རྒྱ་ནག་གཞུང་གིས་བོད་ཀྱི་ཆབ་སྲིད་བཙོན་པ་རྣམས་ལ་སྨན་བཅོས་ཀྱི་ཐོག་ནས་ལྟ་རྟོག་བྱེད་བཞིན་མེད་པའི་དབང་གིས་བོད་ཀྱི་རྩོམ་པ་པོ་གངས་སྐྱེས་སྒྲུབ་པ་སྐྱབས་ལགས་དང་གངས་ཚེ་རིང་སྒྲོལ་མ་གཉིས་ཀྱི་འཕྲོད་བསྟེན་གྱི་གནས་སྟངས་ཇེ་སྡུག་ཏུ་ཕྱིན་ཡོད་འདུག
འདི་གའི་གསར་ཁང་ལ་ཁུངས་ལྡན་གནས་ཚུལ་འབྱོར་བ་ལྟར་ན། ད་ལྟའི་ཆར་རྒྱ་ནག་གཞུང་གིས་བོད་ཀྱི་རྩོམ་པ་པོ་གངས་སྐྱེས་སྒྲུབ་པ་སྐྱབས་དང་ཚེ་རིང་སྒྲོལ་མ་གཉིས་ལ་བཙོན་ཁང་དུ་སྨན་བཅོས་ཀྱི་ཐོག་ནས་ལྟ་རྟོག་མ་བྱས་པའི་དབང་གིས། སྒྲུབ་པ་སྐྱབས་ལགས་ཀྱི་དྲན་པ་ཉམས་པ་དང་། མིག་གིས་མི་མཐོང་བ། དེ་བཞིན་སྙིང་དང་མཁལ་མའི་ནད་གཞི་སོགས་ཧ་ཅང་ཇེ་སྡུག་ཏུ་ཕྱིན་ཡོད་འདུག་ལ། ཚེ་རིང་སྒྲོལ་མ་ལགས་སུ་བཙོན་ཁང་དུ་མནར་གཅོད་དང་སྡུག་སྦྱོང་དྲག་པོ་བཏང་སྟེ་སྨན་བཅོས་མ་བྱས་སྟབས། ཁོང་མོའི་དྲན་པ་ཉམས་པ་དང་སྙིང་ནད་སོགས་ཀྱི་ན་ཚ་གཞན་ཡང་བྱུང་འདུག
གནས་ཚུལ་མཁོ་སྤྲོད་པས། རྒྱ་ནག་གཞུང་གིས་བཙོན་པར་དུས་ཐོག་སྨན་བཅོས་བྱེད་དགོས་པའི་བཙོན་ཁང་གི་སྒྲིག་ཁྲིམས་ལ་རྩིས་མེད་བཏང་སྟེ། གངས་སྐྱེས་སྒྲུབ་པ་སྐྱབས་ལགས་དང་ཚེ་རིང་སྒྲོལ་མ་གཉིས་ཀྱི་འཕྲོད་བསྟེན་གནས་སྟངས་ཛ་དྲག་ཆགས་ཡོད། ལྷག་པར་དུ་རྒྱ་ནག་གཞུང་གིས་བོད་ཀྱི་ཆབ་སྲིད་བཙོན་པ་རྣམས་ལ་ཆེད་དུ་སྨན་བཅོས་ཀྱི་མཐུན་སྦྱོར་དང་ལྟ་རྟོག་བྱེད་ཀྱི་མེད་སྐོར་དང་། ཕྱི་ལོ་ ༢༠༢༤ ལོར་གངས་སྐྱེས་སྒྲུབ་པ་སྐྱབས་ལགས་མཱེན་ཡཱང་བཙོན་ཁང་དུ་བཙོན་འཇུག་བྱས་ཡོད་པ་ཤེས་རྟོགས་བྱུང་བ་དང་ཚེ་རིང་སྒྲོལ་མ་ལགས་སེར་ཤུལ་རྫོང་ཁོངས་སུ་ཡོད་པའི་བུད་མེད་ཀྱི་བཀག་ཉར་ཁང་ཞིག་ཏུ་བཅུག་འདུག་ཟེར་བ་ཙམ་ལས། རྒྱ་ནག་གཞུང་གིས་རྒྱལ་སྤྱིའི་ཞུ་གཏུག་གི་ཁོངས་སུ་ཡོད་པའི་བཙོན་པ་རྣམས་ཀྱི་བཙོན་ཁང་བརྗེ་བཞིན་ཡོད་སྟབས། ད་ལྟ་ཁོང་གཉིས་དོན་དངོས་སུ་གང་དུ་བཙོན་འཇུག་བྱས་ཡོད་མེད་ཀྱི་གནས་ཚུལ་ཤེས་རྟོགས་ཐུབ་ཀྱི་མེད་སྐོར་སོགས་བརྗོད་བྱུང་།
