གཞིས་ཆགས་ཁག་ནང་དབུ་མའི་ལམ་གྱི་གོ་རྟོགས་སྤེལ་བའི་སྐོར་སྐྱོད་གནང་འདུག

དབུ་མའི་ལམ་གྱི་སྲིད་ཇུས་དེ་ནི་བོད་པའི་ལས་དབང་དང་བཙན་བྱོལ་ནང་གི་བོད་མི་ཙམ་མིན་པར་གཞིས་ལུས་བོད་མི་དང་་བོད་ནང་གི་ཛ་དྲག་གི་གནས་སྟངས་མྱུར་དུ་སེལ་བའི་ཐབས་ལམ་དང་ཐད་ཀར་འབྲེལ་བ་ཡོད་སྐོར་བརྗོད་བྱུང་།

འདི་ལོའི་ཕྱི་ཟླ་ ༢ ཚེས་ ༢༧ ནས་ཟླ་འདིའི་ཕྱི་ཚེས་ ༤ བར་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག ལས་འགུལ་ཁང་གི་ཚོགས་གཞོན་བསྟན་འཛིན་བཤེས་གཉེན་ལགས་དང་། དབུས་རྒྱུན་བསྟན་འཛིན་ཀུན་བཟང་ལགས་གཉིས་ཀྱིས། དབུ་མའི་ལམ་གྱི་གོ་རྟོགས་སྐོར་བསྐྱོད་ཅེས་པའི་བརྗོད་གཞིའི་ཐོག རྒྱ་གར་བྱང་ཕྱོགས་རྡེ་ར་ལྡུན་ཁུལ་གྱི་བོད་པའི་གཞིས་ཆགས་བདུན་གྱི་ནང་དབུ་མའི་ལམ་གྱི་བྱུང་རིམ་དང་གྲུབ་འབྲས། དེ་བཞིན་ངོ་བོ་དང་ཁྱད་ཆོས་སོགས་ཀྱི་སྐོར་གཏམ་བཤད་དང་དྲི་བ་དྲིས་ལན་སོགས་གནང་འདུག 

གནས་ཚུལ་དེའི་ཐད་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཞོན་མོང་བཟའ་བསྟན་འཛིན་གཤེས་གཉེན་ལགས་ཀྱིས་འདི་གའི་གསར་འགོད་པར། ད་ལན་དབུ་ལམ་གོ་རྟོགས་སྐོར་སྐྱོད་ཅེས་རྡེ་ར་ལྡུན་དང་ཉེ་འགྲམ་པུ་རུ་ཝ་ལ། བ་ལུ་ཝ་ལ་སོགས་ཚུད་པའི་ས་གནས་ཁག་བདུན་ཆ་ཚང་ལ་སྐོར་སྐྱོད་བྱ་རྒྱུའི་གོ་སྐབས་དེ་རག་བྱུང་། སྐབས་དེར་ང་ཚོགས་གཞོན་བསྟན་འཛིན་བཤེས་གཉེན་དང་སྐབས་བདུན་པའི་རྒྱུན་ལས་གསར་པ་བསྟན་འཛིན་ཀུན་བཟང་གིས་དབུ་མའི་ལམ་གྱི་འབྱུང་རིམ་དང་། གྲུབ་འབྲས། དབུ་མའི་ལམ་གྱི་ངོ་བོ་དང་ཁྱད་ཆོས་སྐོར་ལ་གཏམ་བཤད་སྤེལ་བ་རེད། གཙོ་ཆེ་ཤོས་དེ་སྐབས་དེར་མི་མང་འདུ་འཛོམས་དང་རྒྱབ་སྐྱོར་ཡག་པོ། དེ་བཞིན་དྲི་བ་དྲིས་ལན་ཁག་དཔེ་མང་པོ་ཞིག་བྱུང་སོང་། ང་ཚོས་དབུ་མའི་ལམ་གྱི་སྲིད་ཇུས་དེ་དམངས་གཙོའི་ནང་༧གོང་ས་རྒྱལ་བ་རིན་པོ་ཆེ་མཆོག་དགོངས་གཞི་ཙམ་མ་ཡིན་པར། མི་མང་གིས་གཏན་འབེབས་གནང་བཞག་པ་ཞིག་ཡིན་པ་དང་། བོད་མིའི་ལས་དབང་དང་། བདེ་སྐྱིད་ལ་ཐད་ཀར་འབྲེལ་བ་ཡོད་པའི་སྐོར་མི་མང་ལ་འགྲེལ་བརྗོད་བྱེད་སྐབས། མི་མང་གིས་སྔར་ཡོད་པའི་གོ་རྟོགས་གོང་འཕེལ་དང་ཁ་གསལ་བྱུང་སོང་ཞེས་དང་། མུ་མཐུད་དུ་མ་འོངས་པར་ཡོང་རོགས་བྱོས་ཞེས། དམིགས་བསལ་སློབ་གྲྭ་ཁག་སོགས་ནས་རེ་འབོད་གནང་མཁན་མང་པོ་ཞིག་བྱུང་སོང་། ཞེས་བརྗོད་བྱུང་།

