བོད་ནི་གནའ་སྔ་མོ་ནས་རྒྱ་ནག་གི་ཆ་ཤིས་མིན་ཞེས་པའི་དཔེ་དེབ་ཅིག་དབུ་འབྱེད་བྱས་འདུག

རྒྱ་ནག་གི་གོང་མའི་ལོ་རྒྱུས་ཡིག་ཚགས་དང་གཞུང་འབྲེལ་ཡིག་ཆ། ཆིངས་ཡིག མིག་མཐོང་ལོ་རྒྱུས་བཅས་ལ་གཞི་བཅོལ་ནས་བོད་ནི་རྒྱ་ནག་གི་ཆ་ཤས་མིན་ཞེས་པའི་དཔེ་དེབ་གསར་པ་ཞིག་དབུ་འབྱེད་བྱས་འདུག

ཟླ་འདིའི་ཕྱི་ཚེས་ ༢༩ ཉིན་ཨ་རིའི་རྒྱལ་ཡོངས་དམངས་གཙོ་གོང་འཕེལ་ལྟེ་གནས་ཁང་གི་གོ་སྒྲིག་འོག སློབ་དཔོན་ཆེན་མོ་ཧོང་ཧྲིང་ལའོ་ལགས་ (Hon-Shiang Lau) ཀྱིས་བརྩམས་པའི་དཔེ་དེབ། བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་ཞེས་པ་དབུ་འབྱེད་ཀྱི་མཛད་སྒོ་ཚོགས་ཡོད་ཅིང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཨ་རིའི་རྒྱལ་སྤྱིའི་ཆོས་དད་རང་དབང་གི་གཞུང་ཚབ་ཟུར་པ་སེམ་བྷིརཎ་བྷེག་ (Sam Brownback) ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་པ་བུ་ཆུང་ཚེ་རིང་ལགས། བགྲོ་གླེང་གཙོ་སྐྱོང་བ་ཝ་ཤིན་ཊོན་ཆ་འཕྲིན་གྱི་ (Washington Post) ཀ་ཐིག་རྩོམ་པ་པོ་ཇོ་ཤི་རོ་གྷིན་ (Josh Rogin) ལགས་སོགས་གནད་ཡོད་མི་སྣ་མང་པོས་མཉམ་ཞུགས་བྱས་ཡོད་འདུག