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཕྱི་ལོ་ ༢༠༢༤ ལོར་རྒྱ་ནག་གཞུང་གིས་གངས་སྐྱེས་སྒྲུབ་པ་སྐྱབས་ཀྱི་ནང་མིར་ཐུག་འཕྲད་ཐེངས་གཅིག་བྱེད་དུ་བཅུག་ཡོད་ཀྱང་། དེའི་རྗེས་ནས་ད་ལྟའང་ཁོང་གི་ནང་མིས་རེ་འདུན་ག་ཚོད་བཏོན་ཡང་ཐུག་འཕྲད་བྱེད་དུ་འཇུག་གི་མེད་ཁར། ཁོང་གི་འཕྲོད་བསྟེན་གྱི་གནས་སྟངས་ཞན་པོ་ཡིན་པ་དང་འབྲེལ་ནས་དགོས་ངེས་ཀྱི་སྨན་བཅོས་མཐུན་སྦྱོར་བྱས་མེད་ཅིང་། ཕྱི་ལོ་ ༢༠༢༡ ཟླ་ ༣ པའི་ཚེས་ ༢༣ ཉིན་གསེར་རྟ་རྫོང་ཉེན་རྟོག་པས་གངས་མེ་སྟག་གམ་གངས་སྐྱེས་སྒྲུབ་པ་སྐྱབས་རང་ཁྱིམ་ནས་བསྐྱར་དུ་འཛིན་བཟུང་བཙན་འཁྲིད་བྱས་རྗེས། ཕྱི་ལོ་ ༢༠༢༢ ལོར་རྒྱ་ནག་གཞུང་གིས་ཁོང་ལ་རྒྱལ་ཁབ་ཁ་བྲལ་གྱི་ངན་སྐུལ་དང་རྒྱལ་ཁབ་བདེ་འཇགས་ལ་གནོད་སྐྱོན་བཟོས་ཡོད་ལུགས་ཀྱི་ཉེས་མིང་གཡོགས་ཏེ། ལོ་ ༡༤ ཡི་བཙོན་འཇུག་ཁྲིམས་ཐག་བཅད་ཡོད།
དེ་སྔོན་ཕྱི་ལོ་ ༢༠༡༢ ཟླ་ ༢ པའི་ཚེས་ ༡༥ ཉིན་གྱི་མཚན་མོར་གསེར་རྟ་རྫོང་ཉེན་རྟོག་པས་ཁོང་རང་ཁྱིམ་ནས་གློ་བུར་དུ་འཛིན་བཟུང་བྱས་ཤིང་། སྐབས་དེར་ཁོང་གིས་ཁམས་བྲག་མགོ་ས་གནས་སུ་མཁན་པོ་ཚུལ་ཁྲིམས་བློ་གྲོས་ཀྱིས་བཙུགས་པའི་སྒེར་གཉེར་སློབ་གྲྭ་ཞིག་ཏུ་དགེ་རྒན་བྱེད་བཞིན་ཡོད། ཕྱི་ལོ་༢༠༡༣ ཟླ་༨ པའི་ཚེས་ ༡ ཉིན་ཉག་ཆུ་རྫོང་མི་དམངས་ཁྲིམས་ཁང་ཟེར་བས། ཁོང་ལ་བོད་དོན་ལས་འགུལ་སྤེལ་མཁན་དང་། “དམར་རྒོལ་ཚོགས་པ་”གསར་འཛུགས་ཀྱི་ཉེས་མིང་འོག་ཏུ་མི་ལོ་ ༥ ཡི་བཙོན་བཅུག་ཁྲིམས་ཐག་བཅད། ཕྱི་ལོ་ ༢༠༡༦ ལོའི་ཟླ་ ༩ ཚེས་ ༡༦ ཉིན་བཙོན་གྲོལ་བཏང་ཡོད་ནའང་། ཕྱི་ཉིན་ཡང་བསྐྱར་༸རིན་པོ་ཆེའི་སྐུ་པར་དབུ་ཐོག་ལ་བཞག་རབས་དང་རྣམ་འགྱུར་མི་ལེགས་པའི་སྐྱོན་འཛུགས་འོག་ཏུ་དུས་ཡུན་ཉིན་ ༡༧ རིང་གསེར་རྟ་རྫོང་ཉེན་རྟོག་ཁང་དུ་བཀག་ཉར་བྱས། ཁོང་འཛིན་བཟུང་བཙོན་འཇུག་བྱེད་དོན་གཙོ་བོ། མི་རིགས་ཀྱི་ལས་དབང་དང་གནས་བབ་མཚོན་པའི་སྒེར་དེབ་དང་ཚགས་དེབ་ལས་དབང་གི་རྒྱང་འབོད། དུས་ཀྱི་ན་ཟུག