དཔལ་ལྡན་རྒྱུད་སྟོད་གྲྭ་ཚང་གི་མཁན་རབས་ ༡༢༩ པ་སེར་བྱེས་ཧར་གདོང་ཚོགས་ཆེན་སྤྲུལ་སྐུ་ཁང་སེར་མཆོག་སྤྲུལ་༸རྗེ་བཙུན་བསྟན་འཛིན་ཚུལ་ཁྲིམས་དཔལ་ལྡན་དཔལ་བཟང་པོ་མཆོག་གསེར་ཁྲི་མངའ་གསོལ་ཞུས་ཡོད་པ་རེད། 
༧གོང་ས་རྒྱལ་བ་རིན་པོ་ཆེ་མཆོག་ནས་སེར་བྱེས་ཧར་གདོང་ཚོགས་ཆེན་སྤྲུལ་སྐུ་ཁང་སེར་མཆོག་སྤྲུལ་༸རྗེ་བཙུན་བསྟན་འཛིན་ཚུལ་ཁྲིམས་དཔལ་ལྡན་དཔལ་བཟང་པོ་མཆོག་དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་ཀྱི་ལས་ཁུར་ལེགས་པར་གྲུབ་ནས་མཁན་རབས་བརྒྱ་དང་ཉེར་དགུ་པའི་ཕྱག་རྟགས་རིན་པོ་ཆེ་བསྩལ་དོན་བཞིན། དེ་རིང་ཕྱི་ཚེས་ ༢ ཉིན་རྒྱུད་སྟོད་ར་མོ་ཆེ་གཉིས་པའི་གཙུག་ལག་ཁང་དུ། སེར་བྱེས་ཧར་གདོང་ཚོགས་ཆེན་སྤྲུལ་སྐུ་ཁང་སེར་མཆོག་སྤྲུལ༸རྗེ་བཙུན་བསྟན་འཛིན་ཚུལ་ཁྲིམས་དཔལ་ལྡན་དཔལ་བཟང་པོ་མཆོག་དཔལ་ལྡན་རྒྱུད་སྟོད་གྲྭ་ཚང་གི་མཁན་པོར་ཁྲི་འདོན་མཛད་ཡོད་པ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཟླ་བ་ཕུན་སྐྱིད་ལགས་དང་། ཧི་མ་ཅལ་མངའ་སྡེ་ནས་ཡིན་པའི་གྲོས་ཚོགས་འཐུས་མི་སྐུ་ཞབས་སུ་ཌིར་ཤེ་ཤར་མ་( Shri Sudhir Sharma)ལགས། དགའ་ལྡན་ཕོ་བྲང་གི་དྲུང་ཆེ་འཆི་མེད་རིག་འཛིན་ལགས། ཆོས་རིག་དྲུང་ཆེ་བདུད་འདུལ་རྡོ་རྗེ་ལགས། དེ་བཞིན་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས། གདན་ས་གྲྭ་ཚང་ཁག་གི་སྐུ་ཚབ་སོགས་ཕེབས་ཡོད་འདུག 
དེ་རིང་སྔ་དྲོའི་ཆུ་ཚོད་ ༨ པའི་ཐོག་ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་ཀྱིས་མཁན་རིན་པོ་ཆེ་མཆོག་གཟིམ་ཤག་ནས་སྤོས་སྣེ་བསྔུན་བསུས་ཏེ་ཕྱག་མཛོད་ཁང་དང་དེ་ནས་འདུ་ཁང་དུ་གདན་འདྲེན་ཞུས་ཏེ། མཎྜལ་རྟེན་གསུམ་འདེགས་འབུལ་ཞུས་ནས་སྨོན་ལམ་གསུང་འདོན་གནང་ཡོད་འདུག
སེར་བྱེས་ཧར་གདོང་ཚོགས་ཆེན་སྤྲུལ་སྐུ་ཁང་སེར་མཆོག་སྤྲུལ༸རྗེ་བཙུན་བསྟན་འཛིན་ཚུལ་ཁྲིམས་དཔལ་ལྡན་དཔལ་བཟང་པོ་མཆོག་ནི་ཕྱི་ལོ་ ༡༩༧༥ ལོར་བལ་ཡུལ་དུ་སྐུ་འཁྲུངས་ཤིང་། དགུང་ལོ་དགུར་དགེ་ཚུལ་གྱི་སྡོམ་པ་བཞེས། གཞུང་ཆེན་བཀའ་པོད་སྔགས་དང་ཕྱི་ནང་གི་སྐད་ཡིག་རིག་གནས་ཐོག་བསླབ་པ་སློབ་གཉེར་གནང་སྟེ། དགེ་ལུགས་རྒྱུགས་སྤྲོད་ཀྱི་བཀའ་རམས་དང་སློབ་དཔོན་སོགས་ཨང་དང་པོར་ཐོབ་སྟེ། ཕྱི་ལོ་ ༢༠༠༢ ལོར་དགེ་བཤེས་ལྷ་རམས་པ་ཨང་དང་པོར་ཐོན། ༧གོང་ས་རྒྱལ་བ་རིན་པོ་ཆེ་མཆོག་གི་དྲུང་ནས་དགེ་སློང་གི་སྡོམ་པ་བཞེས།
ཕྱི་ལོ་ ༢༠༠༥ ལོར་རྒྱུད་སྟོད་དུ་བཞུགས་ཏེ་གསང་སྔགས་ཀྱི་སློབ་གཉེར་གནང་བ་དང་། སེར་བྱེས་གྲྭ་ཚང་དུ་ལོ་མང་རིང་དཔེ་ཁྲིད་དགེ་རྒན་གནང་། དེའི་རྗེས་དགའ་ལྡན་ཁྲི་ཐོག་ཁང་གི་དྲུང་ཆེ་ལོ་གཉིས་རིང་གནང་། ཕྱི་ལོ་ ༢༠༡༣ ལོར་སོག་ཡུལ་མི་མང་རྣམས་ལ་ནང་ཆོས་ངོ་སྤྲོད་གནང་བ་སོགས་ཆོས་ཕྱོགས་ཀྱི་མཛད་པ་རྒྱ་ཆེན་བསྐྱངས་བར་སོག་པོའི་གཞུང་གིས་གཟེངས་རྟགས་ཕུལ་ཡོད་པ་རེད། ཕྱི་ལོ་ ༢༠༢༣ ལོར་དཔལ་ལྡན་རྒྱུད་སྟོད་གྲྭ་ཚང་དུ་བླ་མ་དབུ་མཛད་གནང་ནས་ཕྱི་ལོ་ ༢༠༢༦ ལོར་མཁན་པོའི་ཕྱག་འཁྱེར་བཞེས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
