རྒྱ་ནག་དབུས་ཆབ་སྲིད་ལྷན་ཁང་གི་ལམ་སྟོན་ལྟར་རྒྱལ་ཡོངས་དམངས་ཆེན་གྱི་ཚོགས་འདུའི་ཐོག་<<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་རྒྱས་ལ་སྐུལ་འདེད་ཀྱི་བཅའ་ཁྲིམས་>>ཟེར་བ་ཞིག་གཏན་འབེབས་བྱས།
ཁ་སང་ཕྱི་ཚེས་ ༡༢ ཉིན་རྒྱ་ནག་གཞུང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་རྒྱས་ལ་སྐུལ་འདེད་ཀྱི་བཅའ་ཁྲིམས་ཟེར་བ་དེ་གཏན་འབེབས་བྱས་ཡོད་ཅིང་།་རྒྱ་ནག་དམར་ཤོག་སྲིད་གཞུང་གི་མགྲིན་པ་ལྟ་བུར་གྱུར་བའི་རྒྱ་ནག་ཤིན་ཧཱ་གསར་ཁང་གིས། བཅའ་ཁྲིམས་དེ་གཏན་འབེབས་བྱེད་སྐབས། རྒྱབ་སྐྱོར་བྱེད་མཁན་མི་གྲངས་ ༢༧༥༦ དང་། རྒྱབ་སྐྱོར་མི་བྱེད་མཁན་ ༣། བར་གནས་ ༣ བཅས་སོགས་བྱུང་ཡོད་ལུགས་དང་། འདི་ལོའི་ཕྱི་ཟླ་ ༧ ཚེས་ ༡ ཉིན་ནས་དངོས་སུ་ལག་བསྟར་བྱ་རྒྱུ་ཡིན་ལུགས་བསྒྲགས་འདུག
ཟླ་འདིའི་ཕྱི་ཚེས་ ༥ ཉིན་གྱི་སྔ་དྲོར་རྒྱ་ནག་རྒྱལ་ཡོངས་དམངས་ཆེན་སྐབས་ ༡༤ པའི་ཚོགས་དུས་བཞི་པའི་ཐོག དམངས་ཆེན་རྒྱུན་ལས་ལྷན་ཚོགས་ཀྱི་ཚོགས་གཞོན་ལི་ཧོང་ཀྲུང་ཟེར་བ་དེས་བཅའ་ཁྲིམས་ཀྱི་འཆར་ཟིན་སྒྲོགས་སྦྱང་དང་ངོ་སྤྲོད་བྱས་ཡོད་པ་རེད། སྐབས་དེར་ལི་ཡིས། བཅའ་ཁྲིམས་འདི་ནི་ཞི་ཅིན་ཕིང་གི་མི་རིགས་ལས་དོན་ལ་ཤུགས་སྣོན་དང་ཡར་སྐུལ་བྱེད་པའི་གལ་ཆེའི་དགོངས་པ་ཟེར་བ་དང་། དབུས་དམར་ཤོག་གི་ཐག་གཅོད་བཀོད་འདོམས་ཀྱི་གལ་ཆེའི་བྱེད་ཐབས་ཤིག་ཡིན་ལ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཇེ་བརྟན་དུ་གཏོང་བ་དང་། མི་རིགས་གཅིག་མཐུན་འདུས་གྲུབ་འཛུགས་སྐྲུན་གྱི་ཛ་དྲག་གི་རེ་འདུན་སྐུལ་འདེད་གཏོང་ཆེད་དུ་ཡིན་ལ། དེ་ཀྲུང་གོའི་དེང་རབས་ཅན་དང་། མི་རིགས་ཁག་གི་ཐུན་མོང་དཔལ་ཡོན་དར་རྒྱས་ལ་དགོས་མཁོ་ཆགས་ཡོད་སྐོར་དང་། ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་སྲིད་ཇུས་ལག་བསྟར་དང་། ཁྲིམས་སྐྱོང་སྒྲོམ་གཞིའི་ནང་མི་རིགས་ལས་དོན་སྐྱོང་བའི་མ་ལག་དང་ནུས་པ་དེང་རབས་ཅན་དུ་སྐུལ་འདེད་གཏོང་བ་ནི་དོན་དངོས་ཀྱི་དགོས་མཁོ་ཡིན་ལ། དེ་ནི་མི་ལོ་བརྒྱའི་ནང་བྱུང་མ་མྱོང་བའི་འགྱུར་ལྡོག་ཆེན་པོ་ཞིག་དང་། ཀྲུང་ཧྭ་མི་རིགས་ཀྱི་ནུས་སྟོབས་གོང་དུ་སྤེལ་ཐབས་གལ་ཆེན་ཞིག་ཡིན་སྐོར་བརྗོད་འདུག
བཅའ་ཁྲིམས་དེའི་ལེའུ་གཉིས་པ་སྟེ། མཉམ་སྤྱོད་ཀྱི་སྙིང་སྟོབས་ཁྱིམ་གཞིས་འཛུགས་སྐྲུན་བྱེད་དགོས་སྐོར་གྱི་ནང་། རྒྱལ་ཁབ་ཀྱི་སྤྱི་ཚོགས་རིང་ལུགས་ཀྱི་རིན་ཐང་ལྟ་བའི་སྣེ་འཁྲིད་འོག རྒྱལ་གཅེས་རིང་ལུགས་དང་། མཉམ་འདུས་རིང་ལུགས། སྤྱི་ཚོགས་རིང་ལུགས་ཀྱི་སློབ་གསོ་བཅས་གཏིང་ཟབ་ཏུ་བཏང་སྟེ། མི་རིགས་ཁག་གི་མི་མང་རྣམས་ལ་རླབས་ཆེན་གྱི་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭ་རིག་གནས། ཀྲུང་གོ་གུང་ཁྲན་ཁང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ངོས་འཛིན་བརྟན་བརླིང་དུ་གཏོང་དགོས་པ་སོགས་བཀོད་འདུག
དེ་བཞིན་ལེའུ་དེའི་དོན་ཚན་ ༡༥ པའི་ནང་། རྒྱལ་ཡོངས་ཀྱི་སྤྱི་སྤྱོད་སྐད་དང་ཡི་གེ་ཁྱོན་ཡོངས་ནས་དར་སྤེལ་དང་ཁྱབ་གདལ་གཏོང་ཆེད། སྔོན་འགྲོའི་བྱིས་པ་རྣམས་ལ་སྤྱི་སྐད་གཏིང་ཚུགས་པ་བྱས་ཏེ་ལོ་ཆུང་གཞོན་ནུའི་སློབ་གསོའི་ལས་འགན་ལེགས་འགྲུབ་དགོས་པ་དང་། སྒྲིག་འཛུགས་དང་མི་སྒེར་སུ་གཅིག་གིས་རྒྱལ་ཁབ་ཀྱི་སྤྱི་སྐད་བཀོལ་སྤྱོད་བྱེད་པར་འགོག་རྐྱེན་བཟོ་མི་ཆོག ཅེས་གསལ་པོར་བཀོད་དེ། གྲངས་ཉུང་མི་རིགས་ཀྱི་སྐད་ཡིག་བཀོལ་སྤྱོད་བྱེད་པར་རྒྱལ་ཁབ་ཀྱིས་གུས་བརྩི་དང་འགན་སྲུང་ཡོད་ཚུལ་དང་། དེ་བཞིན་ལེའུ་དེའི་དོན་ཚན་ཁག་གི་ནང་རྒྱལ་ཁབ་ཀྱིས་གཏན་འབེབ་བྱས་པའི་བསླབ་གཞི་རྣམས་ངེས་པར་དུ་སློབ་གྲྭ་ཁག་ནང་ལག་བསྟར་དོན་འཁྱོལ་དགོས་པ་དང་། གསར་ལམ་ཁག་གིས་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་ལྟ་བ་དྲིལ་བསྒྲགས་བྱས་ཏེ། ཁྱིམ་ཚང་དང་ཁྱིམ་ཚང་སློབ་གསོའི་ནང་འཇུག་ཐུབ་པ་དགོས་སྐོར་སོགས་བཀོད་འདུག