ཡང་ཁོང་མོས། སྤྱིར་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གིས་རྡེ་ར་ལྡུན་ཁུལ་དུ་དབུ་མའི་ལམ་གྱི་སྲིད་ཇུས་གོ་རྟོགས་སྐོར་སྐྱོད་འགྲོ་ཐེངས་གཉིས་པ་ཆགས་ཡོད་པ་དང་། པུ་རུ་ཝ་ལ། བ་ལི་ཝ་ལ། བྷ་ལུ་ཝ་ལ་ས་གནས་བཅས་སུ་སྐོར་སྐྱོད་ཐེངས་དང་པོ་རེད། སྐབས་དེར་མི་མང་གི་གོ་རྟོགས་ཟེར་ན་སྤྱིར་བཏང་གི་དབུ་མའི་ལམ་གྱི་སྲིད་ཇུས་དེར་ཆབ་སྲིད་ཀྱི་ལྟ་བ་དང་ལྟ་སྒྲུབ་གཏིང་ཟབ་པོ་ཞིག་ཡིན་དུས། མི་མང་ཁག་ཅིག་གིས་དབུ་ལམ་སྐོར་དཔེ་ཡག་པོ་མཁྱེན་པ་དང་། ཡང་ཁག་ཅིག་ལ་ད་ལན་གོ་རྟོགས་གསར་པ་བྱུང་བ་རེད་འདུག མི་མང་མང་པོ་ཞིག་གིས་ས་གནས་སུ་ཡང་བསྐྱར་ཡོང་ན་གོ་རྟོགས་སྤེལ་ན་ཁ་ཇེ་གསལ་ཡོང་བའི་རེ་འབོད་གནང་མཁན་ཡང་འདུག་པས། ང་ཚོས་ཀྱང་ས་གནས་གང་མང་མང་ཞིག་ལ་འགྲོ་ཐུབ་པ་དང་གོ་རྟོགས་དེ་སྟབས་བདེ་པོ་ངང་དང་། མི་མང་ལ་བསྟུན་ནས་སྐད་ཆ་ཁ་གསལ་ངོ་སྤྲོད་ཞུ་ཐབས་བྱེད་ཀྱི་ཡོད། ལྷག་པར་ངོ་སྤྲོད་སྐབས་དབུ་མའི་ལམ་གྱི་སྲིད་ཇུས་དང་འབྲེལ་ནས་སྐད་ཆ་བཤད་སྐབས། ང་ཚོའི་སྐད་ཆ་མ་འདྲེས་པར་དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་སྟོན་པའི་དབུ་མའི་ལམ་དང་འབྲེལ་བའི་ཕྱག་དེབ་ལྗང་ཁུ་ཞིག་སྟེ། དབུ་མའི་ལམ་ངོ་སྤྲོད་དང་དེ་འབྲེལ་གྱི་ཡིག་ཆ་ཞེས་པ་དེར་གཞི་བཞག་ནས། ཕྱག་དེབ་དེའི་ནང་དོན་དང་འབྱུང་རིམ་སོགས་ལ་གཞི་བཞག་པའི་ཐོག་ནས་ངོ་སྤྲོད་ཞུ་བའི་འབད་བརྩོན་ཞུས་ཡོད། ཅེས་བརྗོད་བྱུང་།

ཁོང་མོས་མུ་མཐུད་དུ། དབུ་མའི་ལམ་གྱི་སྲིད་ཇུས་དེ་ནི་བོད་པའི་ལས་དབང་དང་། བཙན་བྱོལ་ནང་གི་བོད་མི་ཙམ་མིན་པར་གཞིས་ལུས་བོད་མིའི་ས་ཡ་བདུན་ནས་བརྒྱད་བར་གྱི་ལས་དབང་།  ཛ་དྲག་གི་གནས་སྟངས་མྱུར་དུ་གསལ་བའི་ཐབས་ལམ་དང་ཐད་ཀར་འབྲེལ་བ་ཡོད་སྟབས་གལ་ཆེན་པོ་ཡིན་པ་དང་། དམིགས་བསལ་སྲིད་ཇུས་འདི་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་ཡིན་ནའང་། ༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་གནང་བ་ཙམ་མ་ཡིན་པར། མི་མང་གིས་ཆ་ཤས་བླངས་ནས་འོས་འཕངས་ཏེ་གཏན་ལ་ཕབ་པའི་སྲིད་ཇུས་ཤིག་ཡིན་པས་འདི་གལ་ཆེན་པོ་ཡིན་པའི་ཐད། ད་ལན་གྱི་གཏམ་བཤད་ལས་རིམ་ནང་མཚོན་ཐུབ་རྒྱུའི་ཐབས་ཤེས་ཞུས་ཡོད། ཅེས་བརྗོད་བྱུང་། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།