དེང་སང་བཙན་བྱོལ་བོད་མིར་དྲ་རྒྱའི་དམག་འཁྲུག་གསར་པ་ཞིག་གི་དཀའ་ངལ་འཕྲད་ཀྱིན་འདུག

ལས་ཤོག་རྫུན་བཟོ་དང་འགྲེམས་སྤེལ་བྱས་པའི་རིགས་ལ་བོད་མི་རྣམས་ཀྱིས་ཡིད་གཟབ་ཀྱི་ཐོག་ནས་དྲ་རྒྱ་བེད་སྤྱོད་གཏོང་གལ་ཆེན་པོ་ཡིན་པའི་ལམ་སྟོན་གནང་། 

དེ་རིང་གྲོས་ཚོགས་ཀྱི་ལས་ཉིན་གསུམ་པའི་སྟེང་བདེ་སྲུང་ལས་ཁུངས་ཀྱི་སྔོན་རྩིས་ཐོག་བགྲོ་གླེང་དང་འབྲེལ་ནས། ཉེ་ལམ་ནས་དབུས་བོད་མིའི་སྒྲིག་འཛུགས་དང་དགོན་སྡེ་ཁག་གི་ལས་ཤོག་རྫུན་བཟོ་བྱས་ཏེ། གསུམ་བཅུའི་དུས་དྲན་གཞུང་འབྲེལ་གྱི་ཐོག་ནས་སྲུང་གཙི་ཞུ་རྒྱུ་མིན་ལུགས་སོགས་ཀྱི་གནས་ཚུལ་རྫུན་མའི་རིགས་སྤྱི་ཚོགས་དྲ་ལམ་ཁག་ཏུ་སྤེལ་ནས། བཙན་བྱོལ་བོད་མིའི་སྤྱི་ཚོགས་དཀྲུག་ཐབས་དང་ནང་ཁུལ་རྙོག་གླེང་བསྐྲུན་ཐབས་སྤེལ་མུས་ཡིན་པའི་གནད་དོན་ཐད་སྤྱི་འཐུས་ཁག་ཅིག་གིས་དོགས་འདྲི་གནང་བར། བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ལན་འདེབས་གསལ་བཤད་གནང་བའི་ཁྲོད། བོད་མི་རྣམས་ཀྱིས་དྲ་ལམ་འཇབ་རྒོལ་གྱི་གཡོ་ཇུས་འོག་མ་ཚུད་པ་གནང་དགོས་པའི་ལམ་སྟོན་གནང་སོང་། 

སྐབས་དེར་བཀའ་བློན་རྒྱ་རི་སྒྲོལ་མ་མཆོག་གིས། སྤྱི་ཚོགས་དང་དུས་ཀྱི་འགྱུར་བར་གདོང་ལེན་བྱེད་སྟངས་ཀྱི་གནས་བབ་ལ་བལྟས་ཚེ། སྔར་དང་མི་འདྲ་བ་ཞིག་ཆགས་ཡོད་ཅིང་། བདེ་སྲུང་ལས་ཁུངས་ཀྱིས་འགན་འཁུར་ཆེན་པོའི་ཐོག་ནས་སྤྱི་ཚོགས་དྲ་རྒྱ་དང་འབྲེལ་བའི་ཐོག་དོ་སྣང་བྱས་དང་བྱེད་མུས་ཡིན་ལ། ལྷག་པར་དུ་༧གོང་ས་རྒྱལ་བ་རིན་པོ་ཆེ་མཆོག་དང་བོད་སྤྱིའི་རྩ་དོན་ལ་གནོད་གཞི་བྱེད་མཁན་རྣམས་དོ་སྣང་བྱས་ཡོད། དེ་བཞིན་ཡུ་ཊོབ་ (Youtube ) སྤྱི་ཚོགས་དྲ་ལམ་སོགས་ཀྱི་ཐོག་ནས་སྒེར་གྱི་སྐད་ཆ་ཤོད་མཁན་རིགས་གཅིག་ཀྱང་ཡོང་གི་འདུག དེ་ནི་དམངས་གཙོའི་འགྲོ་ལུགས་ཤིག་ཡིན་པས་དོ་སྣང་བྱེད་བཞིན་ཡོད་པ་མ་གཏོགས་གདོང་ལེན་བྱེད་ཀྱི་མེད། དེ་དག་གིས་སྲིད་སྐྱོང་ལ་ཅིག་བཤད་ནས་ནག་པོ་མཐོང་དགོས་པ་དང་། བཀའ་ཤག་ལ་བསྟོད་ར་བྱས་ཏེ་རང་ཉིད་ཀྱི་མི་ཡིན་མདོག་སོགས་རྩ་བ་ཉིད་ནས་བྱས་མེད། ང་ཚོས་ལྟ་སྟངས་དང་ངོས་འཛིན་བྱེད་སྟངས་དེ་འདྲ་ཞིག་གི་ཐོག་ནས་ལས་ཀ་བྱེད་བཞིན་ཡོད། ཅེས་གསུངས་སོང་།