དེ་རིང་གི་མིག་ཆུ། ལོ་ཟླའི་ཁ་དོག ཁ་བཏགས་དཀར་པོའི་ཚགས་དེབ། ༢༠༠༨ ལོའི་ས་བྱི་ཁྲག་བྲིས་དམར་པོ་སོགས་བཏོན་པ་དང་། “དམར་རྒོལ་གདོང་ལེན་ཚོགས་པ་”བཙུགས་ནས་བོད་བསྟན་སྲིད་ཀྱི་ཆེད་དུ་ཕྱག་ལས་མང་པོ་གནང་བ་སོགས་ཆབ་སྲིད་ཀྱི་ནག་ཉེས་བཙུགས་ནས་ལོ་ངོ་ ༥ རིང་བཙོན་དུ་བཅུག གངས་སྐྱེས་སྒྲུབ་པ་སྐྱབས་ནི་ཕྱི་ལོ ༡༩༨༡ ཟླ་ ༨ ཚེས་ ༦ ཉིན་དཀར་མཛེས་ཁུལ་གསེར་རྟ་རྫོང་རགས་བཀྲམ་ཡུལ་ཚོ་གེ་འཕན་སྡེ་བའི་ཕ་ཐུབ་བསྟན་ཉི་མ་དང་། མ་དབང་ཐང་སྒྲོལ་མ་གཉིས་ཀྱི་བུ་རུ་སྐྱེས། ཁོང་དང་ཁོང་གི་བཟའ་ཟླ་དབང་ཕྱུག་ལྷ་མོ་གཉིས་ལ་རང་ལོ་ ༢༢ ཙམ་ལ་སོན་པའི་བུ་མོ་མེ་དབང་སྐྱིད་དང་། རང་ལོ་ ༡༩ ཙམ་ཡིན་པའི་བུ་གངས་བཙན་པོ་ཞེས་པ་ཞིག་ཡོད་འདུག
ཕྱི་ལོ་ ༢༠༢༡ ཟླ་ ༤ བའི་ཚེས་ ༢ ཉིན། ཚེ་རིང་སྒྲོལ་མ་སེར་ཤུལ་རྫོང་ཉེན་རྟོག་པས་འཛིན་བཟུང་བཙན་འཁྲིད་བྱས་ཤིང་། དེ་སྔོན་ཕྱི་ལོ་ ༢༠༠༨ ལོར་གསེར་རྟ་ནས་ཞི་རྒོལ་གནང་སྐབས། ཕ་བསོ་ལོ་དང་མཉམ་དུ་འཛིན་བཟུང་བྱས་པར་མ་ཟད། ཕྱིས་སུ་ཡང་འཛིན་བཟུང་ཐེངས་ཁ་ཤས་བྱས་འདུག འཛིན་ཐེངས་རེ་རེར་རྒྱ་གཞུང་ཉེན་རྟོག་པར་རྣམ་འགྱུར་མི་ལེགས་པ་བསྟན་པས། ཟླ་བ་མང་པོར་བཀག་ཉར་ཁང་དང་བཙོན་ཁང་དུ་གཅར་རྡུང་བཙོན་འཇུག་བྱས་ནས་གློད་གྲོལ་བཏང་ཡང་། བཙོན་ཁང་དུ་གཅར་རྡུང་དྲག་པོ་བཏང་ནས་རྐང་པའི་དཔྱི་མགོ་བཅག་པའི་རྐྱེན་གྱིས། གནམ་གཤིས་དྲོ་གྲང་ལ་འགྱུར་ལྡོག་བྱུང་སྐབས། རྐང་པར་ན་ཟུག་ཆེ་བ་དང་གྲིབ་སྐྱོན་བྱུང་བ། དྲན་པ་མི་གསལ་བ། སྙིང་ཁམས་མི་བདེ་བ་སོགས་ལུས་སེམས་གཉིས་ཀར་གནོད་སྐྱོན་ཚབས་ཆེན་ཐེབས་ཡོད། ཚེ་རིང་སྒྲོལ་མ་ཕྱི་ལོ་༡༩༩༧ ལོར་དཀར་མཛེས་བོད་རིགས་རང་སྐྱོང་ཁུལ་གསེར་རྟ་རྫོང་སྟག་རྩེད་ཡུལ་ཚོ་རྐང་ཚ་སྡེ་བར་སྐྱེས་ཤིང་། ཕ་མིང་ལ་བསོ་ལོ་དང་མ་མིང་ལ་མཚོ་སྐྱིད་ཟེར། ཁོང་མོ་དང་བཟའ་ཟླ་ཀརྨ་དབང་ཕྱུག་གཉིས་ཀར་བྱིས་པ་བུ་གཉིས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