ཡང་ལེའུ་དེའི་དོན་ཚན་ ༢༡ པའི་ནང་དུ། ཧོང་ཀོང་དང་ཨོ་མིན་དམིགས་བསལ་སྲིད་འཛིན་ས་ཁུལ་ལ་ཀྲུང་ཧྭ་མི་རིགས་ཀྱི་ལོ་རྒྱུས་དང་རིག་གནས། རྒྱལ་ཞེན་སློབ་གསོ་དར་སྤེལ་གཏོང་དགོས་པ་དང་། དེ་བཞིན་ཐའེ་ཝན་མི་མང་ལ་ཀྲུང་ཧྭ་མི་རིགས་ཀྱི་ཁྱིམ་ཚང་འདུ་ཤེས་དང་ངོས་འཛིན་སོགས་ཡར་སྐུལ་གྱིས་རྒྱ་ནག་བ་ཡིན་པའི་འདུ་ཤེས་བསྐྲུན་དགོས་སྐོར་བཀོད་འདུག
ལེའུ་བཞི་པ་འབྲེལ་འདྲིས་མཉམ་བསྲེ་སྐུལ་འདེད་གཏོང་བ་ཞེས་པའི་ནང་དུ། རྫོང་རིམ་པ་ཡན་གྱི་སྲིད་གཞུང་གིས་མི་རིགས་ཁག་ལ་མཉམ་སྡོད་མཉམ་སྦྱོང་དང་། མཉམ་སྐྲུན་མཉམ་སྤྱོད། སྤྱི་དོན་མཉམ་སྐྱིད་ཀྱི་སྤྱི་ཚོགས་ཆ་རྐྱེན་དང་འདུ་ཤེས་སྐུལ་འདེད་གཏོང་བ་དང་། ཡུལ་སྐོར་ལྗོངས་རྒྱུ་དང་རིག་གནས་འགྲེམས་སྟོན་ཁང་། སྤྱི་ཚོགས་བརྒྱུད་ལམ་སོགས་ཀྱིས་དེང་རབས་ཚན་རྩལ་ལ་བརྟེན་ནས་མི་རིགས་ཁག་འབྲེལ་འདྲིས་མཉམ་བསྲེ་ཡོང་བར་སྐུལ་ལྕག་དང་། མི་རིགས་བར་གྱི་འཁོན་འཛིང་དང་མཐོང་ཆུང་རིགས་ཀྱི་ཡི་གེ་དང་པར་རིས། བརྙན་ཐུང་སོགས་ཁྱབ་སྤེལ་མི་ཆོག་སྐོར་བཀོད་འདུག
ལེའུ་ལྔ་པ་འགན་ལེན་དང་ལྟ་སྐུལ་ཞེས་པ་དེའི་དོན་ཚན་ ༥༣ དང་ ༥༤ ནང་དུ་ལོ་རེའི་ཕྱི་ཟླ་ ༩ པའི་བདུན་ཕྲག་བཞི་པ་ནི་མི་རིགས་མཐུན་སྒྲིལ་ཡར་སྐུལ་གྱི་དྲིལ་བསྒྲགས་བདུན་ཕྲག་ཏུ་གཏན་འབེབ་བྱས་ཏེ། གཞི་རྒྱ་ཆེན་པོའི་ཐོག་ནས་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་དྲིལ་བསྒྲགས་ཀྱི་སློབ་གསོའི་བྱ་འགུལ་སྤེལ་དགོས་སྐོར་དང་། མི་རིགས་མཐུན་སྒྲིལ་ཡར་སྐུལ་ཐད་བྱས་རྗེས་འབུར་དུ་ཐོན་པ་འཇོག་མཁན་ལ་རྒྱལ་ཁབ་ཀྱི་གཏན་འབེབ་ལྟར་བྱ་དགའ་སྤྲོད་དགོས་སྐོར་སོགས་བཀོད་འདུག
