རྒྱ་གར་ཉེན་རྟོག་པས་རྒྱ་མི་ཞིག་ཁྲིམས་འགལ་ཐོག་དྷ་རམ་ས་ལ་གནས་སྡོད་བྱེད་བཞིན་ཡོད་པར་ངོས་འཛིན་གྱིས་འཛིན་བཟུང་བྱས་ཡོད་པ་དང་ད་ལྟ་རྒྱ་མི་དེར་གསང་ཉུལ་བའི་དོགས་གཞིའི་འོག་ཞིབ་འཇུག་བྱེད་བཞིན་ཡོད་འདུག
དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། དྷ་རམ་ས་ལའི་མེག་གྷན་གྱི་ས་གནས་ཉེན་རྟོག་པས་མིང་ལ་ལོའུ་ཝིན་ནིན་ (Luo Wennian) ཟེར་བའི་རྒྱ་མི་ཞིག་འདས་པའི་ཟླ་ལྔའི་རིང་ཐོངས་མཆན་མེད་པར་དྷ་རམ་ས་ལར་གནས་སྡོད་བྱས་ཡོད་པར་བརྟེན། ད་ལྟ་འཛིན་བཟུང་བཀག་ཉར་འོག་བཅུག་ཡོད་པ་རེད།
དྷ་རམ་ས་ལའི་མེག་གྷན་ཉེན་རྟོག་པས། ཁ་སང་མེག་གྷན་དུ་རྒྱ་མི་ཞིག་ཁྲིམས་འགལ་ཐོག་གནས་སྡོད་བྱས་ཡོད་པའི་གནས་ཚུལ་ཞིག་ཤེས་རྟོགས་བྱུང་བ་དང་། ཉེན་རྟོག་པ་ཡུལ་དངོས་སུ་ཕྱིན་ནས་རྒྱ་མི་དེ་འཛིན་བཟུང་བྱས་པ་ཡིན། ང་ཚོས་ཁོའི་ཡིག་ཆ་ཁག་ལ་ཞིབ་འཇུག་བྱེད་སྐབས། ཡིག་ཆ་ཚད་ལྡན་མེད་པ་དང་ཐོངས་མཆན་གང་ཡང་མེད་པར་ཟླ་གསུམ་རིང་དྷ་རམ་ས་ལར་ཁང་པ་གླས་ནས་བསྡད་ཡོད་པ་ཤེས་རྟོགས་བྱུང་སོང་། ཞེས་བརྗོད་འདུག
དྷ་རམ་ས་ལའི་ཉེན་རྟོག་པས་ཞིབ་འཇུག་བྱས་པ་ལྟར་ན། རྒྱ་མི་དེ་འདས་ལོའི་ཕྱི་ཟླ་ ༩ ནང་བལ་ཡུལ་གྱི་ས་མཚམས་བརྒྱུད་རྒྱ་གར་ནང་འབྱོར་ཡོད་པ་དང་། རྒྱ་གར་གྱི་ས་ཆ་ཁག་ཅིག་ལ་འཁྱམ་ཉུལ་བྱས་རྗེས། ཐོངས་མཆན་མེད་པར་དྷ་རམ་ས་ལར་ཡོང་ནས་ཟླ་གསུམ་རིང་བསྡད་ཡོད་སྟབས། དེ་རིང་ཕྱི་ཚེས་ ༣ ཉིན་དྷ་རམ་ས་ལའི་ཉེན་རྟོག་ལས་ཁུངས་ཀྱིས་ཕྱི་མི་ཁྲིམས་འགལ་གྱི་གྱོད་དོན་ཞིག་ཁྲིམས་གཏུགས་བྱས་ཡོད་འདུག་ལ། ཉེན་རྟོག་ལས་ཁུངས་ཀྱིས་ཁྲིམས་ཁང་གི་ཐག་གཅོད་ཇི་བྱུང་ལྟར་ལག་བསྟར་དང་ཞིབ་འཇུག་མུ་མཐུད་བྱ་རྒྱུ་ཡིན་འདུག