 ཡང་བདེ་སྲུང་བཀའ་བློན་མཆོག་གིས། དེང་སང་དགའ་ལྡན་ཕོ་བྲང་དང་། བཀའ་ཤག དེ་བཞིན་དགོན་པ་ཁག་གི་ལས་ཤོག་རྫུན་མ་བཟོས་ཡོད། ད་ལྟའི་ཆར་དེའི་རིགས་ལ་ང་ཚོས་དྲ་རྒྱའི་བརྒྱུད་ལམ་བེད་སྤྱོད་གཏོང་བར་ཐུགས་སྣང་གནང་དགོས་པ་གཅིག་ནི། ང་ཚོར་ཁ་གཏད་གཅོག་མཁན་དང་། བོད་ཀྱི་ཆིག་སྒྲིལ་ལ་གནོད་གཞི་བྱེད་པ། བོད་ཀྱི་རྩ་དོན་བསྒྲུབ་མ་ཐུབ་པ་བྱེད་པ། ༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ལའང་གཞི་རྩ་མེད་པའི་ནག་ཉེས་གཡོག་མཁན་གྱི་རྒྱལ་ཁབ་ཆེན་པོ་ཞིག་ཕར་ཕྱོགས་ལ་ཡོད་པ་རེད། བོད་མི་དྲ་རྒྱ་བེད་སྤྱོད་གཏོང་མཁན་ཚང་མས་ཡིད་གཟབ་གནང་རྒྱུ་ཧ་ཅང་གལ་ཆེན་པོ་ཆགས་འདུག ང་ཚོའི་ནང་ཁུལ་གྱི་སྐད་ཆ་རེད་བསམས་ནས་དྲ་རྒྱ་བེད་སྤྱོད་གཏོང་སྐབས་སུའི་བེད་སྤྱོད་དུ་འགྲོ་བཞིན་ཡོད་མེད་ཧ་ཅང་གཟབ་གཟབ་བྱས་ན་མ་གཏོགས།  དེང་སང་འཛམ་གླིང་གང་སར་བལྟས་ཀྱང་དམག་འཁྲུག་གསར་པ་ཞིག་ཆགས་ཡོད་པ་རེད། དྲ་རྒྱའི་བརྒྱུད་ལམ་བེད་སྤྱོད་བཏང་ནས་སྤྱི་ཚོགས་དཀྲུག་པ་དང་། རྒྱལ་ཁབ་སྟོབས་ལྡན་གྱི་འོས་བསྡུ་གྲུབ་འབྲས་ལའང་ཐེ་ཇུས་བྱེད་པ་སོགས་ཀྱི་དམག་འཁྲུག་ཅིག་འགྲོ་བཞིན་ཡོད་པ་རེད། ཅེས་གསུངས་སོང་།

བཀའ་བློན་མཆོག་གིས། ལས་ཤོག་རྫུན་མ་བཟོ་མཁན་མི་གཅིག་ཡིན་ཡང་འགྲེམ་མཁན་ང་ཚོའི་སྤྱི་ཚོགས་ཆགས་ཀྱི་འདུག དེའི་ཆེད་དུ་ཛ་དྲག་དཀའ་ངལ་གདོང་ལེན་ཚོགས་པ་ཞེས་པ་ཞིག་བཙུགས་ཡོད། དེ་ཡང་གནས་སྟངས་མི་འདྲ་བར་གདོང་ལེན་བྱེད་ཕྱོགས་དེ་ལྷན་ཁང་གཅིག་གི་ཆེད་དུ་བཙུགས་པ་མ་ཡིན་པར། སྒྲིག་འཛུགས་ཡོངས་ཀྱི་ཆེད་དུ་ཛ་དྲག་དང་དཀའ་ངལ་ལ་གདོང་ལེན་བཞིན་ཡོད། བདེ་སྲུང་ལས་ཁུངས་ཀྱི་ལས་འགན་གཙོ་བོ་དེ་གནས་ཚུལ་གང་བྱུང་ཡང་དུས་ཐོག་དོ་སྣང་བྱས་ཏེ་ཡར་ཕུལ་ཐུབ་པ་དགོས། གྲོས་ཚོགས་ནང་དེ་དག་མིང་འདོན་བྱེད་པར་སྤྱི་ཚོགས་ཡོངས་སུ་ཕན་ཐོགས་ཡོད་པ་མཐོང་གི་མི་འདུག ཡིན་ནའང་། དཔལ་ལྡན་བཀའ་ཤག་གཙོས་འབྲེལ་ཡོད་ཁག་ལ་གནས་ཚུལ་དང་པོ་ཐོན་སྐབས་མི་དེའི་ངོ་དེབ་སོགས་སྤྱི་ཚོགས་དྲ་ལམ་དུ་སྤེལ་བའི་གནས་ཚུལ་དུས་ཐོག་ཏུ་ཕུལ་ཡོད། དུས་ཀྱི་དགོས་མཁོ་དང་བསྟུན་ནས་བོད་མིའི་སྒྲིག་འཛུགས་ཀྱི་གློག་ཀླད་ཚན་པ་དང་མཉམ་དུ་ཤུགས་རྒྱག་བཞིན་ཡོད། ཅེས་གསུངས་སོང་། 

གསར་འགོད་པ། བྱམས་པ་ཚེ་རིང་། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།