་འཕར་ཚད་བརྒྱ་ཆ་ ༩.༩ ལ་བསླེབས་ཡོད་པ་དང་། བརྒྱ་ཆ་ ༧༠ ཡན་གྱི་སློབ་མ་ནི་ཞིང་འབྲོག་གི་བུ་དང་བུ་མོ་ཡིན་ལ། ཁོང་ཚོ་མཐའ་འཁོབ་ས་བབ་མཐོ་ས་ནས་ཡིན་སྐོར་དང་། འཕར་སྣོན་གསུམ་སྟེ་བཅའ་སྡོད་སློབ་མའི་གྲངས་འབོར་མུ་མཐུད་འཕར་སྣོན་དང་། ལོ་འཁོར་སློབ་བསྡུའི་གྲངས་འབོར་འཕར་སྣོན། སློབ་འཛུགས་གྲངས་འབོར་འཕར་སྣོན་བཅས་དང་། ཁེབས་པ་གསུམ་སྟེ། བོད་ཁུལ་གྱི་མི་རིགས་ཡོངས་སུ་ཁེབས་པ་དང་། མཐའ་འཁོབ་རྫོང་ཡོངས་ཁེབས་པ། མཐའ་མཚམས་བོད་སྐྱོར་གྲོང་ཁྱེར་སློབ་འཛུགས་ཡོངས་ཁེབས་པ། གཅིག་མཐུན་གཅིག་སྟེ། འབྲིང་རིམ་ལས་རིགས་འཛིན་གྲྭའི་མཐོ་འབྲིང་ལས་རིགས་གསོ་སྐྱོང་མངོན་འགྱུར་ཡོང་བ་བཅས་ཀྱི་ཆེད་དུ། ལོ་རེ་བཞིན་འཕར་སྣོན་གསུམ་དང་ཁེབས་པ་གསུམ། གཅིག་མཐུན་ཟེར་བ་ལག་བསྟར་དོན་འཁྱོལ་ཡོང་གི་ཡོད་སྐོར་བསྒྲགས་འདུག

རྒྱ་ནག་གཞུང་གིས་བོད་ཁུལ་གྱི་སློབ་གསོའི་བྱ་བ་རྗེས་ལུས་དང་ཤེས་ལྡན་མི་སྣ་ཉུང་ཉུང་ཡིན་པ་སོགས་བཤད་དེ། ཕྱི་ལོ་ ༡༩༨༤ ལོ་ནས་བཟུང་བོད་ཀྱི་ཤེས་ཡོན་གོང་འཕེལ་ལ་ཁ་གཡར་ནས་བོད་ལྗོངས་འཛིན་གྲྭ་ཟེར་བ་གཉེར་བའི་མགོ་བཙུགས་ཏེ། ད་ལྟའི་ཆར་རྒྱ་ནག་རྒྱལ་ཡོངས་ཀྱི་ཞིང་ཆེན་ ༢༣ དང་གྲོང་ཁྱེར་ ༦༠ ནང་སློབ་གྲྭ་ ༡༢༩ ཡོད་བཙུགས་ཡོད་ལ། ད་ལྟ་སློབ་གྲྭ་ཁག་ཏུ་ཡོད་བསྡད་པ་སློབ་མ་ཁྲི་ ༢.༥ དང་། ད་ལྟ་བར་དུ་སློབ་མ་ཁྲི་ ༡༨ སློབ་མཐར་ཕྱིན་ཟིན་ནས་བོད་ཁུལ་གྱི་ལས་རིགས་འདྲ་མིན་ནང་ནུས་པ་བཏོན་ཏེ། སྤྱི་ཚོགས་དཔལ་འབྱོར་འཕེལ་རྒྱས་ཐད་སྐྱེད་སྲིང་བྱེད་བཞིན་ཡོད་སྐོར་བརྗོད་འདུག

ཕྱི་ལོ་ ༡༩༩༦ ལོར་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་རྒྱ་ནག་པེ་ཅིན་དང་ཐེན་ཅིན། ཧྲང་ཧེ། ཧུའུ་པེ། ལོའུ་ལིན། ཅང་སུའུ། ཀྲི་ཅང་། ཧྥུ་ཅན། ཧྲན་ཏུང་། ཧའེ་ནན། ཧུའུ་ནན། ཧུའུ་པའེ། ཀང་ཏུང་། སི་ཁྲོན། ཧྲན་ཞི། ཁྲུང་ཆིན་སོགས་ཞིང་ཆེན་དང་གྲོང་ཁྱེར་ ༡༦ ཏུ། ནང་ལོགས་ཀྱི་བོད་ལྗོངས་འཛིན་གྲྭའམ་སློབ་གྲྭ་དང་འབྲེལ་བའི་ཡིག་ཆ་<<关于内地西藏班（校）扩大规模有关问题的请示》ཞེས་པ་གཏན་འབེབས་བྱས་ཡོད་པ་དང་། ཡིག་ཆ་དེའི་སྔོན་གླེང་ནང་དུ། ལས་དོན་འདི་ནི་ཆབ་སྲིད་ཀྱི་ལས་འགན་ཞིག་ཡིན་ལ། ཚད་མཐོའི་དོན་གཉེར་དང་སྒྲིག་འཛུགས་དོ་ནན། རྒྱབ་སྐྱོར་ཤུགས་ཆེན་བྱས་ཏེ་ལས་དོན་ལེགས་འགྲུབ་དགོས་ཞེས་བཀོད་འདུག

གསར་འགོད་པ། སྐལ་བཟང་སྦྱིན་པ། རྩོམ་སྒྲིག་བྱེད་མཁན། པདྨ་མཚོ།