ལེའུ་དྲུག་པ་བཅའ་ཁྲིམས་ཀྱི་འགན་འཁྲི་ཞེས་པའི་ནང་དུ་ཚོགས་པ་དང་མི་སྒེར་སུ་ཞིག་གིས་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ལ་བརྩི་མེད་དང་། མི་རིགས་མཐུན་སྒྲིལ་ཡར་རྒྱས་སྐུལ་འདེད་ཀྱི་བཅའ་ཁྲིམས་ལ་བརྩི་སྲུང་མ་བྱས་ཚེ། དུས་ཐོག་ཉེན་བརྡ་སློབ་གསོ་གཏོང་བ་དང་ཁྲིམས་ལྟར་ཐག་གཅོད་བྱེད་དགོས་པ་སོགས་བཀོད་འདུག
འདི་གའི་གསར་འགོད་པས་ཞལ་པར་བརྒྱུད་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་ཟླ་བ་ཚེ་རིང་ལགས་སུ། རྒྱ་ནག་གཞུང་གི་མི་རིགས་མཐུན་ཡར་རྒྱས་སྐུལ་འདེད་གཏོང་བ་ཞེས་པའི་བཅའ་ཁྲིམས་འཆར་ཟིན་དེའི་དམིགས་ཡུལ་དང་བོད་ཁུལ་དུ་ལག་བསྟར་བྱེད་ཕྱོགས་སྐོར་བཀའ་འདྲི་ཞུས་པར་ཁོང་གིས། སྤྱིར་བཏང་རྒྱ་ནག་གཞུང་གིས་ཁྲིམས་དེ་བཟོ་བའི་ཀུན་སློང་ནི། མི་རིགས་རང་སྐྱོང་གི་ཁྲིམས་ལ་མཐུན་སྦྱོར་བྱ་རྒྱུ་ཡིན་ཟེར་གྱི་ཡོད་པ་རེད། གྲངས་ཉུང་མི་རིགས་སྲུང་སྐྱོབ་བྱེད་པའི་ཁྲིམས་སྒྲིག་མཐོ་ཤོས་ནི་རང་སྐྱོང་གི་ཁྲིམས་དེ་ཡིན་པས། དེ་དང་མཉམ་དུ་མཐུན་སྦྱོར་བྱས་ཡོད་ཟེར་དུས། ཁྲིམས་དེ་ཚད་མཐོ་པོ་ཞིག་ཡིན་པ་གསལ་པོ་རེད། འོན་ཀྱང་། ནང་དོན་ལ་བལྟས་ཡོང་ན། མི་རིགས་ཀྱི་ཆོས་ལུགས་དང་། སྐད་ཡིག་སོགས་ནི་མི་རིགས་རང་སྐྱོང་གི་གཙོ་ཆེ་ཤོས་ཀྱི་གནད་འགག་ཅིག་རེད་དེ། དེ་དག་གི་ཐོག་ལ་ཡར་རྒྱས་གཏོང་ཐབས་སྐོར་གཅིག་ཀྱང་མི་འདུག དེ་ལས་ལྡོག་ཏེ་ཀྲུང་ཧྭ་མི་རིགས་དང་། མི་རིགས་བར་གྱི་འབྲེལ་བ། འགྲོ་འོང་། སྤེལ་རེས། མཉམ་འབྲེལ་སོགས་བཤད་ཡོང་གི་འདུག ཚིག་དེ་དག་ཧོབ་ཏུ་མཉན་ན་ཕན་ཚུན་འགྲོ་རེས་དང་སྤེལ་རེས་བཤད་པའི་ཟོལ་ཞིག་ཡོད་ཀྱང་། རྒྱ་ནག་གི་སྲིད་ཇུས་སྒང་ནས་བཤད་ན། དེ་ནི་བོད་པ་དང་རྒྱ་རིགས་བར་ཆང་ས་བརྒྱག་རྒྱུ་སོགས་ལ་གཙོ་ཆེ་ཤོས་གོ་ཡི་འདུག