དེང་སང་རྒྱ་ནག་གཞུང་གི་ལས་བྱེད་ཡིན་པའི་བོད་མི་ཚོའི་ཁྱིམ་མི་འདས་གྲོངས་སུ་གྱུར་བ་ཡིན་ནའང་ཆོས་ཕྱོགས་ཀྱི་བྱེད་སྒོར་ཞུགས་ཆོག་གི་མེད་སྐོར་བརྗོད་བྱུང་།
ལོ་ལྟར་བོད་ཀྱི་ལོ་སར་སྐབས་རྒྱ་ནག་གཞུང་གིས་བོད་ཁུལ་ཡོངས་སུ་དམ་དྲག་དོགས་གཟོན་སྔར་ལྷག་བྱེད་བཞིན་ཡོད་པ་ལྟར། བོད་ཀྱི་རྒྱལ་ས་ལྷ་སར་གནས་སྡོད་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ལོ་སར་སྐབས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ཁུལ་དུ་དམག་མི་ཕོན་ཆེན་འགྲེམས་འཇོག་བྱས་ཏེ། བོད་མི་རྣམས་གཙུག་ལག་ཁང་དང་པོ་ཏ་ལའི་ནང་མཆོད་མཇལ་དུ་འགྲོ་བར་དམ་དྲག་དང་ཞིབ་བཤེར་ནན་མོ་བྱས་ཡོད་པ་མ་ཟད། སྲིད་གཞུང་གི་ལས་བྱེད་ཡིན་པའི་བོད་མི་རྣམས་དགོན་པ་སོགས་ཀྱི་ནང་སྤྲོ་འཆམ་དང་ལྟ་སྐོར་དུ་འགྲོ་ཆོག་གི་ཡོད་ཀྱང་། མཆོད་མཇལ་དང་ཕྱག་འཚལ་བ་སོགས་དད་མོས་བྱེད་མི་ཆོག གལ་སྲིད་གཞུང་གི་ལས་བྱེད་ཅིག་གིས་དད་མོས་བྱས་ཚེ་དམར་ཤོག་ཚོགས་པའི་ཁྲིམས་སྒྲིག་དང་འགལ་གྱི་ཡོད་པའི་ཉེན་བརྡ་བཏང་འདུག
འབྲེལ་ཡོད་བོད་མི་དེས་འདི་གའི་གསར་འགོད་པར། རྒྱ་ནག་གཞུང་གི་ལས་བྱེད་ཚོ་ཆོས་ཕྱོགས་ཀྱི་བྱེད་སྒོ་ཁག་ལ་ཞུགས་པར་སྨྲོས་ཅི་ལ་དགོས། རང་གི་ནང་མི་ཞིག་འདས་གྲོངས་སུ་གྱུར་ཀྱང་བདུན་ཚིགས་དང་འདས་མཆོད་སྐབས་སུ་མཉམ་ཞུགས་བྱེད་ཆོག་གི་མེད་པ་དང་། མཐའ་ན་ཕུང་པོ་མེར་སྲེག་གམ་དགོན་པ་སོགས་སུ་དུར་ལས་བྱེད་སྐབས་ཀྱང་མཉམ་ཞུགས་བྱ་ཆོག་གི་མེད་སྐོར་བརྗོད་བྱུང་།
རྒྱ་ནག་དམར་གཞུང་གི་དམ་དྲག་འོག བོད་ནང་གི་བོད་མི་ཚོས་མི་སྒེར་གྱི་སྤྱི་ཚོགས་དྲ་ལམ་ཁག་ཏུ་ལོ་སར་གྱི་སྨོན་འདུན་རིགས་མང་པོ་སྤེལ་བའི་ནང་དུ། བོད་ཀྱི་རྒྱལ་ས་ལྷ་སའི་པོ་ཏ་ལའི་མདུན་དང་བར་སྐོར་ནང་དུ་བོད་མི་སྟོང་ཕྲག་མང་པོ་འཛོམས་པའི་པར་རིས་བཞག་སྟེ། ང་ཚོའི་ཕ་གཞིས་བདེ་ཞིང་སྐྱིད་པར་སྨོན། ཞེས་པ་དང་། ཡང་༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་གཉིས་ཐལ་མོ་སྦྱར་བའི་སྐུ་པར་བཞག་སྟེ། བོད་ཀྱི་སྐད་ཡིག་གི་མེ་སྟག་ཕྱོགས་བཞིར་ཁྱབ་པ་དང་། ཡིད་བཞིན་ནོར་བུའི་སྐུ་ཚེ་བརྟན་པར་སྨོན། ཞེས་བྲིས་པ་ཞིག་འདི་གའི་གསར་འགོད་པས་ལག་གསོན་བྱུང་ཡོད་ཀྱང་། བོད་ནང་གི་བོད་མི་རྣམས་ཀྱི་བདེ་འཇགས་སླད་འདིར་སྤེལ་མེད།