རྒྱ་མི་དེ་དང་འབྲེལ་ནས། མེག་གྷན་གྱི་རྒྱ་གར་བའི་ཁང་བདག་གིས་རྒྱ་མི་དེ་ས་གནས་འབྲེལ་ཡོད་ལས་ཁུངས་ལ་ཁྲིམས་མཐུན་ཐོ་འགོད་བྱས་མེད་སྟབས། ཁང་བདག་ལའང་ཁྲིམས་ལུགས་ལྟར་ཉེས་ཆད་ཕོག་གི་ཡོད་པ་དང་། ཁོས་ཁང་བདག་དེར་ཟླ་རེར་ཧིན་ ༡༡༠༠༠ ཡི་ཁང་གླ་སྤྲད་ཡོད་འདུག ས་གནས་རྒྱ་གར་ཉེན་རྟོག་ལས་ཁུངས་ཀྱིས། དྷ་རམ་ས་ལའི་མགྲོན་ཁང་དང་སྡོད་ཁང་སོགས་ཁེ་གཏོང་བྱེད་མཁན་གྱི་སྦྱིན་བདག་ཚོས་དྷ་སར་གནས་སྡོད་བྱེད་མཁན་གྱི་ཕྱི་མི་ཚང་མ་ངེས་པར་དུ་ཐོ་འགོད་བྱས་ཏེ་ས་གནས་ཀྱི་འབྲེལ་ཡོད་ལས་ཁུངས་ཁག་ལ་ཤེས་རྟོགས་ཡོད་པར་བྱ་རྒྱུ་གལ་ཆེན་ཡིན་པ་དང་དེ་ལྟར་མ་བྱས་ཚེ་ཉེས་ཆད་ཕོག་གི་ཡོད་པའི་དྲན་སྐུལ་ཡང་བྱས་འདུག
རྒྱ་གར་གྱི་ (Write News 24) གསར་ཁང་གི་གནས་ཚུལ་ལྟར་ན། རྒྱ་གར་ཉེན་རྟོག་པས་རྒྱ་མི་དེར་ཞིབ་འཇུག་བྱེད་སྐབས། ཁོས་དེ་སྔ་ཡུ་ནན་ཞིང་ཆེན་གྱི་གཞུང་གི་ཕྱེད་འཛུགས་སྐྲུན་གྱི་བཟོ་གྲྭ་ཞིག་ཏུ་ལས་ཀ་བྱས་མྱོང་ཞིང་། རང་ཉིད་ཀྱི་དངུལ་བྱང་ནང་དུ་རྒྱ་སྒོར་ས་ཡ་ ༤ ཡོད་པའི་ཁར་ད་ལྟའང་རྒས་ཕོགས་ཐོབ་ཀྱི་ཡོད་ཀྱང་། དེ་སྔ་ཁོས་ལྐོག་ཟ་རུལ་སུངས་སྐོར་ལ་སྐད་ཆ་བཤད་སྟབས་བཟོ་གྲྭ་དེ་ནས་ཕྱིར་ཕུད་བཏང་ཡོད་སྐོར་སོགས་བརྗོད་ཡོད་འདུག་ལ། ཁོའི་ལག་ཏུ་ཁ་པར་དང་གློག་རྡུལ་ཡོ་ཆས་གཞན་ཁག་ཅིག་ཡོད་པའི་ཁར། ཁོས་དེ་སྔ་རྒྱ་ནག་གི་ཉེན་རྟོག་པ་བྱེད་མྱོང་བ་སོགས་ཀྱི་རྒྱུ་མཚན་ལ་བརྟེན་ནས། ད་ལྟ་རྒྱ་གར་གསང་བའི་ལས་ཁུངས་ཀྱིས་ཀྱང་རྒྱ་མི་དེར་གསང་ཉུལ་བའི་དོགས་གཞིའི་འོག་ཞིབ་འཇུག་བྱེད་བཞིན་ཡོད་འདུག
འདས་ལོའི་ཕྱི་ཟླ་ ༡༠ ཚེས་ ༩ ཉིན་རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གི་ལས་བྱེད་བུད་མེད་གཉིས་དང་སྐྱེས་པ་གཅིག་བཅས་ཡུལ་སྐོར་བར་བརྫུས་ནས་བཞུགས་སྒར་དྷ་རམ་ས་ལར་ཡོང་ཞིང་། བོད་པའི་མགྲོན་ཁང་ཞིག་ཏུ་ཐོ་འགོད་ཚུལ་བཞིན་མ་བྱས་པར་མཚན་གཅིག་བསྡད་དེ། མེག་གྷན་ཁྲོམ་གཞུང་གི་བོད་མི་ཞིག་ལ་བོད་མིའི་སྒྲིག་འཛུགས་སོགས་ཀྱི་སྐོར་ལ་གསང་བའི་སོ་ཉུལ་བྱས་ཡོད་པའི་གནས་ཚུལ་ཐོན་ཡོད་ལ། བོད་མིའི་སྒྲིག་འཛུགས་ཀྱིས་སྐབས་དེར་བོད་པའི་མགྲོན་ཁང་ཚོས་ཕྱི་མི་འགྲུལ་བ་དག་གི་མི་སེར་ལག་འཁྱེར་སོགས་ལ་ལྟ་ཞིབ་ནན་པོ་བྱེད་དགོས་པའི་འབོད་སྐུལ་གནང་ཡོད།
གསར་འགོད་པ། སྐལ་བཟང་སྦྱིན་པ།