འགྲོ་འོང་དང་སྤེལ་རེས་ནི་རྒྱ་སྐད་དང་རྒྱའི་རིག་གཞུང་བོད་ནང་གང་ཐུབ་ཐུབ་སྤེལ་ཐུབ་རྒྱུ་སོགས་རེད་མ་གཏོགས། བོད་ཀྱི་ཆོས་དང་རིག་གཞུང་དེ་ཕར་སྤེལ་ས་ཞིག་མེད་པ་རེད། ད་ལན་གྱི་བཅའ་ཁྲིམས་ནས་དེ་དག་གི་ཐོག་གསལ་པོ་བཤད་འདུག ཅེས་འགྲེལ་བརྗོད་གནང་བྱུང་།
ཡང་ཁོང་གིས། རྒྱ་ནག་གཞུང་གིས་དེ་དང་དེ་ལྟ་བུའི་སྲིད་ཇུས་མང་པོ་ཞིག་སྔོན་མ་ནས་བོད་ནང་ལག་བསྟར་བྱེད་ཀྱི་ཡོད་པ་རེད། ལྷག་པར་དུ་བོད་པ་དང་རྒྱ་མིའི་བར་ཆང་ས་རྒྱག་བཅུག་སྟེ། ཆང་སའི་ལམ་ནས་བོད་མི་རིགས་ཀྱི་ཁྱབ་ཚད་བརླག་འགྲོ་རྒྱུ་དང་། བོད་ཀྱི་རིག་གཞུང་སྐད་ཡིག་སོགས་ཉམས་འགྲོ་རྒྱུའི་འཆར་གཞི་གཏིང་གི་ཡོད་པ་རེད། དེ་བཞིན་དཔེར་ན་ཐུན་མོང་གི་འཕེལ་རྒྱས་ཟེར་བ་དེ་ཚིག་སྙིང་རྗེ་མོ་ཡོད་ཀྱང་། དོན་དམ་པར་རྒྱ་ནག་གི་དཔལ་འབྱོར་སོགས་ཀྱི་ལམ་ལུགས་འོག་འགྲོ་བཅུག་ནས། བོད་པ་སོ་སོའི་ངོས་ནས་རྐང་ཚུགས་མ་ཐུབ་པ་བཟོ་རྒྱུ་དང་། ཀྲུང་ཧྭ་མི་རིགས་ཀྱི་བསམ་པ་གཅིག་མཐུན་ཟེར་བ་དང་། མི་རིགས་བར་འབྲེལ་ལམ་ཟེར་བ་སོགས་ཀྱིས་དོན་དངོས་ཐོག་བོད་ཀྱི་ཆོས་དང་རིག་གཞུང་ཉམས་དམས་སུ་གཏང་རྒྱུ་དང་། རྒྱ་ནག་གི་ལྟ་གྲུབ་དང་། སྐད་ཡིག རིག་གཞུང་སོགས་ཁྱབ་སྤེལ་བྱེད་ཐབས་སྐོར་ཤོད་ཀྱིན་ཡོད་པ་རེད། སྤྱིར་ན་མི་རིགས་རང་སྐྱོང་གི་བཅའ་ཁྲིམས་ནང་མི་རིགས་རང་གི་ཆོས་དང་རིག་གཞུང་སྲུང་སྐྱོབ་བྱ་རྒྱུའི་ཀུན་སློང་གི་སྒང་ནས་བཟོ་དགོས་ཀྱང་། ད་ལྟ་མི་རིགས་རང་གི་ཆོས་དང་རིག་གཞུང་རྩ་མེད་བཟོ་ཐབས་དེ་མི་རིགས་རང་སྐྱོང་གི་བཅའ་ཁྲིམས་དང་སྦྱར་ནས་བཟོ་ཡི་ཡོད། ཅེས་འགྲེལ་བརྗོད་གནང་བྱུང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