འདས་པའི་ལོ་ཤས་ནང་རྒྱ་ནག་གཞུང་གིས་སྲིད་གཞུང་གི་ལས་བྱེད་དང་རྒན་ཡོལ་བ། སློབ་གྲྭ་ཁག་གི་དགེ་སློབ། དེ་བཞིན་ཆབ་སྲིད་ཀྱི་མིང་ཐོ་ནག་པོའི་ནང་ཚུད་པ་སོགས་ཕོ་བྲང་པོ་ཏ་ལ་དང་གཙུག་ལག་ཁང་གཙོ་བོར་གྱུར་བའི་དགོན་པའི་ནང་དུའང་འགྲོ་མི་ཆོག་པ་དང་། ཐ་ན་སྐེ་ལ་སྲུང་མདུད་དང་ཁྱིམ་དུ་རྩ་བའི་བླ་མའི་སྐུ་པར་སྒྲིག་བཤོམ་ཞུ་མི་ཆོག་པའི་དམ་དྲག་སྲིད་བྱུས་ལག་བསྟར་བྱེད་བཞིན་ཡོད་པ་རེད།
དེའི་ཐད་ཕྱི་ལོ་ ༢༠༢༣ ལོར་ཡུན་རིང་ལྷ་ས་རུ་ཡུལ་སྐོར་སྣེ་ཤན་གྱི་ལས་ཀ་བྱས་མྱོང་མཁན་ཞིག་གིས་འདི་ག་བོད་ཀྱི་དུས་བབ་གསར་འགོད་པར། སྤྱིར་བོད་རིགས་ལས་བྱེད་རྣམས་སྲིད་གཞུང་གི་བྱ་བར་ཞུགས་སྐབས་དང་དམར་ཤོག་ཚོགས་པའི་ནང་དུ་འཛུལ་སྐབས། དམར་ཤོག་ཚོགས་པའི་ཁྲིམས་སྒྲིག་ལ་མཐའ་གཅིག་ཏུ་བརྩི་སྲུང་བྱ་རྒྱུ་ཡིན་པའི་ཁས་ལེན་དམ་བཅའ་འཇོག་དགོས་ཀྱི་ཡོད་པར་བརྟེན། ཕོ་བྲང་པོ་ཏ་ལ་དང་གཙུག་ལག་ཁང་ལ་མཆོད་མཇལ་དུ་ཕྱིན་ན་ཁྲིམས་འགལ་སྒྲིག་འགལ་དུ་བརྩི་ཡི་ཡོད་ནའང་། བོད་རིགས་ལས་བྱེད་མང་པོ་ཞིག་ཁུ་སིམ་སིམ་ངང་ས་གནས་གཞན་དུ་གནས་སྐོར་དང་མཆོད་མཇལ་དུ་འགྲོ་དགོས་པ་ཆགས་ཀྱི་ཡོད་སྐོར་བརྗོད་བྱུང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
༄། བཀུར་འོས་རྩོམ་སྒྲིག་པ་མཆོག་དང་། གསར་འགོད་པ་རྣམས་ལ་ཞུ་རྒྱུ། དང་པོ། གསར་ཤོག་ནང་། དོན་ཚན་འགའ་ཤས་བརྩི་དུས། གཅིག་ གཉིས་ གསུམ་ ཟེར་ནས་བཀོད་པ་འདི་ཚོ། བོད་ཡིག་རང་གི་འགྲོས་དང་གཏན་ནས་མི་མཐུན་པས། དང་པོ། གཉིས་པ། གསུམ་པ། ཟེར་བ་སོགས་ངེས་པར་དུ་འབྲི་དགོས། གཉིས་པ། དེང་སང་”འཛད་སྤྱོད་”དང་། “འཛད་སྤྱོད་པ་”ཟེར་བ་ཞིག་འབྲི་སྲོལ་དར་བ་འདི། གཏན་ནས་མི་འགྲིགས། “འཛད་” ནི། ཟད་པ་དང་། རྫོགས་པའི་དོན་རེད། གོའང་མི་བདེ་བས། ཚིག་གཞན་པ་ཞིག་ངེས་པར་དུ་འབྲི་དགོས། གསུམ་པ། ཡི་གེ་འབྲི་དུས། བརྗོད་དོན་མ་འདྲེས་པར་། མཐོང་བ་ཙམ་གྱིས་སོ་སོར་འབྱེད་ཐུབ་པའི་ཆེད། ཤད་རེ་འཐེན་ནས། བར་སྟོང་འཇོག་དགོས་པ་གནད་ཆེ། དངོས་གནས་བྱས་ན། བརྗོད་དོན་ཁོངས་ལ། ག་དུས། ག་པར། སུས། སུ་ལ། གང་འདྲ། ག་ཚོད། ག་རེའི་དོན་དག ལ་སོགས་པ་སོ་སོར་བཀྲལ་ནས་འབྲི་དགོས་པའི་ཐོབ་ཐང་ཡོད་རེད། དེ་ཙམ་མ་བྱུང་ནའང་། ག་ཚོད་ཐུབ་ཐུབ་ཅིག ཁ་བཀྲལ་ནས་བྲིས་ན། གོ་དོན་འཕེར་ལ། ལྷག་པར་ང་ཚོའི་གཞོན་སྐྱེས་ཚོར། ཀློག་བདེ་བ་འོང་ངེས་རེད་ལགས། ང་ཚོར་དེ་ཚོ་ཚང་མ་སྦྲེལ་ནས་འབྲི་བའི་གོམས་གཤིས་ནོར་བ་ཞིག་ཡོད་དེ་ཚོ། གསར་ཤོག་འདིའི་བརྒྱུད། ལེགས་བཅོས་གཏོང་ཐུབ་པའི་ནུས་པ་ཡོད་རེད། ཐུགས་རྗེ་ཆེ། འཚམས་འདྲི་བཅས། ༢༠༢༦། ༢། ༡༨ ཉིན་ཕུལ།