སྐབས་དེར་རྩོམ་པ་པོ་ཧོང་ཧྲིང་ལའོ་ལགས་ཀྱིས་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་ཞེས་པའི་དཔེ་དེབ་དེ་ཕྱི་ལོ་ ༡༩༤༩ ཡར་སྔོན་གྱི་རྒྱ་ནག་གི་གཞུང་འབྲེལ་ངོས་འཛིན་ལྡན་པའི་ཡིག་ཆ་ཁག་དང་། ཕྱི་ལོ་ ༡༩༤༩ རྗེས་ཀྱི་རྒྱ་ནག་གཞུང་གིས་བསྐྱར་དུ་དཔར་སྐྲུན་བྱས་པའི་ཡིག་ཆ་ཁག དེ་བཞིན། རྒྱ་ནག་གཞུང་གི་བདག་ཉར་འོག་ཡོད་པའི་མི་མང་དཔེ་མཛོད་ཁང་ངམ་ཡང་ན་ཡིག་ཚགས་ཁང་སོགས་ཀྱི་དཔྱད་གཞི་རྒྱུ་ཆ་ཁག་གཞི་ལ་བཅོལ་ནས་བྲིས་ཡོད་སྟབས། རྒྱ་ནག་གཞུང་གིས་རྒྱ་ནག་གི་ལོ་རྒྱུས་ཡིག་ཚགས་ཁག་ལ་ངོ་རྒོལ་བྱེད་མི་ཐུབ་སྐོར་ངོ་སྤྲོད་དང་སྦྲགས། རྒྱ་ནག་གཞུང་གིས་ཕྱི་ལོ་ ༡༩༥༠ ཙམ་ནས་བོད་ཀྱི་ལོ་རྒྱུས་ལ་འཁྱོག་བཤད་བྱས་ཡོད་པ་དང་། དེ་དག་ལ་ཁ་གཏད་གཅོག་པར་ཁུངས་ལྡན་ཡིག་ཆ་ལ་བརྟེན་དགོས་སྐོར་དང་། ད་ལྟ་བོད་དོན་གྱི་ཆེད་དུ་རྒྱ་ནག་གཞུང་ལ་གནོན་ཤུགས་སྤྲོད་མཁན་ཉུང་ཉུང་ཡིན་པས། བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཐད་ཀར་རྒྱ་ནག་མི་མང་ལ་འབྲེལ་བ་བྱས་ཏེ་བོད་ཀྱི་དངོས་ཡོད་ལོ་རྒྱུས་སྐོར་ལ་གོ་རྟོགས་སྤེལ་རྒྱུ་གལ་ཆེན་ཡིན་སྐོར་སོགས་བརྗོད་ཡོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། སློབ་དཔོན་ལའོ་ལགས་ཀྱིས་རྒྱ་ནག་གི་རྒྱལ་རབས་ཡིག་ཆ་ཁག་བཀོལ་སྤྱོད་ཀྱིས། བོད་དང་འབྲེལ་བའི་རྒྱ་ནག་གི་འཁྱོག་བཤད་ལ་ཁ་གཏད་གཅོག་པའི་དཔེ་དེབ་འདོན་སྤེལ་གནང་བར་བསྔགས་བརྗོད་དང་འབྲེལ། སྲིད་སྐྱོང་མཆོག་གིས་འཛམ་གླིང་གི་གཞུང་ཁག་དང་འབྲེལ་བ་གནང་སྐབས་སློབ་དཔོན་ལའོ་ལགས་ཀྱི་བརྩམས་ཆོས་དང་། སྐུ་ཞབས་མ་ཁེལ་ཝན་ཝེལ་ལགས་ཀྱིས་ཁྲིམས་ལུགས་ཀྱི་དཔྱད་པ་གཞི་བཞག་པའི་བོད་ཀྱི་གནད་བསྡུས་ ༢༠།༢༠ ཞེས་པའི་དཔེ་དེབ་སོགས་ཡང་ཡང་ལུང་འདྲེན་གྱིས་བོད་དེ་རྒྱ་ནག་གི་ཆ་ཤས་མིན་པའི་ར་སྤྲོད་གནང་གི་ཡོད་སྐོར་གསུངས་ཡོད་འདུག

ཧོང་ཧྲིང་ལའོ་ལགས་ཀྱིས་བརྩམས་པའི་བོད་ནི་རྒྱ་ནག་གི་ཆ་ཤས་མིན་ཞེས་པའི་དཔེ་དེབ་དེ་ནི། འདས་པའི་ལོ་ངོ་བཅུ་ཕྲག་མང་པོའི་རིང་འབད་བརྩོན་ཆེན་པོས་ཞིབ་འཇུག་བྱས་པའི་གྲུབ་འབྲས་མཐར་ཐུག་ཅིག་ཡིན་པ་དང་། བོད་ཀྱི་གནའ་དེང་གི་ལོ་རྒྱུས་ཀྱི་ངོ་བོ་རྟོགས་པར་བྱེད་པའི་བྱས་རྗེས་ཆེན་པོ་ཞིག་ཏུ་གྱུར་ཡོད་ཅིང་། དཔེ་དེབ་དེ་རྒྱ་ནག་གི་གཞུང་འབྲེལ་ཡིག་ཆ་དང་། གོང་མའི་ལོ་རྒྱུས་ཡིག་ཚགས། ཆིངས་ཡིག མིག་མཐོང་ལོ་རྒྱུས་བཅས་ལ་གཞི་བཅོལ་ནས། བོད་དང་རྒྱ་ནག་བར་གྱི་འབྲེལ་བ་དེ་དབང་བསྒྱུར་གྱི་འོག་ནས་བྱུང་བ་ཞིག་མ་ཡིན་པར། རྒྱ་ནག་གི་དྲིལ་བསྒྲགས་ལས་ལོགས་སུ་གནས་པའི་རང་དབང་ཆེ་བ་དང་རྙོག་འཛིང་ཆེ་བའི་བོད་ཀྱི་ལོ་རྒྱུས་ཤིག་གསལ་བཤད་བྱས་ཡོད་པ་དེབ་ཀྱི་འགྲེལ་བརྗོད་དུ་བྲིས་འདུག

གསར་འགོད་པ། སྐལ་བཟང་སྦྱིན་པ།