ཧོང་ཀོང་ནང་རྒྱལ་ཁབ་ཀྱི་བདེ་འཇགས་ཀྱི་ཁྲིམས་ལུགས་གསར་བའི་འོག་ཉེན་རྟོག་པས་མི་མང་གི་ཁ་པར་དང་གློག་ཀླད་ཀྱི་གསང་གྲངས་ཐད་ཀར་ལེན་ཆོག་གི་ཡོད་འདུག
བྷི་བྷི་སི་སོགས་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༣ ཉིན་ཧོང་ཀོང་གཞུང་གིས་རྒྱལ་ཁབ་ཀྱི་བདེ་འཇགས་ཁྲིམས་ལུགས་ལ་སྒྱུར་བཅོས་བྱས་ཏེ། རྒྱལ་ཁབ་བདེ་འཇགས་ཀྱི་ཁྲིམས་ལུགས་དང་འགལ་བའི་དོགས་གཞི་ཡོད་མཁན་གྱི་མི་མང་གི་ཁ་པར་དང་གློག་ཀླད་ལ་ཉེན་རྟོག་པས་ཐད་ཀར་སྔོག་བཤེར་བྱེད་ཆོག་པར་བཟོས་པ་དང་། ཉེན་རྟོག་པར་ཁ་པར་དང་གློག་ཀླད་ཀྱི་གསང་གྲངས་མི་སྤྲོད་མཁན་རྣམས་ལ་ལོ་གཅིག་གི་བཙོན་འཇུག་དང་། ཧོང་ཀོང་གི་སྒོར་འབུམ་གཅིག་སྟེ་ཨ་སྒོར་ ༡༢,༧༠༠ ཉེས་ཆད་གཅོད་རྒྱུ་དང་། གནས་ཚུལ་རྫུན་བཟོ་དང་མགོ་སྐོར་གཏོང་བའི་གནས་ཚུལ་ཁྱབ་སྤེལ་བྱེད་མཁན་ལ་ལོ་གསུམ་གྱི་བཙོན་འཇུག་ཁྲིམས་ཐག་གཅོད་རྒྱུ་ཡིན་འདུག
ཁ་སང་ཕྱི་ཚེས་ ༢༣ སྟེ་རེས་གཟའ་ཟླ་བའི་ཉིན་རྒྱལ་ཁབ་བདེ་འཇགས་ཀྱི་ཁྲིམས་ལུགས་ལ་བཟོ་བཅོས་ཀྱིས་གསལ་བསྒྲགས་སྤེལ་བའི་ནང་། རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོ་བའི་བྱ་འགུལ་རྣམས་ནུས་པ་ལྡན་པའི་ངང་ནས་སྔོན་འགོག་དང་། བཙིརགནོན། ཉེས་ཆད་གཏོང་དགོས། དེ་དང་ཆབས་ཅིག་མི་སྒེར་དང་ཚོགས་སྡེ་ཁག་གི་ཁྲིམས་མཐུན་གྱི་ཁེ་དབང་དང་ཁེ་ཕན་རྣམས་སྲུང་སྐྱོབ་བྱ་ཐུབ། ཅེས་དང་། བཟོ་བཅོས་ཁྲིམས་ཡིག་དེས་ཁྲལ་དོན་ཉེན་རྟོག་པ་རྣམས་ལ་དོགས་གཞི་ལྡན་པའི་མི་མང་གི་ཅ་དངོས་དག་བཙན་ལེན་བྱེད་པའི་དབང་ཆ་སྤྲད་ཡོད་ཅིང་། རྒྱ་ནག་གཞུང་དང་རྒྱལ་ཁབ་བདེ་འཇགས་ཀྱི་ཁྲིམས་ལུགས་ལ་རྒྱབ་སྐྱོར་བྱེད་མཁན་ཧོང་ཀོང་གི་ལས་ཐོག་སྤྱི་ཁྱབ་རྗོན་ལི་ (John Lee) ཟེར་བས་ཁྲིམས་ལུགས་དེ་ཡོངས་བསྒྲགས་བྱས་པ་དང་ཧོང་ཀོང་གི་གྲོས་ཚོགས་ཀྱིས་གཏན་འབེབས་བྱས་ཡོད་ལུགས་བརྗོད་འདུག
སྤྱིར་འཛམ་གླིང་རྒྱལ་ཁབ་མང་པོའི་ནང་ཁྲིམས་འགལ་གྱི་བྱ་སྤྱོད་སྤེལ་མཁན་རྣམས་ལ་ཞིབ་བཤེར་གྱི་ཆ་ཤས་སུ་ཁ་པར་དང་གློག་ཀླད་སོགས་ལ་སྔོག་ཆོག་པའི་དབང་ཆ་ཡོད་ཀྱང་། ཧོང་ཀོང་གི་རྒྱལ་ཁབ་བདེ་འཇགས་ཀྱི་ཁྲིམས་ལུགས་ཀྱིས་རྒྱལ་ཁབ་ཁ་བྲལ་དང་མགོ་རྟིང་སློག་པ། དྲག་སྤྱོད་རིང་ལུགས། ཕྱི་ཕྱོགས་ཀྱི་སྟོབས་ཤུགས་དང་མཉམ་འབྲེལ་བྱེད་པ་སོགས་ཁྲིམས་འགལ་ལ་བརྩིས་ནས་ཁ་པར་དང་གློག་ཀླད་ལ་ཞིབ་བཤེར་བྱེད་ཀྱི་ཡོད་པ་མ་ཟད། མི་ཁག་ཅིག་ལ་ཁྲིམས་རྩོད་པ་དང་ནང་མི་སོགས་གང་ཡང་མེད་པར་གསང་བའི་ཁྲིམས་ཐག་ཡང་གཅོད་ཀྱི་ཡོད་འདུག
ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལག་བསྟར་བྱས་པ་ནས་བཟུང་། ཧོང་ཀོང་ནང་ངོ་རྒོལ་བ་དང་། ལས་འགུལ་བ། ཕྱོགས་འགལ་ཚོགས་པའི་ཁྲིམས་བཟོ་བ་ཟུར་པ་བརྒྱ་ཕྲག་མང་པོ་འཛིན་བཟུང་བྱས་ཡོད་པ་རེད། འདི་ལོའི་ཕྱི་ཟླ་ ༢ པའི་ནང་བཙན་བྱོལ་དུ་ཡོད་པའི་དམངས་གཙོ་ལ་རྒྱབ་སྐྱོར་བྱེད་མཁན་གྱི་ལས་འགུལ་བ་ཨན་ནཱ་ (Anna Kwok) ཡིས་ཕྱིའི་སྟོབས་ཤུགས་དང་མཉམ་འབྲེལ་བྱས་པའི་ནག་ཉེས་དང་། ཕྱི་ཟླ་ ༢ པའི་ནང་ཧོང་ཀོང་གི་ཀུ་ཤུ་ཉིན་རེའི་གསར་ཁང་གསར་འཛུགས་གནང་མཁན་དམངས་གཙོ་དོན་གཉེར་བ་ཇི་མི་ལའེ་ (Jimmy Lai) ལགས་ཀྱིས་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཏང་བའི་ཉེས་མིང་འོག མི་ལོ་ ༢༠ ཡི་བཙོན་འཇུག་ཁྲིམས་ཐག་བཅད་ཡོད་པ་རེད།
ཕྱི་ལོ་ ༢༠༢༠ ཟླ་ ༦ པའི་ནང་རྒྱ་ནག་གཞུང་གིས་དངོས་སུ་ལག་བསྟར་མགོ་འཛུགས་བྱས་པའི་ཧོང་ཀོང་གི་རྒྱལ་ཁབ་བདེ་འཇགས་ཁྲིམས་ཡིག་ཟེར་བ་དེ། ཕྱི་ལོ་ ༢༠༢༠ ཟླ་ ༧ ཚེས་ ༣༠ ཉིན་རྒྱ་ནག་གི་རྒྱལ་ཡོངས་མི་མང་འཐུས་ཚོགས་ཀྱི་རྒྱུན་ལས་ལྷན་ཁང་ནས་གཏན་འབེབས་ཡོངས་བསྒྲགས་བྱས་པ་ཞིག་ཡིན་ཞིང་། ཁྲིམས་ཡིག་དེ་ཕྱི་ལོ་ ༢༠༡༩ ལོར་ཧོང་ཀོང་གཞུང་གིས་ཧོང་ཀོང་ནང་གི་དོགས་ཡོད་ཉེས་ཅན་པ་རྒྱ་ནག་ལ་རྩིས་སྤྲོད་བྱ་རྒྱུའི་ཁྲིམས་འཆར་ (Hong Kong extradition Bill) ཞིག་བཏོན་པའི་རྐྱེན་གྱིས་རིམ་པས་ཧོང་ཀོང་ནང་གཞི་རྒྱ་ཆེ་བའི་མི་མང་གི་གཞུང་རྒོལ་ལས་འགུལ་ཞིག་བྱུང་བ་དེར་ཐད་ཀར་འབྲེལ་བ་ཡོད་པ་མ་ཟད། དེ་ནི་རྒྱ་ནག་གཞུང་གིས་ཧོང་ཀོང་གི་རྒྱལ་ཁབ་གཅིག་ལ་ལམ་ལུགས་གཉིས་ཟེར་བའི་སྲིད་ཇུས་དེར་རྡོག་རོལ་ཚབས་ཆེན་བཏང་བ་ཞིག་ལ་ངོས་འཛིན་བྱེད་ཀྱིན་ཡོད། རྒྱ་ནག་གཞུང་གིས་ཁྲིམས་ཡིག་དེ་ལག་བསྟར་བྱས་པ་ནས་བཟུང་ད་བར་ཧོང་ཀོང་གི་དམངས་གཙོའི་ལས་འགུལ་བ་བརྒྱ་ཕྲག་མང་པོ་ཞིག་འཛིན་བཟུང་བྱས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
