རྒྱ་ནག་གཞུང་གིས་ཨ་ཉག་སེང་སྒྲ་ལགས་ལ་ཕྱི་ཕྱོགས་སུ་འབྲེལ་བ་ཡོད་པའི་དོགས་གཞིའི་འོག་ཁོང་གི་ཁ་པར་བཙན་འཕྲོག་གིས་ཕྱི་ནང་གི་འབྲེལ་ལམ་བཅད་དེ་སྔར་ལས་རྟོག་ཞིབ་ནན་པོ་བྱེད་བཞིན་ཡོད་འདུག
ཨ་ཉག་སེང་སྒྲ་ལགས་ཀློད་གྲོལ་བཏང་། འབྲེལ་ཡོད་ནས་པར་མཁོ་སྤྲོད་གནང་། ༢༠༢༦།༢།༩
འདི་ག་གསར་ཁང་ལ་ཁུངས་ལྡན་གནས་ཚུལ་འབྱོར་བ་ལྟར་ན། ཉེ་སྔོན་ཕྱི་ཟླ་ ༢ ཚེས་ ༨ ཉིན་བོད་ཀྱི་ཁོར་ཡུག་སྲུང་སྐྱོབ་པ་ཨ་ཉག་སེང་སྒྲ་ལགས་ཀྱི་བཙོན་འཇུག་དུས་ཡུན་ཚང་སྟེ་ཀློད་གྲོལ་བཏང་རྗེས། ཁོང་གི་གནས་ཚུལ་དང་པར་ཞིག་བོད་ཀྱི་ཕྱི་ཕྱོགས་སུ་ཁྱབ་པ་དང་འབྲེལ་ནས། ཨ་ཉག་སེང་སྒྲ་ལགས་སུ་བསྐྱར་དུ་འདྲི་བརྩད་བྱས་ཏེ། ཁོང་གི་ཁ་པར་ལ་ཞིབ་བཤེར་བྱ་རྒྱུ་ཡིན་སྐོར་བརྗོད་དེ་བཙན་འཕྲོག་བྱས་ཡོད་པ་མ་ཟད། ད་ལྟ་ཁོང་ཕ་ཡུལ་མགོ་ལོག་དགའ་བདེ་རྫོང་རྐྱང་ཆད་ཡུལ་ཚོའི་རང་ཁྱིམ་དུ་ཡོད་ཀྱང་། འབྲེལ་གཏུགས་བྱེད་ས་གང་ཡང་མེད་པར་བཟོས་ཏེ་འགྲོ་འདུག་སོགས་ཀྱི་རང་དབང་ལ་དམ་དྲག་སྔར་ལྷག་བྱེད་བཞིན་ཡོད་འདུག
དེའི་ཐད་འདི་གའི་འབྲེལ་ཡོད་གནས་ཚུལ་མཁོ་སྤྲོད་པས། ཉེ་ལམ་ཨ་ཉག་སྐོར་གྱི་གནས་ཚུལ་དང་པར་ཞིག་ཕྱིར་ཁྱབ་པ་དང་འབྲེལ་ནས། ཨ་ཉག་སེང་སྒྲ་ལགས་སུ་བསྐྱར་དུ་འདྲི་བརྩད་བྱས་ཏེ་ཁ་པར་ཡང་བཙན་འཕྲོག་བྱས་འདུག ད་ལྟ་ཁོང་ལ་འབྲེལ་བ་བྱེད་ས་གང་ཡང་མེད། ཅེས་དང་། ཉེ་སྔོན་ཁོང་ལ་སྨན་བཅོས་བརྟག་དཔྱད་བྱས་ཡོད་པ་དང་། ད་ལྟ་ངལ་གསོ་བརྒྱབ་སྟེ་ལུས་ཁམས་གསོ་དགོས་ཀྱི་འདུག ཅེས་བརྗོད་བྱུང་ལ། འདི་ལོར་ཁོང་ཀློད་གྲོལ་ཐོབ་སྐབས། ཁོང་གི་མཁལ་མ་ནད་པ་དང་མིག་ཤེས་ཉམས་པ། དེ་བཞིན་ཁྲག་ཤེད་ན་ཚ་ཡོད་པའི་གནས་ཚུལ་ཐོན་ཡོད་པ་རེད།
བོད་ཀྱི་ཁོར་ཡུག་སྲུང་སྐྱོབ་པ་དང་ལྐོག་ཟ་རུལ་སུངས་ཐེར་འདོན་པ་ཨ་ཉག་སེང་སྒྲ་ལགས་ཀྱིས་ས་གནས་སྲིད་གཞུང་གི་དཔོན་རིགས་ཚོས་དབང་ཆ་ལོག་སྤྱོད་དང་ལྐོག་ཟ་རུལ་སུངས། ཁྲིམས་འགལ་གྱིས་རང་བྱུང་གཏེར་ཁ་སྔོག་འདོན་དང་རྩ་ཆེའི་རི་སྐྱེས་སེམས་ཅན་རྔོན་པ་བཅས་ལ་ངོ་རྒོལ་གྱི་ལས་འགུལ་སྤེལ་ནས་ས་གནས་འབྲོག་པ་མང་ཚོགས་ཀྱིས་ཁོང་ལ་རྒྱབ་སྐྱོར་དང་དགའ་མགུ་ཡི་རངས་བྱེད་ས་ཞིག་ཏུ་གྱུར་བར་བརྟེན། ཕྱི་ལོ་ ༢༠༡༤ ལོར་རྒྱ་ནག་གཞུང་གིས་ཨ་ཉག་སེང་སྒྲས་ཁྲིམས་འགལ་བྱས་ཡོད་ཚུལ་བརྗོད་ནས་འཛིན་བཟུང་གིས་ལོ་གཅིག་དང་ཟླ་གསུམ་གྱི་བཙོན་འཇུག་ཁྲིམས་ཐག་བཅད། ཕྱི་ལོ་ ༢༠༡༦ ཟླ་ ༡༠ ཚེས་ ༡༨ ཉིན་ཟི་ལིང་ཏུང་ཁྲན་ (东川) བཙོན་ཁང་ནས་ཀློད་གྲོལ་བཏང་། ཕྱི་ལོ་ ༢༠༡༨ ལོར་རྒྱ་གཞུང་གིས་སྤྱི་ཚོགས་དཀྲུག་རྐྱེན་བཟོས་པའི་ཉེས་མིང་འོག་ཨ་ཉག་སེང་སྒྲ་ལགས་བསྐྱར་དུ་འཛིན་བཟུང་བྱས། ཕྱི་ལོ་ ༢༠༡༨ ལོའི་ལོ་མཇུག་དང་ ༢༠༡༩ ལོའི་ལོ་མགོར་ཨ་ཉག་སེང་སྒྲའི་བཟའ་ཟླ་གཡང་སྐྱིད་དང་ཁྲིམས་རྩོད་པ་ལིན་ཆི་ལི་སོགས་ཀྱིས་ཁྲིམས་གཏུག་རིམ་པ་བྱས་ནའང་། ཕྱི་ལོ་ ༢༠༡༩ ལོའི་ཟླ་ ༡༢ ཚེས་ ༦ ཉིན་ཨ་ཉག་སེང་སྒྲ་ལགས་སུ་དཀྲུག་རྐྱེན་བསླངས་བ་དང་སྤྱི་ཚོགས་ཀྱི་སྒྲིག་གཞིར་གཏོར་བཤིག་བཏང་བའི་འདུ་འཛོམས་བྱས་པ་སོགས་ཀྱི་ཉེས་མིང་འོག ལོ་ ༧ བཙོན་འཇུག་ཁྲིམས་ཐག་བཅད། འདས་ལོའི་ཕྱི་ཟླ་ ༩ ནང་ཨ་ཉག་སེང་སྒྲ་ལགས་ཀྱི་བཙོན་འཇུག་དུས་ཡུན་རྫོགས་ཡོད་ཀྱང་། རྒྱ་ནག་གིས་ཨ་ཉག་སེང་སྒྲས་བཙོན་ཁང་དུ་ཁྲིམས་འགལ་བྱས་ལུགས་ཀྱི་ནག་ཉེས་བཙུགས་ཏེ། འདི་ལོའི་ཕྱི་ཟླ་ ༢ པའི་བར་དུ་དུས་ཡུན་ཕར་འགྱངས་བྱས།
ད་ལྟ་རང་ལོ་ ༥༥ ཡིན་པའི་ཨ་ཉག་སེང་སྒྲ་ལགས་ནི་མགོ་ལོག་དགའ་བདེ་རྫོང་རྐྱང་ཆད་ཡུལ་ཚོ་ནས་ཡིན་པ་དང་། ཁོང་གིས་དམངས་དོན་གླེང་ཞེས་པའི་ཚོགས་པ་ཞིག་བཙུགས་ཏེ། ས་གནས་སྲིད་གཞུང་གིས་གོང་རིམ་ནས་མི་མང་ལ་སྤྲད་པའི་སྐྱོབ་གསོ་རོགས་དངུལ་ལྐོག་ཟ་བྱས་པ་དང་། ཁྲིམས་འགལ་ཐོག་གཏེར་ཁ་སྔོག་འདོན་བྱས་པ། དབྱེ་འབྱེད། ད་དུང་མི་རིགས་ཀྱི་བདེ་སྡུག་ལ་ལྟ་རྟོག་མི་བྱེད་པ་དང་། ལྷག་པར་དུ་ས་གནས་ཀྱི་མི་དམངས་སྐྱོ་བོ་ཚོར་ལྟ་རྟོག་མི་བྱེད་པ་སོགས་ཀྱི་གནད་དོན་མང་པོ་ཞིག་ཐེར་འདོན་བྱས་ནས་རྫོང་དང་ཁུལ། ཞིང་ཆེན་རིམ་པར་ཞུ་གཏུག་བྱས་མྱོང་བ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
